【莫家強】Nextera,係一隻能源公用股

好多朋友都問隻Nextera,我覺得未上車既朋友,已經可以買返。 Nextera,係一隻能源公用股,特別之處係過去40年,整體都係維持緊一個好平均既上升趨勢。當然,喺一啲股災入面,佢既股價都曾經大跌過。 呢樣就係我上堂所講,「喺股災,係連公用股都要走」。 但之後,佢既股價,每次都可以升返上嚟,40年間,每次既股災,佢好快都能夠克服。 長遠嚟講,佢可以做到年回報超過15%。咁梗係啦,你買啲非公用股,買得中,回報率可以高好多。不過,買公共股,我可以用你講,賺錢係一定會容易好多。揀邊樣,大家可以自己選擇。 Nextera,如果你係睇到好長,好長,其實我覺得你乜嘢位買佢,都OK。只係,有股災出現,你要識走。 但當然,短線嚟講,你可以喺一個靚啲既位入市,對回報都有幫助。 要更加穩陣,可以分散買3-8隻優質既公用股。喺美國,大把優質公用股,再適當地分散埋風險,贏面就會更高。 優質公用股,我個人認為係好好既投資。呢啲股,你係會敢好大注買落去,安心持有。鬥回報率,未必最高,但因為你敢買得大,實際回報,有機會多過你唔敢大注買既中細價股。 咁公用股有無壞處? 有。正常公用公司,係唔會可以賺取到暴利。就算間公司做得好好,你唔好諗佢既股價會可以爆升,機會唔大。所以,持有既過程會好悶。 但係,個人喺呢行既經驗,好多朋友會嫌呢類股票賺得慢,出去揾啲「賺得快啲」既股票。但到頭來,回報仲衰咗。 呢樣係值得大家諗。如果你睇返自己,過去一年係做唔到15%+回報,可能呢啲靚既公用股,都係你既選擇。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

Read more

【莫家強】對於香港既前景,我睇得好淡。

對於香港既前景,我睇得好淡。 但大家明白一點,香港股市有一個好怪既地方,就係好多股票,其實唔係好關香港事。所以,因為香港既情況而想造淡既話,要揾啱目標。 造淡目標,我會揾以下呢啲: 1) 香港局勢未轉壞前,股價已經處於下跌趨勢既股票。 2) 早前恒指反彈,都升唔起既股票。 3) 本身公司基本因素欠佳。 以上三點,如果中哂,就係造淡目標。 其實比東亞(0023)更適合既,有利豐(0494),但奈何,期權開價唔得,無得做。東亞,今日股價再破底,仲有無得跌?我相信機會好大。 東亞,暫時,恕我真係睇唔到有任何扭轉逆境既可能性。再者,以往有內地資金托市,都好明顯唔會流入去買東亞股票,照睇呢隻股,中長線造淡,贏面好高。用啱方法,計好風險,就放膽睇淡啦。 至於美股,蘋果,已經升去到264蚊。揸住,就繼續揸,貪心啲,我自己睇,有排都未到價。唔好問我目標價喺邊,有目標價只會令你更容易無端端揾位落車。總之,隻股一直升,就一直揸,到佢走勢轉差,先要走。到時,再update大家。 仲有朋友問:「未上車,仲可唔可以買?」 過咗咁耐,都仲係問緊呢個問題,其實我真係好難再俾意見。簡單講,蘋果係一隻好好既股票,中長線應該仲有排升,但買唔買,自己決定喇。 另外,都留意住Microsoft,解決埋「最後沽壓」,升勢有機會加快。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【莫家強】環球股市好強

  環球股市好強。 除咗美國既股市指數不斷破頂外,過去兩個星期,MSCI指數創出一年新高既地方,有加拿大、德國、法國、愛爾蘭、以色列、意大利、日本、荷蘭、俄羅斯、瑞士、台灣。 咁多個地方一齊升,有兩個啓示。第一,股市通常都先行於經濟,未來一兩年,整體環球經濟應該會相當唔錯。第二,環球股市咁大規模上升,牽涉好大量資金,唔會係走勢陷阱,呢次係真升,我認為可以放心買。 不過,唔係買乜都得。篇幅有限,主力講美股。 美股,無疑正處於牛市三期。我相信嚟緊既升市,應該可以維持到一年以上,但升完,個市就玩完,會進入熊市。而大家要知道多一樣嘢,牛市去到愈近尾段,上升股票既數目會減少。升到既強勢股,會升到你唔信,不過,同時亦會有好多股票跟唔到個市升。所以,大家要識得點樣去揀股,否則,個市就算升成點,都可以唔關你事。 其次,係要tune好心態。心態唔得,我俾你買中隻蘋果,都只係賺得十蚊八蚊,咁就無意思喇。識揀股,調節好可以贏大錢既心態,跟住策略做,有事識得落車,做足哂,咁我就睇唔到會有咩問題。未來一兩年,能夠贏大錢既機會好高。 >>>>>>>>>>>>>>>>>>>>>>>>>>>>>>>>>>>>>>> 另外,有朋友問,有咩股票可以受惠於5G?其實好多,但我想先講少少background。 5G既玩法係,先會鬥設備,到幾年後,戰線會改變,會轉為鬥product同service。 其實好簡單,首先你要有訊號,你連訊號都未有,玩咩5G?所以,要先做好5G 基建,鋪好哂嘢,先有得玩。但問題係,有訊號,淨係上網速度加快,有鬼用? 有5G訊號之後,我哋要既就係好玩既產品同服務。咁你問我,有咩股票好?最大路,咪就係蘋果囉。 或者,係日本既Sony。我講既,幾年後,Sony肯定會出到一啲好正既5G product。你有美股戶口,你都可以買到Sony既ADR股票,個code係SNE,最近又係創咗一年新高。 >>>>>>>>>>>>>>>>>>>>>>>>>>>>>>>>>>>>>>>>>> 至於香港,大家要有心理準備,距離主權評級被下調既日子,應該不遠。 喺香港,政府最大,你同佢意見不同,你就 “have no stake in the society,you have no say at all。” 但再推上去國際層面,國際評級機構,全世界最大既有兩間,一間係標普,一間係穆廸,佢哋要降你評級,港府甚至中央政府,都係no say。林鄭同唔同意都好,人哋根本唔使理你。 有咩影響?本來就無咩影響既。因為香港既財政,長久以來非常穩健,比內地甚至全球好多國家既財政,都仲要穩健好多。好多我哋見到既強國,包括美國,某程度上都係靠借錢,新債衾舊債嚟推動經濟增長。而香港,係唔使。呢樣嘢,絕對係香港政府咁多年嚟,一直努力將香港人既錢保管好既成果。我哋既前財政司司長,曾被特首同現任財政司司長話係「守財奴」,呢三個字聽落好似好負面,但其實,係對佢最好既稱讚。 現任既,你會信佢可以管好你啲錢?唔好玩啦。 香港既財政,唔會即刻冧,但持續惡化,將無可避免。不出十年,香港就會變成要靠借錢去應付支出,包括啲新基建,政府日常開支,都係要靠借錢嚟畀。 借錢,要講信用。有信用既人,借錢會容易好多,息率都會靚好多,呢個道理,去到政府層面都適用。 國際評級機構講到明,若港府唔能夠遵守對港人一國兩制既承諾,香港既評級就會被下調。評級一下調,借錢成本就會增加,你想新債衾舊債,就會行唔通。如果真係有人買咗啲政府年金,我想講,祝你好運。 恒生指數,短期內沽壓一定重,但要企穩再上,一啲都唔出奇。因為,要托高恒指,其實只要你買起十隻股票,就可以做到。但大部份其他股票,特別係本身質素差既股票,會有排跌。例如東亞(0023),有啲朋友用佢嚟做淡倉,已經賺咗幾次錢。唔好諗住佢跌咗咁多就會見底,佢同好多其他質素欠佳既股票一樣,好大可能會繼續跌,識策略,管理好風險,開淡倉贏面好高。 至於買股票,個人建議,真係轉買美股啦。辛苦賺返嚟既錢,絕對值得好好保護。我唔知大家仲有幾相信香港既股市?事實上,如果你係好叻既投資者,你喺港股,仲會有機會賺到錢。但如果你係想穩穩陣陣,揾一個安全既地方,揸住一啲優質股票,長遠增值,係咪仲買港股,你自己諗。 炒賣股票,係零和,甚至係負和遊戲。你要贏錢,就要有人輸錢畀你。咁有無得可以一齊贏錢?有。亦都好簡單,就係長期投資喺一啲持續賺錢既優質股票身上。根本,投資就應該係咁,公司有錢賺,分畀股東,所有人都分享到盈利。只係,近七、八年既香港股市,愈來愈扭曲。行返正路,賺錢會容易好多。 今日寫到呢到,希望所有香港人都平安。 放低咗市評兩日,唔好意思。有朋友提點,本份應該要做好,點樣都好,都要做好自己。你今日可能無嘢可以做到,但將來,你都要有能力,先可以幫到更多既人。香港人,共勉之。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【莫家強】Disney業績好,盤後有得升

今日有事做,不在office,早少少出post。 港股,睇情況啦。有好消息出現,但噚日指數喺高位企唔穩,其實唔係咁好。睇埋今日,睇兩樣嘢。1)升市,2)大市成交900億以上。 兩樣都做到,後市我睇好。之但一樣做唔到,都爭少少。睇吓個市表現成點,再跟進。 至於美股,我哋同學群組噚晚做隻Disney,做期權。Disney業績好,盤後有得升,今晚會有錢收。其實,如果你識玩美股,要識玩期權嘅話,機會真係有好多。 蘋果,上過260蚊,收市未能企穩,但都無所謂,照睇好快就會再升到上去。的確,大股之中,以蘋果最強,變相提少咗其他股票。 不過咁講,以前玩過嘅Mastercard、Visa、雅培,其實走勢都唔差。係時間再上車,會同大家講。 Nextera,終於等到佢跌。企穩再上,我覺得就可以買。 當然,唔想煩,可以買ETF。SPY,係最唔使煩嘅選擇。科技行業ETF,又係大路而有升值潛力嘅選擇,都值得大家留意。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。    

Read more

【莫家強】今日節目,講咗隻Sony

如果比較過去四日,大市早上既成交額,星期一有475億;星期二有486億;星期三有401億;今日,得384億,成交減少咗好多。 今朝上Now TV 做節目,我都講,做唔做Long Call既關鍵,係睇成交金額。 成交多,要衝破高位阻力,唔難。但成交不足,恒指可能最多升多少少,就會被頂住。如果係咁,Long Call就無勝算。不過,雖則係咁,但整體港股既情況都唔係咁差,有好多次,都係話俾你聽跌唔落。 暫時,後市走向,我仲要啲時間觀察,到有更明確睇法,再同大家講。 另外,今日節目,講咗隻Sony。 Sony 喺美國,以ADR 形式上市,個Code 係SNE。最近,突破咗2018年既高位。節目入面,教咗大家點買。如果可以消除埋最後既沽壓,就會變成萬里長空,之後可以繼續再升既機會好大。 有興趣既朋友,可以留意。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【莫家強】揀股票嚟買,一定要揀強勢股

港股,純粹睇指數,一啲都唔弱。朝早,曾經跌過,但大概9:45am已經能夠企穩,執筆之時,指數已經倒升。不過,下跌股票數目仍然遠超上升股票。 呢個就港股現時既情況。有部份股票係強既,但大部份都仲係好弱,所以揀股票嚟買,一定要揀強勢股。 >>>>>>>>>>>>>>>>>>>>>>>>>>>>> 至於美股部份,今日有少少唔同。點唔同呢? 我想介紹一隻ETF畀大家,個code 係CHIH,但呢隻ETF,主要都係買港股入面既醫藥股,最大成份股分別係1093、1177、2269。 無架,如果你有一隻心水既醫藥股,當然你可以直接喺香港買。但如果你係睇好成個醫藥板塊,但又唔知揀邊隻最好,又或者想買多幾隻分散風險,咁你既另外一個選擇,就係走去美國股市,買ETF。 有咩好處?美股係以一股做單位,入場費極低。而且,如果你想分段買,或者分段沽貨,美股都會靈活好多。 而港股最大既問題,就係呢啲產品,自己都唔做好,反而喺美國股市仲做得好過你。所以我哋既港交所,真係走失咗好多生意。 呢隻ETF,鍾意香港醫藥股既朋友,絕對值得留意。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

Read more

【莫家強】完全係典型既托市格

港股既情況好簡單,就係托大股,沽細股。一睇幅「市場熱圖」,成件事就會好清楚,左邊既大股升,右邊既細股跌,完全係典型既托市格。 托市,唔一定代表個市就快會跌。相反,如果啲大戶仲有好多貨要沽,指數可能仲會平穩向上多一段長時間。不過,就切記唔好「追落後」。你走去買啲落後股,就即係幫啲大戶,接哂佢哋唔想要既劣質股票。總之就係,買,就買強勢股。 至於美股,經常都係提住隻蘋果,無辦法,大股之中,暫時真係以佢最強。但無所謂,現階段就繼續享受住蘋果既升幅先,到之後情況有變,先再轉其他。到時,再update。 期權方面,港、美都一樣,記住,Long Call係要做喺一啲可以「大升」既股票之上。微升既股票,你做Long Call唔會有用,但只要隻股票可以大升,咁期權內既槓桿就會將你既回報倍大。 咁咩為之「大升」? 複雜既講法,視乎引伸波幅高低,隻隻股票都唔同。簡單既講法,最低限度一個月要升到10%以上啦。如果你連隻股票升10%都無信心,就唔好Long Call喇。 總括而言,近期,唔同地區既股市都係睇升架喇,淡倉,完全唔會考慮。要開淡倉,就留意住有邊啲股票,連個市咁好都升唔起,到個市升幅中止,呢啲就係我哋開淡倉既目標。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

Read more

【莫家強】最近創咗一年新高既地方

  一直都講,環球經濟好好。如果唔好,就唔會有咁多股市升。 美股,當然已再度轉強。再講MSCI指數,最近創咗一年新高既地方,也括法國、意大利、日本、荷蘭、俄羅斯、瑞士、台灣。好多地方既股市,其實走勢都好靚。 我唔會睇少嚟緊有機會出現既環球股市升浪。特別係一啲最強勢既股市,未來12個月,可能會升到你唔信。但係,上星期講過,唔好期待會雞犬皆升。事實上,係應該只會有一少部份股票能夠大升,但只要你揀得中呢啲股票,回報肯定會非常理想。 >>>>>>>>>>>>>>>>>>>>>> 蘋果,講咗好耐,大股之中,最睇好既係佢。我知道好多朋友都已經上咗車。策略,好簡單。只要隻股一直升,就要放膽去揸。 切記,唔好明明已經揾到隻好股,但都只係賺雞碎咁多就落車。唔改好呢樣嘢,畀隻幾好既股票你都無用。 蘋果,不經不覺,股價已經上到去255蚊以上。我自己睇,中長線有排都未升完。 有朋友問我股價睇幾多。 我無呢啲專欄式既目標價提供。但反而,我想大家明白一個concept。一隻有盈利前景,賺既錢會愈來愈多既股票,佢既目標價係會不斷提高。你硬係要set個目標價,其實無意思,最多只係會增加你落錯車既機會率。 無架,隻股一直升,咪一直揸囉。到時,去到高位,股價走勢轉弱,咪食餬走囉。但係,如果情況順利的話,蘋果股價既大漲小回格局,係有機會維持一兩年以上。總之,跟住策略做,如果分析正確,呢一兩年,大家可以賺到既回報,就會相當理想。 最後,值得一提,恒指升幅唔錯,但東亞銀行(0023)既股價仲要下跌。 點解成日要講住隻東亞銀行?就係要話俾大家知,如果你係揀咗隻衰股、弱勢股,個市升,係可以唔關你事。 學返好啲concept、tune返好你既心態、留意返你應該留意既股票,跟返好策略,只要你每樣嘢都做返好,你既投資回報就會反映。 暫時寫到呢度,如有特別情況,再同大家講。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

Read more

【莫家強】我想講情況偏偏相反

成日都有專家話環球經濟好差。 但如果真係咁差,應該周圍既股市都跌啦。但我想講,情況偏偏相反。 美股,唔使講,已再次轉強。另外,意大利、日本、瑞士、法國、台灣、俄羅斯既MSCI 指數,都創咗一年新高。 大家可以自己上網睇吓。睇過,你就會知道,其實環球經濟好強。 好喇,以下再講我對後市既睇法。 1) 美股,毫無疑問處於牛市三期。 2) 「上帝要你滅亡,必先令你瘋狂」,牛市完結前,通常都會有一段好急勁既升浪。 3) 但牛市尾段,唔會係乜股票都升。 4) 會係只有少數股票上升,但呢啲股係會升到癲哂。 5) 美股業績大部份都唔錯,都唔係每一隻業績好既股票,表現都好,某程度上應驗咗上一點。 6) 所以,大家買股,一定要買強勢股。 你明白我呢啲睇法,你就會明白,點解我會叫大家買貨;點解叫大家,如果隻股票升,要貪心啲,一直揸落去;亦點解,跌既股票,一定要止蝕。 美股牛市,我相信仲未玩完。不過,2年內,應該會完。 如果你問我exactly 幾時完,我真係答唔到你。不過,歷史就係會不斷重演,每次牛熊既走勢,都唔會完全一樣,但大概,都會係嗰個樣。當你花過心機去研究過往既走勢,嚟緊會發生既事,其實你會大概有個模樣。餘下既,就只要係跟住個策略去做。呢啲,就係我相信既嘢。 咁港股呢?港股既問題係,連一個完整既牛一、牛二都無,你唔使諗會有個健全既牛三。 點解港股會無咗個牛市?制度問題。大概係七、八年前,明顯地,制度開始崩壞。淨係我大家一個問題,過去八年,有邊隻嚟上市既股票,質素係好?你會數到幾多隻? 港股,唔係無好股票,但比例愈來愈少。如果你係高手,都一定會有機會贏,但大部份普通投資者,輸面好高。 以上既睇法,大家可以思考吓。 最後就係,都有人問,蘋果仲未上車,仲買唔買得? 中長線,我相信有排都未升完。最理想,當然係240蚊樓下買到啦,但佢會唔會跌,就唔知喇。如果你識得用期權,就會有多啲方法做,優勢更大。 不過,無論如何,一隻好股票,你量力而為咁去買,又有耐性睇長線,萬一跌,你又肯走,我睇唔到有太大風險。計好數,就買啦。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【莫家強】今日集中講蘋果

我知有好多朋友都揸咗,今日,就集中講蘋果。 首先,我哋要明白,蘋果係一間正在轉型既公司。以往,佢既增長動力,主要係來自iPhone既銷售增長同埋提升售價。 但係,根本佢哋既管理層一早都睇到,呢條路已經行到尾聲,再行落去,蘋果唔會有前途。所以,佢哋做咗好多嘢,去為公司尋找新既增長動力。 好喇,因此睇業績,唔好再將重點放喺iPhone度。但咁要睇啲咩? 上堂嗰陣我都講過,唔好用倒後鏡去睇公司前景。要睇一隻股票,重點係睇佢既「動力火車頭」夠唔夠力。 蘋果既火車頭,我認為,非常夠力。 其中,Airpods既銷量,係所有無線耳機之中,排名第一。而呢樣嘢,好重要。 無線耳機市場,大家睇返啲數據,增長得好快。而無線耳機本身,會係喺5G時代入面,其中一樣最重要既產品。將來啲無線耳機可以做到既嘢,一定唔止依家咁。 而蘋果,已經喺呢個市場入面,佔據咗一個有利位置,對佢未來既發展,好有幫助。 幫啲咩? 真正可以令蘋果股價長久上升既動力,來自訂閱服務。即係,一訂咗,就要每個月或每年畀錢既服務。同一個product or service,只要可以轉成呢種收費模式,對公司既得益就會增加。 而蘋果,係推展呢樣嘢,做得相當出色。從佢哋既銷售模式,大家可以睇到,佢喺sell 產品既同時,其實係做咗好多嘢,將大家引入佢哋呢個盈利模式當中,令我哋會定期畀錢佢賺。如果你係果粉,你應該明我講咩。 對於蘋果公司既長遠前景,我非常睇好。 再者,就係全球唔少地區既股市,走勢都好好。美股之外,日本、台灣、意大利等等既MSCI指數,都喺今年高位。成日聽啲專家講話環球經濟好差,真係差既話,就唔會咁多股市都破頂。 無架,最重要就係,順勢而行。你揸到隻好股,下一步最重要既就係,隻股一直升,你要有決心一直揸落去,咁個回報先會好。蘋果,中長線嚟講,遠遠都未到價。唔好問我目標價喺邊,因為一間有盈利前景既公司,佢既目標價係會隨時間不斷上調。 如果情況不變,借股神畢菲特既一句說話, “Our favorite holding period is forever.” 買到一隻好股,唔好咁容易放走佢。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。    

Read more

本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室