【莫家強】有朋友問小米點睇?

有朋友問小米點睇? 呢隻股,生意做得好唔好,都係其次。因為,就算佢生意做得好,你諗住佢既股價就會上升?Sorry,你可能諗多咗。 就算一間公司有錢賺,佢既管理層,要唔想同投資者分享利益,有好多方法。最肉酸既,就係運用財技,自己分錢畀自己。無咁明顯既,例如只要佢喺一啲業務上,自己「揾人」做返supplier,收貴自己,咁啲利潤就好容易可以去到自己想去既地方。 講返小米,公司做到成績,分花紅畀員工,唔係壞事。但你喺隻股票跌成咁既時侯,仲分錢,就唔係太講得通。仲要係,收錢既主要只係特定既380個員工,合共分咗1.63億人民幣,咁既做法,我就得覺得真係相當肉酸。 要避開呢啲股票,畀兩個方向大家留意。第一,睇派息。 派息係對投資者最實在既回報,因為呢啲錢真係真金白銀派入投資者既袋。一隻長期做到穩定派息既股票,古惑嘢會少好多。 第二,長期股價走勢。一隻好股票,係唔會長期下跌。同樣地,一隻長期下跌既股票,都好少係好股票。 特別係,喺現今資訊咁發達既時代,你要博佢係「滄海遺珠」,無人知佢好,得你知佢好,機會唔大。 正正經經買一啲生意做得好,管理層有誠信,股價又長期向上既股票,賺錢會容易好多。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。      

Read more

【莫家強】企後一步,睇返件事

咁講真,我明白,好多朋友都會覺得揸蘋果、Microsoft「回報好慢」。比著舊陣時既我,都會咁諗。 不過,有啲時候,我哋都真係要識得跳出嚟,企後一步,睇返件事。 你嫌回報慢,但你又係咪真係賺得比我多先? 當然,一定會有人賺得比我多。但唔會係多數人囉。大部份玩港股既投資者,唔好話要鬥賺得多,過去半年,真係唔使輸都已經偷笑。咁講真,大家睇吓幅恒指既走勢圖,就會明白,過去半年,恒指既走勢根本上就係亂七八糟。你仲話要估佢升跌?點估? >>>>>>>>>>>>>>>>>>>>>>>>>>>>>>>>>>>>>>>>> 早前都有朋友問我:「點解見你好似已經淨係玩美股?」 好簡單,我同大家一樣,都係睇住回報做人。邊度賺到錢,就玩邊度。你見我玩美股,好似好容易。講真,真係唔難,當你識得個方法,花一啲時間去做功課,回報就自然唔錯。 玩港股,我都有玩少少,因為點都要keep住個感覺,但我想講,真係完全係兩回事。 比較易玩,咪東亞、中鐵嗰啲囉。不過,唔係買,而係用嚟造淡。兩隻股票,照睇,好快又會再破底。 >>>>>>>>>>>>>>>>>>>>>>>>>>>>>>>>>>>>>>>>> 上堂時,耐唔耐都會有朋友同我講:「美股我未玩過喎,唔識玩。」 我真係會好直咁講,唔識玩,咪學囉。 最重要係,美國好多股票,質素真係比港股好好多。幾年後,你係可以睇到間公司可以發展成點。 淨係講蘋果,當5G開始盛行,你會預計到佢真係會變成你生活既一部份。打機、睇戲、聽音樂、揸車、開會、開燈、開冷氣、食飯畀錢,樣樣佢都賺到你錢。 當你能夠揾到十隻呢啲前景亮麗既股票,適當地分散投資,再萬一出現股災,你又識避既話,點會唔贏? 我既投資就係咁簡單,由揀好股票開始,再做好個投資策略。今年玩美股既成績唔錯,明年,我相信會更好。 美股既睇法,我之前都分享過。如果同我睇法相同既,咁就真係要認真諗吓,呢個牛三最後階段,要點樣去部署策略。 最後,講座報咗名既朋友,聽日見。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【莫家強】回報梗係做得唔靚

喺我認識既朋友當中,好多時,大家面對既最大問題,並非話唔知要買咩股票。 事實上,你上網,只要你識得揾啲真係有質素既分析員,佢哋就會話到畀你知,有邊啲股票應該買,邊啲股票唔應該買。 但咁最大問題係咩? 係有啲朋友捉到鹿都唔識脫角。 明明已經揀中隻好股票,但最後就只係賺得雞碎咁多。咁樣,回報梗係做得唔靚。 >>>>>>>>>>>>>>>>>>>>>>>>>>>>>>>>>>> 有朋友都同我講過,睇你網頁,好似成日都淨係講嗰幾隻股票。 係架。因為,我相信咁樣先係最容易,能夠令大家可以賺到錢。 例如係之前既Visa、Mastercard,依家既蘋果、Microsoft,呢啲都係一啲我最睇好,而又好穩陣既股票。 Visa、Mastercard,我知有唔少朋友都跟咗我買,而且仲係揸咗幾個月以上。買過既就會記得,我當時都係不斷同大家講,「隻股票升,就要繼續揸」。 有跟住玩既朋友,嗰次都賺得相當唔錯。 其實蘋果、Microsoft都係,跟住玩既朋友,我相信下年我哋會有好大機會,可以再次賺到好理想既回報。 我買股票既理念其實好簡單,我相信,只要你買到一隻好股票,之後你真係無必要再轉嚟轉去。總之隻股票一路升,你就一路持有,咁你既回報就已經會好好。 而且,呢種玩法既另一好處,就係所有參與者,都可以一齊贏錢。因為,呢個已經唔係一個「零和」既遊戲,係一個可以俾所有人一齊贏錢既真正投資方法。 >>>>>>>>>>>>>>>>>>>>>>>>>>>>>>>>>> 下年,我睇美股會升得好勁,升完,就有機會變為熊市。 應落好似好驚? 但有聽過我詳細分析既朋友,就應該會知道點解我就話:「更加要睇升。」 堂上,我會同大家分享我既部署方法。 熊市,其實唔難避。 要避開熊市,今日起你要做到一樣嘢,就係要避免將來會出現一種fear of missing out既感覺。即係話,個市升到高位既時候,你先覺得自己賺得太少。 低位一路無貨,高位先覺得自己賺得少既人,係最容易會喺熊市輸大錢。 相反,一路升,一路都賺得唔錯既朋友,到時你只要肯係高位回落時收割,熊市蝕大錢既風險就會大減。 星期六既講座,我會再講多啲。報咗名既朋友,到時見。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【莫家強】有無朋友揾過你夾錢做生意?

我唔知大家有無朋友揾過你夾錢做生意? 有的話,你考慮是否應承,會因為乜嘢因素? 會唔會諗你朋友係咪信得過?會唔會睇佢過往做生意既往績?會唔會真係睇吓盤生意有無得做? 樣樣都無問題,咪夾囉,夾多少少都無問題。 但係,如果個朋友都唔係好信得過,盤生意你又睇唔通,你又會唔會夾錢先? 問題就係咁。如果你係用「夾份做生意」既心態去投資股票,其實好自然,你就會有個心去揀好既股票嚟買。 識唔識揀,係另一回事,但起碼你會嘗試去揀啲好既股票。 但偏偏,香港咁多年來既投資教育,就係刻意將呢啲股票模糊成為一啲「冧把」,扭曲哂大家既投資概念。 升既股票,就話貴,唔好買,叫你去買啲跌既股票。一隻衰既股票,跌價一成,就會有專家同你講「價值顯現」,叫你去買。最衰,甚至係有啲明顯係呃人既公司,只要包裝得好,都會有人願意成幅身家買落去。 呢啲遊戲,拆穿,就係少數人做出嚟,想贏大家錢既玩意。你係高手,贏到錢,無問題,你咪去玩囉。但大部份投資者,如果你唔自覺被人帶咗入呢啲遊戲裡面,長遠,其實你會輸多贏少。 想賺錢容易,就要買返一啲好既股票,將自己帶返入一個可以全部人一齊贏錢既遊戲。 對於班上既同學,我既建議好簡單,分散買入3至8隻好既股票,長線贏面就會好高。風險得到分散,你亦會揸得好舒服。只要呢啲公司繼續可以賺到錢,你作為投資者,就可以分享到利潤。賺錢,就係咁簡單。 如果你之前既投資成績一直都唔好,係時候要諗吓,你既投資出現咗啲咩問題。 最後,美股我一直都話,將會出現牛三最後升浪,2020年,我相信個市好大機會係會升到癲哂,但升完就無架喇。如果你睇法相同既話,呢個機會,就要諗吓可以點樣把握。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【莫家強】蘋果、Microsoft,繼續走強

蘋果、Microsoft,繼續走強。另外,上星期如果有攞文章,你會睇到隻Adobe,呢隻股既走勢都好靚,近期升勢基本上無停步,一直咁升。 講講Adobe。 大家對佢最熟識既產品,可能係Adobe Acrobat,即係睇pdf既程式,又或者係Photoshop。但除此之外,佢哋既製作影片軟片 Adobe Premiere Pro,好多商業級既製作都會用到。 Adobe,可以講,係喺佢既範疇入面,一間好top 既軟件公司。 但點解我會鍾意呢隻股票。其中一個主因,係佢有好多既軟件,你係唔可以買斷,你要用,就要最個月或者每年keep 住畀錢。 你可能會諗,咁有咩咁緊要? 上堂教過,一間公司,點樣收錢,係可以決定佢既存亡,或者係盈利增長既前景。 你諗吓就會明白。如果佢既軟件,係可以畀一次錢,就用一世,咁佢今年收咗你錢之後,下年賺咩?佢咪要每年都繼續sell你,不斷推出啲update,希望你會轉用新既版本。但係,你會唔會咁易轉先? 仲有,要做呢啲跑數式既sales,又或者marketing,其實好貴。就算賣到貨,支出都好大,會影響公司利潤。 但假如,佢已經令你autopay,每月或每年定期畀錢佢,情況就會唔同。 基本上,佢已經唔使再sell你,只要佢繼續做好售後支援,你用得開心,就會繼續畀錢。維持舊客,永遠都比揾新客花費更少,呢個係做生意既金科玉律。 唔使再成日煩揾新客,只要做好自己,客戶基礎就會好自然地不斷增長,咁公司既經營前景,就會更平坦、亮麗。一隻股票,股價能夠長久平穩上升,唔係無原因。 事實上,我自己都係,會好主力投資喺呢啲公司身上。你都識揾呢啲股票既話,中長線而言,佢哋會為你帶嚟好好既回報。 投資股票,賺錢其實唔難,只要你識得分辨邊啲係有前景既公司。 提一提大家,上星期既講座,改咗去今晚,我會講更多買美股投資既重點。報咗名既朋友,今晚見。 另外,星期六有加場,今年最後一次,有興趣可於以下連結報名。    

Read more

【莫家強】近期破頂既行業ETF,有邊幾個?

今日講下美股既強勢行業。 睇美股有咩強勢行業,最簡單係睇行業ETF。我自己做功課,都成日會睇呢樣嘢。見到啲咩強勢行業,想穩陣既,可以自接買ETF。又或者,喺ETF入面,揀啲最好既股票嚟買。 要揾美股ETF既資料,非常容易。有好多網站,可以免費俾大家揾到資料。 好喇,近期破頂既行業ETF,有邊幾個? Technology、Healthcare同Financial。而較適合中長線投資既,我會揀前兩個行業,即係科技、健康護理。 Technology + Healthcare,長線真係無得輸。 ETF 有咩好處同唔好處? 先講唔好處。慢。 ETF 既股價上落,通常較細。除非你揀啲有3倍槓桿既ETF。但呢啲ETF,又唔適合長揸。有機會再同大家講。 但對於長線投資者嚟講,ETF係非常好既投資。首先,佢會幫你分散到風險。而且,就算都唔識揀股票都無問題,只要個行業得,你就會賺到錢。 如果你想買啲Tech ETF,我會建議你揀啲持有Apple、Microsoft 同Google既選擇,呢三隻大股,都好強。 另外,留意Nasdaq,破頂可追。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【莫家強】今日有隻股票跌咗97.94%

噚日上堂都講,你喺港股,要揾一隻長期下跌既股票,根本非常容易。事實上,喺香港既股市入面,好多股票既質素都極差。 本身我自己係完全唔會玩啲莊家股。如果唔係有朋友同我講,我都唔知今日有隻股票跌咗97.94%,基本上已經同total loss無分別。 喺香港,實在有太多只係識攪財技,而無實業支持既股票。不過好彩,呢啲股票,完全係有樣睇。玩唔玩,你可以自己決定。 但係,就算唔講到呢啲莊家股,其實喺港股入面,有好多其他股票,你預咗中長線點都會繼續下跌。中鐵(0390)再度破底、東亞(0023)都差唔多,呢啲股票,絕對係睇淡好過睇好。有期權做嗰啲,大家自己揾吓機會。 至於美股,大家預計短期可能會有啲震盪。但呢個時候,最重要就係留意住,有邊啲股票可以喺跌市中抗跌,甚至係逆市上升。呢啲,通常都之後個市好返,都會升得好靚。 之前隻蘋果,就係咁樣揾出嚟。 而從近日既觀察,Visa 同Mastercard 有再度轉強跡象,如果兩隻股再喺跌市中表現對辦,後市走勢我會睇得更樂觀。 另外,Nextera呢類公用股,往往喺跌市中表現更佳,股價破頂再上,都絕對唔出奇。 但今晚美股既表現,我覺得好重要。 最好既情況,係有壞消息而不跌反升,咁後市我會睇得更好。相反,今晚如果升唔起,可能代表大市短期表現會較差,多貨既,可以減一減磅。 今晚再update大家。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【莫家強】Money is made by sitting, not trading.

Money is made by sitting, not trading. 蘋果,不經不覺,已經升至267蚊。Microsoft,都上到150蚊。 仲有無得升?我相信,中長線嚟講,仲有排升。揸住呢兩隻股票既朋友,我既建議係,繼續揸住。 點解咁有信心?原因好簡單,因為呢兩隻都係好好既股票。兩間公司,都具備盈利長線增長前景,而且,管理層都具備誠信,因此,股價能夠繼續上升,一啲都唔出奇。 買到呢啲股票,就唔咁易放走佢。長遠嚟講,佢哋會為你帶嚟好好既回報。 又睇吓隻東亞(0023)。今日恒指雖然繼續上升,但東亞仲要逆市下跌。嚟緊,股價會再跌穿底既機會,我相信好大。 睇咗我短評一段時間既朋友,應該會好清楚,點解我會叫大家揸強勢股,沽弱勢股。 最初,叫你買隻將近破頂既蘋果,你可能都會嫌貴,唔係好敢買。但如果你最後信我買咗,而又聽我講一路揸到今日,你應該會明白我一路都講既嘢。 買股票,唔好怕貴,唔好貪平。好既股票,唔會長期平賣俾你。如果你係貪平去買股票,你就唔會買到蘋果,你會買咗東亞,而你既投資回報就會反映返你呢個諗法。 所以,如果你之前既投資回報一直都唔理想,係時候,由最根本去改。 之前一直講,美股有機會行牛三最後升浪,大家都感覺到,機會好大。如果把握到,未來12個月,回報將會非常理想。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【莫家強】恒生指數,走勢唔差

先講港股。 一直都講,恒生指數,走勢唔差。要托起恒生指數,其實好容易,只要買起十隻股票已能做到。呢一樣嘢,內地大戶要做,根本唔難做到。而且,恒指內既最大權重股,好多從事既業務,都同香港無乜關係。所以,因為香港既前景而造淡恒指,絕對係捉錯用神。 所以,你想造淡的話,要揾啱股票。東亞(0023)係其中一隻。恒指,升逾300點,但執筆之時,東亞只能輕微上升0.33%。 如果指數再升,呢隻股可能仲可以升多少少。但升完,會再破底既機會仍大。 上星期都出過一個post,講點樣揀股票造淡,有興趣可以揾返。 美股,好強,好強。 蘋果,一路逐步上升,上星期五收市,已升至265.76蚊。呢隻股講咗好耐,我知有唔少朋友,係由230蚊左右揸上嚟,我俾意見係,繼續揸。呢隻係一隻好好既股票,唔好浪費佢,唔好賺少少就走。 你買中咗一隻好既股票之後,最好就係乜都唔好做,一路揸落去。 另外一隻,係Microsoft。策略一樣,上咗車,就要揸穩,唔好賺少少就落車。佢同蘋果一樣,都係質素極好既股票,中長線嚟講,我相信有排升。 最後一個少少建議。 如果你過往炒股票,成績一直唔好,我話你知個原因。 炒股票,係一個「零和」,甚至係「負和」既遊戲。你要贏錢,就一定要有人輸錢畀你。而且,通常都係好少人贏,好多人輸,所以除非你係技術好好既炒家,否則,會輸多贏少。 但你亦可以揀一個可以全部人賺錢既遊戲。 你只要,唔好再炒出炒入,專心揾一啲好既公司作長線投資,呢種玩法,就有可以令所有人同時賺錢,你賺錢既機會就會增加,而且,回報好可能比你炒出炒入仲賺得多。 買好公司,分享盈利成果,呢個亦根本係最正路、投資股票本身既原意。  

Read more

【莫家強】美股咁大規模既升市,唔會係走勢陷阱

一直都話,環球股市好好。美股,以至好多其他地方既股市,都升得好靚。咁大規模既升市,唔會係走勢陷阱,係真升。但問題係,我哋要識得點樣揀啱股票買。 General rule,永遠都係,強者愈強,揀最強既股市,入面最強既股票,贏面就會高。 >>>>>>>>>>>>>>>>> 蘋果,升到咁上下,開始有少少整固跡象。唔係壞事,整固完可以再上,留意住佢既走勢。呢隻股票,有極好既盈利前景支持,我相信,中長線而言,佢有排都未升完,揸住既可以繼續揸,情況有變再update大家。 但應該愈來愈多朋友睇到,點解我成日都叫大家,有靚股票一定要「繼續揸住」。上年至今年上半年既Visa、Mastercard,同埋今次既蘋果都係一樣,你贏唔贏到大錢,重點係你有無學識點樣揸股票。出面既「主流」玩法,會教你set個止賺錢位,賺少少,就食餬走,之後再換另一隻股票,換嚟換去,但咁樣,缺點係,即使俾你買到隻最好既股票,你都肯定唔會賺得多錢。 好股票,買咗,唔好成日換,簡簡單單長線持有,回報可能比你炒出炒入更要理想。去到投資美股,有咁多優質、公正既股票,仲係咪要炒出炒入,大家可以自己諗吓。 >>>>>>>>>>>>>>>>>> 另一隻,大股之中最強勢既股票,有Microsoft。 Microsoft 早前奪得國防部雲端合約,阿馬遜不服,提出訴訟抗議,有朋友問會唔會對Microsoft 有影響? 呢樣正正就係我成日所講,唔好淨係睇個消息,真正要睇既,係股價對消息既反應。 對Microsoft嚟講,呢個肯定係壞消息。但其中一個我喺課堂上教既技巧就係,如果一隻股票,佢既股價可以喺壞消息中上升,呢隻股,中長線可以再升既機會好大。大家又可以即管睇下Microsoft之後既表現。 明晚有免費講座,我會分享更多技巧。報咗名既朋友,如無意外,聽晚7:30見。但無論如何,注意好安全,揾錢重要,安全更加重要。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室