【莫家強】相對於港股,美股正氣好多。

呢句說話,最初唔係我講,係一位我股票班既同學講既。但「正氣」呢兩個字,正正就係我心底內美股同港股既最關鍵分別。 喺恒指早前上升既時候,我一路都講,指數雖升,但下跌股票既數目一直偏高,大戶明顯係想挾高個市嚟散貨。再者,我哋會睇到,好多股票之所以大升,原來係因為啲公司想喺高位「抽水」。你睇,連騰訊都係咁,點攪? 一散完貨,一抽完水,任務完成,你就會睇到成個市跌起上嚟係可以全無承托,恒指成份股可以係全數下跌,試問咁樣既股市,我哋作為普通投資者,點會有信心? 熟識我既朋友都知,我一早已經無再點玩港股,轉哂去玩美股。而我好慶幸,我係做咗呢個決定。 講上升,美股比港股升得仲多,升得仲耐,但你係唔會睇到啲大戶急住散貨,啲大公司急住抽水,呢個就係兩地股市最大既分別。 港股大跌咗兩日,但睇返美股期貨,呢一刻只係較上週五微跌少少,你揸住美股,根本無必要驚。 玩美股,事實上,你只要真係做好股票研究,學好期權,要贏錢根本唔係難事。 好喇,講吓美股部署。 我暫時仲睇唔到有任何要睇淡美股既原因,美股,會繼續睇好。 有四隻股票,我知道大家特別鍾意,分別係Apple、Microsoft、Mastercard、Visa。 後兩隻,大概係三個星期前叫大家可以再買,近日升勢有加速跡象,只要升勢仍在,謹記要繼續揸穩。咁多個月橫行後,一破頂,我自己係會有啲期望。Long Call,識玩就自己睇位玩啦,呢度唔講咁多。 總之,升要繼續睇好,跌先走。有特別嘢再update大家。 Apple、Microsoft 仍然強勢。總括四隻股票,都係基本因素極好既股票,只要個市繼續上升,四隻我都無乜高位目標價,繼續升,就放膽揸上去。 但記住「有信心,不過唔好盲目。」 如果美股他日走勢轉差,呢啲股票轉跌,全部都要走人。下一次既美股調整,跌幅可以好深,唔好輕視。總之,四個字,順勢而行。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

Read more

【莫家強】美股個勢咁勁,梗係升啦

講完港股,都講吓美股。 兩個月前,呢度出過一篇文章,題目為「5隻升勢最穩定的美國藍籌股」。如今睇返,5隻股票,全數上升。 當然,你可能會諗美股個勢咁勁,梗係升啦。 但有樣嘢我想講。 點解美股會咁勁,升咗十年都仲有得升? 短期嘅升勢可以係受資金推動,但一個長達十年嘅升勢呢?如果唔係啲藍籌公司有質素,能夠不斷創造價值,為投資者賺錢,個市又直係可以升到咁耐?係個市勁令啲股票升,或係啲股票好令個市升? 你嘅次序,會決定你揀啲咩股票嚟買。 例如蘋果股票,喺我認識嘅朋友入面,我問佢哋:「呢隻係咪一隻好股票?」 基本上,個個都會話係好。咁當然,都有好多朋友有跟住買,並且揸到依家。但喺無買嘅朋友當中,唔買嘅最大嘅原因就係「升咗咁多」。 「升咗咁多,所以上升空間就有限」,好多朋友都有呢個諗法,我絕對明白。 因為,喺我投資回報做得最差嗰幾年,就係有呢個諗法。好嘅股票,唔買,買哂啲衰嘅股票,講真,咁點會有運行? 2019年,如果你已經落失咗一年嘅機會,2020年,係時候要改變你嘅諗法。 升咗咁多,驚無上升空間? 我咁睇,我寧願睇衰啲無上升過嘅劣質股,都唔會睇死一啲持續上升嘅優質股。蘋果對TVB,一隻長升,一隻長跌,你買邊隻股票係你嘅選擇。但你揀邊隻股票,今年,你就會得到相應嘅回報。 美股好強,我會繼續睇好,直至佢轉弱為止。當然,我成日都話要順勢而成,任何一隻股票如果確認轉跌,我都會走。但就謹記,啲股票升得好地地,就唔好成日諗佢幾時會跌。 愈諗,只會令你愈賺唔到錢。 AAPL,畀咗個止賺位大家,但跌到先算啦。無特別事發生,要佢跌落止賺位,都唔係易事。總之,唔到價,佢繼續升,就繼續揸。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

Read more

【莫家強】全部都係過去三年升勢最穩定既股票

以下兩份名單,一份唔癲(A),一份癲(B),全部都係過去三年升勢最穩定既股票。但重要嘢先講三次。 呢個絕非買入建議! 呢個絕非買入建議! 呢個絕非買入建議! 咁要買,可以點? 一係你本身已經識玩,知應該幾時買,幾時走。一係,如果你有邊隻股票想買既,你可以打電話去財經節目,問你信得過既專家意見。 玩呢啲股票有幾個好處: 1) 贏錢機會較大。 2) 升起上嚟,持續時間較長。 3) 一旦轉勢,會好覺眼,正常情況下,你肯走一定走到。 咁有突然停牌或單日跌八成風險既股票,買之前要小心考慮。 好,去名單。 A(9隻): 0003 0270 0548 0914 1109 2020 2313 2319 2331 B(9隻): 0826 0960 1268 1579 1858 2588 2669 2688 2869 最後,都係嗰句,美股選擇多好多。但港股,升起上嚟快啲,又係真既。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

Read more

【莫家強】美國既投資者重視業績

先講美股業績期。 美股,每季都會出業績。我以前就曾經無知地以為「一年出四次既業績應該無乜嘢啦」,點知就中招。 美國既投資者重視業績既程度,遠高於香港。一隻中價股,一個理想既季績,可以令股票即時彈升2成以上。相反,一個唔理想既業績,都可以股價下挫兩成以上。 至於最大型既股票,以我既觀察,大概都可以上落4-8%左右。而有留意開期權價格既朋友,你就睇到喺業績公佈前,啲短期既期權,引伸波幅一般都會明顯抽高,到業績公佈後就會回落。所以業績前,如果你有啲心水股票想低位接貨,其實都可以試吓做Short Put,個價會靚好多。當然,風險都會高少少啦。 唔想太受業績影響,我既建議好簡單,學好點玩ETF。 另外就係,中美簽完首階段協議,美股繼續升,到收市後期貨升幅仲再加大,但港股就升幅收窄,強弱之別,其實已經係一個訊號。 睇多一兩日,如果港股未能再次轉強,就要小心。 其實無論港美股票都好,順勢而行啦,估到咁細有時點估得準,但總之你成套策略已經喺哂度,咪等個市話俾你聽點做囉。 最後,蘋果有好輕微既減弱跡象,咁未必係真既,但俾個位大家,跌穿293蚊止賺,唔跌到就繼續揸。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【莫家強】似唔似短期見頂?

有朋友問:「似唔似短期見頂?」 預測既嘢,就無謂講喇,我又無水晶球。但我既部署係點,會睇啲咩因素做買賣決定,就可以同大家分享。 第一樣嘢,睇市場對消息既反應。 近日股市走勢轉弱,某程度上都係因為對中美貿易前景不明。咁講,有隱憂,個市跌少少,又真係唔代表啲咩。 但點樣先會係有啲嘢代表呢? 例如,可以係中美簽完協議之後,有好消息傳出,但個市不升反跌。又或者,有壞消息傳出,卻好快企穩反彈,甚至跌都唔跌繼續升,咁就係有意思既訊號喇。 應跌唔跌屬利好,應升唔升屬利淡,等有再實質啲既消息出現,我再詳細講。 第二樣嘢,有跡象出現大跌,我會好果斷減持股票。 咁有時個市真係會因壞消息而跌。如果跌幅唔大,又或者係我做少少Short Call已可抵消虧損既,咁我就唔會太過理會。 講真,上年都賺得唔錯,輸返少少出去,我覺得真係完全無影響。暫時,我仲係好定。 但如果你會見到件事係不斷而壞既方面發展,而係可以愈燒愈大既,你會見我走貨會走得好快。我唔會俾自己有機會輸大錢。 有人都問,你成日叫人升市買貨,你唔怕跌架咩? 就係升市買貨我先唔怕。因為,只要個市稍為一轉差,就已經會好覺眼,你肯走貨,一定可以走到。但係跌市買貨,除非你係咁有本事,經常都撈中低位架啫,否則,你既風險仲大。 我自問,就真係無準繩度又好,又低風險既撈底方法。 我淨係知道,我過去賺得最多錢嗰啲經驗,全部都係來自順勢而行,坐貨坐返嚟。我覺得順勢坐貨,贏面一定高過逆市撈底。最低限度,Apple、Microsoft,最難只不個係頭段,但到隻股票升順咗之後,基本上就已經無難度,你只要一直坐,坐到佢回頭先食糊,咁就已經可以。 唔知邊一個位先係決定既位置,咪分段走囉。美股最好架喇,佣金又平,又可以一股一股買賣,咪自己就返注碼囉。只要大方向啱,少少股票既買賣時機有誤,我真係唔會睇得咁重。 所以,你見我投資其實係幾輕鬆。 暫時,保持警覺性啦,但就唔使恐慌。未買貨既朋友,我唔會建議呢一刻買。但如有壞消息而上升既勢頭,而你又知道邊啲係好股票,就喺嗰陣時買啦。 最後,耐性都係投資成功既一個重要因素。 有更確實既事件出現,會再update大家。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【莫家強】蘋果,係一隻好好既股票。

  即係我諗,我根本都使說服你去相信呢樣嘢。但問題係,你都知蘋困係好股票,但你喺佢身上賺唔賺到錢? 你要喺蘋果身上賺到錢,有幾個要點。 第一, 你首先要有行動。講,無乜用,你要真係用錢去買。有時講真,一隻咁好既股票,你用適量既注碼去買,有咩好驚?到時,如果個市真係唔掂,又者或隻股票跌穿位,咪走囉。就係咁簡單。 第二, 真係令你賺大錢既,係靠「坐貨」。呢幾個月,多唔多人話俾你知,美股已經升咗好多,小心啲,上升空間有限,有貨好走,買返啲落後仲好,股值好貴,好危險,有餬唔食,第時無得食?如果你聽咗呢啲說話,你一早就已經沽清哂啲股票。你隻蘋果,無可能會坐到依家$316.96。 第三, 要有信心,但都要保持理性。幾強勢既股票,有一日,升勢都可能會停止。當然,你揀股票揀得好,佢既升勢係可以維持幾年以上。有上過我堂既朋友,你就會知道,全世界有幾多股票係不斷升,連升幾年。但點都好,如果呢啲股票既升勢開始減弱,由高位回跌,下穿我既止賺位,我都會走。 但如果係無事無幹既話,隻股票繼續升,你就要放膽一直揸。只有咁樣,你先可以賺到理想既回報。 美股,好強。暫時,我真係睇唔到有咩原因佢既升勢會停止,而且你望住自己個投資戶口每隔一排又會賺多咗錢,呢幾個月呢個情況都無停過,咁係咪應該有啲耐性等佢繼續升先。 情況有變,我再update大家啦。但暫時,繼續睇好。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。      

Read more

【莫家強】好多專家都掛喺口邊話「環球經濟好差」

今日早少少出post。 大概過半月前,當出面好多專家都掛喺口邊話「環球經濟好差」,我就同你講,其實好多股市都破緊頂。除左美國,日本、台灣、加拿大、德國、法國、比利時、意大利、愛爾蘭、以色列、俄羅斯等等既MSCI 指數,喺上月都曾經創過一年新高。 「股市先行於經濟數據」,近日,我哋終於開始聽到啲專家話,經濟數據有所好轉。 呢個就係問題。如果你係靠睇經濟數據去買賣股票,我話俾你聽下一步會點。 「你有機會喺下一個股災中,輸大錢」。 美股,之前一直都講,將會步入牛三最後升浪,2020年,會升到你唔信。幾個月前我開始講呢樣嘢嗰陣,唔知大家點諗。但今日,呢樣嘢,正在一步一步實驗。 只要你揸啱股票,下年,你會賺到好好既回報。但之後點?美股會出現泡沫,然後爆破。所以,你要識走股票。 唔好再聽新聞炒股票喇。聽新聞炒股票,係「令你變得目光短淺既最佳訓練」。日日分析新聞,你中股災既機會就會增加。 要睇big picture。 如果我既估計準確,下年,我哋將會先再賺一舊大錢。然後,就要睇住一啲泡沫爆破既跡象。有既話,就開始走股票。走完,食完糊,最重要一步,就係頭也不回,暫停玩股票一年。呢啲,到時再講。 >>>>>>>>>>>>>>>>>>>>>>>>> 好喇,最強既兩隻大股,蘋果同Microsoft,繼續揸就可以。 如果倉位,可以再分散少少,就更好。上個月派過一篇文章,講過5隻升勢最穩定既股票,表現都唔錯。 兩隻信用評級股,都繼續睇好,希望升勢未來可以加速。 仲有好多我叫「C餐」既股票,同學都可以博下。 總之記住一樣嘢,唔好怕追強勢股。只要隻股轉勢時,你有策略去走,就唔會有危險。相反,買落後衰股,仲危險得多。 都係未理解到既話,問自己一條問題。做蘋果定TVB既股東,邊樣先係危險啲? 今年,喺美股既表現相當滿意。明年,若然真係估中行牛三最後升浪,就只會更好。大家,要做好準備,去把握呢個機會喇。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【莫家強】升咗上嚟,下一步點做

今日集中講吓,升咗上嚟,下一步點做。 先講港股。 噚日講咗,恒指阻力位喺27800點水平左右。如嚟緊無特別壞既消息傳出,恒指有機會升至呢個水平。但要企穩,兼突破,好睇去到嗰個位置後,成交能否繼續增加。到時再update。 另外,都係噚日所講,港股今年好興行一個pattern,就係趁好消息急升,然後挾到高位就橫行,再過一段時間,就跌返落嚟。 好喇,咁策略點做? 繼續升,就繼續睇好。但如果見到個升勢開始減弱,其實再睇升就已經無乜值博率,好倉可以逐步落車。每隔3個交易日,個市都唔係點升,就減少少貨,直至減哂為止。 另外,真係唔好追落後。 今早,恒指升成咁,都仲有612隻股票要跌,933隻股票無升跌。呢啲股票當中,如果有啲係之前升得好好,今日只係稍為整固,咁問題都不大。 但如果係之前一路都處於弱勢,而去到今日都仲升唔起既股票,你仲應該對佢抱有期望嗎? 若有專家叫你買呢啲落後股,買之前,真係要諗清楚。 >>>>>>>>>>>>>>>>>>>>>>>>>>>>>>>>>>>>> 至於美股,開始多咗評論擔心,個市升咗咁多,開始有評論擔心,後市升幅會有限。 其實呢樣嘢呢幾個月都開始發生緊,好多之前好強勢既股票,喺7月後都已經無得點升。只係有個別強勢既期權股帶動住,個指數先仲係升得咁好。 但呢個,正正係牛市三期趨近尾段既正常情況。 一啲大戶認為質素無咁好,又或者,到時無容易甩到身既股票,去到牛市尾段,一般都唔會點跟升。相反,一啲強勢既股票,就會「升到你唔信」,直至最尾,泡沫爆破,個市就玩完。 同樣情況,2016-17年,喺港股都出現過。嗰兩年,例如啲騰訊、吉利、瑞聲都升到癲哂,但如果你走去買中移動、利豐、TVB,咁成個升市就唔關你事。 後尾嗰幾隻股票,一路股價都無升過,但唔代表你買咗佢就會賺錢。如果個市有勢,始終都係,買強勢股先係賺錢法門。只要,當啲強勢股走勢轉弱,而你識落車,咁就無問題。 最後,下星期一既講座,地址改咗去「尖沙咀柯士甸路22-26號好兆年行603室」,敬請注意。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。    

Read more

【莫家強】揀啲最強勢既股票嚟玩

玩港股,如果你係識得揀啲最強勢既股票嚟玩,都可以既。 好喇,玩指數,雖然都係無乜力升,但起碼走勢都唔算太差。但有兩樣嘢,真係要小心。第一,追買落後股。第二,玩啲無基本因素支持既細價股。 今日,講一講呢方面港股既情況。 以下既圖,係今早cap 既。當時,恒指都無乜點升跌,但下跌股票數目卻遠超上升股票。上升股票只得520隻,但下跌股票就有891隻。 呢個情況,唔係今日先發生,而係成為咗常態,就算喺升市既日子,好多時都仲係跌既股票多過升。喺呢個市,仲要買落後股,想贏真係唔易。 另一樣嘢,係極多股票係無升跌,今早,就有超過一千隻。而呢啲無升跌既股票,主要係啲市值較細既股票。 正常一隻股票,好少會完全無升跌。呢啲股票,之所以無升跌,係因為佢哋係無「真實」既成交,根本就無投資者去買賣。而當呢啲無升跌既股票,佔整體股票比例超過四成,其實係反映整個香港股市係出現咗好大問題。 特別係啲中細價股,除非你真係識點玩,否則,真係不宜沾手。 至於美股,繼續大漲小回格。 昨日提過既SPGI,自己睇住位做嘢啦。 節目提過,SPGI,即係標普環球,係信用評級公司。呢個行業,全球嚟計,基本上係三間公司玩哂。第大兩間,標普同穆廸,已佔全球市場份額約8成。加埋第三位既歐洲公司惠譽,共佔市場份額約9成半,即係幾乎玩哂。 好多年前,時任中國央行行長周小川,已經「炮轟」呢樣嘢,仲話要發展內地既評級機構。但咁多年嚟,唔好話要同「三大」競爭,就連要打入市場,都有困難。 呢個行業既龍頭,壟斷優勢極穩固。有壟斷,生意就易做,大家睇吓SPGI 同MCO既股價走勢,就會明白。 分散少少啦,之前好多股票都無力,就無辨法。但呢排咁多股票重新發力再上,就無必要買哂蘋果。 蘋果係好股,中長線我相信仲有排升。但都無謂將所有雞蛋放哂喺同一個籃。 但總之,全部雞蛋,你都揀哂係靚雞蛋,長線贏錢既機會就會好高。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。   風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【莫家強】恒指雖然反彈,但東亞(0023)卻再次破底

今日,恒指雖然反彈,但東亞(0023)卻再次破底。 睇開呢度既朋友,肯定都知道,我係長期睇淡東亞。原因,係我根本就睇唔到,佢究竟做咗啲咩,去逆轉佢正在惡化既業務,同公司狀況。 當然,我成日都話,喺香港既股市入面,東亞都未算最差,只不過,有好多差過佢既股票,係無理想既投資工具造淡。 例如,翠華(1314),前景肯定比東亞仲差。你睇佢既股價,由2013年尾開始跌,已經跌足6年。之前都講過,如果呢隻有期權,而開價又開得好既話,攞嚟造淡就真係perfect。 但用恒指造淡又得唔得? 唔係咁好。只要你睇下三者既股票圖,就會明白。 東亞,穩步下跌。翠華,穩步下跌。但恒指,走勢我只會形容為「亂七八糟」,而並非真係好淡。 而重點係,前兩者,你可以好容易就預測得到佢哋既股價前景。至於恒指,要估半年後會點,唔係咁易。 永遠都係,玩有趨勢既嘢,順勢而行,賺錢會最容易。 至於睇升,大股之中,我會繼續睇好兩隻美國大股蘋果同Microsoft。呢兩隻股,從基本面去睇,前景非常亮麗。至於股價走勢,亦都好靚,根本無特別事發生,佢哋既股價就會by default 繼續上升。 所以買呢啲股票,賺錢既竅門就係,「無特別事發生」就繼續揸啦。過一段時間,你就會發覺,回報其實相當理想。 >>>>>>>>>>>>>>>>>>>>>>>>>>>>>>>>>>> 揾東亞、翠華,同蘋果、Microsoft比較,就係要同大家講一個道理。衰既股票,幾平都唔好買,你寧願買返啲「看似好貴」,但質素好,有前景既公司,咁樣,你先會賺到錢。 如果你既投資回報一直唔理想,試吓改返啱啲投資觀念,表現就必有改善。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

Read more

本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室