【莫家強】今日節目,講咗隻Sony

如果比較過去四日,大市早上既成交額,星期一有475億;星期二有486億;星期三有401億;今日,得384億,成交減少咗好多。 今朝上Now TV 做節目,我都講,做唔做Long Call既關鍵,係睇成交金額。 成交多,要衝破高位阻力,唔難。但成交不足,恒指可能最多升多少少,就會被頂住。如果係咁,Long Call就無勝算。不過,雖則係咁,但整體港股既情況都唔係咁差,有好多次,都係話俾你聽跌唔落。 暫時,後市走向,我仲要啲時間觀察,到有更明確睇法,再同大家講。 另外,今日節目,講咗隻Sony。 Sony 喺美國,以ADR 形式上市,個Code 係SNE。最近,突破咗2018年既高位。節目入面,教咗大家點買。如果可以消除埋最後既沽壓,就會變成萬里長空,之後可以繼續再升既機會好大。 有興趣既朋友,可以留意。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【莫家強】今日集中講蘋果

我知有好多朋友都揸咗,今日,就集中講蘋果。 首先,我哋要明白,蘋果係一間正在轉型既公司。以往,佢既增長動力,主要係來自iPhone既銷售增長同埋提升售價。 但係,根本佢哋既管理層一早都睇到,呢條路已經行到尾聲,再行落去,蘋果唔會有前途。所以,佢哋做咗好多嘢,去為公司尋找新既增長動力。 好喇,因此睇業績,唔好再將重點放喺iPhone度。但咁要睇啲咩? 上堂嗰陣我都講過,唔好用倒後鏡去睇公司前景。要睇一隻股票,重點係睇佢既「動力火車頭」夠唔夠力。 蘋果既火車頭,我認為,非常夠力。 其中,Airpods既銷量,係所有無線耳機之中,排名第一。而呢樣嘢,好重要。 無線耳機市場,大家睇返啲數據,增長得好快。而無線耳機本身,會係喺5G時代入面,其中一樣最重要既產品。將來啲無線耳機可以做到既嘢,一定唔止依家咁。 而蘋果,已經喺呢個市場入面,佔據咗一個有利位置,對佢未來既發展,好有幫助。 幫啲咩? 真正可以令蘋果股價長久上升既動力,來自訂閱服務。即係,一訂咗,就要每個月或每年畀錢既服務。同一個product or service,只要可以轉成呢種收費模式,對公司既得益就會增加。 而蘋果,係推展呢樣嘢,做得相當出色。從佢哋既銷售模式,大家可以睇到,佢喺sell 產品既同時,其實係做咗好多嘢,將大家引入佢哋呢個盈利模式當中,令我哋會定期畀錢佢賺。如果你係果粉,你應該明我講咩。 對於蘋果公司既長遠前景,我非常睇好。 再者,就係全球唔少地區既股市,走勢都好好。美股之外,日本、台灣、意大利等等既MSCI指數,都喺今年高位。成日聽啲專家講話環球經濟好差,真係差既話,就唔會咁多股市都破頂。 無架,最重要就係,順勢而行。你揸到隻好股,下一步最重要既就係,隻股一直升,你要有決心一直揸落去,咁個回報先會好。蘋果,中長線嚟講,遠遠都未到價。唔好問我目標價喺邊,因為一間有盈利前景既公司,佢既目標價係會隨時間不斷上調。 如果情況不變,借股神畢菲特既一句說話, “Our favorite holding period is forever.” 買到一隻好股,唔好咁容易放走佢。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。    

Read more

【莫家強】美股指數又再有發力跡象

上星期都講過,環球唔少地方既股市都造好,對於好多話全球經濟不景既評論,我實在覺得莫名其妙。 美股指數又再有發力跡象。有朋友問:「你睇牛市仲會行多幾耐?」 個人估計,不會少於12個月。因為,我真係見到美國既經濟仲係好強,而且,好多Reits 同銀行股走勢都轉強,完全唔似會短期內轉入熊市。 當然,我自己已有exit strategy,就算估錯,都會有位走。但亦都係呢個原因,現時,我唔係好怕持有股票。 大股當中,最靚既,我仍然覺得係蘋果。中長線,我相信仲有排升。已經買咗既朋友,繼續持有啦。星期三收市後會出業績,到時睇情況,再同大家跟進。 另外一隻我好鍾意既大股,係Microsoft。佢啱啱攞咗美國國防部價值100億美金既雲端合約,今晚既股價勢必再創新高,keep 得到升幅,後市好大機會能夠再升。 至於Mastercard,今個星期都會出業績。Paypal、Visa 業績後既股價表現都OK,Mastercard業績後,話唔定可以為呢個板塊再注入上升動力。有特別情況再update大家。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。   風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

Read more

【莫家強】大戶好明顯散緊啲衰股出街

先講港股。 恒指雖然能夠微升,但成個市場,上升股票只有581隻,下跌股票就有848隻,跌既股票比例好多。我既解讀係,大戶好明顯散緊啲衰股出街。 成個市,暫時唔係咁差,但有一樣嘢,就一定唔好做,呢樣就係「追落後」。 你仲買落後股,就即係幫啲大戶接哂佢哋唔要既股票。好多呢啲股,質素好有問題,就算將來個市好返,佢哋都好難長升。所以,唔好買。相反,趁大戶未沽清貨,仲要偶爾托高股價,我哋就可以吼住機會開吓淡倉。 美股,大股之中,呢一浪其中一隻最靚既係蘋果,有貨就繼續揸啦。 另外,都keep住有朋友問Mastercard 同Visa 點睇。 呢一浪,明顯唔係佢哋最強。中長線去睇,無問題。你揸住佢哋,都唔會輸錢,但就係無力升。當然,你識得玩美股期權,用嚟收時間值,呢兩係會係非常唔錯既選擇。 講開美股期權,可以留意Snapchat。呢隻股,喺今日美股收市後會公佈業績。點解講佢?因為佢隻期權既引伸波幅極多,短期等價既期權,去到170%,所以期權金超多。識得玩,細注博吓呢啲期權,其實都幾好做。博中既話,3日已經可以賺股票價格6%以上既利潤,回報相當唔錯。唔建議太大注玩,但因為期權金咁高,細注玩賺既錢都已經唔少,加上唔使冒好大風險,值得玩。 最後,美股指數似係開始上喇。不過,相比起上一浪,真係明顯少咗股票可以跟上升幅,所以大家買股票,更加要買強勢股。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

Read more

【莫家強】美股,有再次轉強跡象

  噚日都講過,港股指數唔差,問題只係上升股票數目較少。美股,有再次轉強跡象,所以已經買返哂貨,往後,只要睇住啲股既表現,跟住策略做就可以。 但講到強勢,唔可以唔提日本同台灣。 首先講講,要投資日本同台灣股票,最簡單既方法,就係去美國股市,買佢哋既MSCI ETF。日本嗰隻,個Code係EWJ;台灣嗰隻,就係EWT。兩隻ETF,最近都創咗半年新高。 日本,之前我都講過,只要5G一鬥到產品階段,佢哋既經濟會增長得好快。日本工業,贏兩樣嘢。第一,係創意,你見佢哋有好多發明,你真係唔知道到佢哋點解諗得到。第二,係對產品質素既執著。講quality,歐洲最靚既「品牌」就係Made in Germany;亞洲,就係Made in Japan。 而喺日本既MSCI ETF 入面,最大嗰兩隻股票係Toyota同Sony,兩隻股既走勢都好靚,同樣地,兩隻都好有5G產品概念。唔識揀日本股,但都想投資喺日本,最簡單就係由ETF出發。 另外,台灣既MSCI ETF,升勢仲靚,主要受惠於半導體股上升。但半導體股上落好大,買得,要有心理準備。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。    

Read more

【莫家強】我好鍾意揀啲逆流而上既股票

我好鍾意揀啲逆流而上既股票。 即係點? 如果有一隻股票,係俾啲壞消息圍繞住佢,但佢既股價都仲可以繼續上升,呢樣,反而係代表緊隻股票既質素。 例如,Nike。 Nike同NBA既關係,唔使講。早前,內地要停止同NBA合作,有唔少評論都話,會影響Nike 既前景。但Nike既股價並無因為咁而下跌,反而仲破頂。調返轉,大家可以諗吓點解。 有啲嘢係,當你可以喺某啲範疇上,做到世界第一,你就會有power。Nike有,NBA都有。 另外一隻,係Apple。 有人話,中美關係差,會影響Apple既中國既生意。短期可能會有,但Apple就係Apple,iPhone 就係iPhone,要封殺佢既市場,都唔係咁容易。 蘋果,我講過,已經轉型成功。 以往喺Steve Jobs既年代,靠iPhone一樣產品,已經夠令公司既盈利不斷增長。但當Steve Jobs唔喺度之後,呢條路就再行唔通。 我哋可以睇到,成間蘋果公司,都再無一個人,可以做到Steve Jobs所做到既嘢。但咁,唔代表蘋果就唔會成功。 今日,蘋果已經show 到俾大家睇,佢已經成功轉型,並開始行一條就算無Steve Jobs都可以成功既路。 以上兩隻股票,我都鍾意。但相比之下,蘋果,我覺得發展空間可能更大。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。    

Read more

【莫家強】最差既股票,都有最差既股票既用途。

最差既股票,都有最差既股票既用途。 成日講東亞(0023),呢隻股票算最差咩? 差就係差架喇,不過未真係算最差。差過佢既股票,大把。只不過,唔係隻隻有好既工具俾我哋造淡。 港交所要提升生意,其實好簡單,給予投資者更多造淡既工具,開好啲價,生意自然來。 事實上,好多年前,香港已經有股票期貨。有期貨,即係理論上你睇好又得,睇淡又得。但問題係,啲開價完全唔掂。另外,就係根本無宣傳,好多人都唔知。 講返個市,恒指,我唔會睇得太差。因為喺咁低成交既市況中,大戶要將指數舞高弄低,根本易如反掌。我哋要知道,要推高恒指,其實只要買升十隻股票,已經可以做到。 但無論大戶幾有錢,都無可能買升哂二千隻股票。所以,我哋只要揾到啲無前景,質素差,又支大水喉覆蓋唔到既股票,造淡贏面就自然會高。 中美談判,一波三折,噚日傳Partially 傾掂,今朝傳又傾唔掂,依家美期又升返,可能又會傳會傾掂啲嘢,但你點估。 玩遲一兩日啦,邊啲股票強,邊啲股票弱,我諗有做功課既朋友大概都已經知道。時機成熟,有行動,再update大家。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【莫家強】Nike 業績後上升

我美股既watchlist,有好多都係剛破頂,或離頂不遠,有機會將近破頂既股票。有幾隻,大家都可以留意。 Nike,業績後上升,但遇阻壓出陰燭,即係點? 剛破頂,出陰燭,唔出奇。但如果可以克服阻力再上,就可以追。Nike 業績,我未有時間詳細睇,但長遠增長點,係女性運動服裝市場。呢個市場,只要做得好,Nike 股價會有排升。要啲時間再睇相關資料,有機會再同大家分享多啲。 Microsoft,就算市況轉弱,但佢既股價基本上都無乜調整過,呢樣係好事。佢爭啲咩?就係要比我哋睇到,個市一升,佢可以再有上升動力。 記住,買一隻橫行既股票係無意思既。我唔會心急買佢。但假如佢有跡象再開車,就可以博。呢隻股票,只要一日仲係Satya Nadella掌舵,長遠前景將會非常亮麗。當然,以佢既size,係只會穩步上升,但鍾意穩陣同贏面大既朋友,呢隻股票正啱。 Nextera,強到癲,以一隻公用股計,佢今年做到既回報,已經超額完成。揸住既,繼續揸。未買既,其實仲有好多優質公用股選擇。年回報15%-30%,如果你可以收貨,我會建議你既倉位可以加啲公用股。 至於港股,運動服裝股仲好強。但之前一啲好強勢既股票,例如3、823,走勢已完全走樣。有朋友問過,呢兩隻股可唔可以買?我建議就唔好喇。 買,就買繼續強勢既股票。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。    

Read more

【莫家強】期權短評 – 東亞銀行、中國中鐵、利豐

有朋友問起,今日,講多少少港股。 先講general rule,都係一樣,買賣股票,想賺錢容易,最好就係揀啲有趨勢既股票嚟做。而喺港股,一定係揾處於下跌趨勢既股票比較容易。 例如係東亞銀行、中國中鐵、利豐呢啲,隻股擺明已經完全唔掂,就算個市好轉,股價反彈完都肯定會再跌。可以長久上升既機會,已微乎其微。用嚟造淡,贏面相當高。 只係,一來,期權開價未必理想,要蝕啲差價。二來,點都好,要識得保障自己,風險一定要管理好,要有exit strategy。但只要計劃好,有機會,真係不妨造淡。 一隻股票,衰起上嚟,跌幾多,跌幾耐,都唔出奇。 同樣地,一隻好股票,只要盈利可以持續增長,股價亦係,升幾多,升幾跌,都無問題。 但要揾股票買,我真係會建議大家買美股。 有興趣既朋友,一陣1:45pm 可留意youtube富昌財經台,美股easy trade 節目,我會講多啲美股既分析。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問

Read more

【莫家強】期權短評 – 買股票就係你將你既錢交托畀公司既管理層

Microsoft 能夠有Satya Nadella 做佢既CEO,係好大既福氣。 佢既個人能力,無容置疑。IT強,識做生意,識管理,有遠見,能夠睇得到公司未來應行既路,而且,更重要既係,佢有一種抱負。 有一個好叻既律師同學曾經同我講過,香港人、中國人既視野好窄。 我問點解。佢話,就算係最叻既人,留學嗰班,個個眼裡,都只有揾錢。外國唔同,最叻嗰班,係會諗點樣去為佢既國家,為全世界,做一啲有意義既事。 呢段說話,一直打喺我心入面。 今早,上網返聽Satya 喺Microsoft Inspire既講話,我更加深深感受到,兩者級數既差別。 當然,本份一定要做好。先由股價去評價佢喺表現,自佢喺2014年上任起,5年時間,Microsoft 股價上升逾3倍。以呢隻股票既規模嚟講,呢個表現,絕對非常理想。 另外,我諗有啲朋友會記得,早七八年前,Microsoft 既企業形象好差,好多人閙佢。但近年,閙佢既聲音已經消失,取而代之,係更多既讚賞聲。 「股價上升,當然會有人讚。」 我覺得唔單止係咁。喺Satya 既講話中,佢話 “You can’t claim trust, you have to earn it, each day.” 「你唔係叫人相信你,人哋就會信你。信任,係要你每日一點一滴,賺取返嚟。」 我唔係IT人,但睇數據,客戶對佢哋既信任既提升,已完全顯示喺Microsoft既業績之上。 Microsoft 現在既願景,係要令地球上每一個人,每一間公司,能夠成就更多。 只要Satya一直仍然係Microsoft 既CEO,呢間公司對世界既影響力,將會一直增大。長遠股價既表現,自然唔使講。如美股有跡象出現股災,你都要識走,但除此之外,呢隻股票,你只要長揸,我相回報已經會相當理想。 相比之下,小米雷軍,個人能力一定高。小米呢間公司,可能未來賺既錢,都會愈來愈多,而雷軍既個人財富,亦會一直上漲。但你買佢隻股票,未必賺到錢。 買股票,某程度上,就係你將你既錢,交托畀公司既管理層。以上兩隻股票,俾你揀,你會點揀。 要喺一隻股票身上賺大錢,你一定要長期持有。要放心長期持有一隻股票,你要對佢有信任。點解有啲人買完隻股票,會好驚佢會跌,其實好簡單,就係你心入面,都覺得隻股票唔夠好。 如果你一直都覺得投資股票,賺錢好難,咁我會建議,你真係買返啲真正好既股票。 利申:並未持有Microsoft股票。但如果我有一日買咗,我就唔會寫咁多呢隻股票。但你問我呢隻股票得唔得,我會話佢長遠既股價,睇唔到有頂。只要唔係大調整或股災,揸啦。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

Read more

本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室