【莫家強】用嚟評估救市成效

教多套方法畀大家,用嚟評估救市成效。 如果只係靠出口術,乜都唔使做,個市就能夠上升嘅,即係話畀你聽個市嘅市底唔錯。 記得Trump Trump上年有幾呼風喚雨嘛?一個twitter,話同習大係朋友,個市就已經可以上升。 你就明,點解我啲股會一直咁揸。 點解轉個頭,我對美股睇到咁淡。 因為,如果出完招,個市都仲係升唔起,或者升完好快就倒插嘅,即係話畀你聽個市底好差。 上年嘅Trump Trump威水到爆,但有句說話叫此一時,彼一時,今日佢嘅twitter神功,經已被廢。 然後,留意住美股,如果每一次救市後,個市仲要倒跌,就係話個市應該未有耐見底。 同樣情況,出現喺2015年中港股市。當年我又係避咗。原因係,中國狂出招,又揼水,又禁售,又迫分析員只能唱好,但都係一啲用都無。 最後,唔知邊個天才,設計咗個有bug嘅熔斷機制出嚟,定5%同7%為觸發熔斷水平,近成咁,以致一中5%暫時停市,當個市重開嗰陣,7%必失無疑。 2016年初,就係受呢個天才嘅天才設計所累,A股連中熔斷,最後一日,仲要破哂紀錄,早上10點左右個市就跌停唔使玩,嚇到內地即時要叫停熔斷。 但就係呢次人為犯錯以後,港股就見咗底,之後就踏入咗一個為期兩年嘅大升市。 即係,大家要買股票,都等個市真係出啲大鑊嘢先啦。出完,跌完,但個市好快就升得返,咪入市買囉。暫時去睇,最大鑊的尚未來臨。除非你係好高手,否則真係唔好入市買股票住喇。 最後,聽朝10:40am 我會上NowTV/ViuTV 聯播時段做節目,跟進返之前喺恒指做嘅Debit Put Spread 策略,我當然賣花讚花香,覺得值得睇㗎。 另外,星期五開始,我會做一個一連幾集,免費嘅網上美股ETF教學。詳情留意呢個專頁,容後公佈。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

Read more

【莫家強】減完息後美股市跌

  過咗一晚,有啲嘢可以開始講深入啲。 初步大家會見到,減完息後美股市跌。但減息後嘅真正反應,過往試過,係可以係喺幾日後先出現。 呢樣亦係最難攪嘅地方。 當然,減完息,個市就跌,呢個唔係最利好嘅訊號。但又咁講,之前美股都唔係未試過,係減完息之後幾日先出嗰個,先係真trend。 我可以同大家講,我自己絕對係任性,因為我相信我嘅期權技術,我嘅好倉未走。 但初學者,今次要睇定啲先。 揸貨遇危機,就話無得睇定啲啫。揸cash,明確嘅機會未到,耐性好緊要。 往後個市點走,我都未知㗎。但我就會繼續望實,有特別情況再update大家。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

Read more

【莫家強】蘋果壞消息傳出

好,先講蘋果。 壞消息傳出,昨日開市前,有朋友問:「使唔使走?」 咁我成日都講,考慮嘅要點,唔係消息嘅本身,而係隻股票對消息嘅反應。 而以蘋果嘅反應,算係過得去。起碼,開市後你見佢已經無再跌,慢慢跌幅仲要收窄,收市只跌1.83%,唔算跌得太多。 但當然,蘋果近期嘅走勢,已經無之前咁強,要逐步換碼至其他股票,我覺得都唔係壞事。 有咩可以換? 例如Mastercard。 Visa,雖然股價近日都能夠破頂,但相比之下,又真係無Mastercard 咁靚。 而大家又可以諗返,對於呢隻Mobile Payment 股票,其實疫情唔單止對佢哋無乜負面影響,相反仲可能有利。 事實上,好多呢個板塊內嘅股票近日走勢都唔錯,而Mastercard 係為龍頭之一,股價表現又咁強勢,點解唔睇好? RingCentral,又係唔使講,繼續升就要繼續揸。 唔好揾理由去睇淡一隻升緊嘅股票。 如果你成日見隻股票升得多,就要揾理由去睇淡的話,我想講,你好難會賺到大錢。 到隻股票走勢轉差,咪走人囉。但升得好地地嘅時候,就要對隻股票有信心。 同你管理員工一樣。你無理由個員工做到嘢,交到功課,你反而仲唔信任佢。對於一啲幫到手,好嘅員工,你應該要善待佢,對佢有信心。 同樣地,對於一啲持續上升緊嘅股票,畀啲信心佢,畀啲信心自己,有呢種心態,你揀嘅股票就自然會唔同,你就會發覺啲好股票就會痴住揾你,你就會賺到錢。 買好嘅公司,買上升緊嘅股票,順勢而行,你就會發覺你嘅投資道路會順暢好多。 最後,美股真係好強。 特別如果係嗰啲不受疫情影響,繼續破頂嘅股票,就更加要唔好怕,繼續揸。睇吓有無時間,一陣開市後再講。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

Read more

【莫家強】有朋友問,蘋果點睇?

有朋友問,蘋果點睇? 公司出咗警告,話中國肺炎疫情將預期令公司收入下調,呢個無疑係壞消息。但我成日都講,唔好將著眼點放喺消息既本身,而係要睇佢既股價對消息既反應。 當然,如果一陣蘋果既股價企唔穩,繼續下跌,咁當然要小心啦。但假如佢可以企穩,然後跌幅收窄,甚至倒升呢? 你點知佢一定會跌? 有啲嘢,無必要估,總之就睇實股價表現,跟策略做就可以。 但當然,你亦都可以選擇揀啲唔會受疫情影響既強勢股嚟買。例如,上週提過既RingCentral,股價喺業績後繼續走強,揸住既朋友,繼續揸實就可以。 又好似再之前提及過既兩隻評級機構股,股價又係繼續破頂。呢啲股票,基本上唔會受到疫情影響,所以大家根本無必要自己嚇自己。 另外,要留意實喇,美股啲期權既引伸波幅已經回落,如果升勢加劇,切記唔好手軟。唔好又係錯失哂機會,到「蘇州過後無艇搭」,你先問我仲買唔買得。到時,我真係唔識點答你。 總之,都係嗰句,順勢而行,咁就唔會有問題。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

Read more

【莫家強】我好唔想見到大家再輸股災

我好唔想見到大家再輸股災。因為,我輸過,知道有幾慘。 我可以同你講,要避過股災,其實唔難,你甚至係唔使有好高嘅投資技術,只要喺你腦海入面,唔好有一啲會累死人嘅投資理念就已經可以。 簡單講就係,你要tune返好你嘅投資理念。做到的話,就算嚟緊會出現股災,根本你都唔使擔心,因為你一定唔會有事。 但係如果你嘅理念出咗問題,你會喺股災輸大錢嘅機會就會大增。以下,我會詳細講。 ==================== 第一, 你有無輕視到今次嘅危機? 我唔知大家仲會唔會相信呢次嘅疫情係「可控」? 我唔係醫學專家,我只係一個完全係對政府控制疫情能力失去信心嘅普通市民。 但聽啲人成人講話唔好過份擔心,唔好自亂陣腳。 我想講,就係因為我一早已經好擔心件事,所以我今日先至無亂到陣腳。基本上,我已做足一切我能力範圍以內可做嘅防禦措施。 可能大家聽落有啲誇張,我甚至買咗部小型蒸氣熨斗,出完街又唔可以即洗嘅衫,我會蒸完先掛出露台。 而相反,最初叫大家唔使擔心嘅症府,如今先係亂哂籠。 有句說話,叫做最壞嘅打算,最好嘅準備。你有做到,就能夠減少於危機中受到傷害嘅機會。 ==================== 第二,當危機未能確認之前,你會點做? 我嗰個「過期鮮奶」嘅比喻就係話,如果你雪櫃有盒鮮奶,過咗期只係一日,你打開,又唔係明顯變壞,但聞落又好似有少少怪味,連你自己都唔肯定,咁呢盒奶,你會唔會飲? 咁個市,唔使講都知一定有問題,至於係咪嚴重到會出現股災,無人知,但都唔係完全無機會,咁個市啱啱先跌,你係咪仲會去買貨? ==================== 第三,你知唔知你一直都被貫輸一啲會令你輸大錢嘅投資理念? 點解香港咁多投資者會喺股災中輸大錢?其中一個原因,就係我哋嘅投資教育,一直好提倡大家要「逆勢」。 逆勢呢兩個字,當然唔會講出口,但你諗返啲專家嘅建議,係咪咁先? 佢哋成日會教大家撈底,追落後。調整就叫你去買貨,升得多就會叫你唔好買。升嘅股票就話貴,跌嘅股票就話抵,聽咗咁多年,所有嘢都變得好順耳,好順理成章,但就係因為喺不知不覺間,我哋嘅潛意識就係俾呢啲思想荼毒哂。 講真,要避股災有幾難? 一句說話,君子不立危場下,就係咁簡單。 即係早幾日,港股一開市,如果你已經肯走哂啲貨,而又無再貿然入市買貨,咁依家嘅跌市你有咩好驚? ==================== 最後,唔好急,唔好怕執輸,怕蝕底。呢啲又係會令我哋輸錢嘅心態。 即係啲人成日都話,SARS嗰陣應該買股、買樓。咁事後先講,梗係無錯㗎。 但更重要係,你唔一定要第一時間入市㗎嘛。先講恒指,2003年4月見底,而指數其後反覆上升,要去到2007年10月尾先見頂,其間有四年幾時間俾你賺錢。 樓市仲勁,升咗成十幾年。咁有咩好急? 記住,我哋唔使做第一個睇到跌轉升嘅人。要賺錢,只要到時個市升返,你識得順勢而行就可以。 ==================== 理念攪掂咗,策略講幾句就可以。 星期一,如果美股連一啲反彈都無,個市我會睇淡好多,倉位最少減半,再跌就所有貨都清哂。 之後,我會主力觀察有邊啲股票能夠逆市造好。 但總之,個市一日繼續跌,我都唔會買嘢住。直至等到個市好轉,呢個就係我之前所講,今年嘅最大賺錢機會,亦係我認為入市做Long Call嘅最佳時機。 再講多少少,中外股市都係,最癲嘅升浪,通常都會出現喺好深嘅調整之後。2007年港股嘅817「大奇蹟日」就係最佳例子。恒生指數,兩個半月,升咗接近13000點。你唔信,自己睇返。 但今次港股無㗎喇,因為個根基由2012年起就一直崩壞。要博,博美股啦。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【莫家強】美股大跌,又講一講點做

美股大跌,又講一講點做。 雖然道指跌超過四百點,好似好多,但其實大部份股票今日都只不過係跌0 – 4%左右。喺我嘅list入面,表現最差嘅係剛出完業績嘅Visa,現跌3.82%。 但例如係近期提及嘅ICE、NDAQ同AON,其實係一啲事都無。後者,仲有得升。 好喇,之後點做? 所有股票,跟返之前所講,如股價跌穿今個星期一低位,持貨一律減半。 咁有啲股票,之前幾日升得好靚,股價已遠高於星期一低位,咁點算? 咁呢啲股票就更加無問題啦。而我會建議睇埋下個星期一。 美股有個特性,就係如果三大指數都跌超過1%,之後嘅一個交易日嘅表現,會有好大啓示性。 下星期一,其實只要個市有少少反彈,唔使多,只係微升,我都會收貨。啲強勢股,未穿位,我都會繼續揸。 相反,下星期一,個市連少少都升唔到,咁後市我會睇返淡啲,強勢股減半,之前已跌穿位嘅股票直頭會清哂佢,就係咁簡單。 唔好同啲股票談戀愛。 Apple、Microsoft,兩隻股票我都好鍾意。但如果個市衰起上嚟,無論你隻股票幾靚都好,都有機會大跌。呢一點,我非常清晰。所以,如果個市有唔對路,我都唔會諗咁多,會即刻減貨。 但就算最後真係要走貨,照計Apple點都沽到300蚊樓上,Microsoft點都沽到160蚊樓上,我仍然會好開心。 而再下一步,就係揸住多多cash,等個市調整後再反彈。期間邊啲股票最強勢,就睇住時機Long Call。 個市會點走,我唔知,我都無水晶球。但以上,就係我嘅策略。兩度防線,今個星期一股價低位,同下星期一大市能否反彈。 美國藍籌股,你肯走,就唔會有好大風險。最後要點做,就視乎個市嘅走勢。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【莫家強】到將來美股一旦牛轉熊

今日早少少出post。 我都同位朋友講,港股現時嘅情況,就係到將來美股一旦牛轉熊,即將步入股災時候,我哋要點樣做嘅預演。 港股,當然未必一定會從此轉入股災。但可能性,絕對唔係零囉。 而假如真係步入股災,會係幾可怕,其實唔係睇佢睇得幾深,跌得幾快,而係睇「你究竟係咪一早肯走哂啲貨」。 講真,大家點會唔知中、港經濟將會出現好大問題先?但你會發覺,仍然會有好多人教你逆市操作,撈底博反彈。如果他日港股真係轉入股災,咁做咪就係令你會輸大錢囉。 相反,就算你之前有貨,但你喺星期三就已經肯清倉,今日你首先已經輸少幾百點,而你更加唔使再擔驚受怕,之後即使出現股災,你都唔會受到損傷。所以,我成日都話,股災其實唔可怕。真正可怕嘅,係會令你輸大錢嘅逆市操作思考。 信我啦,到他日個市真係無事嗰陣,個市會有排升,何必急於一時呢? 至於美股,唔使多講,好強。如果你拍埋同港股去比,你就知道個分別。總之,啲股繼續升,就繼續揸。 當然,有一日,美股都會轉入熊市。但到時我嘅操作方法,都會同依家我建議大家做嘅一樣,清倉。只要你成套方法都跟足,股災根本就無咩可怕。 港股,真係唔好玩住喇。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【莫家強】唔好心急撈底

港股,希望大家都已經清咗倉,起碼就算今日恒指再跌四百幾點,都已經唔關我哋事。 另外就係,唔好心急撈底,呢樣嘢好重要,我今晚再寫多篇文詳細講。 然後以下,集中講美股。 蘋果,業績後升咗上嚟,繼續破頂。星期一畀大家嘅止賺位,無跌穿過,所以有貨嘅繼續揸住就可以。後市會唔會跌,其實大家真係唔使擔心,總之跌穿今個星期一低位就走一半貨,唔跌穿就繼續揸,唔使諗太多嘢,輕鬆簡單。 另外,Microsoft 業績理想,盤前暫升4%左右,都係一樣,有貨就繼續揸。 其餘強勢美股都一樣,唔跌穿星期一低位,都繼續揸。 我嘅投資方法就係咁簡單。其實只要你揀啱股票,你用呢個咁簡單嘅方法,回報就已經可以好理想。投資喺一啲好股身上,絕對會好過你喺啲弱勢股度出出入入。 但都要謹記,現時買任何股票,大家都要有一個止賺、止蝕位,而且要嚴守。 雖然我仍然睇好美股,但喺呢個連東京奧運都隨時要取消嘅時間,做投資絕對唔可以毫無防備。 我成日都講,如果美股走勢轉差,一跌穿位,我啲貨係會走得好快,好狠。但亦都係因為有呢種紀律,所以我係完全唔會擔心個市幾時會跌。總之,跌穿位咪走囉。相反,啲股繼續升,我哋就只要好安心地繼續持有就可以。 港股,真係唔好買喇。 抗疫,加油。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

Read more

【莫家強】有無啲肺炎受惠股可以買?

有朋友問:「有無啲肺炎受惠股可以買?」我心諗,唔係掛,真係對港股咁樂觀? 好,講講現時既情況。 今早恒指只跌660點,最大功臣係逆市上升既騰訊。但騰訊上升既原因,係純粹既維穩操作,定係佢真係無懼疫情,實在不得而知。但我哋要學識睇闊少少,喺恒指50隻成份股入面,就係除咗騰訊之外,其餘49隻股票都下跌。而如果再睇闊多少少,成個股市下跌股票既數目去到1600隻以上。個市跌成咁,你仲去揾嘢買,我真係覺得你好勇敢。 如果你真係想揾啲唔受疫情影響既股票,點解唔睇遠啲,去其他地方揾呢。 美股,星期一開市,當然要跌啦。但你會睇到,跌完,好快就低位已見,而好多股票昨日都繼續反彈,其中更有啲股票已再破頂,當中包股保險股AON。 另外,仲有NDAQ、ICE,都值得大家留意。如果你問我,我一定會叫你買呢啲股票,好過去追落後。 早前分享過一幅圖出嚟,係關於疫症對美股既影響。可以睇到,過去世界各地都出現過多次疫症,但最後都無礙美股繼續上升。 加上,疫情對美股既影響似乎經已遠離,美股繼續睇好。 而香港,抗疫唔好鬆懈,政府唔肯封關,大家都睇到有人發住燒嚟香港租酒店,食雞粥,仲教人食退燒藥過關,未來香港既疫情仍有機會進一步擴散。但無論如何,做好自己,帶口罩,勤洗手,大家團結做好衛生,點都會對疫情有幫助。 香港人,加油。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【莫家強】你估港股會調整到咩位?

今天不在office,長話短說。 昨晚有朋友問我:「你估港股會調整到咩位?」 我話:「我唔知,真係唔識睇。」 事實上真係嘛。港股反覆成咁,點估?上星期,我都有睇電視,啲專家個個都睇到後市好好。睇得較保守啲嘅,都會話下跌空間有限,睇好之後彈以再升。點知,全部錯哂。 但我唔係話啲專家乜嘢,因為最大問題,係港股嘅走勢直係好鬼陰濕。估錯市,係正常不過嘅事。 投資要「捨難取易」,呢樣嘢,你嚟上我堂,我一開始就會同你講。 咁即係點? 既然港股咁難玩,成日呃人,除非你真係高手到連呢吓跌浪都可以事先捕捉到,否則,其賓你係可以選擇唔玩。 然後,轉玩美股囉。只要你係跟足我嘅方法玩,你肯定就會覺得「美股易玩好多」。 有朋友笑我,話我啲市評有一個特色,就係啲股票推介成日都唔變,日日都係嗰啲。但就係咁,你會好易睇到喺2019年,我哋係賺得相當唔錯。 如果你已經錯失咗,2020年,美股仲會有好大機會可以再升。但如果你又再錯失埋,到個市由高位轉跌,你先再問我:「仲有咩股票可以買?」 我會直接答你:「Too late。」 最後,美股,無特別睇淡嘅理由,繼續睇好。肺炎確疹個案,人哋一開始就無輕視過,我相信美國會有能力處理。 我哋喺香港,就自己注意身體。祝大家身體健康。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室