陸羽仁-板塊炒作

港股周一唞一唞,繼續挺進。昨日恆指抽高755點至27850點,升幅2.8%,睇上證綜指期貨再升95點,升幅2.1%,今日內地行情看漲,港股早段或會跟一跟。 大市維持高位,但個別板塊插到你傻,好似早前升得好急的「一路一帶」概念,暫時還在力插中,特別係玩高鐵概念的中國南車(1766) 和中國北車(6199) , 早一個星期仲係神車,而家坐過山車,仲係直插向下那一種,昨日雙雙大插超過12%。其實佢地大插係和內地A股同步,雙雙跌停,其合併市值一天便蒸發了超過2000億元人仔。 睇兩車先要睇A股走勢,在兩車合併消息刺激下,從4月7日到17日,9個交易日,中國南車、中國北車A股雙雙收出7個漲停,累計漲幅分別達到111.2%和108.9%。到本周一,中國南車和北車盤中最高見39.47元和42.31元,此時,兩車合併市值高達10635.14億元人仔,超過了全球絕大部分交通設備製造商的市值,甚至超過美國波音公司和通用汽車公司的市值之和,但到周一就先抽後大插。其中,中國北車A股從最高價42.31元急滑到最低35.06元,全天波幅將近19%;中國南車A 股則從39.47元的最高價最低見32.88元,波幅達18.4%。 昨天,兩大神車A股低開低走,僅僅45分鐘,兩車便一起封死在10%的跌停板之上。昨日中國南車、中國北車的合併市值為8544.8億元,較周一盤中1萬億元以上的最大市值,蒸發則超過2000億元。 睇兩車H股,南車高位20.65元,現價15.52元,較高位回落25%,北車高位21.95元,昨收16.24元,較高位跌26%,北車由10元多一點起步,南車由10元起步,兩車都跌了升幅差不多一半。 我地要學炒股新時代,不一定要等大市回吐,個別熱炒板塊也可以回吐。升得多,回吐得急。回吐過急時,或現炒作機會。 另外有內地傳媒報導,內地一些炒港股的ETF股票基金已有回吐跡象,其中華夏恒生ETF指數基金甚至出現跌停,截至4月14日,華夏滬港通恒生ETF指數基金和匯添富恒生B指數基金淨值已較最高點分別下跌2.8%和5.5%。有內地投資者已經開始關心,港股升勢仲可以維持幾耐? 正如我之前提過,內地資金炒作港股,主要係炒「港A股」,其中主要類別係AH股之間出現估值價差的股票。港股經過一輪急升,到目前為止,AH溢價指數已由上月底的34%收窄至目前的23%。係唔係意味著港股通交易量規模會出現下跌,或者南下資金減少,港股升勢可能好快見頂呢? 上海財經大學現代金融研究中心副主任奚君羊教授認為,短期內不會出現這樣的情況。佢解釋,「股市運行的一般規律就是,如果某一個板塊,或是某一個系列的股票出現大幅度上升,會引發和它相關聯的板塊和系列的上升。港股相對其他市場來說,升幅仍然偏低,而A股的大幅度上升,使得港股成為了價值窪地。」相對國內創業板96.87倍的平均市盈率,而港股主板股票平均市盈率只有10 .87倍,創業板的平均市盈率也只有11.96倍。相對於內地股市,港股估值可以用價廉物美來形容。當然,長期而言,A股和港股之間的價差會逐步趨同。滬港通以及年內預計開通的深港通使得資金得以便利地在各地之間相互轉移,將會加快呢個步伐。 不過,奚君羊亦提醒投資者,由於港股的市場參與者是全球性的,港股除了受內地影響以外,也會受到美國、歐洲、日本等其他市場的影響,在某一短時期內,港股唔一定跟足內地股市走勢。 值得留意嘅係,某些前段升得比較多的H股,近期已經出現一定的回落,與A股差價又擴大番,不妨睇睇,例如山東墨龍(568),由3月底的3.56元連升8個交易日至5.87元,而山東墨龍A股為11.88元人仔,換回人仔計算,H股相當於4.69元人民幣,折價明顯。近幾日山東墨龍H股回吐至昨日的5.43元(4.33元人仔),而山東墨龍A股則上升至12.91元人仔,差價由60.5%放大至66%。差唔多狀況嘅有東北電氣(042)收報3.25元,差價59%; 中國北車(6199) 及中國南車(1766) 呢兩日跌到一仆一碌,但H/A股差價仍分別有62%及61%! 外圍方面,受到包括Travelers,IBM及DuPont等多家美企公佈的季度業績唔理想拖累,美股昨日回軟,不過跌幅唔大,杜指跌85點,收報17950點;標普500指數跌3點至報2097點;市場預期Facebook今日公佈業績會有唔錯表現,股價逆市升1%,再加上生物化學股亦造好,推動納指逆市升20點,重上5000點大關,收報5014點。   陸羽仁 http://blogcity.me/blog/reply_blog_express.asp?f=5YTPBH5B812303&id=719929  

Read more

陸羽仁-既托經濟 亦勒狂牛

上周五港股收市後出現震盪。美股杜指因為希臘違約風險大增,急插279點,跌幅超過1.5%。另外,中國證監會話要規管兩融(即融資及融券,前者為孖展借貸,後者為借貨沽空),馬上嚇窒投資者,新加坡富時A50期貨,應聲急插6%;在當晚11點收市的恒指夜期跌穿27000點大關,收報26975點,大跌705點,跌幅2.6%,比現貨低水678點,國指夜期跌幅更大,急插496點,收報14016點,跌幅3.4%,低水521點。         美國上市的港股預託證券都插,ADR港股比例指數上周五收報26855點,比香港收市低798點,跌幅3%,港股在美股時段似乎止唔到跌,急得更深。我相信外圍希臘債務危機對港股影響比較細,內地出招影響比較大。         證監示警人行降準         不過個古仔未完,中國證監會可能見外圍市跌得太厲害有啲驚,到上周六又澄清話它所講的措施不是所謂的鼓勵賣空,更非打壓股市,叫人正確理解,不要誤判誤信。         到周日,人民銀行宣佈降低銀行存款準備金率,自4月20日起下調各類存款類金融機構人民幣存款準備金率1個百分點,對農信社、村鎮銀行等農村金融機構額外降低人民幣存款準備金率1個百分點,統一下調農村合作銀行存款準備金率至農信社水準。         睇完成件事令人有些迷茫,到底阿爺想個市升還是想個市跌?         我覺得兩件事可以拆開解讀,先講中國證監會的示警行為。中證監新聞發言人鄧舸在上周五下午四時的例行記者會宣佈,對券商提出多項要求,包括按市況調整兩融的初始保證金比例(即要求增加保證金),嚴禁開展場外配資、傘形信託等活動。由於現時滬深兩市的融券(借貨沽空)業務發展緩慢,當局將擴大借貨沽空交易的股票來源,讓公務基金、證券公司、資產管理計劃等機構投資者,都可以將股票借出來沽空,可以沽空的股票亦由900隻增加至1100隻。中國證監會由增加兩融保證金,重申禁止傘形信託,到鼓勵借貨沽空,都是指向控制市場風險的範圍。         壞消息出支持力完         幾種政策中以鼓勵借貨沽空較為突出。截至上周四,滬深兩市的融資及融券餘額,共有1.7萬億人民幣,當中有99.5%係孖展融資,只有0.5%屬融券即借貨沽空,沽空比例之所以這樣小,投資者只能從券商借貨,但券商持股不多,想沽亦無貨可借。新例開放基金可以讓市場借貨,借出的股票不能超過基金資產淨值50%,這將大大增加市場借貨沽空的貨源。至於增加兩融初始保證金,特別是孖展借貸,對市場起到降溫作用。         到上周六中國證監會發言人再自問自答式澄清,話周五的通知不是鼓勵賣空,打壓股市,認為這是誤解誤讀,那些措施的目的是促進融資融券業務平衡發展,維護市場穩定健康發展咁話。         單看中證監的行為,可解讀為見A股升得太急想降溫,但一講見外圍跌得咁勁又怕,澄清一下。其實1月的時候都係咁,澄清唔等如唔再做令股市降溫的事情。         至於人民銀行降準,有人睇成為人行出手打中國證監會一巴,我看也有另一種可能。抽離少少睇,中國首季經濟差,人行出手救經濟是預期中的事情,按人行一次降準、一次減息的梅花間竹式出手韻律,上次減息,呢次輪到降準,所以做係正常,唔做至奇。若人行和中證監夾得好啲,應先由人行降準,升埋最後一浸,再由中證監出手示警,邏輯就會順好多啦。         好淡相沖傾向調整         中國股市始終都是政策市,我此前不斷地講,阿爺主要用股市升的好消息來頂住GDP增長差的壞消息,但在4月初至4月中阿爺公佈埋一大堆負面經濟數字,例如首季GDP增長數字之後,加埋出手降準之後,阿爺短期內借股市承托差劣經濟數據的動機已經沒有了,便好可能讓股市稍稍降溫。上證綜指由上次回吐的低點3050點一路升上來,很快便衝破4000點大關,據我原來估計,能夠衝上4000點,已經好巴閉,點知呢隻狂牛相當有力,上周繼續向前衝,周五更衝上高位4316點,連4300點亦衝穿埋,收超4287點,大漲2.2%,照計好難任何股市咁一路漲上去。         如今中證監和人行放出好相反的訊息,市場有點混亂,不排除今天開市股市唔會回。但我認為即使股市唔跌或是少跌,都好開心得太早,內地股市牛氣太勁,阿爺出招降準托經濟之餘,好可能繼續勒一勒隻狂牛,為股市降降溫。勒股市唔係想佢死,正正相反,勒股市係想佢健康地升,未來仲要靠股市幫手托住經濟。以內地股市的狂態,唔勒佢降埋準,好易就由4300點直衝上去,咁搞唔使兩個月要升穿5000、6000點創埋新高,咁搞好快就爆囉喎。所以勒住股市升勢又回回吐少少,反而係愛護股市的行為。中證監和人行好消息壞消息相沖,我傾向相信大市會朝調整方向發展。         買得太早好難忍痛         若然係咁估計,若然今日股市因為降準而唔跌,若然你手上揸到好重貨有風險,減少少貨,都係合理行為。當然如果大插落去,一跌就好深,就不必追沽了,總之要睇住個市應變。         總的來說,現時是一個牛市,散戶若不是技術太高、跟市好貼的話,不宜100%沽貨,又搵位100%入貨。你沽個市跌,100%沽清,到個市跌,你可能覺得未跌夠多,當時市場上又好多人唱淡,你就唔會買番,出現在牛市持貨太少的風險。若然你的貨是賺錢貨,即使想沽一部份都唔好走清。沽完之後,等佢有相當跌幅就買番。         好多散戶愛問冧巴,其實依家冧巴太多。穩陣可等回吐買指數基金,進取可候低買熱門股。AH差價股、一路一帶基建股、互聯網+股,這幾大類股份都可等回吐時份段吸。藍籌股基本上不用考慮,要買買H股好啲,但想買到平貨,要有耐性,唔好跌少少就撲入去,否則佢一浪下來,升得急的股份,你買得太早,都會好痛。         陸羽仁 http://news.stheadline.com/dailynews/headline_news_detail_columnist.asp?id=327095&section_name=wtt&kw=4

Read more

陸羽仁-降溫而非打交

中國大玩冰火五重天,中國證監會先在上周五收市出口術話要搞搞「融資和融券」,即增加孖展供貸按金和擴大供貨沽空貨源,搞到港股夜期大插705點。不過到星期日人民銀行又公布期待以久的降低存款準備金率1個百分點,又變成放水的好消息,搞到上周五沽咗期指的淡友面都青埋。 老實講今年2月第一次降準0.5個百分點,3月減息0.25厘,係時候輪到4月再降準,所以降准係預期中的事,仲覺得佢來得稍遲,問題只是降1%的幅度較大,顯示中央都真係為經濟而擔心。市場人士再估多二錢,4月底可能再宣布埋5月開始再減息。減息與降準梅花間竹地進行。中國不斷進入放水週期。 今次降低存款準備金率1個百分點,是自2008年之後,6年多來的首次降幅達1個百分點的降准,上次2月只是降0.5個百分點。專家估計將釋放1.2萬億資金山來,對經濟對股市都是利好。短期內地銀行股金融股較有利。 有人話中證監和人行打交,我傾向從另一角度看,經濟唔好,降準要降到1個百分點咁多,都係逼不得已,內地股市已顛,放咁多水好易更顛,所以中證監把要調控股市的醜話說在前頭,先為股市降溫,係降溫唔係打交。所以斷估內地股市亦係先升後回格局,阿爺唔希望股市一下子炒到爆。港股先殺上周五夜期的淡友,但要小心高追的好友亦可能中回馬槍。 上周五外圍股市受到希臘違約風險增大以及中國擴大借貨沽空範圍及打壓孖展借貸等因素打擊,震咗一震,歐洲股市重創,其中此前升得最勁嘅德國股市亦跌得最多,大跌2.6%,係2011年11月份以來的最大的單日跌幅,法國股市跌1.6%。美股杜指一度大跌350點,收市收窄至279點,收報17826點,跌幅1.5%;標普500指數跌24點,收報2081點,跌幅1.1%;納指跌76點至4932點,跌幅1.5%。總結全個星期,杜指、納指跌1.3%,標普跌1%。 市場憂慮美企季度盈利唔得,對大市有點顧忌,不過美元匯價靠穩,兌歐元保持在1.08美元水平,上周五紐約油價略回落1.7%至每桶55.74美元,不過全星期計仍有近8%進賬,股市恐指標VIX指數保持在13、14點水平,反映投資者對美股前景唔係咁悲觀,上周五之所以跌得比較甘,主要受外圍,特別係希臘債務危機升溫,令到投資者趁機獲利吐套所致。 希臘財長瓦魯法奇斯上周五與國基會(IMF)及相關歐洲當局開會,主要係傾最後一筆72億歐元的紓困貸款問題,如果無法及時取得紓困貸款,可能無法在5月的期限屆滿之前,償還積欠IMF的兩筆近10億歐元的借款,甚至無法支付公務員的薪水同退休金。不過,債權人堅持希臘首先必須提出可信的全盤改革方案,才肯批出貸款。萬一希臘貸唔到款,無錢還債,後果只有兩個:違約同「脫歐」,後果無人能夠預料,可能波及全球經濟。希臘危機蒲面,例必嚇到全球股市,特別係歐美股市腳軟。我估希臘爆唔到大鑊機會大少少,未來港股都係睇住內地市有無調整,我傾向等調整到來。 陸羽仁 http://blogcity.me/blog/reply_blog_express.asp?f=5YTPBH5B812303&id=719324&catID=&keyword=&searchtype=

Read more

陸羽仁-熊市就來嗎?

  近排港股升得好癲,星期一又是一個大升日。當日朝早, 有位好日不見的美女,來電問我「冧巴」。在這種股市喪升的日子, 突然多了很多素未謀面的人,不停地問我要「冧巴」, 確是頗為煩惱的事情。見到大市升得這樣急,一旦回吐時, 怕佢跌幅都有相當。我便給她一些即使跌,也不至於太慘的股票, 我話,「如果真係要買,就買內銀吧!工行(1398)、建行(9 39)雖然升咗好多,但市盈率相對比較低,6倍幾市盈率、近5厘 息,事必要買,就買佢啦!」   這個回答其實都是應酬式的回答,當時建行只是微升了2%, 但到當天收市,已急經升了7%。建行往後繼續升,不過,即使升到今日的7.84元,市盈率還是6.9倍,息率4.8厘息 ,還未算太貴。   我雖然說大市回吐不出奇,又不等如是叫大家要全面睇淡。我老友經紀張便是一個例子。他說現在股市好癲,他好驚,怕股市爆煲,他早兩日(星期三)已沽清所有貨。 過份樂觀固然不好,但像經紀張般這樣悲觀,我亦有點懷疑應唔應該咁做。   我問他,覺得現時是牛市抑或熊市呢?他有點答不上來。 據我的觀察,恆指由升穿25000點開始,已經由上落市進入牛市。大市近排確實升得很急,一下子便升上28000點,所以出現回吐回較深也不出奇,例如回到近26000點也 不見得是大災難,但大市未去到全面爆破的階段。若大市出現較深的回調,反而是吸納的最好時機。如果講到清倉的話,即手上一股也沽清。清倉的人覺得大市會爆煲,大市回少少的話,他是不會入場的,愈跌佢愈唔敢買,萬一俾我講中係一個牛市,而他將要冒上牛市無貨的風險。   有另一個公司高層對住我苦口苦面想攞冧巴,話貨太少。我問佢持貨狀況,幾百萬現金,揸住幾十萬股票,當中較好的港交所 (388)200元樓上沽咗,反而揸住人見人彈的匯控(005) ,呢個組合股票既少,又有啲癈。我問你貨咁少,做乜急住沽?佢都答不上來,總之係怕跌。   我話你現金太多,現在攞四分一出來,買吓貨先,買恒生H股指數基 金(2828)又得,招商中國基金(133)亦得,但預佢會跌, 唔好一注買晒,分四注。例如133,我講的時候是20.5元(收 市已升到21.45元),我話你現價一注,18元一注,16元一 注,14元一注,正常14元應該買唔到,回吐去番16至18元較 大機會,未必買齊,但攞個平均價,如果你信係牛市唔係熊市,咁叫做有啲股票在手。   我認為在旺市的時候,調整心態比搵「冧巴」更為重要,而心態是要建立增長型的組合,起碼要有好股壓倉。我係好友,覺得熊市有排未到。   陸羽仁 http://www.bastillepost.com/hongkong/19788-%E9%99%B8%E7%BE%BD%E4%BB%81%E7%90%86%E8%B2%A1/614780-%E7%86%8A%E5%B8%82%E5%B0%B1%E4%BE%86%E5%97%8E%EF%BC%9F?r=w  

Read more

陸羽仁-核能水務炒得開心

今個星期內地宏觀經濟數據陸續發表,外界慢慢細嚼「箇中真味」,一如先前估計,內地實體經濟確係唔靚仔。有分析指出,內地增長已經出現「雙破六」,增長放緩已去到阿爺容忍下限的「政策底」。 政策底逼住托 內地剛公佈首季GDP增長有7%,叫做勉強做到預定目標,不過,有分析細睇數字,就話如果用首季增長速度逐季比較,季度按月折算成年增長率只有5.3%,另一個指標工業增加值只增5.6%。內地現在對經濟調控以上下限波動的概念去管理,只要不跌穿下限基本上無問題。 不過,今次兩個代表增長速度的指標放慢幅度,係2008年以來最弱,換言之,好可能已經去到中央的下限穿底警戒線。所以國統局前日派定心丸強調「經濟運行總體在穩定區域」時,都補多句「經濟目前在新舊動力交替的關鍵時刻,存在下行壓力」,即係話中央都係高度注視,防止增長下滑,變成死火。有估計着力點仍然係如何恢復實體經濟的融資能力,貨幣政策偏向趨鬆。 內地觀望新一輪政策走向,大市由全面爆升,進入輪流炒局面,資金開始揀啲有政策消息嘅板塊落注。國務院總理李克強於國務院常務會議表示,決定核准建設「華龍一號」三代核電技術示範機組,一眾核電設備股起飛。上海電氣(2727)一馬當先,與細隻啲嘅中廣核礦業(1164)同樣大升21%。 對於核能股,中環成班茶友有唔同意見。先講客觀環境,本來全球經濟放緩,對所有能源股都不利,包括傳統的石油、燃煤股,以至新能源股。依家能源成本最平,最高產能效益始終係石化燃料,喺國際油價大跌,頁岩油不斷發現開採下,能源價格照計難見昔日原油100美元以上的光輝日子。由於新能源係替代能源,雖然可能較少排放,成本卻肯定比石化能源貴,當油價回落,理論上呢個就係環球能源股的大氣候。 水務嘢炒概念 在呢個大氣候下,中國希望由過去粗放式增長,變成提升產業結構同質素,重點之一係使用清潔能源,於是有唔同政策鼓勵使用可持續發展及替代能源。不過,由於無論風能、太陽能以至核能都係比較貴,所以呢類生意有得做,但同時要留意係邊際利潤會唔會受壓,當股價上升太快時,就要防止佢有回吐。 以核能股為例,龍頭當然係上市不久的中廣核(1816),佢同招股價比已經升咗66%,好多大行都話佢估值高。有中環茶友話,中廣核未來十年已經有晒項目,前景穩定,係穩陣的大股,不過,依家市場唔係炒基本因素,而係炒另一巨企中核上A股。若然論炒,當然係細股行得快過大股,昨日好明顯就出現呢個現象喇。 茶友又話,電價政府要控制,至於生產設備就比較市場化,照計設備股好似上海電氣(2727)概念仲易發揮;可惜講講吓佢已經升咗20%,唯有等佢回吓先吼。 香港隻牛行得慢,A股就繼續勇猛,上證指數撲近4200點,全日飆2.7%。恒生指數昨收造27739點,升120點;國企指數下午就轉趨勇猛,收報14720點,升248點。內地股市急升,內險股受追捧。太保(2601)飆5.5%,造43.05元,為表現最佳國企指數成份股;國壽(2628)揚4%,造39.45元,跑贏一眾藍籌股,好似想挑戰今年高位40元大關。「水十條」政策終於落地,規模比市場估計大,帶旺多隻水務股,龍頭北控水務(371)急漲10%,細隻嘅強泰環保(1395)升夠18%,散戶炒吓板塊尋寶都好開心。行內人話好多股都只係炒概念,實質生意未得,所以係一個玩上落車的遊戲。 陸羽仁

Read more

陸羽仁-自由飛行

中國公佈內地經濟首季增長7%,勉強叫做達標,但已經係新低,消息公佈後大市一度回揚,但跟住又軟一軟。一如陸羽仁所言,阿爺一早堆定沙包,準備迎接呢個咁不利嘅經濟數據曝光,日前出口數字先嚟料,中港股市同日抽升,當無事發生,隔一日個市就回一回,昨日增長數字再公佈,市場又係無大反應,咁阿爺又捱過咗一個洪峰啦。 壞消息洪峰過去         股民如果心水清,會留意到四月初中央密集式公佈利好股市措施,咁做好大機會係為負面數據鋪定安全墊。呢個星期隨着數字逐一公佈,好消息出籠明顯減慢,照陸羽仁分析,阿爺好大機會唞唞,唔使再搞乜刺激動作,俾個市自由浮沉吓先。         內地今年首季經濟按年增長僅僅7%,是自2009年首季以來最低增速,低過去年同期及第四季的7.3%。不過,國家統計局新聞發言人盛來運就講得淡定,強調內地首季經濟增長增速雖放緩,但就業率、通脹率等主要指標仍在合理區間,而且經濟結構繼續優化,重申經濟總體在平穩區間運行。 中央做咁多拆彈工夫,梗係無理由話自己都腳軟,尤其股市定住咗,咁7%增長率係好定唔好,就有自說自話的空間啦!當然,外間對呢個數字就唔係咁滿意,好似匯豐大中華區首席經濟學家屈宏斌就覺得,首季增速和通脹率雙雙持續下行,表明總需求小於供給能力,出現產出負缺口。佢認為,眼下經濟下行壓力加大,減息和降低存款準備金率刻不容緩。 揸油股未係時候 屈宏斌嘅意見代表了部份外資分析,係比較正路的分析,不過,?家阿爺係玩緊綜合拳,利率政策要考慮股市同市場心理效果,確保呢幾「飛」子彈打出來要有實際效果。 無乜政策消息,指數變動不大,但炒落後仍然好好玩。三桶油借住國際油價彈番上54美元,幾隻油股就借勢上番今年高位,最叻隻中海油(883)升咗4%。         近排好多網友問我好唔好入油股,一則佢哋等油價見底等咗好耐,二則油股氣股較落後,手上貨不足者想借油股加番大個倉位。我就覺得油價之前2月反彈到55.6美元,今次若然都升唔穿,隨時雙頂回落,?家個市炒落後炒吓油股,佢哋同煤股一樣,生意仲係弱勢。旺市揸都仲係揸強股,弱股要等生意轉勢,即係國際油價見底。低位買了油股可以趁彈高食胡,等佢插低再買番,游來游去玩短線。         雖然指數上上落落變動無前幾日咁勁,大市成交就續旺,連續第六個交易日成交過兩千億元。恒生指數昨收造27618點,升57點;國企指數收報14471點,升207點,成交金額2162億元。         炒落後大細齊落鑊         資金大玩炒落後,大件夾抵食的內銀股表現省鏡,是力撐大市功臣,單是建行(939)、工行(1398)及交行合力向恒指貢獻197點。建行漲逾4%;工行仲彈多啲,升4.9%,為表現最叻藍籌及國企指數成份股。佢哋上周升番到7年蟹位,我叫大家到水面唔好沽住,覺得內銀仲係平,結果真係仲有氣有力係咁上。         阿里健康終於落實注資,復牌後應聲炒上,收造12.26元,急升80%,升幅是港股最勁;同系阿里影業(1060)升5%,已經係慢車。呢類概念股可以升到無譜,跌起上嚟同樣可以跌到無譜,「投資的我」當然唔敢落疊,「投機的我」人炒我炒,最緊要係識得有危險就跳車。陸羽仁同內地炒界傾開,佢話內地催谷「互聯網+」,即係用互聯網增值,其中幾個概念吹得最勁,包括健康、娛樂、體育,成為投機押注的博彩區。         除了孖住大科網炒作的概念股,股仔喺靜市又乘時而舞。大昌微線(567)中途停牌,暫未知原因;停牌前報0.83元,勁升71%。利海資源(195)一樣係中途停牌,停牌前報0.6元,升70%。炒股仔熱度都幾誇張!         陸羽仁

Read more

陸羽仁-三大意外

               美國公布經濟景氣狀況褐皮書,以及多項剛出爐的經濟數據都顯示,美國經濟唔得,不過,原油價格因為國際能源機構預計今年全球石油需求增幅將超出預期,加上美國上周原油庫存增幅不及預期,令油價得到支撐,能源股造好,而包括英特爾(Intel)與達美航空等多家公布業績的美企,盈利超出預期。美股得到支持,第二日向上,杜指收市漲76點至18113點;標普500指數升11點點,收報2107點;納指受到Intel股價大漲4.5%,升34點,收市重上5000點大關,報5011點。      從褐皮書報告睇到,聯儲局官員對美國經濟狀況的評估,基本上唔不太樂觀,指出美國大多數地區的經濟僅「略微」或者「穩定」增長。近期製造業活動一直都表現「疲弱」,零售銷售表現也「優劣參半」。惟房地產表現較佳,12個聯儲地區都表示有強勁增長,昨日出爐的多項經濟數據亦印證了聯儲局的睇法。4月紐約聯儲製造業指數從3月的6.9下降至負1.2,遠差過市場預期的7,且係去年12月以來首次出現負值。報告指出4月新訂單指數在負值區域進一步下滑,就業指數有所下跌但仍處於正值區域,而平均每周工作時間指數跌入負值區域。惟未來六個月商業活動預期指數則有所回升。另外,3月工業産較上月下跌0.6%,創了2012年8月以來最大降幅,亦差過市場預期的下跌0.5%。       美國經濟唔得,市場對聯儲局提早加息的預期降溫,我估美國好難咁快加息。投資者對後市信心又相對樂觀,股市恐懼指標VIX指數再跌6%至12.84的低位。再加上油價持續反彈,昨日再升4.5%至每桶55.69美元,能源股板塊跑贏大市,杜瓊斯能源指數大跌2.3%,帶領大市向上。      講開美國加息同油價,有長期良好投資記錄的億萬富豪 Stan Druckenmiller昨日接受彭博社訪問時表,佢正押注了三大「意外」,包括中國經濟改善,油價上升及美聯儲局今年之內都唔會加息。他甚至認為在一年半之內,加息都唔會發生。有趣的是,過去一段長時間,Druckenmiller多次批評聯儲局維持零利率太長時間。他建議投資者愈早作出行動,回報將會愈高。      據彭博社億萬富豪榜指標,擁有44億美元身家的Druckenmiller係投資中國的大好友。上證綜指過去12個月已經升了一倍,而佢認為「每當股市爆上,經濟於6個月至一年後會出現全面復甦(full blown recovery)」,而中國作為世界第二大經濟體,經濟復甦,將影響全球的股市及商品價格。例如會推低德國國債價格,提振歐洲出口商以及推高國際油價。而油價已經下跌了一半,明年將隨生產減少而逐步回升。      Druckenmiller現時的相應動作是沽出零售股及因低油價而受益的航空股,買入受惠能源價格上升的股份以及直接買入原油期貨。對於美元匯價走向,Druckenmiller認為美元仍會繼續走強,預期歐元兌美元會大插至0.8美元,亦繼續睇好美股及日股。      無獨有偶,前國際貨幣基金組織 (IMF) 經濟學家 Stephen Jen亦指出,美元匯價近日回軟,其實係短暫現象,預期美元價位將會再度回升,主要原因係全球大規模的「結構性沽空」美元正在回補當中。根據國際清算銀行 (BIS) 統計,美國以外全球國家及企業以美元借款的總額已達 9 兆美元,創空前新高,且大部分須在接下來幾年清償,這放將支撐美元上漲數年。除此之外,之前減持美元的全球央行也正開始轉變政策,使得美元需求增多。美元佔全球外匯儲備比重曾經由10年前的73%降至2011年的空前新低60%,但之後已回升至 63%。Stephen Jen認為,美元將爆出巨大的需求,不只來自經濟成長等循環性因素,將超越聯儲局加息掀起的短暫波動。佢預料美元兌歐元 3 個月後會升至一兌一平價。換包話說,美元仍會再升10%!不過,若然美元上升,又會對油價造成下行壓力,咁又同Druckenmiller的估計的方向不同。 陸羽仁  

Read more

陸羽仁-克強博弈

港股終於出現等待已久的調整,恒指一跌就跌五百點,單睇點數唔算少,若然睇今次個市升咗成三千點,當然亦唔係多啦。不過,如果心雄追貨,高位回頭綁住咗,都有小小無癮,喺北水主導下大時代,股市拋起嘅浪頭咁高,香港散戶真係唔易適應。         谷高股市頂住負面數據         股市大浪湧來湧去,呢個時候講太多冧巴都未必有用,因為個市如果大水湧到,豬同大笨象都飛上天,相反就變成識飛都無用。喺呢啲政策驅動嘅資金市,真正需要唔係邊個冧巴,又或者無綫幾時放丁蟹出街,而係透視中央嘅政策。         呢排個市升,陸羽仁少咗講內地宏觀數據同A股嘅關係,正式嚟講,港股咁洶湧嘅市況,係內地A股急升的副產品。在全球貨幣戰下,內地出口無可避免有好大影響,加上本身產能過剩嚴重,令中央喺經濟面受到的壓力好大,為了迎抗呢個局面,特別係第一季出來好差的數據,阿爺三月份開始大力催谷股市,包括推出各種利好措施。         由於香港已有滬港通,加埋跟住搞掂公募基金買港股等細節,搭通咗水喉,所以當阿爺谷高內地股市,內地大水順勢湧入香港。從呢個角度睇,內地股市先係主旋律,香港係水漲船高,跟住湧起。         呢幾日股市狂升,可能令大家無留意,周一中國公佈,3月出口總額8868億元人民幣,按年跌14.6%,創2014年2月以來新低,與市場預期增加8.2%差天共地。除了出口數字礙眼,產品通縮繼續維持,大堆不利數字,但股市大升,造出歡悅氣氛,負面感覺大大被沖淡,呢個亦係阿爺喺三月份預先推高股市想做的效果。         內地景氣低迷,一早睇淡無乜買股的外資看在眼中,仲保持到冷靜留意到,所以好多國際財經媒體,都對內地公佈出來數據的差勁表示意外,流露「真係差得咁緊要?」嘅反應。中國公佈的經濟數據,間接解釋咗點解外資會睇淡內地,唱空中國市場,只係佢哋諗唔到,中央會出大水沖倒龍王廟的方式去應對呢次信心危機,喺壞消息引爆前,先驅動股市大升浪淋濕晒啲炸藥,呢個亦係國務院總理李克強打股市牌來應對增長急降的博弈,部份資金就係呢個時候走埋落香港搵食,搞出香港呢個飆升三千點的短期洪峰。         托市誘因或短期降溫         如果無估錯李克強呢個牌路,股市產生的良好感覺係用來承托首季不利數字的衝擊,呢個係陸羽仁喺三月份提出遇低可以買國貨的分析基礎。在呢個分析基礎下,以股市急升緩和實體經濟下墜的安排,在四月份差劣數據陸續發表後,中央已交足功課。對阿爺來說,長遠政策係繼續想利用股市融資,成為長線利好因素,但短期托市的目標已達,個市升跌變番由市場主導多啲,甚至當內地個市再升得太多太急,中央可能降吓溫。克強總理玩股市博弈,我哋跟住佢手影炒股就啱啲。         由於股市升得多,好多大戶都開始沽貨食胡。最明顯係騰訊(700) 主席馬化騰再減持2000萬股,股價挫9.3元,昨收造161.2元,質低恒指155點,其他科網股同遭拋售。新華保險(1336) 盤前錄得大手上板,傳為基金GreatEastern減持,全日收造49元,挫3.6元,為表現最曳國企指數成份股。中國信達(1359) 疑被瑞銀減持,全日收造4.73元,挫5%,顯示減磅基金都唔少。最終大市全日跌逾450點,恒生指數收造27561點,挫454點;國企指數收報14264點,跌325點,成交金額2376億元。         陸羽仁 http://news.stheadline.com/dailynews/headline_news_detail_columnist.asp?id=326520&section_name=wtt&kw=4

Read more

陸羽仁-北水口味

上證綜指昨日突破4100點,收4121點,升2.2%,帶動港股繼續暴炒,恆指升2.7%,國指仲勁,狂抽4.3%!港股市值昨日亦創出新高,首次超過30萬億元,達到30.55萬億元。有傳媒報導,「深股通」將於今年10月開通,而「滬股通」、「港股通」的總投資額度將全部取消,每日額度亦會提高。其中,「滬股通」每日額度提高至200億元人民幣,「港股通」提高至400億元人民幣;新開通的深股通額度為200億元人民幣。 不過,目前港股通每日所消耗的額度,太約20幾億,不足上限105億元的四份之一。擴大上限額度,短期內實際作用有限,但卻反映阿爺支持港股通的態度,北水流港不止不反對,仲要擴大,呢個態度就有意思,你知阿爺係政策市,睇到阿爺的政策傾向好重要。 內地股市依家成交量超過一萬億人仔,當中有2%資金炒港股已經爆錶啦!股市成交量預期大增,直接受惠的港股,就係港交所(388)啦,所以解釋了日港交所昨日受開放額度消息影響,一度升上300元,最後暴漲近兩成至297.4元。 如今個市被北水炒起,睇吓北水口味亦好重要,唔好以為佢地乜都炒,有啲股佢地係沽緊唔係揸緊。 好似昨日北水南下的「港股通」,買入104.9億,沽出85.3億,一加一減即係淨買入19.6億(我地平時講的用了的額度就是說這個淨額),十大成交活躍股份排頭位是港交所(388) ,買入9.4億,沽出3.3億,淨買入6.1億,第二位是南車(1766) ,淨買入1.1億,買賣已較平衡,第三位國美(493) 淨買入8700萬。 最值得注意是十大榜只有三隻股係北水淨沽出,第四位海通(6837) ,沽出7.6億,買入9800萬,淨沽出高達6.6億,可以話係北水沽貨首選,明顯係因為阿爺開放一人可開20個戶口,內地擔心爆發經紀行佣金大戰,所以力沽證券股,海通昨日只升1%,大家有呢類股都可以高位套吓現,或者換吓馬啦。第五位上海電器(2727) ,淨沽出2.3億,昨日升0.1%。十大榜另一隻淨沽出的是排第9位的中海油田服務(2883) ,淨沽出1.5億,估計係唔睇好油田設備服務股的生意,佢昨日仲大升5.3%,即係只有香港人或外地投資者買。 呢啲北水榜有參加價值,解釋咗海通之類為何跑輸大市。北水愈來愈重要,佢地口味我地要知呀。 另外美企財季公佈潮重頭戲今周正式上演,市場6年以來首次預期企業盈利將會明顯收縮,據湯臣路透的報告,標普500企業季度淨利潤將收縮2.9%。而羅克韋爾全球資本公司首席市場經濟學家卡迪羅(Peter Cardillo) 警告,「市場已經處在高位,而盈利不會太好,將引發市場回調。回調8%到10%,也不足為奇。」 美股市場態度轉向謹慎,股票恐懼指標VIX指數升高超過10%不至14點。昨日美股先升後回,不過跌幅溫和,杜指跌81點,收報17977點;標普500指數跌10點,報2092點%;納指微跌8點至4988點。結束了連續三日的升勢。 今個星期,將有大量重磅金融企業派成績表,今日就有摩根大通及富國銀行等,另外還有強生(Johnson & Johnson)。     陸羽仁 http://blogcity.me/blog/reply_blog_express.asp?f=5YTPBH5B812303&id=717874

Read more

陸羽仁-佣金大戰

港股主要由內地帶動,上周五上證綜升1.9%,港股繼續炒上,恆指收市仍然進賬328點,升幅1.2%,認真唔少嘢。 我覺得內地投資者上周五早市時有點卻步,一來係此前升得實在太癲,要唞唞氣,其次係今個星期的有多項影響大市的變數陸逐出場,所以投資者停一停,睇一睇。但尾段就盛傳將有好消息,所以逐步炒上收市。 首先係今個星期內地有30隻新股招股,預計資金凍結接近3萬億元,大陸依家每日成交1.5萬億元,3萬億都會做成一定的影響。據市場估計,星期三將是資金凍結的高峰期,單日凍結資金1.7萬億至2萬億元;星期四資金面壓力最大,星期五凍結的資金將大面積解凍。 由今日起,阿爺陸續公佈3月及今年首季度宏觀資料,內地3月貿易差額、新增人民幣貸款、M2增速將於今日出爐;週二會公佈3月全社會用電量增速;週三,3月社會消費品零售總額增速、工業增加值增速、固定資產投資增速,以及一季度GDP數字。 另外,中國金融期貨交易所上週五公佈,將滬深300股指期貨持倉限額由1200手調整至5000手,並相應調整股指期貨產品日內開倉量限制。 不過到周日又有好消息公佈,中國證券登記結算公司發佈通知,明確自今日起A股市場全面放開「一人一戶」限制。 這意味著,自13日起,個人與機構投資者均可根據自身實際需要開立多個A股賬戶和封閉式基金賬戶,上限為20戶。也就是說,現在只能在一家證券公司擁有一個證券賬戶的股民,將最多可以在20家證券公司開設20個賬戶。過去6個月只限一人戶都開多咗1300個戶口,未來放開限制,一定戶口大增,炒得更熱。不過亦會爆發證券公司降佣搶客大戰,不利內地證券股。 據中信建投證券副總經理薛群表示,內地期指上周五異常波動,暴漲100多點,從大幅貼水變成大幅升水,預計本周初期指多頭將大幅增倉,肯定會對大市構成正面影響。咁多影響市場的因素集中出爐,內地市會先抽升,然後好友與淡友的激烈爭持,攻防戰會集中在4000點關口。 美股方面,上周五蜆殼石油(Shell)表示以690億美元收購英國的BG集團,以及通用電氣(GE)宣布重組通用金融(GE Capital)並回購500億美元股票計劃,推動GE股價飆升超過一成,刺激美股造好。杜指漲99點,收市重上萬八點樓上,收報18058點;標普500指數成功突破上升阻力位2090點,升11點至2102點;納指漲21點,收報4996點。總結全個星期,美股表現唔錯,杜指與標普指數漲1.7%,納指漲2.2%,係第二個星期向上。但在業績公佈期中,大市上升不多,過埋業績就可能回調啦。    

Read more

本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室