人到五十 財務自由

朋友甘仔係高級打工仔,鑽石王老五,賺幾多使幾多,人到四十幾都係租樓住,月租4、5萬係咁租,我睇到都肉痛。佢唔止唔儲錢,仲鐘意成日炒股。佢讀會計出身本來應該好識計數,但唔知點解炒股輸多贏少,可能輸得多,最近突然問我投資到底為乜? 佢好似茫無頭緒。我估佢咁迷茫主要因為炒股常輸,但我今期亦可講講投資的終極目標。   投資當然唔係為投資而投資,為炒而炒。我認為投資的總終極目標都係為咗happy。點樣才算happy?按陸羽仁的定義係,係達到財務自由的境界,下半生生活無憂,就可算happy,投資亦都到岸。   怎樣才稱得上財務自由?其實要求亦唔係非常高,只要能夠在退休時,唔使去憂柴憂米,問政府攞救濟,可以嘆住杯紅酒,計吓自己的財富,夠用到「收工」都唔使憂嘅,就係財務自由啦。(我搞緊個退休計數機,幫大家計吓要幾多錢才達到此目標)   講番我自己的經驗,自己在20幾、30歲的時候,已經諗緊呢個問題。當時太座聲稱,佢做到四十歲就要退休。我自問沒有這樣的福氣,當時希望做到50歲,可以退休,於願足矣。於是定下目標,爭取50歲財務自由,之後嘆世界又得,做自己喜歡做的事情又得。到今天,我有幸講句,我的目標已經達到了。   作為過來人,我認為做到50歲財務自由的關鍵,係「今日準備,決定未來」,所以須早為之計,最好由20幾歲就開始。我認為方向主要有三個,第一係增加工作現金流。將自已當做一家公司,試想想,如果公司生意做得穩打穩紮,有現金源源不斷地流入,能夠不斷壯大,自然掂啦。但如果這家公司,主業唔理,不斷經營副業,搞這搞那,時賺時蝕,公司好難做大。所以年青人要以工作為先,炒股為副,先投資好自己的事業。想清楚自己長遠要做什麼,有什麼目標,如何達到該目標,現在的工作估計到達唔到自己目標的,就要趁早改行啦。   第二,係儲蓄。現實中,辛苦賺來的錢,在日常的生活開支,交埋稅之後,好多人所餘無幾,因為若無節制,隨時使大咗都唔知。阿甘就係呢種例子,賺得多,花得更多,我其實懷疑佢係淨負債。我後生時已定下了目標,每月一定要儲起人工的50%以上。當初賺得唔多,的確好難,要好有定力。我用的方法頗為原始,但好有效,就係下下計住使幾多。我用錢一定去「襟機」,唔用信用卡,儲起襟機單,一個月就知道用了幾多錢。一超標就節流。   到後來人工高了,儲錢就比較容易,不過,我使錢一定按照「收入與支出不相稱」呢條原則。就係消費水平一定比同儕為低。大家可以睇睇同自己收入水平差唔多階層,他們的消費模式,或薪金與支出比例,用得比他們少就可以啦。譬如人家住山頂,我就住山腳,佢住香港,我住九龍,餘此類推。大家要記住,自住樓,屬於消費一種。我問阿甘佢一個月使幾多,佢根本唔知,用信用咭仲要俾「最低還款額」,賺咁多錢都要借信用咭,仲俾緊10幾厘息!    第三、係投資。投資對年青人而言,最大的優勢係時間長。可以享盡「複利」的無窮威力。同係5%的回報,60萬元的本金,儲蓄20年,連本帶利有162萬,但係,多10年時間,連本帶利變成258萬!   我年青時的投資傾向係不斷買樓,在香港及外地買樓。買了樓向銀行貸款,租金收入又抵消了部份月借款,補錢部份當係儲蓄。當時的想法好簡單,我買一間300萬嘅樓,首期100萬,做10年按揭。10年之後,即使樓價唔升,我已經擁有那間樓。固然啦,買樓都講彩數,當時的300萬樓,依家已經升到過1000萬,不過,樓市在期間都出現大波折,大上大落。買樓比起買股票的最大好處係,買賣樓宇好麻煩,唔會手震震就沽咗間樓啦。不過現在樓價太貴,年青人買樓投資的方式已經唔太可行,不過,當中的道理其實一樣,可以不斷買入可供長揸的資產,例如優質的股票。因為企業有借貸,股票本身也有槓桿效應,當然揀股就要非常小心,唔可以買廢股啦。   只要做足上述三點,要達到50歲財務自由,並不困難。有網友有話,我已經4、50歲啦,仲未可以財務自由,豈不是好大鑊?咁又未必,且聽我再分解。   陸羽仁 ————完————- 本文刊載已獲作者授權 為表謝意。十分支持大家到陸SIR專頁瀏覽! https://www.facebook.com/pages/%E9%99%B8%E7%BE%BD%E4%BB%81/204865603047048  

Read more

聚財

近呢幾年,股市上上落落,唔生唔死,搞到心情好鬱悶。最近與舊朋友聚會,當中不少都係事業有成的中產,薄有身家,席間講起投資,大家都感歎,唔知有乜好買。     在座有個律師,他以前係半個炒樓專家。有錢就買樓,待價而沽,買一開二,炒得都幾過癮,但近呢兩年投晒降。原因係政府打擊樓市,推出雙倍印花稅,貴價少少嘅樓都要俾8、9%稅,加埋1%經紀佣金,使費接近10%,即係買入即升10%都無肉,短期轉讓,仲要加稅。咁嘅情況,炒家、半炒家都無得玩,只有退場一途。   另一位朋友係老師,她保守好多,從來都唔鍾意炒買,前幾年股市旺場的時候,買吓股票,但都「蟹咗」,近年買股甚少出入,另外做吓人民幣存款,賺少少利息。   大家傾起,都人到中年啦,究竟有乜嘢,可以作為較長線嘅投資呢?有人問起,買基金好唔好?我認為基金其實都有好嘢,但唔係有研究,多數唔識揀,普通人買基金都是「瀨嘢」多,原因是專買一些流行基金。例如呢期興炒金磚四國,基金公司就整出一大堆金磚四國基金,賣晒廣告,散戶就買金磚四國基金;呢期話利息跌債券得,基金公司又搞債券基金,佢哋又一窩蜂去買債券基金。不過,唔知大家有否留意,一個熱潮唔會維持好耐,一兩年就過晒。在座有位朋友係人事經理,話自己唔炒嘢,但係買埋一大堆流行基金,我問佢知唔知那些基金是搞乜東東,佢連個基金名都講唔出,只知道有啲係新興國家基金,有啲係債券基金,講基金公司名就更加講唔出啦。   唔少人都係咁,唔想炒股,就買基金,我覺得都幾弊,因為這類基金熱門,都係在那種產品熱門時搞基金,入貨價自然高,係買呢啲基金等如經常摸頂買貨,基金公司賣完一浸熱門貨,就閃人去搞下一個熱門概念。之前搞落的基金不同熱門,未必找最好的芬佬去管,但你仍然每年要俾管理費2至3%。買貴嘢之餘,仲俾人抽水。所以話,唔識走去買基金做長遠投資,唔係一個好方法。   我覺得比較好嘅方法,就係揀個大方向,低價買入,不斷聚財。原本經濟ok樓價較低時,買樓投資,係最好嘅聚財方法,因為買樓有槓桿,放低三成買咗十足資產,只要入貨價唔計,供十零年成舊資產都係自己,仲可能會升值。不過依家樓價貴,已經行唔通。同學反覆問我,樣樣嘢都好似唔得,究竟邊樣至得呢?   我叫大家先諗一個問題,估估中國經濟在未來十年八載,究竟得唔得?如果覺得係得嘅,就趁低價買些與中國經濟相關的資產。如果唔睇好中國經濟,覺得歐美掂啲,就買歐美資產。關鍵係先抓住一個大方向,然後每當佢低價時就入貨,長期持有。大家要留意嘅係呢種方法講就易,做起來頗難,因為期間必然出現波動,一般人唔係咁易把持得住。   我不妨舉兩個我認為可以「聚財」的例子給大家參考。如果你認為中國經濟長遠係得嘅,可以考慮越秀房產信託基金(405),現價3.62元。佢喺廣州擁六個物業,但最主要資產係廣州IFC。越房市賬率只有0.619倍(即股價對資產淨值的比率),你買佢,等如用緊62折買廣州IFC呢舊資產,平咗38%,有一個唔錯的安全閥。但記住!記住!記住!要有心理準備,雖然資產有折讓,股價仍然係有下跌的可能。大市唔好,佢股價仍然會跌。不過,如果長揸5、7、10年,蝕錢的機會唔會好大,大家唔好忘記,每年還有接5至7厘息收。   另一隻招商局中國基金 (133), 現價10元,息率4.7厘。折扣就更誇張啦,市賬率0.395,四折都唔夠。佢嘅資產主要係金融股、招商銀行、興業銀行和中誠信託加埋佔佢54%資產,其餘有26%是文化傳媒,其他資產包括能源、製造、科技、醫藥及地產等(資料詳情見 http://goo.gl/2u9HJm)。惟一的缺點係資產比較側重金融業。市道熱的時候,基金炒得好貴,市道唔掂的時候,基金就出現好大的折扣。招商局中國基金市帳率仲低,得0.39倍,即係39折,平咗61%!有咁大個折讓頂住,都算有安全空間。不過,又係嗰句,記住!記住!記住!大市唔好股價仍有機會下跌。但佢跌得愈深,就更加抵買。   買這些股票,等同用平價買了廣州頂級寫字樓,或者多間大銀行及媒體的股權。由於折讓有相當,除了較安全外,亦變相有一定嘅槓桿比率,例如招商中國基金,等如放低近四成錢,就可以買十足資產。有錢又不妨可以買少少,可以做到聚財的效果。到樓價跌番到咁上下時,又可以沽咗佢地去買樓。   講到風險,好多人怕風險去存人仔,大家千奇唔好以為咁就完全無風險,因為中國經濟一旦崩潰,人仔一樣會大跌。大家睇好人仔匯價,即係對中國經濟前景有信心,買越秀房產信託基金同招商局中國基金,豈不是一個更好嘅投資?   溫馨提示:大家記住唔好睇完呢篇文章,就去狂掃貨。股票可升可跌,長線投資買股票,唔可以心急,睇定啲,慢慢見低位才買,贏面會大啲。另外買股票要留有餘地,不宜瞓身,呢啲都係郁得好慢的股份,不用心急進攻也。   ** 博客文章文責自負,不代表本公司立場 ** 陸羽仁 ————完————- 本文刊載已獲作者授權 為表謝意。十分支持大家到陸SIR專頁瀏覽! https://www.facebook.com/pages/%E9%99%B8%E7%BE%BD%E4%BB%81/204865603047048

Read more

加息遙遠

美國聯儲局公布會議紀錄顯示加息比較遙遠。對上一次會議記錄顯示,聯儲官員認為經濟成長出現反彈,但還沒到太強的程度,也沒有暗示將在短期內升息,又認為「持續性的刺激政策不會造成通貨膨脹率大幅攀升的風險」。聯儲局的態度,符合投資者諗法,市場氣氛轉好,大市反彈,杜指創出5周以來最大漲幅,杜指收市大升159點至16533點;標普500指數漲15點,收報1888點;納指升35點,報4132點。 聯儲局昨日公佈上次聯邦公開市場委員會(FOMC)會議紀要。紀要顯示,幾位聯儲官員認為經濟增長存在下行風險,而多數官員則認為通貨膨脹狀況穩定,繼續採取刺激性措施來壓低失業率的同時,不會帶來通脹率大幅上升的風險。     另外,聯儲官員表示,有必要改善對未來利息之路的前瞻指導,「早期溝通」將有助於「提高貨幣政策的透明度」。會議期間,也討論過退市策略,包括一系列可使用的工具,為退市作準備,確保在債息、銀行利息及其他借貸利率上升的同時,可以控制通脹,當中包括透過隔夜逆回購協議,或調節銀行存放在聯儲局的定期存款利率,吸納市場上過多資金。 更重要的是會議記錄透露,討論加息方式只是進行「謹慎計畫」,並不暗示將在短期內升息。當局仍未有最終決定,短期內不會調整退市策略。 富國銀行私人理財夠公司代理首席投資官科隆克(Darrell Cronk)表示:「聯儲局會議紀要,沒有很令人意外的東西,這意味著聯儲聲明立場也更為鴿派。」科隆克認為美國經濟基本面因素很好,美股仍將繼續攀升。     美國零售情況也向好。包括珠寶零售巨頭蒂芙尼(Tiffany & Co) 、超市連鎖Target及美國第二大家裝用品零售商勞氏 (Lowe’s) 等零售巨頭,昨日公佈業績,令市場再度聚焦零售股。蒂芙尼第一財季盈利飆升50%,又上調全年每股盈利預期。股價勁升9.1%,係表現最好的標普500指數成份股。 Tiffany所有地區銷售額均有所增長,佢全球同店銷售升11%,美國升8%,亞洲升10%,日本升30%,歐洲跌3%。雖然日本競升可能係消費者趕在消費稅實施前購物所致,但除歐洲外,其餘各市場皆向好,美國的8%增長亦帶動市場認受美國零售市場正在復甦。 Target季度盈利下跌16%,但營業額好過市場預期,股價升1%;而Lowe’s季度盈利增長16%,但營業額卻低過預期,股價跌微跌0.2%。標普零售股指數昨日反彈1.2%,係推動大市的主要動力。     截至昨日,標普500指數成份股企業,已經有約96%的企業公佈了業績,根據湯森路透資料,季度盈利增幅為平均為5.5%,營業額增長2.8%。儘管較往年有更多企業的盈利超過了預期,但營業額超過預期的企業則減少了。而分析師對今年的平均預計增幅為9.1%,明年為11.4%。美銀美林的今明兩年的盈利增幅均為8%,對今年餘下時間和明年的企業業績前景看法已變得較為謹慎。 但總的來說,美企盈利仍呈一個溫和向好走勢,雖說這種走勢未足以推動大市大升,但在資金咁多時,同樣好難睇得太淡。 陸羽仁 ————完————- 本文刊載已獲作者授權 為表謝意。十分支持大家到陸SIR專頁瀏覽! https://www.facebook.com/pages/%E9%99%B8%E7%BE%BD%E4%BB%81/204865603047048

Read more

微微減辣

中港股市彈完美股彈。科網股及生物科技股大覆反彈,帶動美股顯著造好,杜指及標普500指數齊創歷史收市新高,杜指升112點至至16695點,升幅0.7%;標普500指數漲18點,收報1897點。納指跑贏大市大升72點至4144點,升幅1.8%。以全年計,到昨日標普500指數全年上升2.6%,杜指微升0.7%,納指仍跌0.8%。 美股朝早明顯抽上,之後在高位橫行到尾。科網股明顯反彈,Facebook 及Yelp漲超過4%, LinkedIn彈2.4%, 之前慘跌的Twitter大彈6%至33.94美元。 美股突然一彈,好多本來睇淡的交易員一頸血,大嘆唔明為乜會升。美國大市有幾大升因。第一,咁多人睇跌,自然好多人沽空羅素2000指數,挾淡倉係升的主要原因。早前跌得多的納斯特克互聯網指數升近3%,SPDR生科ETF升3%,都係跌得多挾得多之象。     第二,中國印度都升。中國上週五發報「新國九條」所賜。阿爺已經好耐冇出招刺激個市,股民見到有政策出臺,就好似久旱逢甘露,反應劇烈。最近跌到死死嚇嘅煤炭、電力股大幅反彈,推動漲停板,A股彈升超過2%。另外印度雖然無新國九條,但昨日股市大彈2.5%創歷史新高,因為大選結朿,按票站調查顯示親市場的Narendra Modi 應會勝出。 第三,全球債券都好,10年期國債債一度低見2.6厘,利率環境穩定。 而家美國主要指數一如我早前所料創咗新高,又睇吓有無力再上啦。     另外香港政府計劃放寛樓市辣招,其中最重要的,是放寬豁免換樓客的六個月換樓期計算,特別是在購買樓花方面,當局考慮將六個月換樓計算期限,由現時一買就計,改為等到入伙收樓時才開始計。 此舉會吸引更多換樓客買新樓,因為若買遠期樓花隨時有年幾時間慢慢賣手上的樓,仍可享受換樓低稅,但對想沽二手樓者不利。政府此舉有少少向發展商讓步,但同時可加快一手樓去貨速度。暫時睇唔到對樓市有好大刺激,亦唔覺政府會再大力減辣。 陸羽仁 ————完————- 本文刊載已獲作者授權 為表謝意。十分支持大家到陸SIR專頁瀏覽! https://www.facebook.com/pages/%E9%99%B8%E7%BE%BD%E4%BB%81/204865603047048

Read more

股係自己嘅好

港股佛誕休市,假前港股唔係咁靚仔,主要係內地公佈數據反映經濟持續放緩。香港對內地數據反應強烈,內地就相對平靜,A股昨日牛皮,上證指數全日波幅只有百零點,最終微升唔夠1點,幾乎可以用水波不興嚟形容。   家測試緊22000點有無反彈,早排揸咗21500點收回價的牛證股民,家隨時係鱷口徘徊嘞!   陳總歎投資環境攞命 呢排港股氣氛平平,大家觀望情緒高漲,依家基金經理心態係無論中港都係處於經濟調整期,買乜都好容易中招,部份資金寧願落注係美英市場。外匯基金宣佈最新一季業績,港股蝕咗幾十億,總裁陳德霖做定期望管理,話今年係投資困難的一年。 金管局陳總咁講,固然有大機構高層行騎樓底都戴鋼盔的作風,但亦唔係完全無根據。以金管局的組合嚟講,唔可能唔揸啲港股、外匯同債券,但呢幾類資產係美元轉強下都好可能受壓調整,咁搞法等如要綁住兩邊手同人打交,要追番唔輸已經唔易。嚴格嚟講,香港資產係用美元計價,故此無論股票、物業,都可以歸入美元資產類別,呢啲投資工具喺美元轉強、美息向上的大環境下,做到保本已經唔易,遑論升值。 以金管局的網絡同資源,連佢哋嘅總裁都話今年投資難度咁攞命,散戶係咪應該要打醒十二分精神先!  黃金周旅客數字公佈,錄得自2003年自由行開放以來首次下跌,零售股表現弱,連帶受惠自由行的收租股九倉(004)股價都被波及,周一收報52.65元,挫逾3%。         當九倉股價下跌之餘,持有九倉控股權的會德豐(020)主席吳光正家族,就入市增持旗艦公司會德豐股份。吳主席一向以數口精見稱,有人就問從中係咪可以見到微言大義呢?         地產公司大股東增持股份,今年都見唔少。中環茶友話人嘅心理好得意,有人講笑話飯是隔籬的香,文章卻是自家的好,咁股票又點睇呢?隔籬飯香係因為飯係阿媽煮,食得多就會悶;文章係自己寫,咁就百看不厭,至於股票點睇,分野就在於係咪自己經營。若然盤生意係自己,落足成擔心機,當然特別認識到佢嘅優點,如果有錢自然要買貨,買貨都自然要買佢先。         主婦食家口味有分別         以會德豐為例,佢最主要嘅資產係九倉股權,近年開始大舉進軍房地產,經過一輪播種,中港兩地項目都開始踏入收成期。雖然內地樓市今年開始「立立哋」,但會德豐不少項目已經銷售,未來資金同盈利就會回籠,作為大股東當然覺得抵買,加上海港城呢啲咁靚嘅資產,長遠唔會點衰,秤過度過有閒錢在手,就會諗不如捧番自己場,好過周圍搵投資啦,呢個係從基本因素去分析。         至於基金經理對資產股失去興趣,係覺得美國收水,不利呢類股份,佢哋係從不同資產價格同回報比較去決定點落注,唔係從個別公司的經營角度去睇。         從基金經理以至其他散戶立場嚟睇,盤生意唔係自己,就好似出街食飯,啲餸唔係自己煮,咁就要講啱唔啱自己口味,仲要講有無新鮮感,內裏無乜感情因素,咁感覺又唔一樣。茶友打咗個比喻,大股東係主婦,梗係鍾意食自己的住家菜,基金經理係食家,周圍去揀好嘢食。         要記住係,大股東自己早已揸到成手貨,唔買得幾多,增持的承托力有限,基金經理先係專業買家,所以短線計,大股東增持,同散戶應唔應該跟住入貨,道理一字咁淺啦! 陸羽仁 ————完————- 本文刊載已獲作者授權 為表謝意。十分支持大家到陸SIR專頁瀏覽! https://www.facebook.com/pages/%E9%99%B8%E7%BE%BD%E4%BB%81/204865603047048

Read more

一個贏錢的阿伯

上個星期講到五個可以令你輸大錢無得退休的原因,各界反應熱烈。好多朋友話會剪低篇文章,貼喺牆上面,時刻提醒自己,更會畀仔女睇,叫佢哋唔好做呢啲蠢事。         特別係文章裏面提到的碌卡消費,原來好多人都唔知道只還最低還款額(Minpay),年息會去到35厘,還唔足Minpay,仲升到40厘咁恐怖。之前有網友問我,上海同香港股市互聯互通,個市會唔會轉好呀?佢可唔可以碌卡借錢入定貨?又問我有冇股介紹?         碌卡炒股無運行         我話其他投資問題答你唔到,但碌卡炒股呢個問題就非常容易答。唔碌卡借錢,一年已經慳到35%至40%啦。呢個世界,幾難至搵到一年必穩賺咁多的投資?即使係世界第二大富豪、股神巴菲特,佢投資的每年平均回報都係15%至20%,如果你搵到一項投資,可以年賺35%至40%,年年如是,過得二三十年,你就可以做世界首富啦。攞你錢的發卡公司賺咁多錢,等如你畀人攞緊咁多錢,你就知幾大鑊啦。所以,欠緊卡數嘅人,還卡數就係穩賺不賠的投資啦。         你可能會問,借卡數炒股,唔使借成年,借一兩個月炒完賺咗咪還番畀佢囉。我就話財不入急門,你愈心急要一炒即中,通常就死硬啦,想一兩個月,結果就借咗一兩年,利疊利,命都無。         有網友早前都問過我,唔借錢,唔炒股,唔搏殺,邊有回報?點會發達?講起回報,我經常講要分開「投資的我」同「投機的我」,「投資的我」買大股無死錯人,每年低揸高沽就掂,甚至長揸都得。好多人覺得好悶,覺得這種做法唔會成功,就唔會做。我不妨講個成功的真實個案,同大家分享。         我有個朋友的90歲老爸剛剛過身。清點遺物時,發現竟然留低價值160萬的股票。仔女都非常驚訝,點解老爸會剩低咁多錢?或有人話,160萬,都唔算好多。但呢位阿伯後生未退休時,只係啤膠工人,每月收入肯定唔會多。阿伯過身時90歲,65歲退休,已經退休25年,正當係啤膠行業開始式微的時候。老實講,一個啤膠工人,退了休25年,死後仲剩低160萬遺產。你話喺香港唔可以累積財富,又係唔係太睇小自己呢?         唔聲唔聲成小富         我同朋友了解一下,點解佢老爸一個草根工人可以剩到咁多錢成為小富。朋友所知不詳,只知梗概。他老爸煙酒不好,平時唔會亂花錢,25年前攞到幾十萬退休金,大部份買了股票。佢老爸買嘅股票,都係大股,例如中電(002)、長實(001)、和黃(013)同中鋁(2600)之類。買咗之後,唔經常進進出出,通常係見到回報比較高嘅時候才沽出。平時就靠老人金、股息同仔女少少飲茶錢,就搞掂日常生活。         朋友舉了他老爸買中電嘅例子。早幾年約30幾元買入,坐咗幾年,食咗幾年息,2009年見到股價升到60幾蚊,就沽咗。眼光又的確幾準,中電之後跌番落去50幾元,上星期至上番60元,阿伯沽完中電都差唔多啦。朋友話老爸平時都有睇吓報紙,會留意吓中電的生意情況,但唔覺得佢對中電有咩遠見卓識,只係覺得中電係電力公司夠穩陣,又派高息,所以就買吓;至於沽貨係見佢當時升得咁快咁急所以沽,亦唔係睇通佢有乜唔妥。         低揸大股慢慢坐         阿伯最後剩低的股票,比較多的是和黃,佢2009年時入貨(應是沽了中電套現咗),股價只係70幾蚊,上周已經升到106蚊。講開和黃,順帶一提陸羽仁在三年前和黃70幾蚊嘅時候,都講過幾次,和黃未來幾年盈利應有增長,買得過。當時我公司有位靚女睇完呢個專欄,就問我好唔好買,我話短期上落唔敢包,睇中長線就可以,靚女就買咗,到最近沽出部份,執咗唔少,話要多謝我。我話唔使多謝,賺錢都係因為佢夠耐性,可以坐足幾年,無買完回少少就走啫。         講番阿伯,睇佢一生經歷,讀書唔多,收入微薄,後生時仲有少少好食懶飛,鍾意就開工,唔鍾意就唞吓,到老來才定性。退休25年,90歲過身,死咗之後遺產160萬元。如果大家有用過我喺《巴士的報》(www.bastillepost.com)搞的「巴士的退休資金計算機」,都會知道夠錢畀自己到90歲過身都唔易,阿伯仲剩番咁多畀仔女,可以稱得上係一個成功的投資者。         唔明股票唔去買         大家不妨睇睇阿伯的投資經驗,有甚麼地方值得我哋參考同記取。首先係佢唔會買三四五六線、古靈精怪嘅股票。阿伯成日話,讀得書少,有好多嘢唔明,怕俾人滾,就唔會買古靈精怪嘅股票,只會買大公司股票,因為知佢哋做緊乜,中電發電、長實起樓、和黃做超市碼頭,隨口講得出。我聽到之後滴晒汗,一個啤膠工人同股神巴菲特講買股嘅方法,其實差唔多?巴菲特之所以唔買科網股,冇中招,原因就係佢唔識科網呢盤生意,所以就冇買。好多人想刀仔鋸大樹,買一博十,專買古靈精怪的股票,結果連刀仔都輸埋。         第二點係專買藍籌大股,貪佢哋穩陣,唔會執笠。阿伯成日都問,呢間公司唔會執笠啩?可能係後生的時候見過銀行擠提,銀行執笠,話60年代恒生都試過擠提啦。所以對公司穩唔穩陣,特別小心,連銀行股都唔買。買股死坐最怕公司執,佢要避開可能執笠的大股。         長揸連息都食埋         第三點係肯長揸。呢個同佢買股想食息有關係。所以會揀比較高息的股票。和黃買咗之後,股價下跌,都冇所謂,可以坐吓,收吓息。見到升,都唔需要急着沽出。佢成日講,沽咗隻股票,都唔知買乜。長揸,就可以食到較大的累積升幅。         自我控制最重要         第四點同投資組合無關,但同人生觀有關,係量入為出。阿伯好早已經離開仔女,獨自生活,主要靠自己養活自己。雖然花費不多,但生活也算開心。財經報紙經常睇,但落注唔多,問佢睇咁多做乜,佢話可以知道世界發生乜事,可以知多啲,充實自己。其實,當你對世界發生嘅事知得愈多,愈了解,就愈想有行動,忍唔住在股場進進出出,控制唔到自己。至於阿伯點樣能夠知得多,買賣得少,點解咁忍得手就唔知啦,可能係怕買得多會輸唔夠錢生活,亂炒股都係一種花費。         佢生活能夠做到量入為出,睇住有幾多股息收入,仔女會畀幾多茶錢,生果金有幾多,就使幾多錢。事實上,生活過得開心,又唔一定要豪花。最難得的是阿伯知道自己未來的生活係點。而好多人都沒有這個概念,無諗過退休以後,生活會係點過。         《巴士的報》搞那個「巴士的退休資金計算機」,好多網友撳完之後大歎,點得呀,點可以累積到咁多錢夠退休呀,唔會成功嘅。我就舉一個無乜讀過書嘅啤膠工人成功故事畀大家睇睇,要做到財務自由,其實唔難。關鍵係知道自己要做啲乜,又肯去做,就雖不中,亦不遠矣。問題係好多人都唔肯去節制自己。         不知道大家是否記得,幾年前有一名英國籍退休法官,因騙取綜援被控。當年佢在香港做法官,仲係老外,一年可以賺幾多錢?但點解退休後要住公屋,仲要呃綜援?錢去晒邊?唯一的解釋就係亂咁使錢啦。         所以話,做唔做得到財務自由,退唔退到休,與讀幾多書、每月賺幾多錢無關。香港係資本主義社會,錢會搵錢,以資本累積資本容易,狂花錢損耗資本呀。   陸羽仁 ————完————- 本文刊載已獲作者授權 為表謝意。十分支持大家到陸SIR專頁瀏覽! https://www.facebook.com/pages/%E9%99%B8%E7%BE%BD%E4%BB%81/204865603047048

Read more

唔好sell in May?

朝向5月,美國市場又在議論是否要Sell in May(5 月沽貨)啦,雖然呢件事過去經常得,但今年美國交易員好似有少少窒手。   先睇睇歷史數據,Bespoke的聯合創辦人 Paul Hickey話,Sell in May的模式有66%機會中,若你在11月到4月買美股的回報,比5至10月買美股平均高3.5倍。   不過CNBC出咗條新聞,個題話「點解今年5月沽貨唔係幾掂」(Why it may not be smart to sell in May),主要理據是美國企業盈利可以推動股市向上。花旗的首席美股策略師Tobias Levkovich話,烏克蘭係全球股市的主要風險因素,但美國企業的盈利得,所以佢估今年夏天美股得。   昨日收市後公布業績的微軟、亞馬遜、Starbucks全部都得,令市場人心振奮。Levkovich話,佢地認為今年上半年係波動市,但隨著企業盈利改善,下半年股市會好啲。   UBS紐約交易主管Art Cashin就從技術因素睇好,話標普500指數而家1878點,要留意1885這個阻力位,若然升穿就會將大批「熊BB」(baby bears)殺晒。佢亦話好多華爾街大名公司盈利都好好,利潤率創新高。不過他也留意到強勁的季度業績係財務工程和大量削支造成,小心這些利潤不能長期持續。   不過結論仍然係唔好在5月大力沽貨。   睇番昨日個市,經濟數據美國經濟數據好壞差半,抵消了對股市影響,美企業績成為左右大市的主要力量。蘋果業績靚仔,加上動作多多,加大派息之餘,又回購900億美元股票,兼一拆七,氹到投資者非常開心,股價勁升8.2%至567.77美元,進一步推動投資氣氛。科技股板塊升超過1.1%,領漲大市。   美股先升後回穩,杜指午後一度由轉跌,主要係受俄羅斯又玩嘢,喺烏克蘭旁邊搞軍演,令到烏克蘭緊張局勢升級。杜指收市企穩,收16502點,無升跌,標普500指數微升3點至1879點,納指跑贏大市,升21點,收4148點。   美企業績公布進入高峰期,昨日有好多家企業公布業績,科技科網股業績尤其出色,Facebook、Citrix、F5 Networks及德州儀器都好過預期,Facebook比起蘋果,業績更好,今年首季盈利增加近兩倍,營收亦較去年大增72%,兩項數據都超出市場預期,不過股價就不升反跌。   至目前為止,已經有32%的標普500成分公司公佈了財報,其中74.8%的盈利勝預期,53.5%的營收超出預期。營收增長最大的行業來自石油與天然氣行業,同比增長率為9.6%。其中表現比較勁嘅係 Cabot Oil & Gas,首季盈利較去年更係增長了1.5倍至1.07億美元。營收增長36%至5.1億美元,遠超同業的平均增長7.6%。Cabot Oil & Gas股價昨日升超過半成至37.97美元。   陸羽仁 ————完————- 本文刊載已獲作者授權 為表謝意。十分支持大家到陸SIR專頁瀏覽! https://www.facebook.com/pages/%E9%99%B8%E7%BE%BD%E4%BB%81/204865603047048  

Read more

搵1000萬的五個方法

上次我講了個輸1000萬的故事,有網友反映事件很令人沮喪,希望我寫番篇「如何搵番1000萬」來補數,我從善如流,馬上動筆。   第一個方法,嫁人。最好搵個七、八十歲的富翁或富婆嫁/娶咗俾佢,如果女的職業是護士,男的職業是風水師,有較大機會成功,你睇富豪三太和在赤柱的哨牙通,都係呢種例子,不過成功機會太低,十萬中無一。   第二,戒賭。若然嫁不到娶不到有錢人,一般人的想法就是去賭一舖,以求一朝發達。以賭場為例,你見賭股炒翻天,就知道贏的只是賭場,拉長來計賭客永遠輸錢,因為賭場中各種賭博,賭場都以機會率取勝,賭仔長賭必輸。在股市這個大賭場也是如此,好多人抱賭博心態去炒神仙股去炒衍生工具,好易輸死。要累積財富,就由戒賭開始,即使不能一朝到站,起碼向著正確方向進發。   第三,複式投資。不要少看投資複式增長的效果,有一個叫「七十二律」,即是每年有10%回報,把回報的錢再投入投資,只要7.2年就可以翻一翻。若你今年有100萬,每年有10%回報,23年多一點就有1000萬。如果你今天32歲,已有100萬儲蓄,做到每年有10%回報,真係55歲可有1000萬上岸。你話我32歲無100萬噃,唔好忘記如果你仲做緊嘢,從工作不斷有新錢加入去投資的資金池中,即使起步時得三幾十萬,都有類似效果。關鍵係盡量保住不輸,反而唔使強求高回報。至於投資對象,好多不同的東西都可以,難題是要有相當技巧,才能每一年在不同投資標的中,揀到既穩陣又有10%以上增長的對象。   第四,買樓。好多人唔識揀投資對象,所以在樓價平時買樓,係最容易的投資。2003年沙士後你用100萬俾首期在港島買間330萬的樓,如今隨時值1000萬。買樓有借貸槓桿,是一個較大碼投資,買完樓要供樓,是一個強逼性的儲蓄,若入場時間好,是一般人較易把握的投資,可惜現時香港住宅樓價太貴,難以入場。有些新發展區商舖可能還比較合理,但銀碼較大,加上無經驗者好難揀到好東西。   第五,低買好股。每年股市都有低潮,要避開高峰,在低潮時買股,笨笨地每年在股市低潮時低買好股,不斷累積,收到息又投入去買股。見升得好多時,可以賣一點,但不用清倉,高位減倉,低位加倉,年年如是。在報紙唱到好淡時買股,講到好好時沽貨,累積咁做十零廿年,其實到50幾歲時有1000萬都唔係咁難事。   陸羽仁 source: http://www.bastillepost.com/hongkong/%E9%8C%A2%E8%B2%A1%E4%BA%8B/%E6%90%B51000%E8%90%AC%E7%9A%84%E4%BA%94%E5%80%8B%E6%96%B9%E6%B3%95?r=w

Read more

本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室