大市已升近淡倉既「止蝕位」，講講做法。 我提議既策略，有兩種。第一種係SPH，上過期權班既朋友一定會識做，好處係贏面高。第二種係Debit Put Spread，係有限風險睇淡既策略。 先講SPH。呢一刻仍會有錢賺，我認為可以take profit。現時，大市要再跌至25500點或以下既機會已經唔大。跌唔落，基本上都幾肯定今次只能賺安慰獎，可以先平倉，再等機會。 Debit Put Spread，係純粹睇淡既策略，由1月9號開倉到依家，恒生指數差唔多升咗600點，所以無可避免要輸啲錢。我自己，會睇多兩日，到下星期二如果個市繼續唔跌，就會逐步減淡。 風險聲明：筆者為證監會持牌人。以上內容並不構成投資建議。投資者於投資前必須充分了解產品風險，自己的財務狀況及投資目標，並諮詢專業顧問。

首先，講一樣嘢。上過我期權班既朋友，應該會記得，我第一堂就會講，Naked Short Call，盡量唔好做。 第一，識睇期權價格既話，相信都會知道，呢個策略本身係無乜著數，就算賺到，通常回報都唔會多。第二，輸既話，風險好大，愈輸會愈加速，風險好大。 有朋友上星期做咗Short Call，問我可以點救。老實講，用錯策略，挾咗先問，真係無乜嘢可以做，唯有止蝕。 所以，首先，我開淡倉，通常會用有限風險既策略，例如係Debit Put Spread。呢種策略既好處係，估錯方向都好，Delta會一路減少，即係會愈輸愈慢。相反，估中方向，有一段Delta會持續增加，即係會愈賺愈快。 估啱方向，固然開心；萬一估錯，要救倉，都有得救。因此，策略選擇都好重要。 至於恒指，已不經不覺回升至通道頂，加上已升近去年12月5日，下跌裂口既阻力位，我自己睇會有調整，暫時目標為通道中線大概25000點水平。止蝕位，為12月高位27260點。 風險聲明：筆者為證監會持牌人。以上內容並不構成投資建議。投資者於投資前必須充分了解產品風險，自己的財務狀況及投資目標，並諮詢專業顧問。

  呢排個市其實幾好做。 淡倉底，跌得多可以隨量食吓糊。而反彈，久不久就出現，力度有，但持續時間唔長，變咗一開淡倉個市就跌，心理壓力較細。 睇返港股個市，成交繼續薄弱，下跌股票又多，大勢仲係向下居多。暫時，繼續先睇24500點。如果跌到，再睇支持力度，先考慮點做。 噚日講過，環球主要股市，基本上都係處於弱勢。全世界大把平股票買，變咗單靠一個平字，係唔足以令港股轉跌為升。暫時，仍然唔會諗買股票住。 順勢有錢賺，繼續原來既策略就已經可以。用有限風險既策略，計好數，無乜好擔心。未到24500點前，如果有市況有變，會再update大家。 風險聲明：筆者為證監會持牌人。以上內容並不構成投資建議。投資者於投資前必須充分了解產品風險，自己的財務狀況及投資目標，並諮詢專業顧問。

  先祝大家新年進步。 之前一直都講，方針係中線睇淡，恒指目標暫時仍睇24500點，但有機會轉變。會再觀察住個市，有變再update大家。 呢啲市，短期既升跌，真係無得估。新年前，港股仲好地地咁升，加上美股又向上，講真，邊個會估到今日可以跌成咁。睇返今朝出面好多市評，都睇錯哂。但只要睇長少少，就會容易睇好多。以中線情況去睇，港股此刻仍未有睇好理由，用有限風險既期權策略造淡，仍然係策略主調。 另外，如果大家有睇環球MSCI指數，就會知道我哋現正係處於一個環球跌市之中，主要股市之中，基本上全部都差。硬係要揾比較好既，只有新西蘭、印尼。 再俾多幅圖大家睇。 圖中有三條線，係三隻ETF 2018年既走勢。最好果條，係MSCI 香港ETF，成份股中無中資股，一年回報跌12.72%。中間果條，係MSCI A股ETF，一年回報跌30.96%。最差果條，係土耳其，一年回報跌44.12%。 睇完，我諗大家會明白多啲嘢。 總結，環球跌市中，全世界會有大把股票買，因此，單靠估值便宜呢個因素，絕對唔足以令個市轉跌為升。要睇升，我會等個市既走勢完全先做。暫時，策略仍會以造淡為主。用有限風險既方法，計好數先做，風險就唔會高。 最後，今晚有課堂，會講更多部署方法。報咗名既朋友，今晚見。 風險聲明：筆者為證監會持牌人。以上內容並不構成投資建議。投資者於投資前必須充分了解產品風險，自己的財務狀況及投資目標，並諮詢專業顧問。

呢排估短線方向，都唔會好中。但其實問題唔大。今日，想分享我自己既部署。 噚日，大概26200點位置，我自已做咗第一注淡倉，策略係用較長期既Debit Put Spread。另種方法，好處係，風險有限，同有仇報。 有朋友問，可唔可以做Long Put，我覺得都可以既，但就要記住要小注、高槓桿，同埋要有輸哂拎出到既金額既準備。Long Put，有一個唔好處，就係有時間值損秏。如果頭幾日錯方向，就唔係咁容易追返。 做長期Debit Put Spread，唔同既地方係，未必一定會輸時間值，只要「最後」方向正確，就會有時間值賺。而玩呢種策略，其中一個重點，係要揀適合既期權月份開倉。揀得啱，短期就算要挨價，最後都有機會贏返。 落第一注淡倉，係因為到咗第一個阻力位。下一步，我會等恒指出現陰燭，就會加第二注淡倉。 好多朋友話呢個係政治市，睇圖無乜用。其實都係，呢排用圖表方法去睇市，我自己都時有中招。所以，策略既時期我拉長咗，買既就係特朗普嚟緊呢幾個月內會再反口。 做Debit Put Spread，原因係，就算最後真係估錯市，都唔會死人。相反，如果估啱，回報會比風險更高。呢個就係我做以上部署既原因。 趕緊篇講淡倉部署既文。識得點做，就唔會怕被挾淡倉輸大錢。有興趣既朋友可以留意。 風險聲明：筆者為證監會持牌人。以上內容並不構成投資建議。投資者於投資前必須充分了解產品風險，自己的財務狀況及投資目標，並諮詢專業顧問。

  噚日講過，如果上週持有咗好倉，可以先行食糊，等低位先買返。今日，大市出現咗少少調整，我自己都開始買返少少好返。再跌，再買。 策略方面，Credit Put Spread、Debit Call Spread、Long Call，三種睇好既方法，如果大家都識得用，做trade就會更得心應手。 照睇通道，12月底前，恒指有機會上試28000點左右，上升幅度未必足夠做Long Call。要大贏面，大市微跌都贏，就做Credit Put Spread；要回報高啲，就做Debit Call Spread。兩者都係有限風險，只要注碼唔係玩得過大，其實都好穩陣。 至於Long Call，睇下恒指有無機會跌至26700點以下，到時，Long Call既值博率就會高好多。 風險聲明：筆者為證監會持牌人。以上內容並不構成投資建議。投資者於投資前必須充分了解產品風險，自己的財務狀況及投資目標，並諮詢專業顧問。  

  今早，大市成交有526億元，又再比噚日增加咗。明顯地，有資金開始重新投入港股市場。中線港股既走勢，我會睇返啲。 但餘下問題係，應該幾時買？買啲咩？同用咩策略買？ 昨晚美股大升，源於美國聯儲局主席暗示明年有機會停止加息，帶動道指大升逾600點。不過，港股今日就唔係大跟到個升勢。好消息而不升，短線要小心啲。 不過，恒指，以及好多指數重磅股，都已經突破咗下跌通道，加上大市成交持續增加，顯然係大戶重新入市既跡象。因此，我會選擇等港股短期內出現調整，就會買返啲貨。 買啲咩？最簡單，就係買指數產品。Basic rule，如果上升股票數目多，揀中價股會比較著數。相反，上升股票數目少，即普遍股票都會跑輸大市，就買市好過買股。現時，明顯係後者。 用咩策略買？買正股可以。期權方面，可考慮三種策略，Long Call、Debit Call Spread 同Credit Put Spread。 第一種，最難贏，但博中股價大升，賺最多。第二種，只要大市最後能夠上升，就唔會有時間值損秏，而且回報都可以相當唔錯。第三種，回報不及前兩種策略，但贏面較高。 三種策略，都係有限風險。等短線回調，我就會入市。 風險聲明：筆者為證監會持牌人。以上內容並不構成投資建議。投資者於投資前必須充分了解產品風險，自己的財務狀況及投資目標，並諮詢專業顧問。

噚日，接近兩點鐘，大市成交都仲有接近600億元。但今日，差唔多時間，成交連540億元都無。加上又差唔多到達阻力位，呢種情況下，指數再升既空間未必太多。 呢排港股既升勢，其中一個原因，係話貿易戰有緩和跡象，但大家都明白，特朗普話反口，就隨時可以反口。指數雖升，但明顯地資金並無大舉流入港股，某程度上亦都反映咗大戶既決態。 至於造淡方法，可以考慮造Debit Spread。同時做11月25800LP 及25200SP，睇到今個月結算，輸最多輸210點，贏最多贏390點，只要恒指跌低過25500點就唔使擔心時間值損秏。 進取既朋友，可以將行使價再拉低啲，賠率更高。 風險聲明：筆者為證監會持牌人。以上內容並不構成投資建議。投資者於投資前必須充分了解產品風險，自己的財務狀況及投資目標，並諮詢專業顧問。

有朋友話港股好難玩，的確係。而最難玩既地方係，方向經常轉變，而且好多時間要即時作出反應，慢少少都唔得。 「10點半」呢個方法，有時上堂我都會講。簡單而言，就係開市至10點半呢個時段，會係全日成交最大，以及對走勢最有代表性既時間。而通常，就算指數一開市就大跌，10點半前都會有反彈出現。 但相反，若果連反彈都無，就係對市況既一啲啓示。 我自己喺10點半左右加咗淡倉。 另外，今日想講多一樣嘢，就係要特別小心內銀股。 近日內地不斷話要推動內銀放寬放貸俾民企。有熟識內銀既朋友同我講過，之前內銀借錢俾國企，只要利潤計到數，就多多都借。但借俾民企，就有錢賺都未必會做。 兩者既風險，完全係兩回事。 假如未來佢哋真係無得揀，一定要借錢俾民企既話，幾大既內銀都有機會死。因此，除咗之前話唔好掂內房股之外，內銀板塊，都要睇路。 指數方面，早兩日都講，要睇通道頂可否突破得到。得既話，就阻力變支持。但唔得，又係完全另一回事，依家要睇埋通道底，位置大慨係24400點。 但無論如何，呢啲位，最好用有限風險既方法玩。Short Call、Short Put，真係唔好做咁多。我自己，倉位已經變為主要係debit spread。特別係唔可以經常睇到市既朋友，更加要小心保護自己。 風險聲明：筆者為證監會持牌人。以上內容並不構成投資建議。投資者於投資前必須充分了解產品風險，自己的財務狀況及投資目標，並諮詢專業顧問。

噚日講過，等阻力位先造淡，贏面會比較大。現時，恒指最近既阻力位大概喺25300點。 另外，市場上亦已經見到有一啲股票有能力抗跌。其中，唔少中型既內銀股，過去3個月既股價已經無再跌。呢樣嘢，某程度上都反映咗港股既情況。 我既睇法係，如果內地經濟要崩潰，中型內銀股一定會跌到散哂。而相反，如果呢類形既股票可以企穩，或者就代表後市會有轉機。 策略方面，到25300點可以用有限風險既方法造淡。但如果恒指能夠克服呢個個關口，下一步就到衝擊下跌通道頂位。若都能突破，整體市況就會有所轉變。 風險聲明：筆者為證監會持牌人。以上內容並不構成投資建議。投資者於投資前必須充分了解產品風險，自己的財務狀況及投資目標，並諮詢專業顧問。