教多套方法畀大家，用嚟評估救市成效。 如果只係靠出口術，乜都唔使做，個市就能夠上升嘅，即係話畀你聽個市嘅市底唔錯。 記得Trump Trump上年有幾呼風喚雨嘛？一個twitter，話同習大係朋友，個市就已經可以上升。 你就明，點解我啲股會一直咁揸。 點解轉個頭，我對美股睇到咁淡。 因為，如果出完招，個市都仲係升唔起，或者升完好快就倒插嘅，即係話畀你聽個市底好差。 上年嘅Trump Trump威水到爆，但有句說話叫此一時，彼一時，今日佢嘅twitter神功，經已被廢。 然後，留意住美股，如果每一次救市後，個市仲要倒跌，就係話個市應該未有耐見底。 同樣情況，出現喺2015年中港股市。當年我又係避咗。原因係，中國狂出招，又揼水，又禁售，又迫分析員只能唱好，但都係一啲用都無。 最後，唔知邊個天才，設計咗個有bug嘅熔斷機制出嚟，定5%同7%為觸發熔斷水平，近成咁，以致一中5%暫時停市，當個市重開嗰陣，7%必失無疑。 2016年初，就係受呢個天才嘅天才設計所累，A股連中熔斷，最後一日，仲要破哂紀錄，早上10點左右個市就跌停唔使玩，嚇到內地即時要叫停熔斷。 但就係呢次人為犯錯以後，港股就見咗底，之後就踏入咗一個為期兩年嘅大升市。 即係，大家要買股票，都等個市真係出啲大鑊嘢先啦。出完，跌完，但個市好快就升得返，咪入市買囉。暫時去睇，最大鑊的尚未來臨。除非你係好高手，否則真係唔好入市買股票住喇。 最後，聽朝10:40am 我會上NowTV/ViuTV 聯播時段做節目，跟進返之前喺恒指做嘅Debit Put Spread 策略，我當然賣花讚花香，覺得值得睇㗎。 另外，星期五開始，我會做一個一連幾集，免費嘅網上美股ETF教學。詳情留意呢個專頁，容後公佈。 風險聲明：筆者為證監會持牌人。以上內容並不構成投資建議。投資者於投資前必須充分了解產品風險，自己的財務狀況及投資目標，並諮詢專業顧問。

好多朋友亦都會問，呢一刻係咪可以睇淡？ 大家真係要明白，中長線個市應該未跌完，但短線，真係好難講。貿然入市造淡，如果你嘅功夫未夠，係會可以畀人挾到頭暈眼花。 所以，我一直嘅建議都係揸cash，直至有趨勢出現，先再入市。 當然，你係高手，就不受此限。但好坦白咁講，無惡意，要問入市意見嘅朋友應該都係偏向初學者居多，呢一刻個市係好難玩，暫時繼續離開股市，係最好嘅選擇。 講長遠少少。唔好再將武漢肺炎同SARS比較。講嚴重程度，SARS完全無得比。武漢肺炎，已經對全球經濟造成長遠嚴重打擊。 睇返全球MSCI指數嘅情況，基本上全球無一個國家可以置身事外。但諷刺嘅係，叫做指數表現最穩嘅，反而最早出現疫情嘅中國。當然，如果大家可以揾一揾佢嘅MSCI指數成份，你就會知道點解。單係兩隻股票，已經佔咗指數成份3成。 其次，台灣都仲做得相當好。晶片產業，佢做得好好。有報道指，台灣嘅晶片技術，最少領先中國四年。晶片，最大嘅發展機遇係人工智能。將來，可能連你個枕頭都會有晶片。只要勢頭不變，台灣經濟，會愈來愈強。 而最大鑊，有俄羅斯，同埋歐洲嘅希臘、意大利。 希望會好彩挨得過。但唔好彩的話，一年內，歐債危機重燃，並非全無可能。暫時唔使估機會有幾大。到時，唔好企錯邊就得喇。 至於俄羅斯，就更大程度係受油價大跌影響。 附圖，我無詳細計過數，但此刻嘅油價，係非常之平。 油價喺金融海嘯後，價格一直下跌。但佢下跌嘅pattern係，大跌完，企穩，然後就會持續一段長時間進入橫行區間。 咁即係點？ 如果你要博油價長遠回升，唔係易事。但如果你只要油價唔繼續跌就能夠賺錢，難度就唔高。 升先有得賺，同唔跌就有得賺，係兩個完全唔同嘅概念，你一定要分得清。 油，我已經開始出手。用ETF做，風險容易控制好多，加埋期權自製高息，我認為呢一刻係好好嘅投資機會。 股市同商品唔同。 如果一間公司出現經營困難，蝕錢勢頭唔能夠逆轉，佢嘅股價係可以永遠唔能夠上升。呢啲公司，無論跌幾多，都唔一定會變成「估值吸引，投資價值浮現」。因為，一間長年蝕錢嘅公司，基本上係無價值。 但一啲有實際用途嘅商品，價值點都唔會係零。 油價，因為好多原因，已被大幅低估。但如果我同你講，你用期權加ETF去持有石油，可以收到一年接近兩成利息，即係話油價一年跌唔夠兩成，你都會有錢賺，咁你又會覺得點。 當然有風險。但相比起股市嘅不確定性，我會覺得油，我會更有贏錢嘅把握。 總括而言，股市，我都會等再有趨勢出現先會再算。暫時，仍會繼續用Short Put加ETF對沖嘅方法，細細注去玩。 油，亦會作適量部署。 其餘仲有咩發現，再update大家。 風險聲明：筆者為證監會持牌人。以上內容並不構成投資建議。投資者於投資前必須充分了解產品風險，自己的財務狀況及投資目標，並諮詢專業顧問。

我嘅策略，之前都講過，趁引伸波幅高企，我仲有坐住一啲極價外嘅期權Short Put，然後就係，再買入一啲指數嘅反向ETF。 如果你都有睇過啲期權金有幾咁多嘅話，你就知道點解我會咁做。 個市跌完，回穩，縮窩，我就會有錢賺。 另外就係，有朋友會筧得股價已被低估。但我想講，真正被低估嘅，唔係股價，係油價。 但當然，如果你無返咁上下財力，唔係貿然去玩期油。 學識點玩ETF加期權，用「自製高息策略」去玩油，呢一刻我覺得會係一個好好嘅投資機會。 風險聲明：筆者為證監會持牌人。以上內容並不構成投資建議。投資者於投資前必須充分了解產品風險，自己的財務狀況及投資目標，並諮詢專業顧問。

  啱啱今日教完今個星期嘅第三晚書，終於得閒少少，講吓近況。 我依家做嘅方法好簡單，就係用一啲反向嘅ETF，戥住啲Short Put，希望個市可以喺跌完之後回穩、縮窩，咁我就會有錢賺。 今日，想講一樣嘢，就係沽期貨，同埋用反向ETF嘅分別。 沽期貨，最大問題係，理論上無論風險。即係話，假如指數上升，升得愈多，你就輸得愈多，基本上無上限。如果你放唔夠錢，就要補倉。補完倉，指數繼續升，咁你就有機會無止境繼續輸。 呢個係沽期貨嘅最大問題。 至於反向ETF，好處係，其係佢只不過係一隻睇淡嘅股票。 只要你唔係借錢去買，任個市點升，你都唔會使補倉。亦唔似窩輪咁有期限，又唔似牛熊證咁有打靶機制。 但佢都有個問題，就係喺上錯市中會有損秏。 反向ETF嘅特性就係，如果係一啲單邊市入面，佢嘅股價係會跑贏指數。但喺一啲上錯市入面，就會有損秏。 另外，就係有管理費。不過呢樣嘢，我覺得係微不足道。 點解會用反向ETF戥住啲Short Put？ 因為，個市下跌風險好高，叫我就咁做SP，我都會有啲擔心。 用反向ETF做啲對沖，我會放心好多。 另外就係，萬一個市不跌反升，起碼ETF都係有限風險，喺我有mon住delta 嘅情況下，我唔會有問題。 而最想理嘅情況，就係個市跌完，再喺低位企穩，縮窩，咁我就會兩邊賺。 呢個策略，可能有啲朋友會睇得明，有啲朋友可能未必明白。但點都好，叫做分享一下我嘅策略。 不過，始終個市啲上落真係好癲，除非你真係好肯定可以駕御得到個波幅，否則玩細啲，或者暫時離場先啦。 到個市有更明顯嘅方向，我再update大家。 風險聲明：筆者為證監會持牌人。以上內容並不構成投資建議。投資者於投資前必須充分了解產品風險，自己的財務狀況及投資目標，並諮詢專業顧問。

  毫無疑問，呢個幾星期嘅美股，非常難玩，但無論如何，投資嘅宗旨唔好變，就係順勢而行，中長線買好嘅股票作投資。 睇開我節目嘅朋友，一定會聽過我一句說話，「無論乜嘢股票，遇上股災，都一定要走。」 股災入面，係會連最好嘅公用股，都會變得唔穩陣，都會大跌。 但如果唔係股災呢？ 呢樣嘢，正正就係我話要觀察嘅重點。 好簡單，如果呢次武漢肺災都唔能夠令美股轉入熊市，咁三大指數再次破頂，就將會係不久之後會發生嘅事。 而我呢排，寫市況變得要小心好多，因為確實美股會進入股災嘅機會，已經唔係零。 自己嘅個人投資，向自己負責就可以。但寫出嚟嘅嘢，會影響到人，就要更加謹慎。 如果以我近日嘅觀察，我會相信美股今年三大指數能夠再次破頂嘅機會仍大。 今日，好開心睇到兩樣嘢。第一，美股指數開始有企穩跡象。第二，喺我嘅美股名單上面，所有股票全升，呢一刻並無遺漏。呢係話，所有之前穩步上升嘅股票，都能夠重新踏上升軌。 但危機係咪遠去，的確武漢肺災疫情嘅發展，會係一個變數。 不過又咁講，台灣同澳門嘅例子，已經顯示到呢個疫情，並唔係完全無得打。 而社會上嘅一啲商業活動，亦都開始以一啲唔同嘅形式復行。 逆境會孕育出強者，除非逆情真係去到全面失控，否則啲企業只要努力，就會揾到佢哋嘅生存空間。 市況會否繼續好轉，呢一刻仍要觀察。但我個人嘅好倉，仍然keep住，因為我相信自己會有能力可以完全控制到風險。 之後個市點走，我都會繼續update大家。但現階段，真係唔好急。賺錢，唔係取決於你係咪早幾日入咗市，而係當下一個趨勢出現時，你係咪企啱方向。 今晚講到呢度，有特別情況，再同大家講。 最後，聽晚第一次嘅期權網上課程會正式開始，我已經準備咗一啲更貼市嘅方法同大家講。 報咗名嘅朋友，聽晚見。 風險聲明：筆者為證監會持牌人。以上內容並不構成投資建議。投資者於投資前必須充分了解產品風險，自己的財務狀況及投資目標，並諮詢專業顧問。  

  過咗一晚，有啲嘢可以開始講深入啲。 初步大家會見到，減完息後美股市跌。但減息後嘅真正反應，過往試過，係可以係喺幾日後先出現。 呢樣亦係最難攪嘅地方。 當然，減完息，個市就跌，呢個唔係最利好嘅訊號。但又咁講，之前美股都唔係未試過，係減完息之後幾日先出嗰個，先係真trend。 我可以同大家講，我自己絕對係任性，因為我相信我嘅期權技術，我嘅好倉未走。 但初學者，今次要睇定啲先。 揸貨遇危機，就話無得睇定啲啫。揸cash，明確嘅機會未到，耐性好緊要。 往後個市點走，我都未知㗎。但我就會繼續望實，有特別情況再update大家。 風險聲明：筆者為證監會持牌人。以上內容並不構成投資建議。投資者於投資前必須充分了解產品風險，自己的財務狀況及投資目標，並諮詢專業顧問。

前一個星期五，我話應該減一半貨，之後上個星期，大家都知道發生咩事。 昨晚，我話已經開始買返貨，訓醒見到美股出現報復性反彈，道指狂飆近1300點。 當日講過，報復性反彈係會出現，但絕對唔易捕捉，因為會嚟得好快，好急，就係呢個意思。 往後，要最小心一樣嘢，就係出現好消息但個事跌。特別係，真係減完息之後，大家要睇實個市會唔會有好消息出現但要下跌。 相反，好多人已經話美股「升咗咁多」，減息嘅預期已經price in咗，但如果喺呢個情況下，減完息仲有得繼續升，美股三大指數要再破頂絕非難事。 呢個幾星期，美股係咪好難玩？ 絕對係非常難玩。因為乜嘢都要求你好快就要行動。慢三日，啲timing就會錯快。 無辦法，喺呢啲非常市況，timing is everything。 但我由年頭開始所講嘅嘢，大家會睇到一樣樣開始實現。 「今年唔會好似上年咁易玩，有機會出現一個好深嘅調整，你要避到。」 「經歷過咁大嘅調整，個會有報復性反彈，但唔容易把握，你要有哂心理準備先會有機會博到。」 個市愈難玩，我就更加希望勤力啲，將我嘅經驗同睇到嘅嘢，多啲分享畀大家，令你最少唔會企錯哂邊，好彩嘅仲可以把握到一啲機會賺錢。 但有樣嘢，最難攪嘅就係心態。 你嘅心態，會決定你睇我嘅文字，會睇到嘅咩。可以係，我明明講A，但你會睇到係B。 但我亦都正在好努力咁，不斷將我認為正確嘅投資心態，貫輸畀大家。 「買好嘅股票，順勢而行。」呢樣係我認為最重要，喺呢個專頁我講得最多嘅說話。但大家可以諗返，我一直做嘅決定，都係以此作依歸。 我之前講嘅好多嘢，都實現咗。我講過，係因為歴史根本就係會一直重演。當然，唔會每次都係100%一模一樣，但個pattern會係好相似。只要你真係肯花功夫去做研究，好多嘢你就會睇到。 而今年，餘下未出現嘅，就係我所講牛三結尾嘅升浪。 今晚，會有美股實戰班嘅簡介會，由於疫情關係，大家可以喺屋企上網睇。正式課程，會係下半個月開始。 至於期權初班，今個星期會加班，「快車」流程，星期四、五，同下個星期一，連續三堂，全部網上教學。期權班呢次唔會有介紹班，因為後日就已經開始，報名請直接聯絡WhatsApp 63832145安排。 我已經同同事講咗，可以做返現場報名嘅discount 價。 最後，以下有網上講座嘅報名連結。今晚再見大家。 風險聲明：筆者為證監會持牌人。以上內容並不構成投資建議。投資者於投資前必須充分了解產品風險，自己的財務狀況及投資目標，並諮詢專業顧問。  

道指又大跌，但開心嘅係，好多朋友今朝都特登PM同我報平安，知道大家啲貨都走得七七八八，甚至已經走哂，咁我都放心啲。 最緊要，今次大家都無乜事。 睇啲美股評論，好多都話美股呢次嘅下跌，係11年嚟最差。但如果呢個跌市，都無令我哋輸大錢，我覺得就已經證明我哋做得相當唔錯。 好喇，現階段，我覺得真係並非入市做好倉嘅時候。就算係TDOC，有啲朋友見到隻股好強，問可唔可以買？但我嘅睇法好簡單，你敢唔敢大大注買先？ 如果呢個市況，係唔能夠令你安心用正常注碼買股票嘅，講真，可以賺得幾多。 上年，賺得最好嘅朋友，係因為你哋係喺一個好平穩嘅上升嘅市況入面，買Apple、Microsoft。呢兩隻股票，一嚟回報唔失禮，二嚟你又會敢大大注買，所以先會賺得多。 但正如我昨日所講，美股，真係唔會有一隻可以話係穩陣嘅股票。既然係咁，我會覺得Cash is King。 雖然唔知個市幾時先跌完，但我只知道，今次跌得愈深，之後嘅反彈就愈勁。 現時，我會寧願揸住現金，睇定啲先。因為，我知道如果我仲貿然入市買貨，最後可能我會迫住喺再低啲位止蝕。 一來，損失會增加。二來，到真係機會嚟嘅時候，我會變得更怯，唔敢出手。 但如果我能夠keep住無乜大損傷，然後再趁呢個機會過一過冷河，平伏心情，下次機會來臨時，我就會有較大可能會把握得到。 最後，總之就記住要順勢而行。 市況再有咩重要嘢發生，我會再update大家。但現時，stay safe，保持耐性係最重要。 風險聲明：筆者為證監會持牌人。以上內容並不構成投資建議。投資者於投資前必須充分了解產品風險，自己的財務狀況及投資目標，並諮詢專業顧

Facebook專頁唔係一個適合講詳細短炒策略嘅地方，所以，呢篇文我會集中講個big picture，以及中長線少少嘅部署。 我嘅睇法係，今年美股嘅高位仍然未見。即使話，我睇美國三大指數都仲會再次破頂。 而睇完股神畢菲特嘅訪問之後，知道佢都係仲睇好美股後市，呢樣嘢都令我更加放心。 好喇，但係又講返個好現實嘅問題。如果你啲貨係上個星期五已經走咗，今日你嘅決定好簡單，就係可以開始買返少少貨。之後愈升愈穩，就繼續加注。 相反，如果你係到頭先開市先止蝕，講真，我都唔知點幫你。 Timing is everything。時機錯咗，結果就會完全唔同。 買啲貨，最簡單嚟講，就係一啲個市未跌之前已經係靚，跌市嗰陣，都見到有少少抗跌力，然後今日已經有得升嘅，呢啲就係我有機會出手嘅目標。 例如係Microsoft，合格有餘。Mastercard，就唔合格。 過多幾日，邊啲股票得，邊啲股票唔得，就會更加明顯。 正股，正如啱啱講過，如果喺高位已經走咗，今日已經可以開始回補。但我覺得，又無必要一次過買返哂。 而且，既然啲期權嘅引伸波幅咁高，大家不妨將少少買股票嘅quota，換成做啲價外Short Put，一邊賺住時間值，再部署喺好低先去接貨。聽得明白，識得控制風險嘅，不妨試吓咁做。 呢個反彈，都算OK啦。 但之後仲有無力再上，好睇Trump Trump 點樣做，同埋國際會唔會真係揾到方法去醫呢隻武漢肺炎。 總括嚟講，短期睇法係樂觀咗，但都未敢完全放下戒心。 但過多幾日，睇吓個市同啲個股嘅表現，後市嘅走向應該會更加明朗。 風險聲明：筆者為證監會持牌人。以上內容並不構成投資建議。投資者於投資前必須充分了解產品風險，自己的財務狀況及投資目標，並諮詢專業顧問。

今日講三樣嘢。 第一樣，價外Short Put。 昨日講過，如果之前你已經喺高位走咗貨，其實你係可以做一樣嘢，就係喺低位用Short Put部署重新買返啲優質藍籌股。 咩叫做低位？ 就係由高位計，最少20%以下。例如係Microsoft，就大概係$152.56以下。 平時，你唔會能夠做到咁遠而仲有肉食。但就係因為啲期權金抽升得好緊要，你先可以咁做。 只要個市未來能夠稍為回穩，就算係跌少少先回穩，你都會發覺你啲Short Put仲會有錢賺。 正股我就唔會買住㗎喇。但Short Put，如果大家識得控制風險，就做啦。 第二樣，就係個市。 暫時，唔好咁快諗美股真係會好轉。跌市莫估底，好明顯地，美股仲未有見底跡象。 有啲朋友我知已經清咗倉，正股，絕對唔使心急買返，到個市真係跌完再升，大把時間畀你買。 未走哂貨嘅朋友，如啲股票跌穿位，都要走人。未跌穿嗰啲，都可以做吓Covered Call。喺期權金咁多嘅時候，Covered Call其實都幾好做。有時間值收入，你啲貨會坐得舒服好多。 第三樣嘢，未來呢段時間，開始留意住邊啲股票開始能夠抗跌，甚至係逆市上升。未係時候買住，呢啲股票會係將來個市穩返之後，大家入貨嘅目標。 跌市，總有一日會過去，但最重要係，喺呢段時間你識得照顧好自己。財不入急門，只好迫自己要咁急追返哂啲虧損，呢種心態，我嘅經驗係，只會令你輸更多嘅錢。 總之就係，要將自己放喺一個安全嘅位置，然後再靜心等待下一個機會出現。 非常時期，如有特別情況，我會多啲出文update大家。 短期嚟講，美股一定係唔樂觀。但雨過總會天晴，只要留意住啲股票嘅表現，到可以再買貨嘅時候，啲股票自然會畀signal 我哋。 風險聲明：筆者為證監會持牌人。以上內容並不構成投資建議。投資者於投資前必須充分了解產品風險，自己的財務狀況及投資目標，並諮詢專業顧問。