退休買落三層樓格局

->>按此到討論區發問     泰利: 諗樣兄,小弟三十五歲,現與女友租樓住,租金12000。女友於2012年購2M樓七成上會供30年,現升值二成及放租八千五。   母親現居供完的居屋約值二百五十萬(未補地價價錢)。現打算與女友聯名另購二百四十萬(9成上會)以下樓宇(需於居屋附近,母親不會居住女友物業)讓母親居住,自己與女友住居屋。   現只有200000及母親借款200000(要分期還給母親)。本人與女友收入為25000 及32000。請問與母親換樓住是否好方法?現是否買樓時機?或應租幾年樓等跌巿?本人名下並未持有過物業。請賜教   答案    相信你搬去居屋最大要點係想慳返$12000月租,用同樣錢去供樓仲可以還本變相「儲錢」。比做法正確! 資助房屋最好用黎住,投資價值稍低。你同女友既負債比率確實偏低,有能力買多一或二間三百萬左近既樓。由於泰利年到35仲未有樓係手,不如細細地開始供番間。他日(總之十幾年後)父母百年歸老,你同女友(太太)夾埋有三間樓係手供滿,一間自住兩間出租,起碼生活唔會太大壓力。   至於租樓定買樓好,諗樣係前文講過,可以咁睇: 一般香港人租樓支出約為樓價的5%,如果你睇樓價黎緊兩年跌超過一成(5% x 2),咁都係租樓好。如果睇持平或升,咁就要買樓係手啦。   因為以泰利情況,似係腳踏實地形(當然係靠估! 泰利如果係進取型可在blog中澄清),唔會出現中額流動現金去等終極大跌,咁情況下不如乖乖地買多間,減省租金支出,同時間做朋友,更可早日供滿樓享受生活。   乜x野「同時間做朋友」? 你估星爺d戲咩? 其實睇開本blog既朋友可能都知,筆者提過時間可幫你搵埋通賬去減省你攤還月供按揭所需成本,即係隨時間一過,你開頭買落間樓最終都可用好平代價咁還。再唔明搵一個有樓而要供既uncle問一下。當然你會話通賬唔一定出現,你唔比通縮咩? 學特首咁講: 「係美元同港幣續掛勾既前設下,諗樣睇唔到通縮取代通賬此肯定發生可能的未預見性。」希望學得似啦,佢個double-negative真係用得好熟架。   另外時間都可以幫你消除部份投資風險,雖然樓唔可以有效去平均投資,但時間一耐自己知樓股債邊樣投資物最適合你!   至於現時是否時機? 應該今個月不是,施政報告已出,樓又癲。當然係報紙猛吹,賣定例牌反價而出現零星高價成交而矣。因諸家都對今年樓市頗為睇好,加上連街市阿姐都講緊銀行水浸,筆者估計今年樓市會有一個反高潮,微微向下調整。資深投資者已將大部份錢移離住宅市場。諗樣給予讀者既係理財方法,唔係同你估升跌。泰利如緊守穩當理財方法,合女友之力,先攪好退休買落三層樓格局,應可輕鬆生活。     相反如有讀者不先審閱自己財政而妄自出擊,樓市一跌就抵擋不住。係樓市一輸,就要輸十年!

Read more

五至八年內有兩間樓收​租

    大雄: 你好! 小弟今年24現在同父母在街市開舖…父早在有強積金開始就開始用供$800 (報自僱)母報家庭主婦 (沒有收入)小弟在街市幫手沒有正式支人工…(打算報自僱,做數…不過唔知怎樣報比較好…)   – 我同父母 每月淨儲6M另外還有一位姐姐27歲做SALES月入平均14000   沒有儲蓄-.-現有 47年唐樓A(~200M) 自住 沒有欠債剛剛買了 240萬連租約樓B 收租 可收$8000 按5成 分30年 2.15 姐姐供 爸爸名另外有70萬HKD 和 30萬人民幣定存到2013 年中   – 因為父母年紀唔少,想係5~8年內有兩間以上收租之用….小弟想47年唐樓買給姐姐,套現100M 作5成按,再租給父親8000,可以增加姐的借貸能力套現100M——>先轉人民幣定存半年 半年後有父親交租給姐姐的紀錄 可以增加姐的借貸能力14000+8000(0.7) 作收入…再用100M人民幣+70M HKD 買C   – 現在只能用姐姐去借錢…小弟就不用借原因一 現在樓價覺得高,所以只用姐姐,留小弟的能力下跌之用原因二 小弟還沒有想到支多少人工給自己比較好…以上是大約的想法可以嗎…??另外我自己的收入可以怎樣做數??小弟同父母是保守之人,股票有買,不過都係覺得買樓儲錢比較好~麻煩你…..謝謝你… 答案   對不起遲覆了,諗樣同大家一樣,希望盡用每一天,休息時盡情休息。大雄既工作及財政狀況,係想運用借貸力時都唔想見到既,情況包有自僱冇入息證明、抵押品(樓宇)年歲高、樓宇業主高、姐姐的負債比率亦因剛買入2.40mil樓而加高了,係呢個三高一低情況下點攪呢? – 首先如將唐樓賣比姐姐,先要考慮如家姐再供多一間樓能否承擔,即將47年唐樓賣比家姐,假設借一百萬,每月都要還近5000蚊,恐怕加埋上一間會令個人負擔比率超過50%,即個人總債項超過總收入的50%。 – 你賣左間樓比姐姐,就當租金係八千,冇番半年租金收入記錄銀行係唔會將該租金當作入息証明的! 就當你連約成交,係做按揭時提供租約,但係個租客又係賣樓業主本人(即你父親),諗樣真係諗唔到銀行會唔會接受。如用差餉估值計租金,個租值可以同市場價差好遠,所以你諗既「 14000+8000(0.7)」二穿一,未必可行。 – 另一點要注意,係47年樓齡用作按揭好難做到廿年供款以上。連十五至廿年都已難批。對症下藥應該要換樓,47年既自住樓有兩個諗法,一係趁高售出,但新買入既樓可以要細些少。一係搵人幫你攪「多間隔用途房」,谷高回報。除非你間樓有機被人收購,或有可能整做樓上鋪,否則你要諗諗趁高出貨。 – 或者唔駛諗得咁複雜,其實手上約一百萬港元現金可等時機,過幾年再買入樓房收租。現47年自住樓可能父母住慣左,賣唔成就算。不過為長遠計,你自己一定要整番d收入,用現稅階計報約兩萬月入實適宜。因為你自己有免稅額約11萬,如父母超60歲更可埋父母免稅額,有祖父母免稅額亦可報埋上去,計及稅階你都係交一萬幾千稅。你當資助下政府,睇下佢有冇建房福利惠及你啦,請你自己暫不要做業主,看政府有何「梁策」!

Read more

用時間去貶抑債務

看到這個blog,獲益良多!也來揍熱鬧, 請給評一下, 還應該買樓嗎? 老伴很反對。 只有資金, 沒入息證明! – 家庭主婦: 本人53歲, 成員4口,沒負債, 老伴年前中風, 被逼提早退休, 現住單位值6.5mio (在市區), 有一出租單位值4.5mio(在東涌),有股票+債卷值3mio; RMB8mio (3mio在香港;5mio在大陸), 股息+利息+租金收入,大概每月45k, 家庭開支25k. 我想買一個有實用面積1000呎的單位,上限9mio. 做一半mortgage. 應否等樓市下跌才考慮?  請賜教!  – answer: 諗樣其中一個在blog既主張,係趁後生借入美金去買有形資產。越早做你就可以用更多時間去貶抑債務,「越還越少」。唯對年過五十人仕,真係冇後生仔咁多時間,成日提及既借貸力已減低。對於佢地既投資主張活用股債組合。  – 家庭女仕就所提及資產約港幣二千三百萬,樓房佔當中約半(一千一百萬)。現時香港房價以回報黎講唔吸引,只有三厘多一年。有時間都用黎照顧老伴而唔想招呼租客。所以家庭女仕未係時候投資香港樓房。賺價又唔見有水位,收租回報又唔係高,錢又唔係借得多,幾個原本應有既優點都盡失。所以唔係後生或有自住需要都唔駛急去買樓。  – 人民幣同樓都可按兵不動,要留意係債券市場會否產生泡沫而令組合有所影響。如果債券評級連一個A都去唔到小心債價賬面會有下跌兩至三成既準備。當然只要債權人唔賴債,你keep住條債都係有驚無險而矣,同埋損失跌市入貨機會。總括而言,而家買股確實好過買債。你睇下過往一年係股票市場賺錢既人,真係少之又少。係近排銀行報價機先有番些少人氣。  – 再講股市,而家幾倍市盈率既內銀股確實抵買,你見香港某大「為您」基金,由六月睇到而家有加倉內銀股之趁勢。有持反意見者細說不良貸款率為內銀股上升之絆腳石,更有人話國有銀行公佈既不良貸款率機構係假既。諗樣對此不以為然,如果你係一個長線投資者,買內銀可要比而家跟紅頂白咁去炒領匯更為合適。領匯息率已經降到三厘,不過仲有人以為佢息率係六。有阿伯再我講係八!  – 其實理財確實係一樣好個人化既事,同一個資產組合,絕對會因家庭狀況而得出唔同結論。如行動不便者唔會為賺多一百幾十萬而搬出鄰近覆診醫院既樓,上篇亦提過有人為念老伴係有生之年都唔會賣出舊居,所以先至生出「理財策劃」呢個行業。可惜以筆者所見行業內大部份既人都係「各有各做」,例如股票行就猛咁叫你短炒,中原地產點都係講磚頭好D,銀行掉返轉好少叫你買樓等等。市場上需要一些可給予股樓債平衡投資方案既人。  – 至於參加投資課程,確實可令自己知識增長,但係一旦決定投資就要同市場上各參與者博奕。當中重心態、市場消息多於書本知識。比你知道哂所有股票圖表指標都唔代表你可以賺大錢。正所謂投資要有膽色,肯定係機會就要買而唔好再心大心細,祝大家係投資路上一路順風。

Read more

低水屋苑何處尋

拜讀先生分析,獲益良多。小弟行年38,有幾個問題困擾, 盼先生能幫忙幫忙, 不勝感激。 小弟與女友剛結婚,小弟月入4萬,太太月入8萬, 現租往青衣。另有銀行存款約50萬, RMB60萬及股票約$50萬(股息回報約4%)。   除太太與其家人有一供了10年的聯名物業(太太月供約8千)供老人家居住外,我們兩口子的日常花費不大。兩公婆目前均於中環上班,但太太礙於工作壓力大都想另找工作,到其時她的入息那部份將會減少很多。加上現在因為SSD, 導致四處盤荒, 加上樓價飆升, 實在有點不知如何是好的情況。 小弟應該怎樣辦,是否應找個單位上車後再說? 還是等調整再上車?單位的名可否再用老婆的名? 如上車,目前那裡比較有保值能力? 謝謝!   ->>按此看答案   先計算最大購買力 讀者加上太太月入共12萬,係申請按揭時入息夠數上會好少因往後轉職而要收樓。為保守計,假設家庭入息會往後降低至8萬。   太太有8000蚊要幫屋企供,銀行唔太理你要供幾多間樓,只要入息同負債比率不過50%(第一間樓及樓換樓自住者適用),銀行就會批比你。另外,樓齡同借款人年齡都係考慮因素。一般你四十歲或樓下,做廿五至三十年按揭應冇問題。樓齡當然唔好大於三十年,同埋有lift有馬路到既樓一般問題不大。呢幾年多左人問就係危險斜坡同大廈維修令呢兩樓野,因樓而異。不過只要識字既你知道有以上既野要注意,買幾百萬樓之前我信你一定會問到篤。   講返最大購買力,即係如果你每月可還一萬元既按揭金額下究竟你可以借幾多? 係息口收實2.15%,拉長到30年,應可借2.65mil。而每月還到一萬元既家庭(人),最少都一齊夾埋搵兩萬蚊啦。   而讀者夾埋80000,減去老婆要供8000蚊樓,每月可還32000,即佢可負擔一間3.2*2.65mil = 8.48mil。係呢段旺市日子,只用你借貸能力一半比較合適,即係應target市價4.5mil既樓。呢個價錢係市淨連何文田都買得到,可以你而家係青衣連灝景灣都冇得諗。而再加碼雖然你有能力,不過市跌你睇住自己蝕然又冇子彈再「溝貨」,會非常冇癮。   呢個budget如果係東九龍如麗港城、德福,將軍澳一帶,會海闊天空,前兩者更附合你保值之意。沙田都保值而大兩房應該係價錢上仲有得諗。麗港城係前十年大幅跑輸個市,但「今時唔同往日」,現時反而較低水,加上用家多係跌市防守力高。青衣或奧海城或西九四小龍,已唔使諗三房,兩房都好勉強,同埋價錢高水。所以要同太太傾下會唔會搬去九龍東或新界東沙田。如可即睇樓及買入樓宇作九成上會,但年期可減低至15年。因讀者入息高,九成上會而年期短可減低按揭保費支出。但會否減低借成數呢? 諗樣認為不必。因政府收緊按揭下你放左入去做首期既錢好難套返出黎,有cash緊係留係身好。而開始做短既年期想往後拉長則十分客易,因拉長左你就還少左錢,幾乎一定批。所以做九成上會,有能力就做短個期,錢「跟身」最好。   萬一你地唔想搬,咁又可以出買半間樓之策。即係某區域買間樓收租,用「租金幫補租金」。咁做既壞處係至少要比三成首期上會,跟足更要比五成首期。其實七成上會因銀行做生意,你不太張揚又準時還佢都唔想告發你。一經發現,九成九都係加息。(咁你你可以轉走)。當然最高懲罰係即時還錢。而九成按揭有半官方按揭證券公司擔保,係而家一咪收緊借貸下咪試。   收租樓買邊? ,除左前文所列,東涌亦可選。升值能力同樣高,而校綱同偏遠係現時障礙,四百幾萬仲有選擇。至於咩都唔做,難免要捱多幾年貴租,冇樓係手等同做空物業市場,相信你已經聽過。

Read more

舊樓做按揭要注意點?舊樓平在何處?

Hi, Mr. Yeung, I am a fan of lumyeung net. From reading your articles, I find that you are very smart on buying properties and money matters.   I would like to ask you if my husband can buy $3 million property for investing, which area would you recommend?   I found that most properties […]

Read more

點樣搵萬八儲萬九蚊?? (問)

諗樣兄你好,  本人將近四十歲,09年中賣出港島自住單位後在同區租樓住(因就兒子上學) ,現月租約一萬,  2010年頭以180萬買入土瓜灣一單位收租(自己名),現值270萬,尚欠150萬,月供$5500,現租$8800  2010年中再買以160及165萬買入牛頭角兩單位收租(自己及太太名各持一間),  至今年年初,小陽春之前,太太的單位以220萬賣出,剩下的一個單位尚欠銀行108萬,現值260萬,月供$3700,現租$8000  本人文職月入不到兩萬,太太自僱,今年環境不太好所以收入不穩,但每月定期入兩萬元到私人戶口作出糧,  現持有現金50萬,及股票蟹貨、ibond等約$40萬。     去年賣出了太太的單位,原意想在港島買回一層自住樓,可惜賣了之後才小陽春,賺少樓價又貴,所以沒有買回,  有考慮過在深水長沙灣一帶買回200萬以下單棟樓收租,但考慮鎖兩年SSD及現在樓價較高,又擔心手頭上冇乜現金,  所以想請教閣下意見,謝。  —  巴利  答案 雖說話讀者來信,但見文知巴利應係一個平凡既香港人。即係人工唔算高,又要養老婆仔女,今次睇下呢個香港人點去努力改善自己生活。  先答巴利問題,太太自僱用轉數去私人戶口當出糧,一般銀行唔會當呢個係月入,就算當都係拆一半。自僱人仕借錢如攪有限公司,出示公司盤數應該唔難。但無限或單獨受僱者如冇數薄係身可上交利得稅單作證明,都係一個有力證明。今次當自照僱太太收入既一半(即一萬元)為可核實收入。     假設巴利兩間租出樓房都有租約,計埋每月都收成$16800租。保守咁計家庭總入息為巴利兩萬,太太一萬,加埋租金收入既八成即有$(20000+10000+13400)=$43400。係政府新出措施下佢只可用入息四成供樓,即$17500。現時兩間收租樓夾埋供$9200,即係巴利夾埋太太用$(17500-9200)=$8300買間樓收租仲有可能。不過政府而家正做野唔favour你地上會。假如巴利冇新既入息證明,其實而家計埋租金收入已用借貸力一半。兩人現金流亦不見強勁,固建議一動不如一靜,還掂有兩層樓係手,應待樓市下滑再食下一個浪。     反而想講巴利早年低價購入樓宇,就算太太唔做野屋企得自己搵錢,諗樣發現佢比哂成份糧比太太做家用後自己仲有錢淨,正式搵萬八儲足萬九。佢做左咩功德令佢搵兩皮幾野都可以係香港咁自在呢?  都係個句: 買樓! 當然買樓唔係必贏,但係買樓儲錢係一個可預計,有進度記錄而令你慢慢晉身小富既方法。年長既你可能問九七年買樓息太貴點儲錢? 係呀息貴絕對唔好買,如租金回報率低過息口更加唔好買。巴利係2010年一口氣買左三間樓(分別1.80m, 1.60m及1.65mil),如果要名正言順放租個陣每間要三成首期,即合共1.50mil,計番巴利兩年前應該三十五六歲左右。你問下自己究竟呢個年歲有冇機會儲到百五萬呢? 話難唔難,兩公婆一齊遂蚊儲百幾萬有可能。所以結語為能不能為自己預備安穩生活,在乎你肯唔肯開始儲同比恆心儲錢。       買入 現值 尚欠 月供 現租 已售 土瓜灣單位 1.80 2.70 1.50 5500 8800   太太牛頭角單位 160 n/a 0 0 0 220 自己牛頭角單位 165 260 108 3700 8000         […]

Read more

即時倍大資產一倍方法

奇君:  諗sir你好,拜讀你的網誌一段時間,獲益良多,希望你能指點一下。  小弟與妻子29歲,月入約$32000,儲蓄約有現金30多萬,無重大債務,家人有一私人住宅單位,銀行估價約三百萬,家人提議以二百萬將單位轉讓給我們。我們想做九成按揭上會供30年將樓收在名下。  1.有間供完既樓係手有咩投資選擇? 2.請問自讓樓宇有甚麼地方需要注意?  3.請問可有方法能夠將估價多出的一百萬吐出來運用嗎?  4.如果可以,投資每月派息的高息債券基金是否一個好選擇?有否其他的建議?    答案 現時樓市暢旺,好多人會諗樣點去將手上物業加按套現。奇君呢個案正好講多次金管係現行措施有咩限制:  1.  加按套現最多去到五成  2.  如果係買第二間樓,負債比率降至四成,壓力測試不能過五成,自住除外  首先奇君要注意自讓或轉贈,由於轉讓代價可能大幅比市價低,銀行有可能拒絕你做按揭申請。禮物形式轉贈銀行一般不受理。今次轉讓價二百萬大幅低於市價,只借一百八十萬,問多幾間應該會做到。最好之前同律師樓講定你會自讓後上會,律師事務所可能有銀行介紹比你。  至於套錢,銀行會以市價同轉讓價較低者計物業估值,低者為準。你行轉讓,就算金管容許你套錢至七成都係二百萬既七成。反而你轉讓後九成上會借二百萬分30年還要比按揭保費,個度要加借六萬蚊。唔行轉讓而真係老豆用市價賣比仔,然後比三成首期上會,咁樣老豆會賣樓收番三百萬,但放低九十萬比仔做三成首期,計落老豆仲多十萬落袋,而仔就唔駛比按揭保費,但要支付約五萬蚊印花稅加些少傭。      根據以上考慮,諗樣會咁做: 用市價由老豆賣比仔,老豆比番九十萬個仔做首期及七成上會。用市價方法定你買賣合約就肯定間間銀行都批到。如果有人銀碼再大過3.0mil,市價方法更有著數。之後奇君有間樓只係按左比銀行,唔做按證擔保,如佢偷雞租出去都問題不大,比銀行發現就還番老豆入左袋既2.1mil將拖欠比率降低至五成。老豆既cash確實可買高息債券基金,銀行有售。而獅子銀行款式較多,因該處銀行客路以穩健收息為主。買隻穩陣既基金比到4-5%年息應該問題不大,該類債券基金可隨時售出,仲要每月派息,但壞處係價錢有浮動,一年10%上落有可能。  而諗樣經常建議既債券,係比債券基金簡單,保本,息口差唔多,但有年期同埋風險集中於一個債權人。唔想放係基金比管理費咁買債券擺個年期係一策略,但投資年期預要五年。   好啦,而家奇君有樓出租,搵租客同佢供按左出黎既錢。至於出左黎既錢又有息收,二萬幾萬放係債券基金一年收番十萬息都合理。咁你可能問? 攪咁多野做咩?? 我就咁租間樓出去都收十萬銀租一年啦! 做咩又按揭又要搵租客? 分別就係十幾年後,有只有間樓係手或你有間就供滿既樓架二百萬cash既分別。而你係呢十幾年既洗費只要債券定期派息你就有! 趁樓市高加按及倍大資產,將套出黎既錢放係穩當投資,係令自己預先制造被動收入既妙法!  

Read more

成功為什麼與努力工作無關?

諗樣兄你好! 讀過富爸爸,知道只靠勞力收入只會讓自己一世在營營役役,因此我們需要尋找被動收入。而讀過你的blog,被知道在香港這個國際都會,尋找被動收入的。深感興幸能在如此年紀便能接觸到你的blog, 讓自己能好好準備﹗ 小弟今年23歲,月入21K。與家人同住葵青,現樓約值330萬,尚餘50萬供款。 本著早儲蓄,早收成的信念,小弟現月儲$7K。由於要還學債,養家庭,這水平己是十分極限。現手上有流動資產約100K。本計劃再儲蓄兩三年至流動資產300–400K,然後再置業。但又眼見樓價節節上升,及認為愈早置業愈能及早建立被動收入,因此正思考現在是否置業時機。而首期部分小弟打算與家人商擬,把現住樓加按借出,以四十年按揭攤分債務,讓通脤減少負債。(兩年後,小弟月入可提升至38K) 今天借此機會,希望諗樣兄你能在此指點指點!首先謝過! 另外,由於如「置安心」計劃推出,又是否合適的買入機會?   ANSWER: 今次讀者宜將父母手上樓宇加按套現,為自己第時結婚買樓做準備,等樓市有變才買入。23歲根本就係一個本錢,等得。以廿歲來說,如果兩年後有38K收入是不錯了,但有冇諗住趁後生未有家庭負擔時多作準備,及利用本身才幹,將兩年後感覺secured既38k人工先提升到50k呢?   眾所周知,新畢業加入四大行既會計生工作頗為艱苦,在公司掉盡年青歲月而老黎孤家寡人既女仕更比比皆是,月薪只是一萬幾千,時薪計仲低過老麥。相反,每日工作六小時既地區總監卻年薪百萬為起步,坊間究竟有冇文章,為此現象作出歸納及總結呢?   三個層面論搵錢 從事專門或極厭惡工作令人可獲取更多報酬,此乃第一層面,亦是最易明解。專門知識加上予人方便又可得另一重報酬,生意人也! 而要更有效取得報酬,需要將自己從事的工作所發揮既影響力提升至第三層。即係如果你係強國海關做野,你係一個決定全關貨品出入口既官員,你既報酬隨時多過省長。權力貴乎在可影響資源分配或成件事既結果,各位年青一輩要努力加上把握時機由第一爭上第三層。第三層既madam簽個名就有錢落袋,麻甩佬紮成世鐵都搵唔到!   當然諗樣唔係歧視紮鐵工人,睇而家香港走勢建築業人工調升可期。但係希望此文幫到成十點仲係公司捱緊既你,好好思考未來去路。仲有最後但係最重要既係, 點解人幾廿歲仲係停留係低效工作,性格使然也!   希望讀者參考本文心法,在工作上更上一層樓。誠信、工作投入感這些量度唔到既素質,才是老闆在晉升時最為看重的! 至於2012年可去銀行搞個靈活按揭戶口,將父母間樓套100萬出黎,一半可以存係靈活按揭戶口而收番同按揭息口等同既息。另一半可買入一些港元存款證或換做人仔做三個月3%年息定期,再過幾年先低吸自住樓吧! 如果你比心機儲錢同埋工作順利,2015/2016每年買一層都冇問題,樓市係唔會只升不跌的。   至於置安心同居屋近似,投資價值稍低。除非免五成地價而自己又想住係該屋十幾廿年,否則有能力者都不建議買入。

Read more

換左樓,舊樓租出定賣走好?

Hi 諗sir你好, 我月入3萬,   供緊+住緊一層~200萬九龍灣樓 (月供~5000, 按7成, 2011年頭買, 現時升左~40萬),   最近同男友聯名按7成買左一層400萬樓, 打算之後搬去住, 諗sir你覺得之前果層200萬樓過左ssd之後應該放租定賣好?   如果租好d, 係唔係要還返幾十萬俾銀行等個貸款額低過五成先得? thx~   answer: 係決定賣出定係放租之前,最緊要睇下繼續keep層樓會唔會影響你跌市再買樓既能力(或稱子彈)。讀者月入三萬,假設佢男友一樣都係搵三萬蚊個月,即家庭收入六萬。佢地新買4.0mil上會借七成,假設分25年還每月要月供12000蚊。其實佢地月入六萬即放每月三萬蚊係供樓銀行都批到(暫不理金管最近係買二間樓收緊借貸比率至四成入息),而三萬蚊月供借盡應可達2.65mil(借設2.15%年息,分30年還),咁即金額為2.65mil*3=7.95mil。   係借盡7.95mil,而現時手頭兩件貨合共4.0mil+2.4mil=6.4mil,已達借盡八成,跌市一跌會令讀者坐貨,沒再買樓機會。除非男友收入不只三萬,如達6.0萬元或以上,咁現時所耗借貸能力會降至一半,係跌市時會多一個入貨機會。   當然讀者會諗而家舊樓租出去成萬蚊,供按揭只五千,收完租還埋按揭仲有成四千蚊補貼我而家要供成12000蚊既新樓。建議讀者可以咁諗: 現時舊樓收番黎既租還按揭可清本金約$3000,淨低$4000就可自用,即舊樓減去利息支出係有$7000一個月落袋。如果佢睇呢兩年樓市係升或打和,佢至少賺$7000*24=$168,000落袋,但係如果間樓跌一成,其實佢呢十幾萬即刻化為烏有。   故建議舊樓賺左先,除非男友用入可穩達五萬水平,為家庭提供較強現金流,否則放棄hold住舊樓賺多幾十萬既可能,而釋放借貸力去博下一轉樓市跌「玩鋪勁」既更為上算。最後一個問題係要唔要降低貸款額至五成,其實唔降租出去係偷雞,不少人都咁做,比銀行發現就可以會即時加息,或眼白白姑息你。但降低有一個好處,係可名正言順用張租張當入息證明係下次借錢當入息證明。如真的決定保留舊居,都係keep住多個現金唔補錢好。

Read more

樓市投資必勝法

諗樣先生, 拜讀貴BLOG良久,實得益匪淺。現我有一疑問,看 閣下能否給予一點意見? 謝謝 理先生。 本人個案: 現年30歲,已婚,育有一女。先前在中國內地工作,去年回港,現已買荃灣麗城花園($4M,full paid,夫婦聯名),手頭上有$3M資產。 希望用$1M投資地產,期望有收租收入。 現在本人無收入,主力攪生意,太太月入2萬。   答案   睇手上鋪牌 先睇賭幾大 讀者睇到個標題,可能覺得諗樣講緊廢話。其實人就係咁,鋤大D睇牌差唔多人人都識,而家由賭台去到買樓投資又夾硬要將賭錢同買樓投資分開。以諗樣而言其實要係錢方面做正確決定不出博奕理論範疇。今日個案理先生都算有米,本樣想先計下佢最盡借到幾錢,先至部署物業投資。由咁去開始諗點買同買咩樓,希望比讀者新思維上既體驗。 為左做個buffer,假設理先生真係一蚊收入都冇,銀行睇佢既入息證明等於零。係真實情況下當然一萬幾千收入,就算係生意人都有辦法整到出黎。 理先生太太收入兩萬,即係每月按揭還盡係一萬蚊,係咁情況下太太就算單拖借2.70mil分三十年還係冇問題。(當然上會間樓樓齡要少於二十,理太太唔係發達太太周身街數個隻啦!) 理先生既麗城花園剛入選全港租金回報高既屋苑第五位,恭喜哂! 一間4.0mil樓套現2.0mil出黎冇問題,但係要搵個人啃左月供$7600條數。 手頭上3.0mil資產,心雄起黎梗係可以套哂佢買樓,如此一算理先生比三百萬現金出黎,再借(2.70+2.0)=4.70mil係好有可能。咁講佢槓到盡買4.70+3.0=7.7mil既樓房係上到會做業主的!(當然加按兩百萬個度要搵擔保人,如理先生真係一蚊收入都證明唔到)   計左7.7mil做max之後,我地target7.7一半既樓,即約3.3mil樓宇,點解呢? 仲要係先搵太太加按麗城間樓用一百萬做首期去買呢間樓,唔好用自己現成既資產(等自己唔好犯本)。   借用必勝投資法(假設樓市升50%)… 睇完鋪牌而用借盡既一半買樓,為既係令自己跌市時保持購買力。理先生買入3.3mil同區爵悅庭,假設樓市升50%,理先生可沽出樓房獲利1.65mil,到時佢有4.65mil流動資產,手上麗城花園市價6.0mil,夾埋有成千萬係手。   樓市下調50% 萬一樓市下調50%,理先生爵悅庭價1.65mil(些微負資產),麗城只值2.0mil(沒負資產),手上流動資產3.0mil。到時咩樓都平哂冇人同你爭,理先生可「施施然」用1.65mil全數比哂買多間樂悠居,個陣有三間樓係手,(3-1.65)=1.35mil現金,供樓冇比之前多左。 如幾年過後原本跌左五成既樓市又升番一倍,即返回現時水平,理先生麗城同爵悅庭平手,沽出樂悠居賺一倍即1.65mil!所以無論樓市先升後跌或先跌後升,只要理先生留番一手,有錢係跌市入貨根本必勝! 當然你會同諗樣講如果跌完五成再五成,理先生可以輸到成世無得番身,咁諗樣都知大亞灣核爆香港連條草都生唔到既機會都有,可行與否足下自判。投資永遠先問自己可承受幾多風險,同埋自己願意承受幾多風險。上半部已有本篇交代,下半部留番比理先生。而點解知道必勝法而仲未發達既人,係嚴守紀律方面有問題。   仲有就係,如果唔升唔跌開圍骰,理先生都贏。

Read more

本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室