今日講三樣嘢。 第一樣，價外Short Put。 昨日講過，如果之前你已經喺高位走咗貨，其實你係可以做一樣嘢，就係喺低位用Short Put部署重新買返啲優質藍籌股。 咩叫做低位？ 就係由高位計，最少20%以下。例如係Microsoft，就大概係$152.56以下。 平時，你唔會能夠做到咁遠而仲有肉食。但就係因為啲期權金抽升得好緊要，你先可以咁做。 只要個市未來能夠稍為回穩，就算係跌少少先回穩，你都會發覺你啲Short Put仲會有錢賺。 正股我就唔會買住㗎喇。但Short Put，如果大家識得控制風險，就做啦。 第二樣，就係個市。 暫時，唔好咁快諗美股真係會好轉。跌市莫估底，好明顯地，美股仲未有見底跡象。 有啲朋友我知已經清咗倉，正股，絕對唔使心急買返，到個市真係跌完再升，大把時間畀你買。 未走哂貨嘅朋友，如啲股票跌穿位，都要走人。未跌穿嗰啲，都可以做吓Covered Call。喺期權金咁多嘅時候，Covered Call其實都幾好做。有時間值收入，你啲貨會坐得舒服好多。 第三樣嘢，未來呢段時間，開始留意住邊啲股票開始能夠抗跌，甚至係逆市上升。未係時候買住，呢啲股票會係將來個市穩返之後，大家入貨嘅目標。 跌市，總有一日會過去，但最重要係，喺呢段時間你識得照顧好自己。財不入急門，只好迫自己要咁急追返哂啲虧損，呢種心態，我嘅經驗係，只會令你輸更多嘅錢。 總之就係，要將自己放喺一個安全嘅位置，然後再靜心等待下一個機會出現。 非常時期，如有特別情況，我會多啲出文update大家。 短期嚟講，美股一定係唔樂觀。但雨過總會天晴，只要留意住啲股票嘅表現，到可以再買貨嘅時候，啲股票自然會畀signal 我哋。 風險聲明：筆者為證監會持牌人。以上內容並不構成投資建議。投資者於投資前必須充分了解產品風險，自己的財務狀況及投資目標，並諮詢專業顧問。  

未開市之前，見到道指要跌成800點，唔知大家都有無諗過今日美股應該都會血流成河。 但事實係，當個市開始「平穩」少少之後，再睇返啲股票，又唔係真係咁大件事。 Apple、Mastercard已經算係跌得多，但跌幅都只係4%左右。 Microsoft，跌大概3%。 S&P Global 同Moody’s，跌2%左右。 RingCentral，跌1%多啲。 NextEra，跌不足1%。 呢排大家好鍾意嘅Zoom，仲要升6%。 好喇，咁樣後市點？ 短期風險肯定已經增加，所以如果上星期五無走過貨嘅朋友，我都會建議走一半貨。 但如果你已經走咗一半貨，見到今日嘅跌市，都已經唔覺得太擔心嘅話，現階段你真係可以再睇定啲先。 而我知有啲朋友，叻過我，上星期五清咗倉，今日，我甚至叫佢哋可以喺極低位部署用Short Put接貨。 但先旨聲明，你要真係咁叻，已經走哂啲貨，先好做呢樣嘢。成手貨嘅朋友，唔好再加倉，攪到防守力進一步減弱。 好，講講Short Put可以點做。 今日嘅跌市，令到普遍期權嘅引伸波幅上漲，令期權金抽升。結果係，就算你嘅Short Put做到遠一遠，呢一刻你去開倉，都仍然會有肉食。 好喇，頭先live講過，2018年第四季嘅美股大調整，美股藍籌股由頂到底嘅跌幅，普遍大概係15% – 25%左右。之後，佢哋就出現大反彈。 今次照睇，就算美股呢一次調整未完，但我相信，都唔會係末日。調整完，就會再升。 如果，你之前已經走哂貨，個倉現時只剩下現金，而又有啲心儀股票你係想喺低位買入嘅話，我覺得今日已經可以係開始部署嘅機會。 例如係Microsoft，早前高位係$190.70，如果你可以喺8折水平以下接貨，即係低過$152.56，我會覺得why not？ 用你有能力接貨嘅注碼，用部署Short Put，真係要接貨，就接佢返嚟，只要你有本事坐返啲貨上嚟，贏嘅機會好大。 當然，亦有可能個市根本就唔會跌咁深，到時，只要個市回穩反彈，你啲Short Put就會有錢賺，而你再食咗啲Short Put先，再買返股票，又得。用嚟Apple、Mastercard，呢個方法都OK。 但當然，首要條件，係你上星期五已經走咗貨，到埋你識得點樣處理Short Put嘅風險。初學者，就唔好跟。 對於肯喺上星期較高位置果斷走貨嘅朋友，呢個會係你嘅少少獎勵。 個市會唔會再跌少少，我唔知道。但以今日嘅表現睇，美股唔會係末日。用適當嘅策略去玩，要賺錢唔會係太難嘅事。 今晚分享到呢度，有特別情況再update大家。 風險聲明：筆者為證監會持牌人。以上內容並不構成投資建議。投資者於投資前必須充分了解產品風險，自己的財務狀況及投資目標，並諮詢專業顧問。    

我話今次嘅情況，比1月尾嗰次跌市更加兇險，原因有兩個。 第一， 上次大跌，到反彈出現，時間好短。而且，升跌嘅交接係好clear cut，大跌完，即時就大升，買盤好有力，基本上反彈一出現之後，你就知道，唔使再驚。 但今次唔同，你會見到偶爾大市都會有反彈出現，但通常挨唔到一陣，又會被沽盤擊散，呢啲走勢，其實先最難攪。 第二，睇broad market，我會睇ETF。我個list上面，全部都係喺過去三年，成個市場上升得最平穩嘅ETF。但喺呢一刻，係要全部下跌，無一幸免，呢個情況非常少見。 講講策略部署。當出現咗一啲咁全面嘅跌市之後，有技術性反彈出現，絕對唔出奇。但基於風險考慮，我會建議，持貨減半。再跌再減。 再講講個別股票情況。 Apple今日唔算太差，只跌1.22%。Microsoft 跌幅都有所收窄，只跌1.90%。Mastercard，都係差唔多，跌1.92%。 NextEra，屬於公用股，只跌0.11%，一啲事都無。 但比較大件事，例如係S&P Global，跌3.61%。RingCentral，跌3.10%，而且已經係第二日下跌，所以虧損會多少少。 不過，我可以畀個數字大家。2018年尾，美股都出現過一隻頗大嘅調整，如以強勢大藍籌股計，股價平均由頂位要跌2成多啲；一啲規模細少少嘅股票，股價有機會跌3成以上。再睇現時嘅跌幅，如果市況真係再惡化落去，啲股票距離見底可能仲有一段路段。 今次嘅跌市原因，市場普遍認為，係由於肺炎疫情。留意多一樣嘢，日本今次處理疫情嘅工作做得非常差，夏天東京奧運可能因此而取消，呢樣嘢，就算唔講實際經濟影響，只係講佢對投資氣氛嘅打擊，肯定都會好大。 暫時，我自己都會先減少股票持貨，增加現金水平，等技術性反彈出現後，如再下跌穿底，後市我會睇得更淡。 風險聲明：筆者為證監會持牌人。以上內容並不構成投資建議。投資者於投資前必須充分了解產品風險，自己的財務狀況及投資目標，並諮詢專業顧問。  

  睇返啲報道，版本有幾個。1）憂慮肺炎疫情影響經濟。2）有分析員話，美股太耐無調整，所以要調一調。3）聯儲局副主席克拉里達(Richard Clarida)話，美國經濟仍然穩健，叫大家唔好預期有得減息。 但亦都有可能係，有人想借勢震倉，趁低吸貨。 所以，昨晚我都出咗個post，同大家講可以的話，最好等多日。因為，美股實在試過太多次，一跌完好快就回穩，之後又再破頂。太快走，好易走錯。 而且，突然間市面出現咗好多話美股要整嘅言論。 當然，係唔可以掉以輕心嘅。但如果，喺呢啲唱淡聲當中，個市又再破頂呢？咁樣，就會係另一回事。 今晚美股開市後，我睇完個市嘅走向之後，回再出文update大家我嘅睇法。到時再講。 風險聲明：筆者為證監會持牌人。以上內容並不構成投資建議。投資者於投資前必須充分了解產品風險，自己的財務狀況及投資目標，並諮詢專業顧問。  

呢篇文想我講一樣嘢。 如果你之前一直都無買過美股，睇住我推介啲股票係咁升，但係就始終都係唔敢出手，以下，我會教你可以點樣做。 首先，善用兩種美股嘅特性。第一，美股你最少可以只買一股。第二，普遍佣金好平。再將兩樣嘢加埋，變相就係，你會好容易就做到「分散投資」同埋「分注吸納」。 然後，用一個你完全唔會有壓力嘅注碼，幾細注都好，入咗市先。 睇咗我呢個專頁一段時間嘅朋友，你肯定知我嘅揀股風格。 喺上年，當好多人都同你講美股好貴，Apple、Microsoft已經升得太多，唔會再有上升空間嘅時候，我就同你講，呢兩隻都係好有前景嘅股票嚟，唔怕買，總之佢哋嘅股價繼續升，你就要繼續揸。而你會睇到，佢哋嘅股價又真係不斷上升，然後喺上升嘅過程當中，你係會睇到啲新聞，同你講佢哋啲生意係點樣不斷增長。 就係呢個原因，點解我話呢啲股票貴都要買。因為，好嘅公司就係咁樣，佢哋嘅股價喺絕大部份時間就係會一路上升。你嫌貴，就好難會有機會買到。 相反，你要平嘅股票，例如東亞、TVB、翠華，隻隻都平，但係呢幾個月嚟，關於呢幾間公司，有邊單新聞係好嘅？ 但其實，以上我講嘅呢啲嘢，大家心入面應該都好清楚理解。只係，始終見美股真係升咗咁多，硬係就買唔落手。有朋友同我講：「我好驚自己黑仔，一買就坐沉你啲隻股票。」 無問題㗎，咁你咪買細啲囉，分注買。但無論如何，買咗先講。 人嘅心態好簡單，第一步永遠都係最難行，但只要你真係行咗出去，然後睇過件事又唔係好似想像中咁可怕，咁之後你第二、第三、第四步就唔會再有「阻力」。 而行第一步嘅竅門，就係將件事scale down，做細啲，但就要迫自己一定要開始行動。 第二步，就係睇吓件事，會唔會真係同之前唔同？ 當你再唔係買埋一啲連你都唔知係咩嘅股票，轉為買返一啲你真係可以安心持有嘅好公司，究竟你嘅睇法、心態，以及投資表現，會唔會有唔同？ 過埋呢一步，我可以同你講，你將會有更大決心去鑽研投資技巧，令你嘅投資回報做得更好。 其實呢篇文所講嘅嘢，都係我脫離港股轉玩美股後嘅經歷。 喺港股，你成日都會擔心，究竟隻股票升完，係咪啲大戶想出貨，裝你陷阱。但喺美股，你只要真係識得點樣去揾啲好公司出嚟，你啲投資回報就自然會好理想。 Apple、Microsoft、Visa、Mastercard，到最近嘅RingCentral，以及其他我推介過嘅股票，都希望可以畀到大家一啲啓發。 好多謝參加咗我「每週美股研究報告」嘅朋友，今年，我哋大家一齊努力。 最後，美股真係無乜要睇淡嘅理由。NextEra，企得穩，無乜嘢要擔心。RingCentral，走勢仲係好靚，止蝕係遠，但已經上咗車嘅朋友，記住佢繼續升你要繼續揸。Apple，受疫情影響，但大家可以相信佢哋嘅管理層會有能力解決到問題。Microsoft，前景非常亮麗。Mastercard，喺上星期好多股票都稍作整固嗰陣，佢都繼續升，又係要揸穩。Visa，不及Mastercard，但都唔算差，起碼都破到頂。Moodys 同S&P Global，全球寡頭壟斷地位牢不可破，喺評級機構嘅行頭內，中國用咗十年時間，連門口都未入到，以後都好難有變。以上全部都係好好嘅股票。當然，仲有更多。 暫時，我睇唔到美股有任何要睇淡嘅理由，繼續睇好。 但當然，美股出現股災，只係時間問題，所以我哋要盡快tune 好心態，順勢而行，咁就無有怕。 最後，好多謝支持我，參加咗「每週美股研究報告」嘅朋友，我一定會努力，做好研究，希望我哋今年嘅回報都可以更勝去年。一齊加油。 風險聲明：筆者為證監會持牌人。以上內容並不構成投資建議。投資者於投資前必須充分了解產品風險，自己的財務狀況及投資目標，並諮詢專業顧問。

好，先講蘋果。 壞消息傳出，昨日開市前，有朋友問：「使唔使走？」 咁我成日都講，考慮嘅要點，唔係消息嘅本身，而係隻股票對消息嘅反應。 而以蘋果嘅反應，算係過得去。起碼，開市後你見佢已經無再跌，慢慢跌幅仲要收窄，收市只跌1.83%，唔算跌得太多。 但當然，蘋果近期嘅走勢，已經無之前咁強，要逐步換碼至其他股票，我覺得都唔係壞事。 有咩可以換？ 例如Mastercard。 Visa，雖然股價近日都能夠破頂，但相比之下，又真係無Mastercard 咁靚。 而大家又可以諗返，對於呢隻Mobile Payment 股票，其實疫情唔單止對佢哋無乜負面影響，相反仲可能有利。 事實上，好多呢個板塊內嘅股票近日走勢都唔錯，而Mastercard 係為龍頭之一，股價表現又咁強勢，點解唔睇好？ RingCentral，又係唔使講，繼續升就要繼續揸。 唔好揾理由去睇淡一隻升緊嘅股票。 如果你成日見隻股票升得多，就要揾理由去睇淡的話，我想講，你好難會賺到大錢。 到隻股票走勢轉差，咪走人囉。但升得好地地嘅時候，就要對隻股票有信心。 同你管理員工一樣。你無理由個員工做到嘢，交到功課，你反而仲唔信任佢。對於一啲幫到手，好嘅員工，你應該要善待佢，對佢有信心。 同樣地，對於一啲持續上升緊嘅股票，畀啲信心佢，畀啲信心自己，有呢種心態，你揀嘅股票就自然會唔同，你就會發覺啲好股票就會痴住揾你，你就會賺到錢。 買好嘅公司，買上升緊嘅股票，順勢而行，你就會發覺你嘅投資道路會順暢好多。 最後，美股真係好強。 特別如果係嗰啲不受疫情影響，繼續破頂嘅股票，就更加要唔好怕，繼續揸。睇吓有無時間，一陣開市後再講。 風險聲明：筆者為證監會持牌人。以上內容並不構成投資建議。投資者於投資前必須充分了解產品風險，自己的財務狀況及投資目標，並諮詢專業顧問。

有朋友問，蘋果點睇？ 公司出咗警告，話中國肺炎疫情將預期令公司收入下調，呢個無疑係壞消息。但我成日都講，唔好將著眼點放喺消息既本身，而係要睇佢既股價對消息既反應。 當然，如果一陣蘋果既股價企唔穩，繼續下跌，咁當然要小心啦。但假如佢可以企穩，然後跌幅收窄，甚至倒升呢？ 你點知佢一定會跌？ 有啲嘢，無必要估，總之就睇實股價表現，跟策略做就可以。 但當然，你亦都可以選擇揀啲唔會受疫情影響既強勢股嚟買。例如，上週提過既RingCentral，股價喺業績後繼續走強，揸住既朋友，繼續揸實就可以。 又好似再之前提及過既兩隻評級機構股，股價又係繼續破頂。呢啲股票，基本上唔會受到疫情影響，所以大家根本無必要自己嚇自己。 另外，要留意實喇，美股啲期權既引伸波幅已經回落，如果升勢加劇，切記唔好手軟。唔好又係錯失哂機會，到「蘇州過後無艇搭」，你先問我仲買唔買得。到時，我真係唔識點答你。 總之，都係嗰句，順勢而行，咁就唔會有問題。 風險聲明：筆者為證監會持牌人。以上內容並不構成投資建議。投資者於投資前必須充分了解產品風險，自己的財務狀況及投資目標，並諮詢專業顧問。

        Ichimoku，中文譯作「一目均衡圖」，佢既好處，顧名思義，就係可以畀我哋好容易就一眼就睇到股票強弱。但做法有啲要注意地方，呢篇文章會簡單講講。 1) 基本用法 圖A，中間大家會見到「一舊雲」，雲上就係牛區，雲下就係熊區，股價喺牛區就主力造好，熊區就主力造淡。所以，用喺一啲持續上升既股票，如果股價處於牛區，即係話你隻股票可以繼續揸，然後到跌落熊區，就止賺、止蝕。 2) Ichimoku既原本設定，較適用於長線投資。 圖B，Ichimoku用嚟教你牛市坐股票，熊市走人，或者提醒你走避一啲基本因素徹底轉壞既股票，效果一流。如2018年5月既東亞，你用Ichimoku走，30蚊以上就已經走到，唔使怕跌到依家18蚊以下。 3) 作中短線買賣，要調節參數。 原本設定，如作中短線買賣，止賺、止蝕位有機會設定得過遠，如圖C的Mastercard，現價約340元，但離場價格卻放置於240元以下。雖然，雲的位置會跟隨股票上升，但如用作中短線投資，所用參數也要作合適調節。 4) Ichimoku不宜單獨作買賣訊號 雖然Ichimoku係一個好強大既技術分析指標，但如果單靠佢就進行買賣，效果未必理想。不過，假如我哋可以揾到一啲能夠穩步上升既股票，有能力長期騎於雲上，呢啲股票，長線就可以為我哋帶來最大回報。 希望以上既分享，可以令大家對Ichimoku開始有初步認識。除咗MetaStock之外，唔少平台如例如係Tradingview.com都會可以用到Ichimoku，有興趣大家都不妨研究吓。 風險聲明：筆者為證監會持牌人。以上內容並不構成投資建議。投資者於投資前必須充分了解產品風險，自己的財務狀況及投資目標，並諮詢專業顧問。

以下，講少少Logistics。 以後逢星期一、三、五，我都會上載報告去Homeblogger 既付費專欄平台，大家只要登入平台，就會睇到有關內容。 下星期一，會開始soft launch。 咩係soft launch？就係平台上已係會有嘢睇，但就唔會計錢住。所有計劃既生效日期，會由3月先開始計。 好喇，講講一啲我面對既難度。 附圖係用我既系統揀出嚟，喺S&P 500指數成份股入面，分數最高既五隻股票。咁我相信，大家睇咗我既專頁咁耐，對我揀股既能力，應該已經有一定信心。 但係，有一樣嘢我必須要做，就係要令大家將來只要揸住我既最新報告，就已經識得去自己揾食。喺過百隻股票入面，買邊隻好，咩位買，咩位沽，都會變得好清楚。 以上係我今日全日做出嚟既少少成果，加入咗ichimoku (一目均衡圖)，令成個系統既買賣變得更完善。 Ichimoku，可能有啲朋友都會聽過，識得用既話，係一個相當強勁既指標。 未聽過既朋友都唔緊要，畀多一日時間我，星期日我會寫少少簡單教學。 但無論如何，大家唔使擔心，呢個服務，我一定會盡力做到物超所值。將來有建議，都歡迎話我聽。

美股好強，呢樣嘢都唔使多講。 投資要順勢而行，要買升既股票，睇得呢個專頁既朋友，基本上都知道應該要咁做。 但我明白，到落盤既時候，見到隻股票之前已經升咗咁多，決定入市既時候，始終硬係會有啲唔自在。 今日，講吓一個可能幫到大家既處理方法。 第一， 隻股票可能本身你預計要買10萬蚊既，照買，但可能就只買3萬幾蚊，即係原本入市金額既1/3。 我唔點樣去解釋，但心態就係咁。如果你一蚊都唔買，當隻股票繼續升上去，你走咗寶，慢慢你就會唔鍾意隻股票，之後你都唔會再買。 但只要你有買少少，佢升上去，你都會開心，仲要加埋嗰種「早知買多啲」既諗法，下次再有入市機會，你自然就會買。 第二， 同時間，你可以喺低位部署Short Put。 即係，你個策略會變成Short Put + 少量股票。 Short Put 既作用，就係等可以一邊賺住時間值，一邊等適合既機會喺低位買貨。詳細行使價、月份點揀，恕我唔會喺度教。但Short Put + 股票的確係一個相當唔錯既策略。 第三，分散投資，唔好買死一隻股票。 分開幾隻股票去買，但就要make sure隻隻都係好股票。適當地分散投資，對我哋散戶投資者嚟講，非常重要。有機會再講。 第四， 股價轉勢，都要識得離場。 一般朋友成日會覺得隻股票「升咗咁多先買」，風險會好大。但我想講，你買升既股票，風險先唔高。 特別係一啲長跌既股票，通常都係一啲質素差既公司，其實仲衰。 而且，升開既股票，一旦轉為跌勢，會相當覺眼，你肯走一定走到。 希望以上既分享，會令大家更加識得點樣去買上升既股票。 美股，波動會有，但我會睇到能夠繼續破頂既可能性好大。揀啱股票，做啱策略，未來幾個月我哋能夠繼續贏錢既可能性好大。 總之，他日個市轉勢，我哋可以察覺得到，識得走人，就唔會有問題。 風險聲明：筆者為證監會持牌人。以上內容並不構成投資建議。投資者於投資前必須充分了解產品風險，自己的財務狀況及投資目標，並諮詢專業顧問。