今日係最後一篇文章，咁啱個市又轉跌，係時候要同大家重温我認為投資最重要嘅一點，就係順勢而行。
過去大半年，基本上我哋揸住嘅股票以及ETF，特別係後者，一直都喺度穩步上升。揸住佢哋，根本我哋乜嘢都唔使做，就已經可以賺到相當唔錯嘅回報。
或者咁講，喺呢啲上升嘅市況當中，我哋喺買入股票之後，其實最後就係乜都唔做，咁賺嘅錢反而仲比出出入入更好。呢個，就係升市嘅順勢而行。
至於另一邊嘅順勢而行，就係話當我哋感覺到個市有危險嘅時候，係要走貨，而唔係買貨。雖然最近有好多朋友都話，幾日之間輸咗兩個月以來累積嘅回報，走貨嘅時候有啲唔開心。但換轉如果喺跌市入面大家唔係走貨，仲係繼續撈底，可能大家要損失嘅就唔係之前賺到嘅利潤嘅一部份，而係要輸入肉，輸到本都無。
又向好嘅方面諗，假如大家真係走完貨，然後個市真係步入股災，只要大家繼續遵守住順勢而行嘅法則，咁之後嘅危險，我哋基本上就已經避開咗。
坦白講，我暫時都唔敢肯定今次美股係咪從此就步入股災。如果係嘅話，未來9個月，大家就要忍一忍手，唔好咁輕易入市買貨。然後，只要我哋避得免頭9個月嘅跌市，去到熊市嘅第三期，市場上就會有大把優質嘅股票，以好平嘅價錢畀我哋任揀任買，呢個會係一個好大嘅賺錢機會。
到時，最難嘅唔係揀股票，而係你要有錢去買貨。只要你有錢，賺錢就唔係難事。
所以，大前提係大家喺熊市嘅初期唔好輸大錢。假如你輸咗錢，去到熊三，有幾多好嘅投資機會都唔會關你事。記住，呢一刻，保住盈利同本金比任何嘢都重要。
最後，我諗大家都睇到，市場上嘅危機根本都已經浮哂面。淨係咁多大企業都沾手於Bitcoin，一旦Bitcoin 出事，會連累股市大跌都唔出奇。又或者，大家睇返啲美國最大型企業，過去半年都已經無升，加上好多創新股都去到幾百倍P/E以上。當個市有升勢，估值貴呢樣嘢，唔會係問題。但一到個勢轉差，所有呢啲因素嘅負面影響，就會浮現。
往後嘅升跌，我無水晶球，預測唔到。不過，有啲嘢唔使水晶球，就係市場嘅投資風險已經大增，大家一定要小心。最後，祝各今年可以萬事順利，然後危過就有機，希望我哋全部都可以賺到理想嘅回報。共勉之。