【莫家強】若然你係揸住啲雲端股

今日個市好簡單,如果你睇嘅係幾大指數,當然唔係咁靚。但若然你係揸住啲雲端股,或者係揀啱啲醫療相關股,今日好多都係升。就算係業績麻麻嘅TDOC,跌幅都已大幅收窄。

有朋友問,會唔會擔心經濟轉差?

我唔會擔心,因為一定會差。一定會有好多公司做唔掂生意,好多人會失業,呢樣嘢基本上肯定會發生。但對於股市,係另外一回事。

各國政府,嚟緊都一定會放水。放水呢樣嘢,唔會有得公平,香港如是,中國如是,美國如是。而結果係,有啲人或公司,會比肺炎出現前得益更大,但同時,亦會有好多受武漢肺炎疫情打擊嘅人或公司,係會完全得唔到任何保償。

其實你要揾一啲近月賺錢多過上年嘅公司,一啲都唔少。用呢個思維去諗,你會容易啲揾到啲升嘅股票。但如果你係用追落後嘅心態去揀股,咁你就只會揀到啲受疫情打擊嘅股票。

所以,你嘅心態係點,就會決定你會買到邊一啲股票。

今日,隻CLIX升返。呢隻ETF,係你唔買都要留意住。

CLIX要升,可以係兩個原因。第一,係一啲有做網上銷售嘅股票上升。第二,係一啲無做網上銷售嘅實體零售店跌。夾埋隻IBUY嚟睇,你就好快就會有個初步概念零售業吹緊啲咩風。

最後,提多大家少少,嚟緊嘅美股,唔好睇道指。道指嘅持股,粗俗啲講,係有啲九唔搭八。

睇嘅,應該睇S&P 500指數,以及納指。呢兩個指數,最大嘅五隻成份股,完全一樣,都係依次序Microsoft、Apple、Amazon、Google (Alphabet)、Facebook。前者,叫做比例分散啲;後者,呢5隻股票已經佔咗指數接近一半成份。而呢5隻股票,現時走勢全部都唔差。

唔想煩,唔識揀股,最簡單可以用我喺期權班教嘅方法,一邊用期權製造高息,一邊玩納指ETF。然後,就留意住嗰5隻巨企嘅走勢。

今日個市唔靚,正好就係觀察股票表現嘅最佳時機。有朋友問飛天雞翼仲買唔買得?穩陣啲嘅方法,你可以等下次整固完再上嘅時候先買。

但揸住貨嘅朋友,佢升,記住要繼續揸。聽過我分析嘅朋友都會知,如果佢真係可以喺更多國家成功企穩陣腳,呢隻股再升double都係太難嘅事。呢隻會另一隻我覺得風險唔細,但有潛力倍升嘅股票。繼續留意住啦。

風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。






本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室