事先張揚:四月很美好,五月小心啲

今日題目

 

四月股市很好。實體經濟?who cares

美股反彈符合黃金比例

Sell in may好似冇乜根據,不過都係小心啲好

美企業績對辦,但股價照插

 

 

四月股市很好。實體經濟?who cares

五一勞動節快樂,埃汾照樣勞動。實不相瞞,多數放假先最有心機寫。

 

回顧四月,大家投資表現如何?身家升跌點?

 

你睇下四月嘅「實體經濟」如何?美國第一季GDP收縮5%,金融海嘯後最差。放心,下季更加恐怖。消費開支史上最大跌幅,工業生產又係史上最大跌幅,三千萬人失業,史上嘅幾倍。

不過,美股表現都係1987年以嚟單月最強,環球股市亦都係金融海嘯後單月最強。所以千萬唔好執著於啲咩「經濟數據」,股市炒未來。

 

事實上,正係美國首次申領失業救濟人數,差不多7百萬嗰個星期(3月25),美股就見底,打後差不多升三成。

 

當然,3月當時真係嚇到賴屎,而家事後講就易,當時撈底,真係要好大個心臟同好大個荷包。但至少,你可以做到嘅,就係唔好panic sell,sit tight.實不相瞞埃汾嘅倉位完全冇減過,甚至加咗少少。總資產(所謂嘅「身家」)仲高過肺炎跌市前。

 

重覆一次,要你撈底執三成,冇乜可能。但至少你唔好低位打靶賣畀人。同埋,你如果低位打靶嘅,往後你要再買返,心理上好難的。

 

美股反彈符合黃金比例

睇開文都知,埃汾唔係好信技術分析,唔多信圖。頂多有時睇下250天線,或者睇破頂,睇momentum。

 

但作為一個數人,「黃金比例」0.618實在太過偉大。用落股市,啲友就叫Fibonacci,同一回事。大約係講大升後嘅調整,或者大跌後反彈。例如金融嘯後嘅跌浪,跌幾多先見底?就剛好係之前1982-2007升幅嘅61.8%(雖然搵起點有啲夾硬)。

 

但,不可不信邪,你見昨晚(星期四)美股明顯變差,好似冇乜特別消息,明明啲業績都OK,星期三仲升到爆。望下樓上個圖,正係低位反彈咗61.8%了。Just saying

 

 

Sell in may好似冇乜根據,不過都係小心啲好

 

事實上,大家應該小心啲了。問我就幾時都睇好,幾時都買得,但要控制你倉位同風險。Sell in may呢啲嘢冇乜根據,但史上好似真係有咁嘅趨勢。

 

而可能我細膽,不過你見侵侵近期啲言論開始唔係太友善,聲稱要中國為疫情找數云云。你問我當然係為咗佢嘅選票,因為而家咁嘅經濟情況,唔搵外在敵人,恐怕連任有啲難度。

 

有傳話想賴帳,唔找數,中國持有嘅美債佢全部唔還(但,聽聞其實根本唔會有得還的,只會一直印)。有乜後果就試下先知,就我片面嘅理解,咁樣應該係構成違約事件 —正如你公司欠落嘅債券,冇得選擇性違約。一張唔找就等於全部違約。

 

可能被佢嘅幕僚勸阻,咁侵侵似乎又話唔會唔還錢。不過就可能又出佢拿手好戲,加關稅。Well,大家可以諗下,之前一路加加加,結果如何?不過當然,呢類東西已經夠震散股市—低位升咗三成喎。

 

另一方面,聯儲局當然繼續放緊水,但部機開始慢落嚟,資產負債表增幅係7星期最慢,都合理嘅。

 

美企業績對辦,但股價照插

 

 

不能一一細講,但你見普遍啲美國公司,特別係升得最多嘅科企,出啲業績都係對辦的。微軟一季賺緊100億美金,所以你去同我講咩頁岩氣公司爆煲,真係唔知有乜好講。Tesla 亦強,賺錢喎,不過你見股價昨晚(星期四)高位大跌。Google Facebook較早前出嘅業績都勁,廣告其實加緊錢。但最具代表性係剛剛昨晚(星期四)收市後出嘅蘋果同亞馬遜。亞馬遜業績比預期低,預第二季輸錢,咁盤後大跌合理。但蘋果業績明明勝預期,一樣照跌,似係成個市場氣氛拖累多啲。

 

 

Comments are closed.

使用諗Sir獨家按揭進階計算機,Powerteam成交實例請到:https://buyhouse.com.hk

wtsapp icon top