繼續炒疫後復蘇
新世界似有後著
亞洲市場牛市重臨
拆息大跌，樓市有支持？
繼續炒疫後復蘇
簡評一下港股，暫時似乎都係炒重啟經濟，開關，消費重臨。股票永遠炒前景，部份嘅醫藥股回吐，包括之前成日提嘅平安好醫生（1833）。而本地消費股呢兩日不錯，周大福（1929），莎莎（178），六福（590），歐舒丹（973），利福（1212）等等。本地地產股都強，九倉置業（1997），領展（823），長實（1113），（16），恒地（12）新世界（12），等等
新世界似有後著
講開新世界，早兩日宣佈4合1，實在有啲奇怪。好地地搞乜四合一？定有後著？當然比較正常嘅講法係想個股價唔好咁細，因為傳說中外國基金不能買股價1美金以下嘅股票（但其實新世界而家9蚊）。亦都有話係想收多啲貨—因為4合1後又會有碎股，散戶就好多都沽—而大股東呢期係密密增持的。
Anyway，正所謂拎住個槌仔就乜都似釘，我都係覺得有啲嘢。早幾日隻新世界百貨中國（825）幾強，之前專欄都寫過係私有化目標，可以諗下。
亞洲市場牛市重臨
你冇睇錯，亞洲股市之前所謂「轉熊」，其實高位跌咗三成，而家就變咗牛市了。詳情可以睇返彭博嘅稿。睇嘅係MSCI亞洲，相對地公平嘅指數。由3月23嘅低位，已經反彈20%。
比較有趣嘅係，MSCI亞洲，其實差不多係最後一個「轉牛」嘅區域，落後於美國，歐洲，東南亞同拉丁美洲。但至少大中華股市，其實之前係跌得最少嘅。當然韓國或東南亞又係另一個景象。
之前驚嘅，都係嗰幾味，其實但凡環球跌市，亞洲市場都係講嗰幾樣嘢。資本外逃，外勞匯款大跌（例如菲律賓同印尼），貨幣貶值，但好多公司賺本土貨幣債就美金，負擔大升。不過今次新嘅就係多咗，「經濟倚賴中國」。除咗進出口外，仲有旅遊業。但隨住疫情見減退，人人開始講重啟經濟，股市即時就反彈—從來都唔會等到真係冇個案先彈。
另外可以留意下，各國走出熊市嘅次序，睇下有乜啟示。初步睇似乎都係跌得越勁就彈得越快。南韓3月尾已走出熊市，之後係菲律賓同印尼，泰國澳洲紐西蘭台灣印度越南。中國呢？根本冇入過熊市。
當然了，風險幾時都存在。低位彈返兩成都好，其實年初至今仲係跌緊14%，而亦見到個volatility 仲係自雷曼之後嘅十年高位。
一方面證明時機好重要，你年頭買同3月低位買已經兩回事。另一方面，唔想搞咁多嘢嘅，就真係一動不如一靜，切忌就低位打靶。
拿，4月，恒指都彈成千點啦。唔算好多（5%不夠），但總好過你日日走去鬧匯控叫佢賠返啲息畀你，或者去炒期油ETF。
拆息大跌，樓市有支持？
寫過多次，美國拆息落晒，香港未落，當然會吸引資金流入，港紙強勢，多次觸及7.75強方保證，所以金管局入市注入港元。而家銀行體系結餘多咗，港紙拆息跌返好多，個別嘅按揭已經唔再掂到封頂位。固然而家每個月慳到嘅係極少，但what if 拆息繼續跌？08聯儲局減息同埋QE後，你見拆息去到0.5厘樓下的。
同一時間，又見到啲樓價指數回穩了。當然已轉勢定稍為反彈，就事後先知嘅。
sex videos
亦都分享啲花邊新聞，你見啲賣家嘅議價能力相當強，一見疫情回穩，反價又有。甚至簽咗賣都寧願賠訂反口。
版務
星期五公眾假期，但專欄依然係繼續的。