對於現時美股嘅策略，我會特別留意一啲已破頂嘅股票同ETF，然後等佢下一次再上嘅時候，就加注買貨。所以，今日都會集中同大家講有咩破頂嘅ETF。
第一隻講嘅係PTH。
呢隻ETF，最主要投資喺Biotech嘅股票，但其餘醫療範疇嘅股票，佢都會有持有。而佢同其他ETF嘅一個重要分別，係佢會講求佢嘅持股會有「上升動力」。而的確，呢個做法，令佢嘅表現都明顯跑贏S&P 500 Healthcare Index。
要知道佢嘅持股分佈，可參考以下連結：
https://etfdb.com/etf/PTH/#holdings
其中，我想大家特別留意以下一啲股票。
West Pharmaceutical Services Inc (WST)
呢隻股票，我未必會公開講，因為我有機會自己會買。
而佢嘅特別之處，係佢唔係做藥物，而係做一啲注射藥物嘅容器。大家睇過我嘅評論都知，我成日都話你買得啲醫藥股，就要預咗佢嘅股價會好chok。因為，喺藥物研發嘅過程中，變數好多，有好消息，當然股價可以大升，但有壞消息，股價同樣可以大跌。
但要點解決？你咪揾啲無咁大變數，而又有前景嘅「醫藥股」囉。
WST嘅前景，在於我哋可以預期注射藥物嘅供應同需求都會大增。淨係肺炎疫苗，嚟緊將會有好大市場。當然，到呢一刻，我哋仍未知道邊一間藥廠率先研發到疫苗，並推出至市場。但可以肯定，呢啲疫苗，全部都要入樽。睇到呢度，你就知點解我咁睇好呢隻股票。而當你睇埋佢嘅長遠股價走勢，你就會更加對佢嘅未來前景有信心。
將來我做節目，唔好問我對WST嘅睇法，最好私底下問。
然後，喺呢隻ETF入面，例如係Masimo (MASI)、Teladoc (TDOC)、Thermo Fisher (TMO)、UnitedHealth Group (UNH)、Moderna (MRNA)都係我好鍾意嘅股票。惟篇幅所限，今日未必可以每隻都可以寫到分析。但策略都係一樣，嚟緊如果出現整固後企穩再上，就買啦。
至於CLIX，即係之前提過嘅Online Retail嘅ETF，我想再補充多少少。
如果大家有做過功課嘅話，你會發覺，佢嘅持股入面係「大靚過細」。例如係Amazon (AMZN)，做得好好。Alibaba (BABA)、ETSY (ETSY)、Chewy (CHWY)都做得唔差。一啲中概股，表現都可以。但有好多比重較細嘅網購股，其實表現都唔好。
呢個行業就係咁，慢慢係會出現大食細嘅情況，跑出嘅股票會升得好勁，跑唔出嘅股票就會打回原形。網購潮流，唔同實體店。後者講location，例如喺屋企附近嘅一啲小店，你可能因為方便，所以都會幫襯。但online retail，會有更大winner-takes-all嘅意味，即係贏家會攞哂成個市場，所以大家更加要買強勢股。
最後，上個星期其中有一個板塊嘅ETF升得最好，嗰個就係銀行股。
SPDR S&P Regional Banking ETF (KRE)，上週升咗13.98%。Invesco KBW Regional Banking ETF (KBWR)，上週升咗13.85%。SPDR S&P Bank ETF (KBE)，都升咗13.47%。
特別係啲地區銀行股上升，代表美國嘅金融風險危機唔係好大。銀行股我未必會買，但呢個絕對係好現象，會令我更加有信心去買入一啲我心儀嘅強勢股票。
有問題，請電郵至 [email protected] 畀我。星期五，繼續做教學。