今日題目：
內銀反彈，本地零售股都強，但仲係睇好ATMX
私有化對象：信和（83）
原油ETF —繼續鞭屍
內銀反彈，本地零售股都強，但仲係睇好ATMX
大市甚好，不過今日反而想寫其他嘢。你見今日升嘅都係啲重磅股，內銀內險，國企指數明顯跑贏恒指。當然個市要好，內銀點都要升，大基金好多都要例飛買。殘係夠殘，派息又好，又真係應該唔會爆煲—但你睇長少少，都係諗騰訊（700）阿里巴巴（9988）好過。甚至美團（3690）同小米（1810）。
我嘅信念係，全球最賺錢嘅都係科技股，騰訊先1000億（人仔）純利，工行（1398）講緊3000億，照計騰訊點都應該睇齊。
另外，唔止港股強，度度股市都強。明顯係開始炒經濟重啟。甚至都唔係第一人炒。你見大家樂（341）出完盈警，業績明顯差過預期，都仲要倒升。維他奶（345）一樣強。甚至再去諗甚麼莎莎（178）國泰（293）之類都有得。不過其實真係唔係今日先開始彈，似乎都係買返科技股好啲。
私有化對象：信和（83），尖沙咀（247），恒隆集團（10），恒隆地產（101）
一注獨贏，就梗係信和。
大家搵到嘅，搵高盛份報告嚟睇。我就只係睇報紙睇到。其實大行報告有時可以好流（反正我都寫過），有時亦係你睇到時乜都升晒。但私有化好玩，因為私有化要坐，偏偏人就冇乜耐性，基金經理都未必有耐性—因為要交代成績，好多啲啲客未等到食糊已唔耐煩要贖回。
言歸正傳，有機會細寫，好值得研究。但，一注獨贏，諗咗信和先。之前利豐（494）同會德豐（20）私有化，太古（19）又有傳（難度高好多）。收費專欄第一期就係寫私有化對象。
點解睇信和？因為英雄所見略同。明報篇嘢都大約有講，幾個重點，信和都中晒。大股東渣得多（咁就私有化都唔使好多成本），負債低（唔通大股東同你孭上身咩），簡化架構，大股東增持過，仲有夠殘。
信和？留意返，信和嘅大股東係……尖沙咀置業（247）。真係冇返咁上下年紀都唔知呢隻嘢，根本係重叠咗，姓黃嘅經247再渣83。247入面近乎係冇嘢的，你睇佢個年報啲數就同83一樣咁滯！隻247就500億市值（信和嘅大半），但冇成交的。簡化架構似樣。至於負債？wow，講你都唔信，以勇猛馳名嘅信和，係net cash 的！大股東？之前一路都以股代息增持。
至於夠唔夠殘？報紙引報告話信和仲殘過金融海嘯。齋睇股價應唔係，而家10.5，當年6.5都見過。不過，如果計「估值」，相信就係。埃汾放假中，但粗略計，而家book value 應該21蚊，剛好50%折讓。當年呢？應該12蚊book，冇見過6蚊喎。所以你計price to book，而家殘過當年。似乎唔買就笨。
有機會寫埋兩隻恒隆
言猶在耳，今日信和就升4%—不過弔詭嘅係，到升得多，大股東又未必想私有化了。
原油ETF —繼續鞭屍
都仲係有人繼續「博反彈」。所以只能講句，傻仔何其多。搏中係你好彩，輸錢係應份。都係嗰句，樓市股市都未識睇，做乜覺得自己識炒油？同一班友，你叫佢買股票，佢會同你講，「你點知見底未？」（知就發咗啦），同佢講乜乜估值，佢總會話你知「今次唔同冚球鏟」— 但買乜鬼期油ETF，佢就會覺得「跌得好殘」，而唔去諗「你點知見底未？」。一年間，14蚊輸到2蚊唔夠，正路你買咩股票都唔會咁咯。
世界就係唔公平，大股東就係坑你，有錢人就係搵你笨（而家先知？），政客就係無恥（而家先知？），央行就保護有錢人。以上皆是。但，都仲有好唔公平，同冇咁唔公平嘅分別。
你買大公司股票，出你術嘅機會比較細，況且人地都唔使呃你，大把其他油水。美股更佳，港股麻麻地，A股就同情仍需努力。嫌風險大嘅，咁你咪買ETF買盈富，總唔會幾十間幾千間公司一齊呃你掛？又有啲嫌唔夠快嘅（好得意，嫌買正股風險大但又嫌唔夠快），咁你咪炒期指，或者玩牛熊證，做option，借孖展 —係危險好多架，但至少都唔係畀人千你。
諗埋晒啲古靈精怪嘢，以為自己好醒，刻意求工，「傻仔先買盈富大藍籌」，多數就自己死先。大家切記。啲網友以為自己好叻仔？望下鏡去打下薄，睇下自己有幾叻仔。
版務
冇乜特別，你見又再加咗少少嘢，開頭會整個「今日題目」，希望大家有用。另外，我發現留咗電話同email都好，都係未有人PM我嘅。