今日真係寫短啲，但訊息量很大。
HIBOR 一個月新低
不用多講，呢度嘅讀者當然知道點解。真係miss咗嘅，睇返舊文，或者我Facebook Page 都有寫．
咁就當然係呢度嘅讀者優先知，我盡可能堅料都在呢度寫先。但當然有時有例外，始終要就星期一，三，五黃昏。「不如第時多啲讀者，或者加到價，咁就一個星期寫足五日」。講真，儲夠讀者嘅，全職做都可以的。拆息低咗，當然對啲供樓族（例如我）有啲幫助。
另外，你見有呢啲400萬樓下嘅細價樓，啲友都真係去搶的。實不相瞞我都諗過，反正埃汾太係仲有首置名額的。三十幾萬首期，一個月供一皮嘢左右，冇乜壓力。但因為我中學就在呢度讀書，上過去個同學屋企，殘到不堪—而我中學講緊三十年前咁滯喎！當年都好殘。所以作罷。咁又冇咗個機會
門檻低實出事 — 車位
但當然了，物業都有好多種。車位幾時都係劣等資產，但勝在入場費低—但埃汾講過十九幾萬次，入場門檻低嘅嘢，係易中伏的。玩輪又係，劏舖又係，車位亦係，玩到電單車位更加唔使講。當然你反應快嘅，好好炒，炒到尾水就升呢啲嘢。但自問反應慢人幾拍心大心細嘅，就安份啲了。
你買層樓蟹咗，可以自己住。唔住可以租畀人，甚至拎嚟當炮房，當迷你倉，做工人房都仲得（真係有人買個細單位畀工人架！）。但我多咗個車位，冇車嘅，要嚟做乜？自己落去訓？定去打野戰？
門檻低嘅實出事—石油ETF
但近期講門檻低嘅，就梗係呢隻3175。三星標普高盛原油ER期貨ETF。望下個成交？嚇死你，20億。我唔明香港幾時咁多石油專家，股票都未識睇，樓都未識睇，學人賭期油？走去恥笑因航炒燶期油，咪五十步笑百步（定百步笑五十步？）。
根本啲友連自己買乜都未知。詳情，蘋果股榮已經寫得好清楚。簡單嚟講，隻嘢唔係跟油價行，要玩loop loop loop大玩，轉倉。亦因為發行商要對沖，咁梗係用期貨去roll，唔通買桶油返嚟咩。
睇下會唔會詳細寫。但樓上個圖睇到，炒油價嘅，我不如買中海油（883）算啦．本質上，同2018啲友去 short VIX一樣。睇錯邊輸錢冇計丫—但你發現，睇啱又係輸錢的。
門檻高冇咁易出事—中銀航租
呢個真係唔係好對得住呢度讀者，但都冇法。事緣係我上星期五寫完收費專欄後，寫明報嘅（免費）專欄。見到段新聞，講國泰唔訂波音機，轉會續租中銀航租嘅機。然後醒起，之前Facebook Page 都寫過，國泰之前又係sales and lease back．又係呢間嘢。
寫完篇文，然後星期日晚仲爆多單，連聯合航空都幫襯。又係Sales and Lease back。今日隻嘢升7%。
詳情在明報專欄有講，Facebook Page 都有文，我嚟緊幾日都仲會講。所以記得都密切留意埋我Facebook．
行業，聽落唔難。咪同波音空巴買飛機返嚟，租畀啲航空公司。但點解航空公司唔自己買？因為冇錢，或者唔想孭咁大件嘢在自己盤數。另外，咁租賃公司錢何來？就係借。所以大股東係中國銀行（3988）就好重要。
講到尾，唔係咩火箭科學，但個護城河就係極之capital intensive。公司500幾隻飛機，放在自己資產負債表，一架億幾美金，自己計下有幾多。呢啲咪高門檻嘅行業。
ATM，平安好醫生，阿里健康。
ATM，阿里巴巴（9988），騰訊（700），美團（3690），今天個別發展。有趣的是成交，阿里巴巴47億，騰訊更是63億 —最開心的是港交所（388）
但都係想講，阿里健康（241），同埋平安好醫生（1833）。早兩期嘅收費專欄有講。話口未完，今日平安好醫生升9%，變埋紅底股。阿里健康呢？2250億市值。已經大過30隻恒指成份股，包括長和（1），銀河娛樂 27），碧桂園 （2007）。但我係唔多信的，有貨嘅咪有得佢升下，冇嘅唔好追了。
Start up 嘅嘢
DayDayCook上市，我嘅諗法，就係呢個圖。當然，有阿里個名，有新世界，仲要只係集幾億，炒上幾倍全無難度。你有方法IPO買到可以諗諗，但明白係鬥傻遊戲。到升咗幾倍到時就會有人寫隻嘢點掂，就可以笑下。
版務
話明寫短啲，結果都好長。另外想講，其實Facebook Page 係想搞抽獎的，當然唔係送錢，但有啲例如Wall Street Journal 訂閱之類呀咁。大家有冇提議應該點搞？純係益下讀者。定限定要收費專欄讀者先有？好似都公平？又可以搵到多啲人嚟。