各位讀者好，雖然晏咗些少，但紅日（星期五）依然係有埃汾嘅文章。亦都多謝Homeblogger嘅同事幫手upload。由於香港放假，會寫得較短。
美國經濟數據繼續差，但已冇人會理
首先係講美國嘅首次申領失業救濟數據。留意，3月26號嗰一次，我直頭數據出前寫篇文。就係你見到樓上個圖忽然抽上去300萬之上嗰次。4月2號嗰次，我亦都有出個Post，雖然只係兩個字，因為做緊電台節目，上到670萬。昨晚（星期四），你見到，660萬，但唔係太多人關心。正面嘅，你可以話比670萬嗰次為低，但負面嘅，明顯係比預期（5百幾萬）為高。
仲有，其實，3次出完數據，美股都係升嘅！所以並唔係「好多人失業，經濟差，炒人，冇錢供樓，銀行爆煲」咁嘅邏輯。As long as政府/聯儲局可以將疫情控制到係「經濟衰退」（已不能避免），而唔係金融危機（似乎避免咗），就真係冇乜問題的—你保得住你份工的話。
當然了，另一方面，你睇經濟數據，繼續會好難睇，好恐怖。真的。差過金融海嘯，差過科網爆破，會係好似1930年代大蕭條咁。失業率會升到雙位數以上（15%？），GDP會收縮兩三成—但，應該係短暫嘅。
當然亦多得，聯儲局放水。讀者知道的，聯儲局1秒鐘印緊100萬美金嘛。收費專欄有講，亦都比我Facebook Page早，呢個係對大家嘅承諾。
有錢到！香港銀行體系結餘將會爆升！
Meanwhile：
應該冇乜人知係乜下話？知嘅即係做銀行嘅行家了。畀多個圖你
都仲係唔知係乜呀可？咁唔故弄玄虛了，留意下呢段冇乜人理嘅新聞：
港元拆息(HIBOR)普遍下跌。因金管局將減發外滙基金票據，如果期間沒有觸及強方或弱方兌換保證，銀行體系總結餘至5月中會升至約740億元
就係，銀行體系結餘，會升到740億。喂，都幾誇張，你見而家係540億。
當然，膚淺嘅睇法就係，有錢到。亦都可能係。同時間亦見到HIBOR跌，舊文都寫過，HIBOR咁強，令港紙都強，令到有資金流入
而你睇樓上嘅樓，又好似真係見到，舊年（2019年），頭三季都係銀行體系結餘跌，大市就唔得，去到年尾就升返啲—但你年尾先知嘛。
但無論如何，銀行體系嘅錢多咗，對於持有資產（樓又好，股票又好）嘅人，都係好事。
渣打係威係勢
最後，英國叫銀行唔派息呢壇嘢，其實最無辜唔係匯控，亦唔係散戶。而係……渣打（2888），明明公司冇乜英國業務，又冇乜請人。但就居然都畀英國政府搞。匯控遷冊，對我嚟講係不可思議。但what about渣打？唔一定搬香港，其實可以搬新加坡。
再諗大啲，我一路有個想法，就係其實星展係想吞咗渣打的。我之前做星展，但絶冇內幕，呢個想法在我去星展前已有。其實兩間都係淡馬錫大股東，渣打就積弱，星展做得唔錯—但，只能在新加坡獨當一面。香港冇乜訂企，而東南亞又受到中銀香港（你冇睇錯，係中銀香港）嘅挑戰。中銀香港近幾年不停買老母的東南亞業務，既係政治，亦為擴張。星展唔做合併，只怕在東南亞會被中銀挑戰。所以成件事幾合理。如果有一日發生，記住you heard it first from Ivan
但呢個位係咪買渣打？我有啲保留。炒遷冊炒併購當然可以，但買過嘅就知幾咁難玩，唔係難在個市跌，係難在個市係咁升，你隻嘢都仲要跌，就畀人當低能仔。嗰種壓力試過就知，你睇例如大新（2356），亞洲金融（662）之類，個個都估賣，但等咗幾多年？
版務
下星期一當然係會繼續有專欄文。講過了，計「合約精神」我大可以唔寫，但埃汾唔係啲咁嘅人嘛。暫時呢個收費專欄反應都不錯，我係開心的。
大家可以做嘅，當然就係第時續訂，或者叫多啲朋友訂。
循例一句，未like 埃汾Facebook Page嘅，記住去。叫埋朋友。你會覺得，喂，成日講咁煩架。但冇計。並唔止係滿足我個人嘅虛榮，而係like數可以當飯食。 我都係一路做落先知，開始多咗人搵我做其他嘢嘅咁。
咁大家都知我嘅終極目標就係辭工（希望我老細冇睇呢個專欄），全職做收費專欄之類，甚至搬離香港咁做。
大家一齊努力，實現財務自由。