歡迎大家加入新開設「美股研究報告」會員專用 Facebook 群組
https://www.facebook.com/groups/386563215606501/
===============
我經常都話，要賺錢，唔一定要將啲股票炒嚟炒去，揀得啱方向，順勢而行，坐隻ETF 上去，回報已經可以相當理想。
而最簡單，可以揸ARKK。
呢隻ETF，我相信睇開我文章嘅朋友，都肯定唔會陌生，我亦知道有好多朋友揸住佢，已經賺咗好多錢。我想講，只要佢唔跌穿止蝕位，大家係應該繼續揸住佢。呢隻ETF，現時嘅止蝕位係$91.80。
最近，本地有傳媒，寫咗篇文章，標題話Cathie Wood 「將失去ARK 控制權」，又話Tesla 股票將會因此而崩盤，有幾位朋友都send 過畀我睇，問我意見。但睇完內文，其實佢都唔係寫佢標題講緊嘅嘢，然後入面講嘅亦只不過係「翻譯」外國youtuber 上週嘅短片內容，而最重要係佢嘅預測係錯哂，ARKK 同TSLA都升得好靚，所以，我認為大家真係唔使太在意篇文講嘅嘢。總之，有個止蝕位，唔跌穿繼續揸就可以㗎喇。
另外，區塊鍵係我另一個睇得好好嘅板塊。先申報返，我之前已有做同一隻叫做BLOK ETF嘅Long Call。所以，對於呢隻ETF，我就唔評論太多，亦唔會作出建議。但如果純粹係講緊區塊鍵呢個行業，長遠發展前景好大，而且，近日都有相當唔錯嘅上升勢頭。
另一個要留意，近日都近得相當好嘅行業，係AI，即係人工智能。
其實，關於AI 嘅ETF 都有好多，好多隻都升得好靚，無話邊一隻係最好，大家可以睇吓入面嘅持股啱唔啱自己口味，同埋佢嘅升勢靚唔靚，靚嘅話，就可以買。
例如係ROBT、IRBO 都係唔錯嘅選擇。
AI 嘅ETF，有唔少係同Robotics 連埋一齊，亦有一啲係關連大數據，都值得大家留意。
最後，美股嘅大股，走勢就唔係咁靚，例如係AAPL、MSFT 呢啲股票，都升唔起，暫時唔會買佢哋住，我會等佢哋升返先再算。當然，如果啲大股唔得，QQQ都唔得㗎喇。始終都係，買返啲強勢板塊會著數啲。