近日最重要嘅消息，係Pfizer (PFE) 同德國醫藥公司BioNTech 成功研製到Covid-19 疫苗，仲話有效率高達90%。雖然，呢個消息無令到PFE 股價出現突破性嘅升幅，但就為市場帶來極大震盪。一眾舊經股就乘勢大升，但啲新經濟股，特別係啲疫情為惠股，有唔少都跌幅慘重。今日，會用ETF 嘅角度去分析市況，以及講解部署。
首先，雖然好多股票暴跌，但如果你係玩ETF 嘅話，應該都唔會感受到好大嘅痛楚。的確，喺市好嘅時候，好多人都會嫌ETF 慢，唔會買，但一去到呢啲突發性嘅跌市出現時，ETF 就可顯現佢嘅好處。
網購股ETF (Ticker: IBUY)，股價跌幅非常輕微，甚至佢連上星期五嘅低位都無跌穿，股價仲係高位。雖然，都有個別網購股跌得好勁，但都有啲係上升，拉勻之下，影影不大。
另一隻我自己都非常鍾意嘅ETF (Ticker: ARKK)，跌幅就比較深，由最高位計，都跌咗約一成。
如果跌穿止蝕位$89.39，都要離場。但昨晚都見股價喺低位有支持，如現價可企穩再上，甚至可再加注。
SMH 係晶片股嘅ETF。大家可以留意藍線，即大概$186水平。呢個係早幾日上升裂口底部再低少少嘅位置，通常如股價到呢啲位，股價都會好快出現反彈。跌一跌穿，肯好快就升返，都無問題，但如果有三日時間SMH 股價都收穿呢條線，SMH 就要走。
CHIQ，係中消費股ETF。近兩日，股價跌幅都唔細，都相對於好多個股，其實佢都只係跌至上週中嘅水平。呢度，想講多少少，如果隻ETF 嘅股價遠離樓梯級太多，就要小心，即使係無貨要買都好，注碼都要收細，之後等調整後企穩再上先買。
如果個倉本身已有一定貨量，就更可以等回調再上時才買。回調再上，大家可視為一個測試，係大戶對隻股票或ETF 繼續睇好嘅表現。
而即使係重災區嘅雲端股，如果係買入ETF 的話，股價跌幅都會比個股細好多。當然，呢隻ETF 假如大家有買，日後若跌穿$22.87，都要走。
至於後市，短期又再次變得複雜，如貨多，應要減持，但約貨量少過一半，我又覺得不必擔心。後市若形勢再變清晰，就再進攻，現時則應以防守為主。
如市況有變化，星期五再update大家。