【李聲揚】騎師王 – 成功芬佬芬享投資心得

1. 今日故事呢兩位主角,真係傳奇芬佬—因為隻基金係芬蘭嘅Evli Emerging Frontier Fund!(不過佢兩位一個美國佬一個俄佬)。買中隻股票,1年賺14倍,夠晒勁。當然都有啲幸運成份,但講真畀你一樣睇到間公司,你都未必坐到14倍,或者你都唔會買得多
2. 佢地買中嗰隻股票,唔多出名。「當然我聽過啦」「幾個月前咪聽過」。係Supermax Corp,馬來西亞股,呢幾個月都有啲人講,因為真係3月到家升咗14倍(但芬佬更早入股)。間嘢做乜嘅呢?做醫療用手套的。
3. 馬來西亞冇嘢多,就係膠多。真的,橡膠樹嘛。之前寫過啦(https://fbook.cc/3FKE),早排幾乎condom都要搶,大大供應商就係馬拉公司Karex—你冇用過?梗係啦,因為OEM,人地market share 20%,杜蕾斯都用佢(而就用杜蕾斯,真係明月裝飾了你的窗子, 你裝飾了別人的夢),當然廠就在中國同印度,成本低。
4. (廣告)你睇我啲文幾有教育意義,記得訂我Patreon (https://bit.ly/31QmYj7
5. 講返,都有啲時來運到啦。明顯間公司受惠於肺炎,但基金2019年中已經入股,總唔會係一早估到。而未到3月前,股價真係冇乜郁動。
6. 但都有值得討論嘅地方。有機會寫多篇文,但呢兩位芬佬,就周圍走嘅,去睇公司。咁我都陪過唔少芬佬睇,做埋翻譯,返埋大陸,跟埋去韓國都試過。但佢兩位就唔只咁,唔係一日見五間公司然後走人。而係留在12個國家,留足一年,帶埋老婆同仔去tour.睇咗600間公司,而直接見咗300個CEO。
7. 佢地專搵啲冇analyst cover,冇大行寫嘅公司。拿,要contrarian呀,人人見過嘅嘢,係好嘅人地都買咗,股價郁埋啦。要outperform梗要做啲冇人做嘅嘢,等於你球會發堀新人咁。但你話,嗰啲公司好極有限,一來細,風險大。二來亦多出古惑。正係因為咁,佢地就要親身接觸啲公司。親自去盤啲CEO—呢啲就係散戶唔會有嘅優勢。(當然,呢啲錢最後都係出自買基金嘅人身上,但佢地基金表現好就冇所謂)
8. 再強調,都係有啲好彩。但至少係因為佢地親身接觸間馬拉公司嘅CEO,先放心入股,然後成事在天,忽然爆個肺炎,就好似中六合彩咁了
9. 但講到尾,佢地見咁多公司,點決定投資邊間?當然呢啲佢地唔會對外公開,但有講到個關鍵,其實係人。數容易做假,但要面對面講大話昆人,其實都唔係咁容易。
10. 佢地分享咗少少心得,不過我估都係冇將啲秘方話你知。因為呢堆嘢都係常識,冇乜特別。
11. 首先,如果間公司唔敢見你嘅,搵件副手(CFO之類)見你嘅,好可能嚟緊業績核突。咁佢地話,如果公司好有信心見你嘅,CEO親自上陣嘅,應該嚟緊業績會好。只能講,可能東南亞人冇咁古惑。香港?掉轉嚟玩你都得。就係公司垃圾先要好主動見人,就係唔掂先好有信心吹到好大,掂嘅公司反而幾時都擔心前景(呢個同文化可能都有啲關係,華人鍾意謙虛啲)
12. 第二,如果公司用詞比較透明貼地,講啲嘢比較多實制數字支持嘅,似乎比較好信。呢點應該都係,CEO有幾熟數,都幾反映投唔投入,定係隨時會跳船。但當然佢地仲會玩 natural language processing喎,分析下佢啲用字。
13. 第三,就係公司對風險嘅態度。佢地話有信心嘅CEO先比較願意坦白咁講公司面對嘅風險
14. 仲有,話如果公司係被低估嘅,CEO會好清楚咁話到你知投資者有乜誤解。而唔會只係怪股市唔就,投資者短視,冇乜欣賞
15. 順手講埋,佢地一般會投資自己基金嘅3-4%入去,好少過6%—因為同好多基金一樣,單一股票只能佔佢地10%,咁仲要預啲公司會成長嘛—但你見到了,佢地都只係預啲公司升兩三倍,其實夠晒,因為買得大。
16. 講到尾,好似都冇乜咩啟示畀到,照計都係秘技自珍。不過話嚟緊會將啲研究結果公諸同好喎,academic research,又睇下點。兩位都係賓洲大學MBA校友,真係network都唔同啦
17. 所以,基金當然比起散仔,係有優勢啦。但點解過半都仲係跑輸大市?好多時係因為計埋開支後就跑輸。最後投資者發現物非所值,咪用腳投票買ETF。

使用諗Sir獨家按揭進階計算機,Powerteam成交實例請到:https://buyhouse.com.hk

wtsapp icon top