樓市白痴問結婚、問買樓(答)

>>>>>>>按此看問題>>>>>按此看問題 首先「白痴」一詞是出自讀者,不是筆者點題。至於筆者就認為知自己所不足而發問者,點都比扮識扮叻好一百個倍。正如你成日見到及「忍受」筆者所做的爛鬼excel圖及小畫家poster,就知每人都有其強弱,我自己就好需要美術指導。   大角咀是好地方,筆者不能在那處居住。樓市太多好野食,再唔係走去打邊爐,肥多了。下年三月結婚者,宜農曆年前搬好屋,皆因十二月一般是少盤少買賣的,另外七月特別旺,當然是因一班大學生啦。大角咀不是大學區會好些少,但該效應可以會擴散,筆者是喜歡見到的,畢竟有人到香港才可把地價樓價維持在合理水平。至於大公司確係多些少盤睇,筆者自己就睇經紀多過睇公司,呢個可留比讀者自行發揮。而家根本盤少,搵兩到三間已行了,因為你會發覺睇黎睇去都係重覆某幾個盤,而agent見「撞盤」是不會浪費時間的,相信你明點解。   當然後生仔唔想長做無殼蝸牛,你可以睇盤租時找一些少裝修,未有大改動而最緊要無漏水既單位租入,亦要一開頭問經紀有冇「可租可賣」既盤睇,方便自己住完死約時,可直接搵業主傾乘勢買入,傭金都慳返。而經紀見你一心搵租盤,落力極都有限。先定位為「可租可買」,應可助你睇到更多樓盤,得到更好招待。有些留意點不便廣傳,始終經紀們現時搵生意已太辛苦了,相信我們在你搵盤前可見到再面談的。   因金管局規定借款人一般不可將按揭還款提至超過月入之一半,多過一位借款人就將總月入合併,即你們為$41000,而一半即指你們還按揭不可超$41000*50%=$20500。但此假設你在外無街數、冇擔保。通常情況點都要扣返些少,即係還17000-18000一個月的按揭借款有可能做到。如你買樓齡廿年或更低之樓宇,是可以將借款攤30年還的。在現行息口下,每一萬按揭還款是可以借到2.59mil的,因此你借盡就是1.7*2.59mil=4.4mil。   當然買間四百幾萬單位以你情況太冒險,建議「再儲一會」,想想三百萬上車盤吧! 近日解答了不少月薪都是兩萬餘元的讀者之問題,筆者自覺你們是最邊緣去上車的一群,現努力地追車尾而又正考慮是否趁小回而跳上車吧! 希望本篇文章助你們再審視一下自身財政,慎而行之。   ———————————————————- 筆者正為五月舉辦交流會作準備。相信最實務是由買樓開始講起了。 當然會吸取此課堂之經驗,將來會試辦其他大家感與趣的課程。 由於是首辦所以課程長度只為兩講,收費亦因此調整了。但筆者保證內容是不會少掉的! 課題: 買樓心得交流課程 2013年5月7日及14日(星期二) 晚上7.30-9.00 尖沙咀金巴利道35號金巴利中心11樓 費用: 港幣$120 *有讀者問,特此說明是只用$120,就上哂兩堂了。全課程共兩堂 有意請電郵 [email protected] 詳情 http://www.homebloggerhk.com/?p=7194

Read more

樓市白痴問結婚、問買樓(問)

諗Sir,   你好,客套說話不寫了,問題如下:   1. 小弟打算下年三月結婚,由於銀彈不夠付首期,所以打算先租樓幾年儲錢看看到時有沒有上車的機會。小弟從未試過在香港租樓,想請教諗Sir揀租住樓的時間有什麼要注意的呢? 我應該在結婚前什麼時候開始找經紀看租盤? 應該找大的經紀行,還是找小型、甚至蚊型經紀行比較好? 會有些什麼「絕招」教路可以容易些找到好租盤嗎?   2. 雖然口說不買樓,但小弟也想知道自己可以買多大錢碼的樓,我翻舊Post見諗Sir有方程式可以計算自己的購買力,不過我不太看得明白,請問諗Sir可以再教教我嗎?   最後附上背景資料以供參考:   – 小弟32歲,現職IT,月入22K,股票投資約40萬,現金五萬左右(因為準備結婚用了不少…) – 女友29歲,現職社工,月入19K,不懂投資,現金也是數萬(因為剛完成Part time degree, 都是無錢剩…) – 因為比較接近家人,小弟是打算租大角咀的。   在此多謝諗樣網可以如此豐富地分享樓市資訊,實在獲益良多,謝謝~ 🙂   祝諗樣網hit rate蒸蒸日上, 樓市白痴   按此看答案>>>>按此看答案

Read more

初哥買樓疑難(問)

諗樣兄,  小弟閱讀貴網頁已有一段長時間,感謝諗樣兄分享所見所聞和看法,小弟獲益良多。唯尚屬樓市初哥,希望獲諗樣兄指點一二,不勝感激!  實不相瞞,小弟行年29,與女友同年,分別與家人同住。兩口子月入分別30k及22k,儲蓄合共40萬。扣除家用,及投資保險等不能取消的定期供款,每月共可儲2萬左右。二人打算今年內先買樓,在上水、粉嶺、屯門或元朗上車,買300萬左右的樓,下一年再結婚。本來一早已物色心儀物業,無奈樓價飛升,心儀物業一年內由290萬轉眼升近400萬,唯有退而求其次找300萬以下的盤。二人但求安居樂業,唯極其擔心買樓後遇樓市調整,萬一銀行call loan,影響結婚預算,結婚即成泡影,後悔莫及。  在此請教諗樣兄,  (1) 到底應該買入哪個價錢(e.g. 2.5m – 3.3m) 的樓,才比較安全,不被call loan一Q清袋? 傷腦筋的是,樓價平和遠離本區市中心的樓,怕它防守太差,跌市時跌得又急又快。樓價貴及近本區市中心的樓,買入後已所餘無幾,一有閃失,慘過六柒。  (2) 如果十分進取,買入佔近300的樓,買入後要預留多少錢作緩衝?  (3) 另外,聯名(而非單名)買入的樓,Call loan的風險會否減低?  萬分感激!  樓市初哥 >>按此看答案

Read more

三百萬樓盤選擇(答)

->>按此看問題   應該選擇那個價位的樓? 諗樣都係番之前用過既forumla,就係現時旺市只宜用總購買力既一半去買樓。就算樓市下滑都仲有資金係手加碼(或防守)。你同女友人工總數$47,000,按照金管比銀行指引,最多借月供$47000*50%~=$23,000既樓按比你,計番轉頭如果你用三十年按揭,2.15%年息借盡樓係6.09mil。而旺市load一半貨既建議,即係你應買3.00mil左右既樓。   聚唔到人而樓價升幅多跑輸 係三百萬budget之下,原本係兩年前可買大兩房,而家只可買細兩房或更細更舊既樓,但建議你都係上左車先,因為你估佢唔到幾時跌,再加上你家庭總收入未必低到政府會幫你既類別。相信你都睇緊樓,你提出既選項以你屋企附近為先,可惜西九樓價數埋都七千,如果要維持原區生活,希望方便探下父母,最為適合有美居中心,廿幾年樓可惜只提供三百幾呎單位為主,唔知你鐘唔鐘意,而索價竟要六千幾蚊呎先最離奇。講返深水涉區,由於樓宇集中舊樓,換樓客失去上流階梯而多搬出該區,所以聚唔到人而樓價升幅多跑輸。你亦都係其中一個改善了自己人工而未必留返係深水涉住既人,其他market player亦都一樣會咁諗。   三百萬樓下、不太殘舊而交通尚方便的,有幾個地區可以諗。首先係馬鞍山,有直接巴士去北角,搵日自己同女友去行下,已經唔係舊時你去烏溪沙YMCA宿營個樣。返大陸可以極快到大學站北上,出九龍好多巴士線可以選擇。新港城十八年樓仲有極多三百萬出頭既樓房考慮。第一間樓真係唔好買太貴,買四百萬樓都要交成七萬幾印花稅。如果你唔係根本係樓市賺過錢而樓換樓,用呢七萬蚊買個印真係好肉痛,直情係一條毛都買唔到。 如果決意死守九龍,咁就跟大隊去淘大,所以個度呢排越升越有。但當注意力集中在附近供應不斷增加,小心黎個反高潮。荃灣區供應多而交通方便,係另一個搵三百萬樓既選擇。你個budget如果買海濱花園仲勉強買到三房,第時唔駛煩換樓。爵悅庭附近「工廠三寶」仲有些少三百貨,細心搵下應該買到十年樓齡既上車盤。你提及愉景新城在間隔與呎價關係需要再思考,倒不如駁程車買附近舊些少荃景花園或麗城花園仲好過。相反荃灣地鐵站一帶已漸高水,廿幾三十年既兩房都要至少三百萬先有交易。   筲箕灣舊樓有三百萬選擇,但係以單幢主打,可以考慮。港島一頭一尾都會搵到合你budget既盤。你女方父母住係筲箕灣,如考慮生小朋友不如就落地該處,方面照應。該區新淨而又合你價錢既大型屋苑不多,如有網友知道可提供一下。   由於樓價較貴,如果借九成按揭分三十年還要先支付按揭保費十幾萬,可以問銀行加借但係都要比。建議買二百幾萬既樓分短D如十五年還可令按揭保費可大減。至於點解都要做九成上會,因為結婚裝修買電器少不免用錢,上述三項四十萬埋單「冇走雞」。你必定好燒一大筆錢,謹此祝賀你娶得美人歸!    

Read more

換樓好唔好?(答)

->>按此看問題   kitty小姐的個案相信好多人都面對過。結婚「猛猛緊」買間兩房上車,及後發覺要三房先夠用(其實係香港梗係越大越好),於是心中計數如何改善居住環境。  方案一就係人都曉,就係賣左舊樓買番新樓。中間好多人間係究竟賣樓先定係買樓先呢? 對自己最著數既係賣樓數期短,買樓成交期長,咁你既cash就最鬆動啦。但要注意係賣樓一收左錢係就要交吉(搬走),所以請勿係新樓睇到十畫都未有一撇時就走去沽出現居。諗樣係早期文章已有提及詳細情況,如同賣家議價到3-5%內時可以點做,提前成交如何完成等,請留意blog中其他文章(其一參考買樓附送試住期)。  Kitty如要一沽一買未必合適,始終手上現金及月入未見強大,等兩年後抽居屋,真係有可能抽唔到。因政府好大可能將抽居屋入息上限調至三萬五至約四萬水平,多左人爭居屋。   建議可以先將現樓租出,再自己去租三房。好處係唔便比兩次傭(一賣一買),又唔使再行SSD(三年),更可慳比大部份印花稅。賣出金獅收1%即$25000,買入三房至少都三百幾萬,又約$35000,最後新樓更要打印花稅約$70000,即係呢個動作未計裝修先洗十三萬! 呢十三萬只係益左人同政府! 咩都買唔到(除左幾個印)!  

Read more

開心上車盤(答)

連結->按此看問題   年青人嚮往一個人住係正常心態,係香港呢個咁細地方更易理解。 但凡事有代價,搬出黎住影響儲錢進度,就當你交完租仲有錢置業,都只能買次一級既樓房,影響投資回報。亨利現受加租潮所累,防守能力大減,每月要將家庭收入兩成奉上作租金。本blog不知不覺在半年間記載左許多人既買樓故事,願讀者花時間睇一睇,考慮湖清楚後才行事。   咁搬出黎住冇話唔岩,對一些人黎講更是必要的。首先建議佢地結婚同買樓唔好同時進行,當中之忙碌及複雜多令大家爭吵。諗樣認為你地要係結婚用少d錢,作首期買番間樓,作為你地未結婚先搬出黎住既compensation。當然講到compensation你會問「點解要係我!!!」。諗樣客觀咁睇以你收入確實難將買入高質素單位同豪華婚禮一齊進行,比我選我寧願婚禮用少d錢,只要有親朋到賀其實都好開心。   你地應該先買入一間銀碼細而有裝修既屋苑樓,原因係你可慳租、慳返裝修錢、第時又客易將間樓租出。記住通常人買第一間樓都唔係住成世,唔駛豪裝、最緊要第時租或賣得出。   好多人都要先屈就的,冇屋企人幫或強勁收入係2012年第一間屋真係連西九四小龍都唔使諗。你提既「荃灣及大埔以北」地區唔考慮,咁即係荃灣及大埔可否作考慮呢?? 荃灣中心就係一個上車盤,個404呎筆者有幾個friend都住過,而家都搬左去第度。其實流程就係先住細再將租金儲起,再將細屋租出換大樓,咁就有兩間,有心做既唔難。翠屏、九龍灣得寶、牛池灣新麗花園、荃德花園、沙田河畔、大圍金獅現時仲有二百幾萬既盤,你地可以比一成首期。打比喻買入兩年後跌兩成,其實你而家比四年租都等同呢個價,反而供左樓既錢,仲有一半係還本可儲起。   如果想住好些少請你入元朗睇下,自己試搭一下西鐵或巴士,其實冇你想象中咁遠的。將軍澳同元朗一齊去中環,時間唔係差好遠。至於買樓要注意既地方、我好似係幾個月前已講過。   你可能好frustrated點解間屋比你心目中細咁多! 我只能安慰你呢度就係香港,暫時忍耐。至於你財務上既安排,就係死儲爛儲! 同埋咁好諗住博一鋪買股票。搞好結婚同買樓,除非世界未日,否則你仲有成世人時間買股票。  

Read more

你開始計劃儲錢結婚買樓了嗎?(問)

朗尼: 諗樣兄你好,本人睇左你寫的文章真係好到肉,獲益良多, 小第有D問題想請教,還望指教. 本人27歲,月入不穩定,因為剛剛在年頭到人合資開了影樓, 所以講好左拎人工1W,其他留在公司營運, 同埋無做AUTOPAY所以無入息證明(如果我計劃買樓是否要做數呢?). 另外,女友收入1.5W,來緊想轉份高D收入的工,應該年尾就走人,起薪點有1.2W再追數, 應該2,3W無問題,但坦白講要時間,目標想快點搵多D人工一齊買樓租出去,現在都住在洋樓,斷供了(多得父母). 自己手頭上還有35W資金,加埋女友的40W,有75W,想搵D 240W樓做7成租出去來增加非工資收入,唔做9成係因為怕每個月要自己拎多左錢出來, 寧願首期比多D都唔想每月負錢,除左影相,樓市呢樣野真係知識不足,希望諗樣兄點醒小第,萬分感激!     ->>按此看答案    

Read more

九成按揭同七成按揭既分別?

個案: 欣婷同吳德已拍拖三年,感情穩定而談婚論嫁,兩人同為教師,在不同學校任教,大家都覺得自己同伴侶收入不俗,各人都有月入成三萬蚊,係吳德成功求婚後欣婷已不斷在想佢既夢幻婚禮,認為既然大家搵到就不如「洗多D」。 係現今既物質世界,相信你都估到諗野諗到咁夢幻既欣婷,梗有一條卡數傍身。冇錯! 欣婷有條三十萬而每月只係還「老MIN」既卡數。 佢地兩個拍拖個陣都係「柏拉圖」個隻,唔會討論錢銀呢個咁現實既問題,當訂好左一年後既酒席之後,佢地開始去睇樓啦! 話哂都叫「中產」,係放唔低豪宅既虛榮之下,佢地買入西九小龍昇悅居,貪佢搭lift都要看更帶住,好有私穩咁話! 吳德心諗買入價四百萬,自己攞一成首期出黎,分三十年還都係15000蚊,佢地兩個夾埋搵成六萬蚊,冇理由上唔到會!   按揭保費係咩 吳德搵左銀行朋友做按揭,朋友幫間樓估價已經唔到價,最盡都係去到3.90mil。吳德已經有些少唔開心,懷疑係咪朋友唔幫手。之後佢將資料send比另一銀行試圖上會,話自己同女友都係教師,一個星期可唔可以搞掂? 職員話借九成冇得兩個星期都搞唔到,因要按揭證券公司批突左七成後既兩成,佢地肯擔保先有得傾。吳德叫佢盡快啦,跟手打返去問朋友個邊計好條數,究竟可以借到幾多比佢。 銀行朋友話就算九成批到都係借3.9mil的90%,即係3.51mil,要攞多九間出黎,仲要加借12萬既按揭保費。吳德問按揭保費係咩? 成十幾萬? 朋友話借得九成就要焗比,而家同佢批到再算。兩天後朋友打黎,好穩悔咁同佢講女友個邊「有D野」,可能批唔到,叫吳德同欣婷問清楚。   一問之下,發覺欣婷有成三十萬卡數,每月min-pay都15000蚊,點幫手供樓呢?? 吳德真係晴天霹靂,而家先發覺女友咁「大洗」,幾日都唔聽女友電話。欣婷知今次真係大鑊,喊哂咁叫屋企人幫佢清左卡數先,上網睇左諗樣網話清完卡數攞埋個proof去銀行就可以當做冇借過。搞左一大輪,吳德認為唔可以同錢鬥氣,唯有同欣婷去銀行攪埋佢。可惜奇怪既事陸續有黎,按揭證券公司話今次就算清左個loan都唔肯借,因為欣婷爭既倍數太多同kepp住min-pay。如果下星期成交前上唔到會,辛苦儲落四十萬就咁殺訂!   酒席撻訂 原本幾星期前仲好開心似辦緊喜事既吳德,收工後「死老豆」咁既樣同dad&mum講述今次既困難,都係mummy做人耐,私己多,係保險箱攞左條金出黎,good左八十萬比吳德,令借貸降低至七成。由於借七成只需同銀行deal,唔駛按證批,兩日就批左出埋文件,再加上律師樓超快既速度,同埋買新淨樓睇契係快手D,終於上到會。   personal loan唔係搵人還左就可以當冇事 可惜「經此一役」,咩mood都冇哂,唯有酒席撻訂蝕左幾萬蚊。欣婷自然冇面,知道自己衰大洗,更衰既係完全唔比男友知佢大洗,你諗下知一半都冇咁大打擊呀! 奉勸大家買樓上會前要溝通清楚,申請按揭會令好多野「露底」。仲有你既personal loan唔係搵人還左就可以當冇事,如要承造七成以上按揭,半官方機構按證公司係會話條數計到但因你個report「樣衰」而主觀地唔批的! 唔想擔心上唔到會一係就儲夠錢做七成上會,銀行睇錢份上可以批鬆些少。如咁唔好彩批唔到九成而身邊又冇個錢,可以搵財仔做二按,息口6%。以上「因置業而成不了家」既故事,係真實的!    

Read more

樓市真正需求從未減少

又要打人又要驚  梁政府又要打人又要驚,新推五千名額免補價買居屋措施只會搞唔起泡。補價措施係新瓶舊酒,只不過重拾之前係政府會議舉出但未取得共識既政策。到而家真係動議推出又引起居屋炒風,適得其反,可算令梁政府露底。可讚既係新政府反應都算快,而家話真係買左都要有五至十年禁售期,減低居屋市場起泡既可能。由此預見該政策推出未必能真正撮合多宗成交,只會間中令高價成交出現。 為何高價? 因現居屋業主賣樓後就算再買返差唔多大既樓都要補好多錢,佢唔高價放真係換唔到樓。另有一批居屋業主係出面有物業既,呢批人有幾間樓係手當然唔急放一味死揸,真係大勢已去時佢地就會將手上單位一湧而出。 踏入下半年估計居屋會因少數高價成交而令業主心雄提高叫價,係數月後升浪會推至私人樓。可惜到下年年頭政策真正推出會發覺政策不太受歡迎,此利好因素會被去除,樓市相應下調。     真正需求從未減少  樓房需求有兩種,投資需求及自住需求。澳洲政府近幾次減息已經刺激了當地對樓房投資既需求,而係港元保持同美元息口一齊貼近零情況下,香港人對樓房既投資性需求未見減少。仲有你見本blog中不少讀者問既case都係手上自住樓有錢賺,呢個財富效應不斷為市場注入資金。就算歐債危機大爆發,都只可以連續兩到三季改變香港樓市上升既軌跡,要樓價從根本性下跌要有更致命既誘因。 人有時真係好多原因想買間自住樓,但係有兩種需求係計得到而又解釋到點解而家咁多人走去買樓既: 就係生仔同結婚   婚姻註冊數字 出生數字 2009 51175 82906 2010 52558 88200 2011 57883 95348 2012 首五個月 23217 37265(今年有龍年效應) 來源:政府統計處       中國人結婚最好就要有間樓,一年五萬幾人結婚既數字,就算減哂大陸假結婚,婚後再父母自住,結完婚唔係香港住,點睇都有兩萬pair人想買樓上會,只不過而家買唔到或覺得太貴唔買,所以見上圖見到越谷越上既租金。 每年有成九萬個小朋友出世,減左雙非婦估計都有成萬人想換大D間樓湊仔。上面兩萬而呢度一萬,好粗略估計每年新需求都有三萬。本來香港有唔少屋係空置,但係你而家有間樓係手,放左佢D錢可以做咩呢?? 放係銀行成年賺一萬幾千蚊息? 係投資需求大,之前每年儲落不少需求,而係特首講2015年先「有機會」達成每年兩萬個新落成房屋量之下,樓價想跌都幾難。而家只不過將D需求反映左係租金指數度,後生買唔成屋唯有係過往一年幫手谷高租金指數幾成咁多。     建議兩棲用地規劃模式 政府做野永遠都慢市場一拍,呢個係必然。由九七年前遲黎既居屋到董特首時既八萬五政策,都係市升時計劃起樓,市跌時先起好樓幫手推散個市。政府官僚架構令呢個情景不斷重複,造成樓市循環。要解決問題要提供一些廉宜而快建成既樓房,係供應量處低周期時快速增加供應量,另外緊係要當供應量高時拔走供應,令香港樓房供應量不要向兩邊極端搖擺。起青年宿舍只可以幫到未結婚既後生仔提供playground,但每年成幾萬對夫婦要樓住點搞呢? 政府不如著力改建工廈做酒店式住房,為夫婦提供一房/兩房一廁既居住空間,係現「求過於供」周期減低需求穩定樓價。到樓市下行周期可將部份樓層租予旅客,即時減低供應而不致推低樓市。酒店同自住既兩棲用地規劃模式可以實行嗎? 觀塘已有工廈改建成酒店,工程設計上一定做到。此舉亦可快速提供需求,更可把新造房間循環再用,政府自己控制市場樓房供應,唔使好似而家咁間接要批地比地產商又要再等佢地起樓。而家最有需要係結左婚既人,請政府唔好攞納稅人既錢去整間房比班後生仔住而妄想佢地唔會再上街、唔再打反政府既口號。     再唔係,走番以前條路批地起臨時搭建房屋。而家可以租比班後生住,第時市低時可以趁機重建老舊公屋村而用臨屋安置村民,呢D樓唔會有人買或可索性拆左佢減少供應。政府好似為九九年全纖全港既臨屋村而沾沾自喜,可是臨屋再唔係好似以前咁污穢,咁易倒塌。住係新搭既臨屋應該仲好過你屈係舊樓唐樓,或同奶奶成家人迫係一間屋。 至於近期既回購領匯、地鐵等建議,都唔係快見效之策。咁辛苦去傾點買返領匯,不如集中火力為大家提供快而廉既供應啦。

Read more

結婚要幾錢?

無論未結婚既你,或者已結過婚既你,可能對今時今日結婚開支有興趣。買樓乃是人生大事,亦是年青一輩於理財上一大環節,故在粉絲專頁中談及買樓考慮要素。今次轉下話題睇下攪一個體面既婚禮要幾錢。星期二檔案曾提及要廿萬左右, 今次一齊睇上呢個數係太少定過多。 決定一: 買求婚戒指 結婚最起始既梗係求婚,如男生冇此需要可以skip呢一part。求婚信物九成以上都係戒指,可以走去成街都係既珠寶手飾店或到樓上鋪直銷點求購。如果你要買鑽石戒指,粒鑽石肯定係最重要。鑽石以成色(D至I grade,J至M實在太黃啦)、明晰度(即係人地講幾多個v),卡數及切割技巧黎定價。好多人會諗買一卡(carat)或以上鑽石求婚最合適,其實成色唔靚既鑽石就算一卡都係兩萬餘元有交易。至於一粒勁閃既D grade靚cutting鑽石,就算少於一卡都可以頗貴。畢竟信物終歸都只係信物,信任你既伴侶最緊要。 還是控制用一個月人工去買你既求婚戒指吧! 以筆者所見,闊太大多將紅寶石籃寶石戴上手,男仕更加係鐘意錶多過戒指。一隻清澈無暇既鑽石求婚戒指,適合「細細地」買返隻,放係屋企不時望住懷緬一下吧! 決定二: 選擇結婚場地 最基本問題係問自己想係酒店定酒樓擺酒,又或旅行結婚,同埋究竟要請幾多人去飲宴。酒樓有時餸菜幾好味,酒店當然又比人體面些少既感覺。請既朋友同事數目自己當然心中有數,但親戚切記要分別去問清楚各方父母,告知他們一經決定不能大幅更改。大眾經驗係先問女家父母有幾多親戚,然後男方相應配合。因根據中國傳統,女家親戚所交禮金係會收歸女方既,而男家當然要為女家所佔酒席找數。男仕如對呢樣野反感,可以娶個韓妹或印度西施,聽講個情況會掉轉既。 如以二十席計,酒店預算$10000一席連酒水,即預算$200,000,收番人情約七成(不計金器),如朋友比親戚更多成數可提升。酒店大部份有最低消費,即係無論你擺幾多圍,當中支出都要超出定下最低消費。三至四星頭酒店約$150,000,四星一般$200,000,五星約廿五到三十萬而四季或君悅酒店一般五十萬起錶。假設你係酒店擺二十圍每席$10000連酒水,收回人情可假設在酒席支出六成半,即淨酒席支出預算$70,000。當然成數會因朋友多過親戚而有所增加,女家父母退回女方人情比新人而增加,新人預備好餸比賓客而減少,或一對新人平時人緣差而減少。六成半只係一個係酒店擺酒既合理預算。至於酒樓而家都要成六至七千一圍,酒樓一般場地較大如要三十席以上酒樓提供更多選擇,收回人情更可達當日酒席消費九成。即係消費一萬幾千或「打平手」都可以找左當日酒樓條數。各對新人因自己荷包預算,悉隨專便。 近多有更多新人選擇中午在酒店行禮擺酒。筆者自己覺得呢個安排唔錯! 一來自己傾向在大白天為新人送上祝福,二來又可以留番夜晚既時間陪屋企人。需知香港人經歷星期一至五既血戰後到weekend已經唔想再出街social,能夠為你的朋友省出假期的晚上陪伴家人實在極大功德! 今次只講及頭兩個又係最重要的環節,洗費以一對合共收入$35000的新人來說已花費$105,000。戒指:$35000 + 擺酒(二十圍在酒店)$70000。對於一個結婚需要廿五萬既預算,仲有咩其他洗費呢? 下篇再談。 frame id=9

Read more

本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室