【期權教室】莫家強期權短評 (2016/11/15)

  【#期權短評】   大家或者會覺得個市仲有得跌,唔應該買貨住。老實講,如果我唔識玩期權,我都應該唔敢入市。但係,期權有好多種方法,係就算恒指年尾跌到落20000點都可以保我哋唔輸。有呢啲方法,我地入市嘅把握就會更大。     其中一個最簡單、最簡單嘅方法,係做極價外嘅Short Put。譬如係12月18400 SP。沽一張,唔計使費,可以賺$50 x 21 = $1050。     咁樣做嘅好處係贏面高。只要12月尾期指結算跌唔落18400點,全數期權金就袋袋平安。依家嘅市況,係就係差啲,但有3900點buffer應該足夠應付。想再安全一啲,用初班第一堂教嘅SPH會仲好。     當然,想賺多啲就撈股票啦。大家都知我有 #騰訊(0700)。近排個勢係就係弱啲,但我未驚過。撈股票有咩技巧,聽日再講。   #未驚過#ShortPut#SPH    

Read more

【期權教室】莫家強期權短評 (2016/11/14)

  【#期權短評】   如果你有本事坐得穩,個市到去呢個水平,我會建議你逐步買貨,等恒指上返去23000點以上,再睇情況食糊。   不過,入市之時,你要肯定自己「有本事坐得穩」,否則就唔好買。   本事,講三樣野,一係財力,二係心態,三係方法。   我敢買,因為我有方法,令到就算恒指年尾跌到去20000點,都肯定唔會有重大損傷。做到呢點,就無必要驚。   恒生指數市盈率11倍多啲,唔算貴。息率3厘幾,更加算唔錯。當然,咁樣唔代表個市就唔會跌,但同樣地,要跌都唔係咁易。   但係,要識得揀策略都係好重要。亂咁做,都可以輸大錢。聽日再講。    

Read more

【期權教室】莫家強期權短評 (2016/11/12)

【#期權短評】 有朋友見市況差,有啲擔心,問如果個市真係繼續跌落去,要點處理。既然答開,倒不如擺埋上FB,等大家都可以參考一下。   1) 記住,個市一有跡象會大跌,Short Put就唔可以再加注。星期四講博反彈果陣,其中一個重點,係入市嘅策略要可以計到損失。Short Put遇上大跌市,損失可以好大好大,千萬唔好用嚟跌市撈底。   2) 又唔使太過緊張。港交所呢兩年加期指按金加左好多。個市真係大跌,你好快就會唔夠按金。呢樣未必唔係好事。總之,唔夠按金都唔好入錢,減少倉位就算。只要嚴守呢個紀律,要好似我幾年前咁輸大錢,都唔係易事。   3) 善用Bear Put Spread策略。我上堂都講,呢個係一個非常正嘅策略。錯左又唔會輸好多錢,啱左會幫到你好大忙。個市真係大跌都好,就算幫唔到你反敗為勝,最少都會令你輸少好多。   4) 長遠嚟講,玩Short Put,贏輸嘅關鍵係有無做好風險管理。有個心穩陣行先,唔好亂咁博,再用返上堂教過嘅野照做就OK架喇。     最後,夜期跌,唔使太認真。尤其係星期五夜期,升又好跌又好,星期一又未必會跟。真係仲擔心,星期一開市再揾我啦。  

Read more

【期權教室】莫家強期權短評 (2016/11/11)

  【#期權短評】   昨晚舊生聚會,如果你問我邊一part最重要,我會答你係最初講投資心態部分。   招式都好重要。不過我見好過多投資者,就係因為太著重招式,忽略左其他所有嘢,所以成日輸錢。 淨係識招式,但又無tune好心態嘅人,係最經唔起風浪。風平浪靜嘅時候,當然無問題。但係一到個市大上大落,就會亂哂龍,輸大錢。   個市,我講過去到低位我會分段撈底。暫時,恒指22500點以下為低,23500點以上為高,就會開始take profit。策略大家學左,有問題可以再問我。   最後,如果都係等緊博反彈,記住袋穩呢幾個字:「敢買、敢坐、坐得起。」   Good Luck!!!    

Read more

【期權教室│視頻】莫家強一期一會 (2016/11/09)

  ‪#致富教室頻道 星期三呈獻: Homeblogger X 莫家強 20161110-一期一會 想知道除左股票有咩投資選擇? 想知道期權有邊d投資技巧? 就要每個星期四六點準時留意一期一會喇!  

Read more

【期權教室】莫家強期權短評 (2016/11/09)

【#期權短評】   好彩大家聽話,無乜點開Short Put,有啲朋友甚至連清哂倉。 總之,大家無事就好。   都係果句,避呢啲大跌市唔可以純粹靠估市,要靠紀律。有少少機會出現大獲嘢,就要走定先。走錯最多賺少左錢;但唔走又真係中招,就可以輸好多錢。呢個紀律,過去幫過我避過好多次大跌市。   今日,無乜野補充住。個市仲有風險,唔好亂咁入市。聽晚舊生聚會,我會教大家點樣博反彈,嚟到一定要嚟。  

Read more

【期權教室】莫家強期權短評 (2016/11/08)

    【#期權短評】   相信大家都聽過有一樣嘢叫做「挾淡倉」。   通常當呢樣嘢出現嘅時候,大市都會升得好急。而相關有一啲concept,我想大家可以知道得更加清楚,咁樣對我地捕捉出入市既時機會有好大幫助。   首先,挾淡倉嘅意思係「好友」針對性攻擊一啲淡倉,令佢地投降。要做到呢樣嘢,佢地就要喺好短時間入面令大市大幅上升,否則「淡友」就好容易可以施施然甩身。   所以,第一吓升勢一定會好急。   然後,「淡友」有幾類嘅倉位會損失慘重。譬如係股票嘅沽空、期指嘅短倉,以及Short Call嘅倉位。而且,呢幾種倉有一個共通點就係「無限風險」,如果個市一直升,輸幾多都可以。   所以,只要「好友」第一步能夠得勝,「淡友」嘅呢幾種倉位就會逐步崩潰。「淡友」要平倉,即係要買升,變相令大市增添買入力量,令升勢升温。   「好友」入市,「淡友」平倉,兩種情況同時出現,就會令大市大升特升。   最後,老土講句,個市點走仍然好視乎大選點走。希拉莉係佔優,但未係贏硬。財不入急門,博反彈唔使急。不過,之前講過,空頭Short Call最好唔好做,否則,我哋自己都會好容易成為挾淡嘅目標。  

Read more

【期權教室】莫家強期權短評 (2016/11/07)

  【#期權短評】   舊生聚會嘅內容,有一啲幾重要嘅部分,想預先同大家分享咗先,方便大家準備定問題上堂問。   首先,有一個concept大家要攪得好清楚。Short Put賺錢好容易,但係風險可以好高。   好多人會攪亂呢兩樣野,以為Short Put好安全,風險好低,咁樣係大錯特錯。唔識驚,唔識死,呢個亦係點解好多人玩Short Put會輸大錢嘅原因。   另外,我想借附圖講一個好簡單既道理。輸10%,唔難追;輸20%,都唔係追唔到。但係,如果你容許你嘅本金輸50%,你要追1倍先可以打個和。   呢幅圖,出面通常係教你要識得及時止蝕。   星期四晚,我會教大家點樣揀策略。聽日再講多少少。    

Read more

【期權教室】莫家強期權短評 (2016/11/04)

  【#期權短評】   大市跌幅唔大,但係引伸波幅抽升,導致期權價格上升 。   引伸波幅升跌,對期權價格都會有好大影響。所以早幾日我叫減少Short Put倉位,就係擔心會出現呢種風險。   今日就算係早開倉既朋友,啲Short Put都應該要輸錢㗎喇。不過以我所知,大家嘅張數都唔多。   倉位唔中,挨得過美國大選之後,引伸波幅就應該會回落,Short Put就可以轉虧為盈。但倉位太大挨唔過嘅話,就有可以能要被迫喺呢種很差的時機止蝕。   至於幾多張係多,幾多張係少,我成日都話每個人都唔同。依家嘅經驗,就正正俾大家睇到自已可以承受幾大風險。   有擔心嘅話就個別揾我啦,我再比意見大家。  

Read more

【期權教室】莫家強期權短評 (2016/11/03)

  【#期權短評】 個市表面上係差,但係有危就有機。總之Short Put太多的話最好減啲,否則個市如果真係仲有得跌,會好麻煩。   但係,市況係有機會隨時突然轉好,要諗定轉向時點樣做。   有一樣嘢叫做「報復式反彈」。呢幾個字唔使解釋,大家應該都知道點解。要有報復式反彈出現,通常要有以下有幾個因素配合。第一,個市要跌得多。第二,市場氣氛要好差。第三,要有一個轉向既觸發點。   觸發點,純綷brainstorm,可能係希拉莉陣營做到,大幅反先特朗普;可能係下月加息機會唔知咩原因減低;又或者係有大行突然唱好大市。原因有時可以好唔make sense,甚至可以係假,不過呢啲都唔重要,只要氣氛一好轉就會有人信。   之後,個市就可以一下子由極級悲觀變為亢奮,由低位大升特升。呢一刻,我已經開始部署緊呢樣嘢。下個星期四既舊生聚會,我會講詳細講「報復式反彈」。   最後,講多一樣好重要既野,呢一刻最差嘅策略係空頭Short Call,風險高又賺唔到咩錢,有嘅話我建議盡快平倉。    

Read more

本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室