【莫家強】RingCentral (RNG)有機會係嚟緊牛市嘅股王

  我講過,RingCentral (RNG)有機會係嚟緊牛市嘅股王。咁有朋友就問,仲會唔會有邊啲股票,都有機會成為股王? 當然有。 但首先,你要知道當初我點樣揾呢隻RingCentral出嚟。 我有個方法,係可以揾到邊啲股票嘅升勢係最平穩,而每隻股票都會有個分數。 喺4258隻股票入面,過去三年,分數第二高嘅係NextEra (NEE)。呢隻股票,我成日都話佢係公用股之王,買過嘅朋友,就會知佢有幾勁。 至於第一位,就係RingCentral。 當你睇返RingCentral嘅股票圖,你就會睇到,佢係一隻喺過去三年絕大部份時間都穩定上升,而且升得好多嘅股票。雖然,早前跌市,RingCentral嘅跌幅一啲都唔細,但佢犀利嘅地方係,當市況一好轉,佢嘅股價就話咁快已經升返上高位。 上星期五,佢嘅股價仲曾經創出歷史新高,只可惜受到大市喺尾段回落拖累,所以以收市價計,仲爭少少先破到高位。但無論如何,大家應該都睇到呢隻股票有幾勁。 再講點樣去揾其他有條件能為股王嘅股票? 第一步,要先攪好心態,你唔可以有嗰種逆勢而行嘅投資理念。 我經常都講,香港嘅投資教育好奉行「逆勢投資」。當然逆勢呢兩個字,無人會講出口,但只要你細心去聽唔同專家嘅建議,你就會知道絕大部份都係逆勢派。 如果你喺不知不覺間,已經受到呢啲逆市思維影響,唔好話要喺一啲未來股王身上賺錢,就算話留意,你都未必會可以留意得到。可能就係,到全世界都知道佢係股王嘅時候,你先會知道。 第二步,未來股王有個特性,就係會喺呢啲熊市中後段開始,出現好勁嘅抗跌力。 只要你睇返2008年後嘅騰訊,你就會完全知道我講緊啲咩。所以,要留意住有邊啲股票係喺未來幾個月係能夠抗跌。 第三步,我就會留意住有邊啲股票,喺緊會喺我嘅排行榜上,排名不斷上升。 記住,唔好再留戀之前一兩個週期嘅股王。 中人壽、中交建,呢啲都曾經係股王。騰訊,連馬化騰都已經「卸職」,你真係仲咁有信心佢一定可以再創輝煌。我都講過,騰訊之前最好賺就係手遊業務,而國家就係最討厭國內嘅年青人沉迷打機。咁騰訊嘅話事權畀返國家之後,會唔會有新嘅業績可以繼續帶動高增長先? 有,股價繼續升咪買囉。如果無,就唔好純粹因為呢隻股票嘅昔日光輝,就繼續將你自己嘅資產押注落去。 昔日光輝,係完全唔值錢。 最後,我做緊功課,想問吓有無朋友喺外國食過一間專賣雞翼嘅連鎖店Wingstop (WING)? 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

Read more

【莫家強】我將早前買嘅貨食糊清倉

今日,我將早前買嘅貨食糊清倉。雖然貨量唔多,但啲股票升得唔錯,都算係有啲斬獲。 之前都講過,我自己都唔敢買得多,因為我都驚會頂唔住啲升跌波幅,做錯嘢輸錢。買得細,包袱亦細,做買賣會瀟灑啲,賺錢都會容易好多。注碼一大,背負住壓力,情況就唔同,會好難贏。 所以,我建議大家喺確認牛市來臨之前,都唔好over trade。買得細而賺錢,一定好過買得大而輸錢。 另外,之所以走貨,唔係話睇得好淡,反而係「唔識睇」。 你見我,有時收到大家嘅問題時,係會答「唔識睇」、「唔會估」。希望大家唔好覺得我係hea緊你,而係的確如果喺無明確訊號出現嘅情況下,我真係唔會知道個市嚟緊會點走。 例如呢一刻,都係一樣。 我走貨,唔代表我對後市睇得好淡,只係好明顯地市場又再次關注疫情,風險增長,所以啲貨我都走咗先。但同時間,我仍會繼續觀察有啲咩股票會繼續造好。 然而,肺災疫情仍然係市場嘅最大危機。歐美疫情繼續失控,今日甚至聽到連英國首相都中招,都咪話唔得人驚。如果疫情繼續惡化,依家升得愈高,將來個市仲有機會跌得愈深。 總之,小心風險。有特別情況再update大家。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

Read more

【莫家強】好多朋友都問我係咪可以買返貨

過去呢兩日,好多朋友都問我係咪可以買返貨。 其實我都講過,我有買,但現時貨量只係去到兩成左右,換句話說,仲揸住八成cash。至於其餘嘅錢,幾時先會入埋貨,我暫時未知,但我一啲都唔心急。 大家有無試過,曾經因為好心急去入貨,然後啲入市價做得好差?又或者,明明估中個中長線方向,但奈何買得太多,遇上震倉就喺低位止蝕哂啲貨,變咗本來應該有錢贏嘅,最後都變輸。 有啲嘢,我覺得我要講白啲,就係我眼見好多投資者,目光超級短視,考慮買股嘅時候,根本係連下一步係點都無諗過,總之就係突然間「覺得」想買貨,就買咗先算。 試問用呢種心態,喺近日呢啲上落不定嘅市況中炒股,又點會唔畀人打到左一巴、右一巴? 個市係好轉咗,但未穩哂㗎。歐洲嚟緊呢兩個月將會經歷武漢肺災疫情最艱難嘅時候。美國,如果仲係懶懶閒,遲少少都會係一樣。 唔講得遠,喺香港,如果我哋唔自律,都係一樣。 喺呢個情況下,你就明點解,就算我覺得個市穩咗,都只係買兩成貨,揸八成Cash。因為,我同大家都係普通人。只揸兩成貨,就算面對個市大上大落,我都仍然會感到好輕鬆,有時睇啱機會,仲可以偷雞玩吓啲短線期權食吓糊。 但如果我係揸住八成貨,喺面對住極大壓力嘅情況下,我都肯定會不時做錯投資決定,導致輸錢。 財不入急門,呢句說話好真。 你唔心急,慢慢玩,其實美股已經開始容易玩咗少少,要賺吓錢已經唔難。但玩得大,情況就唔同。 你寧願輕鬆地細細注贏,定係大大注輸? 除非你係高手,咁當然做乜都得啦。否則,細細注睇住啲上落走勢去做,無壓力下你會發覺贏面會提高。 直到趨勢明確出現,就係我哋再大手買貨嘅時候。 畀啲耐性先啦,美股嘅牛市長度平均超過四年,真係唔使心急。但喺個市未完全回穩之前,暫時細細注練吓身手先會仲好。有特別情況轉變再update大家。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

Read more

【莫家強】「個市幾時見底」

啱啱掃完哂啲股票,寫完「每週美股研究報告」,對於市況以及策略部署,我可以概括講一吓。 首先,我嘅著眼點唔係睇「個市幾時見底」,而係留意住啲smart money正係流向緊邊啲行業。 而好明顯地,過去5日,好多行業嘅表現都仲未係好好,雖然經過昨日反彈,但啲ETF嘅回報都仲係負數。唯獨一個行業,好明顯受到資金追捧,啲股票表現比大市好好多。 呢個行業,就係tech。 科技股,分好多種,呢度就唔細講。但大家可以諗到一樣嘢,今次嘅疫情,其實係會令科技股加速發展。 想更清楚tech 有啲乜嘢範疇,以下畀條舊聞連結大家,睇完你就會更加清楚。 https://www.weforum.org/…/the-four-superpowers-shaping-our…/ 早幾日,我已經講過開始買返貨。但我暫時嘅持貨,唔計油ETF,純計股票,持倉仍然係喺2成以下,即係仲有8成cash。 唔敢買咁多嘅原因,係因為過往好多次都係,喺市況由「疑似回穩」到真正見底之間,通常都仲會有一次跌得好深嘅震倉。最壞嘅情況係,你呢一刻入哂貨,但到時萬一真係出現震倉,你嘅貨被迫要喺低位止蝕,然後個市就從此見底,咁你就喊都無謂。 如果你再深入問我,個市短線點睇,坦白講其實我都唔知。只不過,我就會係一直去觀察住個市況發展。但大家要留意兩大風險。第一,各國疫情比現時加失控。第二,有大機構倒閉。如出現呢啲情況,無論之前個市幾穩都好,走向都可以喺短期內再度轉差。 對於保守嘅投資者,我嘅建議係,等多幾個月啦。幾個月後,如果我哋都過到呢一關,往後嘅情況應該就會變得明朗好多。 記住,美股牛市嘅平均長度係超過4年,我覺得真係唔使咁急。 想買貨嘅朋友,記住入市前一定要考慮自己可以接受風險嘅程度。睇到有特別嘢,再同大家講。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

Read more

【莫家強】美股現狀係點?

今日忙咗成日,終於有啲時間同大家講吓市。 美股現狀係點,其實好視乎你嘅著眼點喺邊。 如果你睇指數嘅話,當然,叫做跌幅無咁恐怖,但走勢仍然好差。即係,假如你話嘅指數仍會穿底再跌,我都覺得一啲都唔出奇。 但若然你睇嘅係上升股票嘅數目,呢樣事實上係改變咗。 有跟開我節目朋友,應該會聽過我講,早一兩個星期,全個美國股市基本上係無乜邊隻股票能夠上升。但過去3日,情況已經有啲唔同。喺我用電腦掃瞄嘅4258隻股票之中,上升嘅股票有932隻,佔21.9%。若非昨晚指數再又高位大跌,比例應會更高。 升嘅股票,包括有RingCentral、Hubspot、Salesforce.com、Coupa Software 呢啲雲端平台類股票,以及係一啲公用股,甚至係Lululemon、Facebook等。事實上,以呢個角度去睇,係會睇到個市係好轉咗。 當然,要成個股市變回牛市,我相信都仲要一段時間。然而,喺過去嘅股災,每一次都係,總會有一啲股票能夠比大市早幾個月見底。而當中係會包括一啲喺下一個週期嘅股王。 具體啲畀一個例子大家,睇吓08年打後騰訊。無記錯的話,騰訊差不多係喺金融海嘯後復原得最快嘅股票。而之後呢隻股票升成點樣,唔使我多講。 呢次嘅肺災疫情過後,肯定會有唔少行業係會從此走向衰退,永遠不能夠好轉。但亦會有一啲行業,會受惠於一啲新嘅機遇,業績將節節上升。 而往後嘅基本投資理念都係一樣,要買,就買一啲強勢嘅股票。 再講吓香港嘅情況。 今日落街買餸,行過啲鋪頭,我已經見到係人流係多返哂。有啲食肆,係直頭坐滿。 一方面,當然我都會擔心嚟緊會出現第二波疫情。但另一方面,只要疫情唔再轉差,經濟距離重回「大致正常」,亦唔會係太遙遠嘅事。 我自己,對於疫情,會係怕死嗰班。過去兩個月,我一次都無試過坐喺餐廳食飯。見到有人無帶口罩,我係會自覺行遠少少。出完街啲,係會即刻洗,唔適合成日洗嘅衫,盡量我都唔揀,所以有好多時候做節目,你都見我無著西裝,除咗要上電視之外。 係麻煩咗少少,但我又覺得無乜嘢。 但我亦都知道,呢啲嘢好睇性格,我身邊嘅朋友,好多都已經開始返正常嘅活動。 不過點都好,好明顯,出街帶口罩加勤洗手,已經可以大幅減低呢隻武漢嘅傳播。歐美社會成日話「無證據」口罩有用,香港有個咁垃圾嘅政府,但感染人數仍然咁低,呢個就係證據。 希望香港人喺偶爾輕鬆一吓嘅同時,都唔好放低介心,都要注意衛生。有醫護人員都講,香港同意大利,只係有一個月嘅距離。 至於個市,未來幾個月絕對係關鍵。 全世界政府,台灣、澳門、新加坡(同北韓)都做得好好,日本、韓國似乎都錯誤中改正過嚟,確疹數字增長都有所減慢,再睇到歐美人士對待呢次疫情嘅態度,我就會認為只要每人都做好本份,呢隻病毒嘅傳播,係可以壓制得到。 最後,留意住會唔會有愈多嘅股票,喺跌市中仍能企穩。如果有啲話,呢啲就係我哋所講嘅smart money出手嘅跡象。喺呢啲股票之中,好大機會係會有下一個週期嘅股王喺度。但整體指數,可能最少仲要等幾個月時間先會好轉。 以上係我對市況往後發展嘅睇法。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

Read more

【莫家強】個市已經同之前兩個星期有啲唔同

如果我話,個市已經同之前兩個星期有啲唔同,我相信大家都睇到。 穩咗,就一定係㗎喇。只不過,穩完仲會唔會再大跌,呢個先係我哋要考慮嘅事。 先講一種大市見底前嘅常見pattern。 呢種pattern,出現過喺金融海嘯同港股大時代股災之後,兩次都係,大市喺急跌之後回穩,但相隔一段時間之後,再次急跌,之後就從此見底。 點解會有呢種情況發生? 我嘅睇法好簡單,呢個係升市大戶做嘅最後一次震倉,目標就喺短時間入面,以極低嘅價錢買貨。 金融海嘯,恒指見底後回穩,但你睇返之後係仲有一跌。大時代股災以後,恒指見底後回穩,之後因為熔斷機制,個市再跌穿底,但之後就真正回升。 而呢種形態,我認為都有可能喺今次出現。 武漢肺災,雖仍未能受控,但之後會發展成點,隨著數據、資訊嘅掌握增多,我相信嗰啲金融市場大鱷,大概都已經心有數。 做投資嘅人,一向都唔係怕跌市,而係怕我哋口中所謂嘅「不確定性」。但只要最壞嘅情況已可大概評估得到,又或者,可以肯定有邊啲股票係唔會受到長遠打擊,咁啲錢就會開始行動。 而好明顯地,呢啲部署已經進行緊。 到今日,我仍然覺得依家出現嘅情況,係似熊市嘅中後階段。如果無特別情況出現,半年內,配合全球寬鬆救市政策,牛市絕對有機會重臨。 但你要預計兩樣嘢。第一,之後仲有機會有多一次好急勁嘅大跌,你唔好攪到自己要喺好低位止蝕。第二,留意個股嘅走勢。 有一定特定性質嘅股票,係會比大市指數早幾個月見底。留意多啲唔同股票相對於大市嘅表現,後市發展將會愈來愈明確。 正如昨日所講,我已經重新入市,但量唔多。加上呢上睇法,大家應該會更清楚點解我咁做。 但點都好,世界局勢變化太快,點都要睇實。如將來有特別睇法轉變,會再update大家。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

Read more

【莫家強】有時都要發放一吓正能量

成日放負,有時都要發放一吓正能量。 上個星期之前,基本上美股係全部下跌。但今個星期開始,情況已有轉變。 首先,優質公用股回升,過去係熊市二期中後段就會出現嘅跡象。呢類股票,一向都會比個市早幾個月見底。表現最好嘅有兩個sectors,一個係新能源電力,另一個係水務。 另外,一啲業務上唔會太受武漢影響嘅股票,都有見回升。 昨日放負嘅主旨,係有啲股就算疫情過去,都唔會能夠恢復,呢種股票你要識避。 但同時間,亦有啲股已經開始升返,明顯地係有啲smart money 開始行動。 如果你問我買唔買得股,我會提醒你多一次,我仲係睇緊係熊市二期。有大鑊嘢發生,個市會加速個市見底,但就會跌得更深。無事發生,就可能耐啲先見底,但走勢會無咁驚嚇。 你呢一刻買股,要小心真係有驚嚇嘢出現,會令你喺最低位止蝕哂所有貨,咁就喊都無謂。 小心做,睇好啲股票啦。 個市開始有變,我scan股票嗰陣,都會起勁咗,因為起碼會有啲嘢睇。 暫時,無必要睇到個市太死。我嘅做法係,我唔會硬係要估佢一個方向。個市要升要跌,啲股票嘅走勢就會話畀你聽,我哋只要喺有趨勢出現時,順勢而行就可以。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【莫家強】完全無必要做第一個估到底入市嘅人

最近幾日,我留意喺市場入面,多咗好多叫大家撈底嘅建議。 但大家要好清楚一點,要賺錢,我哋係完全無必要做第一個估到底入市嘅人。 好簡單一個例子,你係無必要喺2003年沖入市買樓先可以賺到錢。而且,賺得最多錢嘅,並唔一定係喺最低位入市嘅人,反而係嗰啲喺個市升返之後,最敢持貨,順勢而行嘅人。 現時,市場上睇好、睇淡嘅言論都有。一邊會話畀你聽,依家啲股票嘅估值好低,係買股票嘅絕佳時機。另一邊,有傳倫交所會停市、有金融機構會有財政危機可能倒閉,以及有機會打仗。 你可以選擇,每日根據呢啲喺市場上流傳嘅「資訊」,去做你嘅投資決定。但你亦都可以,等到你有信心投資嘅機會出現時,先放膽出擊。 呢一刻,坦白講,就算你set咗止蝕位你都知用處不大嘅時候,你要買貨都唔敢買得多啦,夾硬去玩,賺得幾多錢? 然而,有好多睇好嘅言論,其實講得無錯,好多股票同埋資產嘅價格,已經被嚴重低估。而當市場秩序回復正常,加上多國將來必然會推出更多極寬鬆嘅救經濟政策,只要金融市場能夠挨得過呢一關,將來啲股票一定會有排升。 但最慘係咩呢? 你今日走去買股票,點知真係有金融機構倒閉,股市大跌,你嚇到啲貨全部止蝕,然後喺無耐之後個市就否極泰來,見底回升,咁樣你就喊都無謂。 OK,我知,有朋友真係好難忍到手,叫你唔買股票,慘過俾蟻咬,咁你就限住自己,只用10%嘅投資資金好喇。 當然,忍到手,就忍啦。 上日的確出現咗一個幾好嘅訊號,就係啲公用股已經開始有資金流入跡象。我嘅睇法係,有啲smart money已經開始計數,但絕對未到可以放手買股持股嘅時候。畀多少少時間,等個市反映多啲資訊畀我哋睇,先再決定行動啦。 總之,記住,除非你係股評人,否則做第一個睇到個市見底回升嘅人,對你係完全無意思。你要嘅係賺錢。 到個市唔再係咁大上大落,而係到有趨勢出現時,你賺錢就會容易好多。到時先出手啦。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【莫家強】疫情總有一日會過去

  但有啲企業,就永遠都唔能夠翻身。例如係,以下其中兩隻喺S&P 500 指數入面跌得最多嘅股票。 一隻係Norwegian Cruise Line (NCLH),另一係係Royal Caribbean Cruises (RCL)。睇個名,大家就知佢哋有幾大鑊,因為佢哋都係做郵輪生意。 前者,過去一個月股價跌咗79.8%,後者,都跌咗74.5%。而呢兩隻股票,我都會形容為「沒有將來」,除非,佢哋有能力徹底轉型。 點解要提兩間公司? 因為佢哋就係好明顯,就算疫情緩和,都唔會可以收復失地嘅股票。而借呢兩個例子,我想大家諗吓,我哋之後買嘅股票,應該係要集中邊一啲類型? 你係要買一啲股價跌得最多嘅股票?定係買一啲無咁受今次疫情影響嘅股票? 每次當經濟從一個危機中恢復,過程都會係一個極大嘅財富轉移。有好多公司,會被市場淘汰,永遠消失,但仍留得喺市場嘅強者,會因為競爭減少,未來嘅盈利有機會再創新高。 目光睇長少少,你就會知「將來」要買股,你應該向邊一個方向揀。 我一直叫大家忍手,但我知道呢樣嘢,絕對唔容易做到。所以,如果大家真係有忍到手,避過咗呢次道指嘅歷史性嘅3000點下跌,我覺得你真係要畀一次掌聲自己。同埋,要記住你今次做得好嘅嘢,以後都要咁做。 然後講下一步係點? 呢排,雖然投資上我只係揸cash,但研究上我無偷懶。基本上,我每隔一兩日都會用電腦掃哂啲股票嚟分析,務求就係,只要個市一好轉,我就可以知道啲錢會向邊度走,而我亦會知道應該要買乜嘢股票。 暫時仍未完全清晰,因為基本上個市差成咁,係乜嘢股票都大跌。但根據往常股災嘅經驗,大概眉目,我都已經有。 上過股票班嘅朋友,記得我講過,喺2008年股災,有啲股票係跌完6成,後升6倍嗎?當有跡象呢啲股票出現嘅時候,只要你識得順勢而行,敢買敢坐,下個牛市由頭玩到尾,我睇唔到你點解唔能夠賺大錢。 我哋正處於一個好有利嘅位置。因為,我哋避過哂呢次股災,無輸過大錢,亦無輸過信心。而且,如果到今日,你都仲真係忍到手,即係話你嘅耐性都督已經改善咗。 到升市,要賺大錢,其實要求都係一樣。你要識得順勢而行,要有方法,有耐性,同埋信心。呢度嘅專頁,我會繼續講好多呢方面嘅嘢。但如果你想我有更多時間、更深入幫你改變,由頭到尾話話你知投資應該點做,下個星期二,我嘅美股班就會開始,我會再教大家點做。 喺過去呢年幾,由坐Visa、Mastercard賺錢開始,到換碼至Apple、Microsoft繼續坐住破頂,再喺高位輸好少就已經識得離場,入面係講求好多技巧同心態調整,呢啲嘢如果你學得識,你嘅優勢就會好大。 上年,好多朋友都係半途加入,喺一個所謂「高位」先開始買股票。但呢一次,我哋將會由「低位」開始。 疫情總有一日會過去,牛市必會重臨。道指能夠單日下跌3000點,就肯定已經唔係正常嘅熊市一期。 現階段,唔好心急,但未來幾個月,要留意住可能出現嘅機會。機會未到,繼續忍手。機會一到,唔好手軟。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【莫家強】收到好多大家嘅問題

首先講返,ETF網上教學群組今日之前仍可加入,有興趣可以喺呢個專頁入面揾條link入組。 再講個市。 呢排,收到好多大家嘅問題,有人睇好,有人睇淡。我會將啲問題group 埋一齊,一次過答。 Q1. 啲股票已經跌咗好多,係咪可以分段買? A1. 呢個講法,個幾星期前已有出現。我哋好多朋友,到今日仲係無乜事,原因就係忍手。仲有,大家要明白,叫你買貨嘅人,自己未必一定會買。如果啲股票真係咁抵買,咁多人買,個市一早就回穩咗啦。我唔會喺個市未回穩之前就沖入去買貨,分段買都唔好。股票,唔係咁玩。 Q2. 係咪可以做Long Put? A2. 以下我寫嘅嘢,你明白的話,做唔做就自己決定。如果唔明,就唔好做。個市,引伸波幅被挾到超高,原因係出自市場嘅恐慌情緒。喺呢個時候再做Long Put,你嘅動機其實就係博個市仍會有更恐慌嘅情況出現。相反,就算個市仍未見底,但只要恐慌情況減退,IV就會下降,你仍然會有機會輸錢。Long Put,唔係唔博得,如果仲有下一波更恐慌嘅跌浪出現,你仲係有機會賺到好多錢。但只要個市稍為回穩,你個倉嘅風險就會好大。 Q3. 你覺得個市幾時會升? A3. 問得呢個問題,應該係認識我唔係太深入嘅朋友。我喺大半個月前就已經避咗個跌市,原因就係,我無去估市。我嘅做法,係唔會堅持一個特定嘅睇法,同時持續觀察住個市嘅變化,個市一變,我嘅策略就會轉得好快。呢一次跌市,我見到嘅係,愈硬頸嘅人,損失愈大。個市跌成咁,真係唔到你守,愈守,愈遲離場,就愈大鑊。同樣地,依家我都睇到個市好淡,但他日如果個市有signal 話可以重新上升,我嘅䏲法都可幾轉得好快。但我無水晶球,喺訊號未出現之前,我唔會估。 Q4. 睇淡仍有空間嗎? A4. 有,點解無?呢個災難嘅級數,係以往未試過。我哋幾時有見過,真係全球多個已發展國家要封城?而當然,唔同國家能夠抵擋疫情嘅能力,都有唔同。最唔ready嘅,係歐洲。我得最淡嘅,都係歐洲股市。然而,造淡始終都高風險動作,恕我喺呢度就唔作出推介喇。已經知道應該點部署嘅朋友,就自己揾機會啦。 Q5. 有咩股票可以買? A5. 唔好咁大癮啦,唔係咩時間都適合買股票,至少依家唔係。順勢而行呀。 Q6. 啲貨仲未走,應該應該走? A6. 我真係想問,點解到呢一刻都仲未走?講真,去到呢個位,我就已經好難再教你點做。唔係唔想幫,而係如果我同你位置亙換,我都會手足無措。所以,三個星期前,我見到有少少唔對路,就已經開始走貨,因為我就係知如果真係出現呢啲情況,我都會無能力處理。 最後,揸哂cash嘅朋友,記住,一定要忍手。跌市,通常喺見底之前,都會跌得最勁,跌到就算你依家只係分注買,都會迫到要止蝕離場。 但假如你清咗倉,等個市升返先做嘢,你先會有機會把握到下次嘅升浪。大家加油。只要你嘅心態tune得啱,方法正確,以後大把機會。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室