【莫家強】一間公司要做大,梗係要開拓國際市場

雞翼,係咩嚟,我就唔講喇。 因為我噚日心情完全係亂七八糟,所以,我都話我已經將所有股票清空。由於買賣過,所以唔方便對某某股票做投資建議。但我都想講,有邊啲特質,會令我睇好呢隻股票。同埋事實上,佢又真係升得好靚。 第一樣嘢,就係留意一啲已經喺大概十個國家取得成功嘅股票。 點解? 一間公司要做大,梗係要開拓國際市場。但如果佢只係剛起步,即使佢喺本土生意做得好好,但去到國外可能係另一回事。同埋,最低限度,好多嘢都要試。發展到呢個階段嘅股票,唔係我杯茶。 另一個極端,就係佢已經喺百幾個國家都有業務,咁問題好明顯啦,就係發展空間有限。例如係今日嘅可口可樂,穩步上升可能還可以,但要爆升,難矣。 但返嚟呢個情況。一間公司,佢已經係十個國家左右有業務,而且有錢賺,某程度上係咪我可以估佢已經揾到佢嘅「成功方程式」。 呢間公司,再喺第十一個、第十二個國家發展,係咪都會有一定贏面。而當佢去到50個國家都有業務嗰陣,佢嘅盈利,係咪會可以倍數上升? 第二樣嘢,franchise制度。 一間公司推franchise,有兩個好處。第一,唔使自己借咁多錢。第二,風險可以轉嫁畀經營者。變相,佢嘅發展速度可以去到好快。 但一個成功嘅franchise,重點係要做到win-win。 呃人嘅franchise,唔會做得長久。Franchise 最好嘅狀況,係經營商可以賺到比打工好少少嘅收入,而品牌商又有錢賺,咁就最好。 要做到呢點,間公司就要有誠信,同有能力。能力就係,佢可以將佢嘅成功方程式,好高效能地複製,令到普通人只要肯做,最少都能夠做到某個級別嘅成功。 雞翼,最勁嘅地方,係佢連送外賣嘅partnership 都幫你揾埋。美國,佢哋到DoorDash合作。例如星馬,就用Deliveroo 同Food Panda。連外賣都傾好,只要做好marketing,即係你揾間平租嘅鋪頭都可以做得掂。經營商,只要做好出品質素,就唔憂無生意,就係呢樣嘢,令佢可以將成功複製,咁盤生意自然就可以發展得好快。 所以,佢嘅股價破哂頂,唔係無原因。 我知有朋友有貨,總之又係佢繼續升,你就繼續揸。成功嘅franchise,幾年時間規模已經去到第二個唔同層次。未買嘅,識用期權已經可以部署。或者,等下次調整完,企穩再上,就可以入市。 總之,不斷知道個止蝕/止賺位,跌穿肯走就可以喇。 聽朝上NowTV 做節目,我會早啲休息。(雖然都已經係1am)。 另外,下星期一開始,每個星期,我會再同我老友兼偶像潘家榮先生上新城電台做節目,到時大家請多多支持。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

Read more

【莫家強】跌幅最大嘅係即月期油,跌到負數。

關於期油,好多嘢真係無經歷過,都唔會諗到佢會出現。 昨晚,跌幅最大嘅係即月期油,跌到負數。下月期油,都大跌,但無跌咁多。下年先交付嘅期油,無乜點跌。後年,即2022年先交付嘅期油,仲有得升。 問題係交付。即係一方「畀錢」,另一方要接現貨油。 正常情況下,的確買油嘅一方要畀錢,但昨晚出現嘅奇境,就係有人就算要貼錢,都唔想,或無能力接現貨油。 由於期油physical delivery,好多畀散戶玩嘅證券行,喺結算前幾日已經會強制要客戶平倉,所以呢吓即月期油下跌,應該已經唔太關散戶事。 但要講吓USO,因為USO好大鑊。 USO大鑊之處,唔單止係因為期油大跌,仲係因為佢每次轉倉,都會輸好勁嘅期油差價。 以前,喺油有正常「即時」需求嘅時候,現月油係唔會有咁折讓。但如果係2022年先交付嘅油,暫時又點會平賣畀你?除非市場都認為,油嘅需求喺年幾兩年後都唔會回升。但現階段,市場無諗得咁悲觀。 變相係,愈近交付日期嘅期油,因為無人要,所以就愈平。 而呢樣嘢,喺會喺每次轉倉,都會打擊USO嘅股價。如果情況持續,USO每月都畀人打一鑊,USO嘅資產係有機會慢慢被陰乾。 油係有機會反彈。但USO要嘅唔止係反彈,而係要即月期油可以升完,再喺較高位置企穩,咁佢先可以消除危機,但呢一刻啲飛機仲係停飛緊,呢樣嘢唔易發生,USO 轉倉輸錢嘅情況應該仲會繼持多一段時間。 所以,USO我已經加咗好多Debit Put Spread淡倉做Delta Hedge,如油價反彈,會再加,直至以上提及嘅轉倉問題變得無咁嚴重為止。然後,再繼續收時間值。 同時,我亦研究緊揸遠期期油,再做USO淡倉,博USO仍然仲會有一段時間跑輸期油。 但做呢個方法嘅風險,係油需求回升,現月同往後月份期油差價收窄,雖然出現嘅機會唔高,但都要睇實,呢個大時代,真係乜嘢都有機會發生。 今日6pm左右,喺homeblogger會開live,到時再同大家分享更多部署。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

Read more

【莫家強】先講USO。由我自己嘅策略講起

  唔計中間有一次成功走位獲利,有兩批貨我可能要接。第一批,接貨價5.8。第二批,如要接貨,接貨價3.6。 做Short Put,有三個風險層次。最大獲,係你純粹為期權金而做,完全無力接貨。無咁大獲,係你有能力接貨,但接完就再無資金,雖不至於無限風險,但假如隻股跌深咗,你往後策略上就會變得好被動。 最無事,係你接完貨之後,你仍然仲會再有資金,就算再接貨都無問題,咁嘅風險就最低。我嘅部署,係呢種。 我做咗好幾隻股票嘅Short Put,有同大家講過嘅有雞翼同瑜伽衫,另外仲有其他股票,預計全部唔使接貨。所以,只有USO要接,我面對嘅壓力仍然好細。 但問題係,USO呢隻ETF本身,好大件事。 油價下跌係一樣嘢。但更影響佢嘅係每月期油轉倉成本日增,即係我哋講嘅輸Contango。最主要對我哋嘅影響,就係本身諗住可以長揸油坐到佢升嘅朋友,呢條路變咗唔work。 原本,我係諗住靠賺時間值損秏可以彌補,但隨著每月期油差價愈加愈癲,加到連隻USO都要改轉倉規則,所以我都要加啲保護。 我嘅做法,係用遠期嘅Debit Put Spread去減低Delta值,令我喺USO下跌嘅時候,可以有錢賺,直至每月期油差價變得無咁極端為止。 再喺接咗貨啲部份,我會再將部份倉位做Covered Call,喺有時間值收入同Spread嘅保護下,就唔會有太大風險出現。 另外一個竅門,就係Covered Call唔好套哂所有現貨,因為你始終唔知幾時油價會有大反彈。呢啲位,一係就唔升,一升就會挾到癲,留一啲正股唔好cover,到升嘅時候你會較容易部署下一步動作。 至於個市,做過SP + 股價方法嘅朋友,應該會睇到效果。用呢個方法,佢可以將你持有股票嘅升跌影響減低,等你坐貨會坐得舒服好多。 隻雞翼,IV好高,當然賺SP期權金都已經好開心,但如果再加埋你有正股揸喺手,升嘅時候,你會更加定。 瑜伽衫,雖然今日要跌,但整體只要繼續維持住上升趨勢,就已經無乜問題。 Semiconductor,又係我睇好嘅行業,我又係用同一方法去玩,暫時又係唔錯。 整體大市,如果有睇我節目,我都講過真係能夠收復大部份失地嘅股票比例唔多,但升起上嚟嘅股票,好多都好靚。如再有期權幫手,分散少少投資,做買賣就會更加舒服好多。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

Read more

【莫家強】最無事嘅係納指

轉頭要拍片,長話短說。 今日,最無事嘅係納指。 睇納指,基本上你只要集中睇5間公司,分別係Microsoft、Apple、Amazon、Alphabet (即Google母公司)、Facebook。 呢5間公司,合共佔納指成份超過四成。換言之,呢5間公司OK,納指就OK。 標普500指數,都係呢5間公司最話事,但總計佢哋喺指數嘅佔比就少好多,只有不足兩成。今日,好明顯就係啲呢啲巨企以外嘅股票,表現較差,以致標普500指數嘅跌幅稍大。 再睇闊少少,代表較細規模公司嘅羅素2000指數,今日嘅跌幅更勁,講到呢到,你就應該更加知道個情況係點。 如果你揸住嘅係近排較強勢嘅巨企,例如係Amazon、Microsoft,我覺得你無乜必要擔心,今日對你嚟講根本係完全無事發生。 雲端科技股,好多呢一刻仲要有得升。 有同學捉到隻Tesla,勁,呢隻我自己都唔係太勁玩,今日嘅升勢都唔錯。 有隻ETF,Ticker係IBUY,成份股係網上零售股,跌幅都唔大。 但例如係之前短暫企穩咗嘅郵輪股,今日又再跌過。 我嘅睇法係,其實個市場,係有跡象開始跟返基本因素走。咁就好做喇。 睇返武漢肺炎疫情,其實台灣、韓國、澳門、香港等國家同地方,已經展示咗點樣就可以阻止病毒擴散。簡單講,就係唔好信世衛講嘅嘢。 歐美地方嘅疫情爆發,世衛要負好大負任。當然,美國疫情失控,Trump Trump 起初對疫情嘅輕視,亦係原因之一。 其實呢一刻,例如你上Fox News 嘅網站,佢哋講嘅有關武漢肺炎嘅嘢,其實我哋一早已經知道。例如佢哋話喺病徵出現前,隻毒已經有傳播能力。呢樣嘢,香港嘅醫護專家已經講咗好耐,所以先話要全民帶口罩,但原來喺美國,呢樣嘢係新聞。 而世衛,仲話緊無病唔使帶口罩。 疫情,隨著歐美國家終於知道譚生菜唔係好人,而只要各國政府可以將台灣、韓國等國政府成功嘅經驗複製,疫情雖然都暫時唔會能夠完全解決,但最低限度市民將可以慢慢過返正常生活。 純粹睇疫情,最壞嘅情況大概已經出現咗。然而,經濟最壞嘅情況,就未出現。嚟緊,將會有一個七國咁亂嘅財富大轉移。一啲企啱邊嘅國家同行業,將會賺到好多錢。而一啲企錯邊嘅國家,將會被弄至債台高築,唔少行業,會完全消失。 總之就係,唔好企錯邊。 升得返2、3月嗰陣跌幅超過一半嘅股票,我都唔係咁驚。如果你仲要係用我嘅方法,喺低位部署一啲接得起貨嘅Short Put,我認為就更加唔使驚。 但一啲彈都無得彈嘅落後股,有信心又識控制風險嘅,部署淡倉都係一個唔錯嘅選擇。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

Read more

【莫家強】波幅同風險唔一定係成正比

今日,想分享吓我嘅一啲策略部署。但首先,大家要攪清楚以下一個concept: 波幅同風險唔一定係成正比。 例如,匯控平日上落唔大,但今時今日,你投資呢隻股票,我覺得絕對屬於高風險。 又例如,好多潛力中價股,一升跌起上嚟每日波幅都可以超過5%,但你又會見到佢啲生意真係愈做愈好,講風險,又未必真係好高。 以上我講嘅嘢,如果你明白的話,以下,我就會講我嘅部署。 用期權收時間值,最好當然係揾啲有多啲期權金嘅股票。但你要明白,例如一啲太過穩陣嘅股票,好似公用股咁,你唔使旨意佢會多期權金。 咁有咩股票最好呢? 就係一啲平時chok得嚟,又具備質素嘅股票。有幾隻,我自己玩緊,喺呢度我唔方便開估喇。但共通點就係,我覺得呢啲股票除咗有返咁上下基本因素支撐之外,仲要係期權嘅引伸波幅要高於70%。 高過90%,仲好,你做Short Put嘅回報會仲靚。 當然,有得110%以上就再好啲。 呢啲股票,你可以將啲Short Put 嘅行使價做到好遠好遠,都仲會有肉食。頭先live講嘅部署,最適合就係用落呢啲股票身上。 例如隻雞翼,等價期權去到80%引伸波幅,呢隻啲期權開價係衰啲,但你要保守的話,你係可以做到隻股票一個月只要跌唔夠3成,你都會有錢賺。而所謂嘅最大風險,咪就只係你要喺現價3成以下接貨。 咁如果你又覺得隻股票OK,你又計過數先入市,接得起貨有餘,咁你又有咩好驚? 做呢個方法,有個竅門,就係唔好做死一隻,要分散啲去做。 當然,如果個市又去返2、3月嗰陣咁差,做Short Put做到行使價幾遠都死。但只要唔係嗰種程度,而你又分散咗幾隻股票嚟做,起碼你唔會隻隻股票都要接貨,我當你5隻股票入面要接一兩隻貨,你嘅風險都唔會太高。 呢個就係我依家嘅玩法。 原油ETF,其實道理都係類似。我一直都講,我唔係睇好油會升,我只係睇佢跌到某啲水平,就難再跌。 如果去到嗰啲位,你仲可以借期權製造一年30%以上「股息」,我就係諗,怕咩揸。 當然,如以上就講,用呢個方法,你一定要分散。如果油只係佔你嘅portfolio一少部份,咁你嘅壓力就會好細,加上你技術好的話,輸嘅機會唔高。 原油ETF嘅引伸波幅過100%,等價期權,Short Call、Short Put都好,等價期1個月可以收超過10%回報,只要你再加少少睇圖技術,要玩贏一啲都唔難。 好似上星期四,我fb都寫咗喺高位部份食糊,嚟返低位,又可以再部署過。 唔好怯,有耐性慢慢做,而期權可以再幫到你嘅係,即使你估錯咗少少個市,你都仲會可以贏錢,呢個就係你最大嘅優勢。 唔怯,唔急,簡單講就係戰勝貪婪同恐懼嘅要素。有期權幫手,就會更加容易做到呢樣嘢。 個市,我真係唔知仲有無得升。但我呢一刻諗嘅嘢就係,有邊啲股票,如果現價跌兩成,我係會好樂意去買貨,而做Short Put嘅回報又理想嘅,我就係揾呢啲機會。 今日寫到呢度,聽日再講。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

Read more

【莫家強】原油ETF

油,上星期四講過,低位買嘅注碼,我已部份獲利。 除此外,我亦有同時做好多Short Call同Short Put去收息。原油ETF,以下星期at-the-money嘅期權計,引伸波幅仍然去到110%,期權金仲有好多,我覺得唔好嘥咗佢。 其實,如果我有得揀,我都唔想油價咁快就升上去。喺呢啲低位,又咁高引伸波幅,我會夠膽啲Short Put做得大量少少,回報仲好。升得太高,我反而啲Short Put唔咁做咁多。 以呢個引伸波幅計,如果你嘅技術好,淨係主力做啲收息策略,就算油價喺12個月按現價計跌4成,你應該都唔使輸錢。呢個,就係你敢講啲高引伸波幅期權嘅優勢。 當然,如果油價仲有超過4成下跌空間,咁當然都要輸錢。所以,仍要控制好風險。 至於美股指數,我做緊一樣嘢,就係用反而ETF夾住啲Short Put嚟做。 最好嘅情況,係大市微跌,咁我就會期權又賺,ETF又賺。 呢個策略,重點有兩個。第一,你要識得調節Delta值,即係整個倉位有幾睇好或睇淡。 第二,就係你要識得處理大跌風險。 攪得掂以上兩點,呢個策略贏面係相當高。微升、橫行你都會有錢賺,微跌更好。大升,講技術,但最低限度反向ETF都係屬於有限風險,控制好注碼同Delta,就唔會挾得死。所以,主力留意住大跌風險就可以。 最後,我想講,我倉位大部份仍然仲係持有現金。我等嘅,係要有啲股票開始重新出現上升趨勢,到時,我先會投放更大注碼。 最後,Trump Trump 話美國經濟會極速反彈,但大家都睇到,佢嘅講話,已經對股市嘅升跌無哂影響力。呢一刻,我諗注意大市嘅走勢,會重要過注意佢講嘅說話。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

Read more

【莫家強】所獲回報算係唔錯

早排,我將焦點放咗喺原油ETF加期權,所獲回報算係唔錯。 我嘅做法好簡單,就係配合住Short Put策略加ETF正股嚟做。 Short Put嘅好處,係有時間值收,特別喺啲期權咁高引伸波幅嘅情況下,期權金咁多,回報其實都唔差。不過,Short Put最大嘅缺點,就係你嘅最大回報,都只不過係賺哂啲期權金。 喺隻股票無大升嘅情況下,你當然唔會覺得有咩問題。但假如隻股票喺短時間內大升,咁就算你賺錢,都會賺得唔開心,因為你會覺得賺少咗。 當然,喺一啲你好肯定隻股會升得好好嘅時候,你直接買正股已經可以。 但如果係喺一啲信心未係太大,但都會睇好股票向上嘅時候,我會鍾意喺做一個mix,喺低位做一啲價外Short Put嘅同時,再買少少股票。效果就係微跌你唔使輸,唔升唔跌就賺哂所有時間值,大升就賺完時間值之外,起碼仲有少少股票可以大賺。 原油ETF,喺低位嘅時候,我就係用呢類方法玩。 另外,有朋友擔心USO嘅contango問題。即係,如果你係大大注揸哂USO,事實上你係要小心嘅。但用以上嘅方法,影響微不足道。我自己賺得都相當滿意,所以都無理會個問題。 油價去到呢啲位,後市升定跌,第一好睇油組會議傾成點,第二係之後開市油價嘅反應。到時,睇到個情況,再同大家講。 至於股票,亦可以同以上方法去玩。 星期二上堂,我同啲同學講過,點解我會對隻「雞翼」有期望,詳細分析有機會先再同大家講。 但大家有無諗過,明明今次嘅疫情,對飲食業影響咁大,但偏偏點解呢隻股又可以升咁勁嘅? 應跌唔跌,仲要上升嘅股票,其實會唔會係反映緊,呢間公司已經揾到喺疫情入面嘅生存之道,甚至提升盈利嘅法門。 仲有一樣嘢,就係今日能夠企得穩嘅公司,半年後,一年後,當其他同業陸續倒閉嘅時候,佢所面對嘅競爭就會更少,有利佢哋將來獲取更大嘅市場份額。 但短期個市,講真,我自己未能完全放心。 油,我已部份獲利。股,我買得唔多。現金,仲係揸緊好多。但喺緊我嘅做法就係,之後每次調整,然後企穩再上,我都會加注。 用得好期權,每次入市,你都會有個buffer令贏面更高,喺暫時嘅市況中,會令到我嘅信心大好多。如果過多一兩個月,疫情開始緩和,一啲強勢股又能夠確立到明確嘅上升趨勢,我買貨嘅注碼就會增加好多。 對於呢樣嘢,我唔係太急。因為,揀啱股票,相比於早入市更為重要。有特別發現再update大家。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

Read more

【莫家強】我相信我會能夠靠原油ETF加期權

未來兩年,我相信我會能夠靠原油ETF加期權,賺到好多錢。相比起股票,呢一刻,我覺得油畀到我嘅機會更大。不過,先撥大家冷水,如果你喺嗰種每一步都要問嘅朋友,我會建議你唔好沾手。因為,你咁樣去玩,會係超級危險。 有無發覺,靠問貼士去做投資,成日都係人哋就有得贏,自己就輸? 梗係啦,以下其實有幾個問題? 鍾意問貼士嘅朋友,通常都會係周圍睇,睇好多資訊。但有個問題就係,你係一定會接收到好多唔同論調資訊。慢慢地,用呢個方法去做投資嘅朋友,就會習慣咗每一件事都會有唔同嘅睇法,然後好自然地就會訓練出一種特質,叫做「睇定啲先啦」。 嗰排邊個專家準,就跟邊個,呢個我眼見好多香港投資者嘅終極投資理念。 但第一個問題就係,你啲timing 會好容易錯哂。 依家個市,兩日前講嘅嘢,兩日後個價都已經唔同哂。如果你係睇咗一個人準,先再去問貼士,然後而睇定啲,先再入市,你嘅timing 肯定會錯哂。 唔好介意,今日仲有朋友問未入市可唔可以跟? 但你知唔知道,星期一OPEC會開會,萬一傾唔掂數,油價係可以跌返哂落去。時機啱嘅,講真有咩好怕,你大可以慢慢睇住嚟食。 然而,如果step one買貨嘅timing已經錯咗,遇上同樣事件,輸緊錢,你先再去問貼士,然後再睇定啲先去行動,咁你點攪?淨係打呢隻句說話,我都覺得危險。 第二,鍾意問貼士嘅朋友,通常啲投資concept 都會係超級混亂。 淨係畢菲特嘅「人棄我取」,都畀唔同人演繹到錯哂。見到網上有人話,匯控值得人棄我取,但大家知唔知道,呢個概念背後有一個要點,就係要隻股票有價值。 「如果你唔想揸嘅隻股票十年,你一秒都唔好揸。」 股神並唔係乜嘢股票都會人棄我取。如果你認為匯控十年會可以再創高峰,咁我覺得無問題,只係大家睇法唔同。但如果你都唔覺得匯控未來都唔會太有前景,咁你仲人棄我取啲乜? 執返好啲投資concept,我認為,係非常重要。 第三,大家真係要培養多少少「交易員」嘅心態。 香港嘅投資者,大部份都係「分析員」思維嘅太多,「交易員」思維嘅太少。前者,會好著一個論點有無道理,一個預測準唔準。後者,賺錢就得,估得唔準咪走人囉,估得準順勢咪硬頸繼續堅持睇法囉。 初學投資嘅朋友,我會好建議你睇多啲Jesse Livermore嘅書,培養返一啲落場做投資應有嘅心態。 信心,估市準唔準,真係並非最重要。成日估市好準,但喺市場上輸錢嘅人,非常多。成日估市唔準,但贏錢嘅人,咁梗係都好少啦。你估市嘅能力,點都要有個譜嘅。不過想講嘅係,大家真係唔好只係追求估市,落場投資嘅一啲操作同心態,同樣都係好重要。 最後,我想同大家講,真係唔使心急,the market is always open,最重要係你會唔會不斷去努力提升自己投資賺錢嘅能力。 唔好問咁多貼士喇,你問十年貼士,你都唔會識得投資。但畀啲心機,用一兩年時間鑽研投資方法,你就會發覺成件事會唔同哂。加油。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

Read more

【莫家強】又講吓我做石油ETF 期權嘅策略

既然有朋友問開,又講吓我做石油ETF 期權嘅策略。而我相信,喺未來兩年,我會用呢個方法,賺到好多錢。 先講理念。 油唔同股票。股票背後通常係一間企業。一間企業嘅最壞情況係出現經營困難,然後執笠。若然你揸住呢啲公司嘅股票,就算喺疫情過後,可能永遠都唔能夠回升。 但油唔同,只要有一日,影響佢嘅負面因素消除,油價就會喺現在嘅低水平起計,大幅回升。 對於油價,好多人都會有唔同睇法,甚至有專家話佢會跌到負數,但我唔會太理會,因為我睇到佢存在嘅機會。 我嘅睇法好簡單,油價大跌,最大原因唔係喺需求面上,而係有部份產油國想借呢個機會,令將來嘅競爭對手減少。終於,最近美國有頁岩油公司申請緊破產,而油價,亦見開始大幅反彈。 另外就係,我有期權,可以令我嘅贏面再大幅提高。 唔知大家知唔知道,現時隻石油ETF 嘅期權,引伸波幅係超高。只要我做一張等價Short Put,一個星期時間,假如隻油唔跌,我已經可以收到「10厘息」。短線,當然我都有可能要挨價。但長遠,以我嘅技術,我睇唔到我有輸嘅可能。 再者,嗰隻ETF嘅入場費超低,每張Short Put,接貨金額可以係低至幾千蚊港。對於初學者,你可以按自己可以接受到嘅風險水平去玩。對於我,就係分配注碼上可以做得好靈活。 而用油嘅ETF去玩,有一個最大好處,就係隻油唔使升,只要唔再大跌,我就已經有錢贏。即使話,我根本唔使油價出現反彈,我都已經可以賺到錢,呢個我覺得係一個好大好大嘅優勢。 成日啲人話啲股票價格被低估,但我認為真正被低估嘅,係油價。 期權 + 油,個人覺得,係現時市場上存在嘅其中一個最好嘅投資機會。風險當然會有,但只要handle得到,贏嘅機會就會好高,而且潛在回報好大。 喺股市仲有咁多不確定性嘅情況下,我覺得玩油,仲比較實在。 但最後都喺嗰句,識玩先至好玩,唔好亂嚟。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

Read more

【莫家強】RingCentral (RNG),逆市顯著上升

執筆之時,道指跌幅收窄,現只跌不足500點。 早前跌得幾多嘅RingCentral (RNG),逆市顯著上升。另一隻我想講嘅係Microsoft (MSFT),呢隻股票長遠我非常睇好,近日係跌市中股價都叫做相當硬淨,暫時已幾乎唔使跌。 有人問Apple (AAPL)同Microsoft,邊隻好? 我自己會覺得,Microsoft 嘅產品同服務係傾向工作,而Apple則係較傾向娛樂。 今次嘅疫情,短期當然對絕大部份企業都會帶來打擊,但中長線而言,有機會加快Microsoft嘅業務增長。然而,對於Apple,就未必有呢個效果。 仲有一隻我以為會好受疫情打擊,但卻企得好穩嘅股票係Lululemon (LULU)。如果之後見個市回穩,而呢隻股仲有力向上的話,我認為絕對可以跟進。 但整體大市,仲係好肉酸,就算要買,都要量力而為。 最後,我想講,真係唔使急去買貨。喺呢啲咁chok 嘅市入面,除非你係高手,否則大部份投資者都會好容易就係升嘅時候追貨,跌嘅時候止蝕,keep 住輸錢。 咁樣有兩個壞處。第一,你嘅本金會慢慢減少。第二,到真正機會出現時,你會唔敢博。 對於個別強勢股,如果你真係怕萬一出現升勢時會走寶,買少少未嘗不可。就算熊市仍未完結,過往每次都係,有啲股票係會比大市早好多見底。 但整體美股要重新轉入牛市,我認為仲未係時候。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

Read more

本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室