金價快突破新高？阿里美團小米入恒指
金價突破新高？
恒指納入同股不同權公司
平安好醫生要散水了
私有化／賣盤名單
亞洲金融幾時賣？
金價突破新高？
今日有人特別點唱，講金價。其實冇乜特別。今日金價已經創7年半新高，距離歷史新高1920美金不夠10%，你話今個月甚至今個星期會升穿歷史新高，絶不出奇。
買金嘅，傳統上得兩個理由。一個係避險驚打仗，第二係保值抗通脹。第一個理由我覺得已經唔存在，你見真係兵荒馬亂，其實人人係拎美金美債，唔再係黃金，時代唔同了，黃金未必畀到你嗰一種「避險」。但你話抗通脹，就似乎有用，特別係聯儲局由2008年開始，史無前例咁做QE，早排又開始新一輪。
然後就要睇三個圖啦。左上角呢個，大家都見過下，聯儲局嘅資產負債表，直角咁升上去，最新已破7萬億。但其實慢咗落嚟，你睇右邊個圖就知，右邊係每個星期嘅轉變，即係左邊嘅increment
更重要係下面呢個圖，美國嘅M2增長。有個講法話，QE唔係印銀紙，因為QE可以收返，印銀紙不能。表面上係啱嘅，你見對左上角個圖，2018年後有一段跌緊，就係縮表，收水，tapering。但，睇埋下面個圖，你就見到，今次QE嘅東西，好多都已經傳導咗入去貨幣供應，咁啲金點會唔升？
問題係，金呢味嘢，好難去做估值。大故事人人識講。問題係，1800蚊抵買，咁3000蚊呢？30000蚊呢？個平衡點在邊？你一路可以講印錢呢個故事，但2008年開始到而家，金價都唔係45度咁上啦。
所以正確做法，係每個月買少少，然後放埋一面唔好理。唔想錯失時機嘅，一次過買都得，但都係記住放埋一邊唔好理。總之你係放你身家嘅大約5-10%入去，等十年廿年，應該見到成果
恒指納入同股不同權公司
一如所料，正如之前幾次嘅專欄講，恒指公司今日宣佈，同股不同權公司可以入恒指。但最快要等到下一次季險，即係8月先可以。我其實唔多明點解佢要今日先公佈，星期五公佈埋會好亂咩？似乎唔會。
Anyway，對小米（1810），阿里巴巴（9988）同美團（3690）呢三間公司股價應該會幾有利。暫時會睇好阿里巴巴，星期五出業績。
平安好醫生要散水了
之前推過幾次，升到你唔信，但平安好醫生（1833）今日急跌。原因應該係換咗個CEO，仲連公司秘書都換埋。而之前亦都有傳話公司抄襲，唔知係咪會有鑊爆。無論如何，由始到終都唔多信間公司，只係抄momentum 同概念，之前買咗嘅應該諗落車了。
私有化／賣盤名單
上星期五專欄寫過堡獅龍Bossini（592），然後星期五晚再見到先施（244）都賣盤。明報專欄有寫，呢堆嘢基本上都完成歷史任務。然後大家又研究會唔會有下一隻。呢期炒私有化呀，賣賣都不錯。
大隻嘅，之前我地寫過信和（83），同埋新世界中國百貨（825）。新豬肉嘅，亦係地產商家族系內，港華燃氣（1083）。摩根士丹利估煤氣（3）有機會私有化呢隻。
細細地嘅，其實仲有啲香港零售商掙扎緊—或者話掙扎多年。包括長毛（而家已剪）黃銳林嘅包浩斯（483），仲有林建名（唔係林建明）嘅鱷魚恤（122）。論機會，可能鱷魚恤仲大，話晒以前大股東都做過私有化。今日跌，但上星期五升10%。有機會再寫多啲。
亞洲金融幾時賣？
亞洲金融（662）出盈警，前因後果已在Facebook Page 講咗。其實Page都講咗幾年，N年前我甚至在公司出過報告。嚟嚟去去都係嗰樣嘢—大折讓，有機會賣盤／私有化。其實公司營運得唔錯，但真係太細，冇乜人理。但至少管理層點都正路過上一段提嘅嗰堆公司，而個資產負債表又乾淨，冇債嘅，差不多全部係啲金融資產。公司又不停回購。有無比耐性又有閒錢嘅可以玩下，挑戰下自己，做終極價值投資者。不過隻嘢悶到七彩，成交又極少。今日成交 3萬港紙都冇。