=======附件=======
=======附件=======
呢一刻，大市的確有繼續下跌嘅可能，暫時，我覺得未係出擊嘅時候。
咁幾時出擊？
一句說話，寧買當頭起，我會等個市回穩後再上嗰吓，先會出手。快嘅話，可以係兩三日後。但現時，唔係無嘢要做。
跌市，係觀察股票強弱嘅最佳時候，望住邊啲股票喺跌市入面仍能造好，到市況回穩後，呢啲就係可以買入嘅股票。
至於有咩股票我係重點觀察緊？以下，我會分享幾隻。
首先，從TOP 100列表中，我會留意到隻Insulet (PODD)。呢間公司，主要銷售嘅產品，係專門畀糖尿病人用嘅胰島素泵。而從資料睇到，公司嘅營業額自2016年後，就一直穩步上升。
至於對於呢隻股嘅投資策略，我會睇埋佢星期四收市公佈嘅業績，如果個市好，佢嘅業績又OK，股價又有得升，我就會入市。
呢一隻，我都好鍾意嘅股票，係從事醫療設備行業嘅Thermo Fisher (TMO)。上星期，佢嘅股價曾經破過頂，然後就遇上阻力稍為回落。往後，如果隻股可以喺整固後再次升破頂，呢一個會係我好鍾意嘅形態，呢隻股我會追。
其餘睇好嘅股票，仲有之前提及過嘅Wingstop (WING) 同Lululemon (LULU)。呢兩隻股，特別係前者，近日嘅表現都絕對唔差。未有貨嘅朋友，嚟緊吼實個市，只要市況一回穩，而呢兩隻股票又能夠即時跟升，我認為又可以買。
至於藥物包裝公司West Pharmaceutical Services (WST)，我會分注買入，並已買入第一注。往後，隻股每次出現整固後再升，我都會加注。但如果股價表現唔好，就唔會再加。
不過，呢隻股，我自己好有信心。WST，喺佢網站內講到，佢係全球最大嘅注射藥物包裝同運送公司，而且做呢類生意，你要符合好多條例監管，對於已於行內一直管運規模嘅公司嚟講，會形成一定嘅barriers of entry。
再者，WST又係另一隻喺過去四十年股價都一直維持住上升趨勢嘅股票，只要能夠做到順勢而行，投資難度不高。而佢對於我嚟講，唯一嘅缺點係期權開價唔靚，否則就perfect喇。
其餘，我仲有留意MSCI (MSCI)。未來又係，只要股價能夠再次破價，佢就阻力就會減少，我亦會買入。
總括而言，都要繼續留意住個市。走勢若進一步轉差，就要忍手，但若倒頭回升，一兩日後，我就回追買一啲表之前表現理想，近日股票又能跟升嘅股票。
有問題，請電郵至 [email protected] 畀我。星期三，講ETF。