今日（星期五）同昨晚（星期四）在Facebook Page上，寫咗唔少關於美國恐怖嘅經濟數據，反應相當不錯。但目測我啲讀者一般唔係啲愛國小粉紅，可能人都係鍾意睇人仆街？或者壞消息永遠搶眼球？
無論如何，唔知巧合定乜，但過去四個星期四，亦即係每次美國出首次申領失業救濟人數數字後，美股都係升嘅。可見根本唔關事。
肯定係，嚟緊啲數字仲會好難睇，失業率會升到十幾甚至二十巴仙。GDP會收縮一兩成起馬（美國喎，唔係馬交新加坡）。但，呢啲全部係極滯後嘅數字。我使乜等到佢出數字先知經濟差？呢個係好多普通人嘅盲點
本欄嘅讀者當然知道，股票炒將來。而家炒嘅係，可能有疫苗（暫時仲係早階段，但可信性應越嚟越高，越嚟越似真係有）。另外，度度都講重開經濟了，美國，德國，香港，印度—未敢即時重開，或者定日期，但都講定咩條件下可以重開。咁點會唔升？更不用講，「聯儲局1秒印緊1百萬美金」
中國經濟衰退，又如何？
同樣地，今日中國出嘅經濟數據，更加恐怖。按年收縮超過6%，唔少人有生之年未見過。但反正，預咗啦
下一步邊個出子彈？
呢個圖就緊要啦。其實我唔係好明。我當然明個圖，財政刺激，as a % of GDP．但點解疫情唔重嘅日本咁多（定因為經濟本身都頹？），法國之類咁少？
但，留意who’s missing．中國好似今年，甚至呢一兩年，都冇乜出過大型刺激方案。應該差不多了？
中銀航空租賃
今日個股只講呢隻。較早前寫過，國泰水深火熱（當然了），sales and lease back，賣飛機畀中銀航空租賃，自己租返。當然係因為手緊。今日呢，講國泰會取消波音訂單，延長之前嘅租—亦都係同中銀航空租賃去租。睇返隻嘢，有排都未返高位，而我估中港airline破產嘅機會極低。
埃汾想做日本股票KOL
同港股美股無關，但埃汾有個大構想，同大家分享下。就係，炒日本股。
近三五七年，香港炒美股嘅人多咗好多。首先係中港股市令人失望，美股又升極都有。但最重要嘅，係有故事講。始終美股啲公司係國際品牌，科技水平又最高……（下刪一萬字），相對地亦冇咁多搵小股東笨
但日本呢？個人覺得日本股好炒，至少多故事寫。如果我識日文，或者住日本，我就會做日本股KOL。近年都寫過多次。三菱化學做肺炎疫苗，任天堂Switch動物森友會（有篇新文在獨角號），ASICS Mizuno 跑鞋，口罩股肺炎四寶。最重要係，有故事講，香港人又熟悉。總好過我同你講咩大陸核電股。加上日本公司，相對地出古惑嘅情況都比較少。再扯遠啲，日本人口下降，拉外資吸引民係必做嘅事。你見日經新聞都買埋Financial Times，西媒係多咗好多日本公司故事。個人覺得，美股同日本股，都仲可以實現「股壇許冠傑」Peter Lynch講嘅嗰種生活投資法。
當然而家香港要買日本股都仲係極難，但正係冇人做先要你去做。我就係想去開呢個商機。可惜我唔識日文。否則我真係主動去敲門。你識嘅可以去試，最好介紹埋我。
版務
其實冇乜特別，但都係提返新讀者，過往嘅文都可以上網睇得返。建議你save晒落嚟，因為唔少嘢都係講完再講。
另外，可以在網頁留言的。當然你亦可以在我Facebook Page PM我。未Like嘅記得Like，最好推介埋畀人地。