星期一，照常有專欄，但簡短少少。
本欄讀者應該知，但再三強調，股票係炒將來嘅。一街都係肺炎，股災咗多次後，再講失業點升經濟點差，就冇乜意思。當然講就易，實際上操作難好多。唔計借咗錢，唔計真金白銀輸嘅壓力都好。就算齋寫，都唔係咁易。點解恒指29000，係跌到21000先見底，唔係17000，唔係23000？呢個其實相對地都冇咁難捉，話晒有個Book Value睇。但美股呢？就極難捉了。
仲哀悼？炒復蘇啦
無論如何，凡事樂觀，要輸錢嘅都應該輸晒，要斬倉嘅斬晒。而家點都似係睇復蘇。如果一切不變，似乎世界各地嘅經濟衰退，同失業大升，都係短期嘅 。但當然前題係 1) 冇第二波嘅疫情大爆發 2) 中美唔在短期內反大面。咁兩樣嘢，都唔係完全冇可能
唔信中國數據都好，你見各地啲疫症數字都應該係真見頂。縱橫遊第一時間飛出嚟話搞華東（中國嘅華東華西，唔係西班牙嘅華西）團，極速爆滿（雖然只係十丁友），雖然亦極速撻Q。但啟示就係佢老闆講嘅一句：港人困不住。
唔知讀者嘅背景如何，但十分鍾意返大陸嘅，我估唔多。但就真係哲學問題：如果七月，去旅行只有得返大陸（唔包台灣啦下，首先我反對台獨，但你懂的），冇其他地方，咁你去唔去？我諗唔少新一代勢死唔返大陸嘅，自然唔使揀。但我撫心自問，可能都係照去—去下北京探朋友又好，去上海迪士尼又好。
打咁大段嘢，都係想講，大家其實屈咗好耐。香港係咁，其他地方係。固然唔少人失咗業，或者再去旅行時都會小心啲，但，嗰種報復式消費，應該可以幫助經濟反彈。
而當然仲有，政府嘅幫助。GoBear專欄寫過，今次各地政府，財政政策為主，貨幣政策反而退居次要。
本地消費股齊齊反彈
香港方面，你見林鄭在復活節前都出咗一大堆招數。幫消費又好，保就業又好。你見一大堆本地股，即時有反應。大快活（52），大家樂（341），維他奶（345），國泰（341）。你話幫助係咪好大？都唔算，但首先令個情況唔惡化落去就得，呢啲公司之前已經近乎係執笠價。當然，以前專欄係有提過下的，呢度同呢度，但要炒嘅……其實都捉到一兩隻嘅。
例如國泰，你睇啲估值係史上最殘—雖然面對嘅危機都係史上最勁。而家機管局定乜話拎錢買機票，20億—其實就算畀晒國泰都好，只係等於佢地平時一個星期嘅收入！而國泰2月已經蝕緊20億！但，好過冇。你見低位彈兩成的，勁過大市。但要捉當然極難。
另一搞笑料，原來話係買四間本地航空公司嘅機票。原來香港有四間航空公司？哦，原來係，港航（快死），國泰，國泰港龍，同埋快運。即係國泰A國泰B國泰C，冇話唔得嘅。咁照計國泰分嗰20億，應該係拎咗八九成了。
資金流方面似乎亦都配合
有透因，咁子彈呢？
呢度嘅讀者，當然比別人更重知道，聯儲局每秒印緊100萬美金。另一方面，中國也不怠慢，中國嘅M2增長亦都3年嚟第一次返到雙位數—你可以話M2比印銀紙更重要添。大家亦都密切留意香港嘅M2。上次專欄亦寫過，香港銀行體系結餘將會大升，但係咪變成游資熱錢，尚待觀察。
快講三單：王維基，大酒店（45），Work from Home ETF
話寫短啲結果都係忍唔住。最後三單快講
王維基嘅HKTVMall（1137），今日（星期一）開始登記買口罩。賺錢事小，企業形象事大，如果今次唔甩碌嘅，照計股價仲有得升。
美國將會有Work from Home ETF。個股票冧把？正係WFH。投資Slack，Zoom等等受惠股云云。知唔知啟示係乜？就係呢堆嘢見頂！我會在FB Page寫多啲，但萬試萬靈。到呢啲嘢入晒屋，商品又好，買金又好，金豬四腳基金又好，必然係見頂訊號。
大酒店，即係香港半島酒店（仲有其他地方都有半島）嘅母公司。其實呢堆營運數據成大半個月前了。固然你見到大跌。但古語有云，今天很殘酷，明天更殘酷—你見，都只係舊年第三四季，今年第一季會更精彩。
不過股價呢？一樣係低位彈兩成。只要唔死就得。同時間，其實你見出租率之類第四季居然高過第三季，但一樣係壞消息，因為第四季理應係旺季。但無論如何，適者生存，半島，一樣做特價。兩千蚊左右有得住，做到今年嘅8月尾，好似唔一定要生日添（懶慢慢睇，你自己睇，反正埃汾7月生日）。實不相瞞，舊年第四季嘅數字，埃汾有份貢獻。埃汾太係12月生日的，往年第四季開始有做呢個東西。兩千蚊住半島，很不錯的說。但會唔會拖低品牌形象，得罪舊寫，「嘩埃汾呢啲卡啦蘇都嚟住，半島而家真係好雜」，就不得而知。不過肯定嘅係，講生存先啦，仲講面子？而我估，8月尾做完之後，應該唔使再做。