呢三招一出，股市就會回穩。
大家好，寫文時正係風高浪急。美國聯儲局繼3月頭「失驚無神」緊急減息0.5厘後，香港時間星期一（3月16）天未光，又再忽然減息1厘。留意兩次減息都係緊急，都未等到開會（3月18）已經射晒子彈。
兩次緊急減息，市場反應都幾負面。股市原本都好地地，出埋招就即插，唔知侵侵諗乜了。如果佢嘅目的係想穩住股市，明顯係失敗。但點解第一次唔得，佢覺得第二次會得？咁可能真係搏第二次得，或者佢冇你想像中咁著緊股市。始終減息照計點都幫到下啲公司。
息又減晒，亦都同時放埋水，基本上已經重啟QE。但市場都唔多領情，咁點算？以下三樣嘢，可能幫到市場。
一．畢菲特入市。留意股神畢菲特近年戰績真係麻麻，仲渣住一大堆現水，畀人笑佢老，笑佢回塘。股神都一把年紀，會唔會就係臨退休整多舖代表作，貫撤實現佢講嘅「別人恐懼時佢貪婪」？相信可能性都係有嘅。事實係3月頭股神已經出手，增持咗Bank of New York到超過10%。當然規模仲係好細，如果佢有大deal出嚟，照計市場有可能忽然間情緒大轉向。股神都買喎，你唔跟？而佢嘅好處係「別人恐懼時佢有錢」。記得08年金融海嘯，畢菲特亦都用極優厚條件「打救」咗投資銀行高盛（Goldman Sachs），同埋通用電氣（GE）。咁你求股神打救，條件就當然係辣。
二．減關稅。聯儲局就可能係侵侵扯線公仔，唔敢逆佢意，而家鮑威爾可能同佢講「我一早話你知咁樣唔得架啦！而家你睇？」。但畢菲特就唔會畀侵侵控制到。所以頭先第一點，侵侵係被動嘅。但有樣嘢佢可以主導：就係減中國關稅。咁核突？放心，為咗連任，有乜做唔出？而家先係最好下台階，為咗世界人命著想，我拋開成見。你見近日侵侵啲言論仲好克制，並冇話將疫情怪落去中國度。當然呢招亦都係一半半，亦不排除佢救唔到市就反枱，正式將矛頭指向中國。但留意中國暫時都仲好克制，你睇人民幣就知，中國經濟一樣大受打擊，但都冇將人民幣貶值—你話背後唔係畀返面美國（或者怕報復，一樣）？點都唔信
三．政府直接入市買股票。呢招最絶對，你當好似盈富基金咁，不過可能更加大規模。咩唔得？梗係得。聯儲局買債都得，點解買股票唔得？係異想天開，但正係夠異想天開先可以夠穩住個市場。非常時期用非常手段，反正日本都用過—甚至有人話，唔使自己出手，叫日本央行買美股都得。暫時法律下，聯儲局只可以買債，改例要國會批准。咁估下過唔過到？相信難度不大。事實上冇你想像中咁妙想天開，波士頓聯儲行總裁之前已經強烈暗示。
講估值平（港股咋下，美股仲係唔平）講咗好耐，只要呢三樣嘢出現，照計市況就可以穩住。是但一樣都OK，三者齊發更好。
=============================================
今次同homeblogger 合作推出新專欄(事先張揚)
一個星期有成三篇文章在專欄中發表, 提供Ivan Li獨門的即市分析, 助你投資快人一步