今日唔講買賣，想講下買樓故事一則。
江珍珍女仕原本住係觀塘舊區，有見區內人仕老化、設施殘舊，遂打盤用積蓄加上樓房升值所賺到既錢換新樓一間，改善環境。
係經紀介紹之下，江珍珍去左觀塘鄰近既將軍澳睇樓，經紀力sell充滿健康之城市，話個度空曠而空氣心曠神怡，叫佢快手決定買入，呎價不比觀塘舊樓貴好多，仲有全屋新傢俱附送，慳返裝修錢又唔駛煩維修。
如事者江珍珍用左佢全副身家，買入健康之城「動L」座高層之一單位。滿心歡喜獲得一安樂窩。收樓時睇都唔睇就簽左滿意紙，住入去先知個廚櫃連門都未裝好，打風落雨又有水係門窗滲入，不過佢都唔介紹，認為此乃小問題。
一年後發現用左冇耐既冷氣機漏水，佢心諗發展商已標榜全屋附送東洋電器，已經唔係「豐習牌」，冇理由咁快部「東知」分體冷氣「瓜柴」。唯有比左二千大元叫冷氣佬上黎整啦，整完確實成星期冇滴水。可惜一星期後又再滴、滴、滴…
江珍珍真係「把幾火」，明明勁乾既佢都比部冷氣攪到濕哂! 唯有請個熟人，拍心口話整唔好唔收費。今次熟人細心一睇，用個牙醫內窺鏡比佢睇一睇，發現部新左一年既冷氣裡面，有一大個窿而夾硬用白膠漿塞埋左! 佢即刻走去同管理處投訴啦，可惜一簽滿意紙、萬事皆如煙…只有你講佢聽，唔會理你!
江珍珍焗住搵人換部分體式冷氣，最貴既唔係部冷氣，而係搭棚錢同埋幫師傅買保險! 仲要比返成萬蚊按金比個X街管理處申請搭棚。所以而家新樓用分體冷氣，有苦自己知，真係唔好貪平買部大陸野，而今次江珍珍衰左係部送既冷氣。
係靚仔爬左出窗整冷氣，而師傅冇野做同江珍珍吹水時，仲話:「我有朋友做門窗工幫手起呢個乜鬼康城，已經知道佢同好多新樓一樣勁唔掂! 首先老細拖糧，成幾個月冇糧出，汗就有份出! 仲有為左慳錢唔用足料，我敢肯定你地有一半入牆電線都係包膠既! 即係冇種管就將條線放入牆。我叫d兄弟開工前一定熄哂大電，如果唔係一鑽牆就電死! 至於你公用大電錶，都係等壞啦，遲下就叫你夾份整架啦!」江珍珍聽完，面色一沉，如何應對可見下回分解。