LINK to 上文提要: Billy原本係一個廢青，原本月入$9000既佢抱住搵夠五十萬買樓就算既心態入行做地產agent。佢係馬鞍山分行由車位做起，憑密食當三番既本領終於每個月收入「躍升」至平均每月$18000蚊。剛出黎做野幾年既佢收入當然唔算理想，但年青既幹勁令佢已經連續第三個月攞到公司係新界東區既「快炮獎」!(通常地產鋪成區頭幾個代理於該月最快開單會有$一千幾百獎勵俗稱快炮)
嶄露頭角既Billy開始被同行認識，個朵係:「xx地產專做車位個肥仔」。Billy同事開始想叫佢「埋堆」，比Billy大兩歲既同事Kenji係公司大Briefing之後拉左佢去食晏。
Kenji話:「Billy，你個team leader係咪過左料比你呀? 條數爆得咁快既?」Billy係入行之前玩Diabloworld玩到有後遺，攪到而家同客吹水可以，日日死做爛做，反而同同事傾閒計就顯得「周身唔聚財」。Kenji見佢對答單字幾個，又再講:「你唔知你老細好勁架咩? 沙士個陣成間行死淨佢一個，就係咁而家先有個區經(區域經理)做。」又講:「個陣聽講佢好無良，靠唔見得光既招數勁做獨家盤，先可以生存到。」
Billy聽下又一個鐘，原來係沙士後期，行業生態極度惡劣。有agent為左爭單租務都大打出手，情況令人心傷。沙士後期樓價已經比之前稍為上升，於是team leader就四出尋找對後市冇信心既業主，問佢地有冇興趣將手頭已出租既投資物業放售? 業主因未同租客完成租約，通常都唔諗賣樓。點知team leader同業主講佢有信心趕走個租客，叫佢開始放盤啦。 業主見佢咁有計，同埋自己租約有排未完根本就好難放，於是就將間樓獨家咁比team leader做。
team leader走去搵租客。幾日之後竟然令租客簽退租書，仲fax份退租書比業主睇。業主就問你係咪搵支槍指住佢個租客? 做咩租客會「咁順灘」走人呢? team leader只冷笑幾聲，同業主講:「搵朋友同租客傾掂左啦!」業主問使唔使封番利是比佢朋友飲茶? team leader只係話:「小意思。」自此業主對team leader更有信心，一星期之後，間樓就用比市價多些少既價錢賣左比第個。
業主簽約前親自打電話比租客證實佢係咪會搬走。租客話冇問題，叫佢比個日期黎就可以。業主見租客都肯搬，價錢又ok，咪簽約收訂，45日之後收埋尾數交吉完成買賣。業主係呢45日中間都打過比租客問佢搵到第間屋未? 租客只係好有禮貌咁答佢冇問題。到交樓前幾日，奇怪既事就發生啦!
業主約定交吉前十日就叫個客搬走，點知搵極都搵唔到個租客，好似人間蒸發咁! 業主打比team leader問有咩計? team leader就同業主一齊上間屋度睇，入面烏燈黑火，搵唔到人。業主急起上黎想撞門，因為幾日後成交唔到業主毀約要賠幾十萬! team leader叫業主冷靜D，因租務條例係保護租客，一旦入到屋租客可以告返業主轉頭。業主過左幾個焦慮既夜晚，終於係交吉前兩日搵到租客。
租客同佢講剛去完旅行，係外地染病，所以聽唔到佢電話。仲話用左成十萬蚊冇錢搬屋，叫佢比返五萬蚊先可以搬走。業主到而家終於明咩事，原來租客要夾佢一筆。但係成交日在即，佢唔比呢五萬蚊要賠成幾十萬，唯有乖乖就範。業主見住租客搬走之後，仲要笑容滿面咁叫team leader出面比五萬蚊個租客。
Kenji講:「因為team leader戲好所以業主冇懷疑過佢同租客係串通既。業主通常賺少幾萬都唔會嘈。租客一次屈到成年租緊係會同agent做場大龍鳳。」其實業主如果係租客未搬走既情況之下簽約交吉賣樓，交吉日期一經披露，業主就處於危險之地。team leader用同一方法幫幾個業主賣到樓，仲彈到單租務比分行同事。如此方法幫team leader渡過沙士寒冬。其他人死哂，佢先可以上位。
Billy聽完半信半疑。不過已提高對team leader的戒心。佢行到生恆銀行附近，佢想起辛苦儲起來既十萬蚊定期已經到期，不如入去攪續期。用不尊貴櫃面既Billy，極力被櫃面小姐游說去聽「更高息既儲蓄方法」。Billy問小姐係咪「唔聽唔得」?小姐話佢今朝到而家都未成功做過一個sales referral，老闆話做唔到唔比放食lunch。Billy唯有幫下佢。
Billy行到銀行分行另一邊較靜既座位，櫃面小姐隨即介紹後生女同事michelle比Billy認識。Michelle諗都唔諗就攞左個保險儲蓄計劃出黎，同Billy講個計劃有約4%回報，比定期更好。Billy一睇就知放十萬本金五年後攞番十二萬都冇，點會年回報4%呢? 不過佢見michelle斯斯文文，又好落力咁講解，真係唔想一口拒絕佢，佢好坦白咁同michelle講:「其實我覺得個回報真係好差，不過你講得真係好落力。咁啦我做間地產鋪就係附近，你過幾日再打比我，我睇下做唔做一份啦!」michelle覺得佢「終於見到一個有人性既人」，雖然冇生意不過都好好送Billy出分行。欲知michelle而家係銀行既跑數生活幾咁無人性? team leader點樣將Billy養肥而後噬? 容後再談。