閱讀報紙既習慣或許會成為上一代的事。係今時今日連三歲小朋友都將iphone當萬花筒般愛不釋手之際，手握報紙邊嘆荼邊閱報的人買少見少。香港主流報章數埋都十幾廿份，計埋五份免費報紙，究竟香港報業生態將來會係點呢?
近年五份(五國/覺)免費報紙加入報壇，確實改變行業生態。首先收費報紙首當其衝銷量下跌，再到免費報紙由最初爭住攞報紙到而家比都唔要，似乎連免費報都嫌太多。免費報業在香港已十年，先回顧及探討會唔會有免費報被淘汰呢? 如果有又係邊份呢?
都市日報於2002年成立，開頭有人質疑佢既營運模式可唔可以賺錢。因為2002年電腦已興起，會覺得大眾會好快去除「紙」呢個新聞載體，轉去電腦睇新聞。最尾瑞典總公司都拍板同地鐵簽訂派報合約，點知出奇地受歡迎，出版無耐已開始大賺。不過到而家既你搭地鐵，仲會唔會伸手去攞「都市」呢?
到2005年，施老闆籌備am730，開印之前仲同行家傾下佢辦報理念。根據施老闆在專欄所述，有報章因而搶先在am730前開刊，而該報章就是頭條日報。「頭條」乃是星島傑作，施老闆都講人地「頭條」一開始就有人有客有印機，根本就冇得比。筆者好讚同施老闆一開頭將am730行「扮弱者」既策略，只印10萬份，激勵員工心中「以弱勝強」既奮鬥心，相反「頭條」一開波就60萬。到今時今日am730已加印到30萬而「頭條」稱客觀統計為90萬。
免費報確實為星島帶來可觀利潤。何柱國先生旗下既星島(HK.1105)高峰期由零點六變三，不過而家又由三合成一。我打開厚厚既「頭條」，差不多香港全部銀行都有同佢落全版廣告，再睇埋入面，一份節錄既星島放左係度。上佢既網站睇，只見一大堆字出現在版面毫不吸引。「頭條」既做法只不過將各大收費報既客戶搶到自己份免費報手上。咁樣再落去真係可以賺大錢?
免費報真正敵人! smartphone
自從有smartphone之後，世界大事即刻可以傳到「手上」。東方、蘋果既即時新聞iphone app，已經有哂簡短新聞。其實生活在香港可謂資訊爆澎，你搭火車、望上商場大螢幕、係公司電腦都睇到新聞。如果免費報紙仲係報導簡短新聞，將會變成毫無價值。
石頭爆出黎既晴報同爽報
令人更意外既係經濟日報集團(HK.0423)既「晴報」係2011年面世，蘋果「爽報」隨之而來。佢地既出現報界認為會”last-in-first-out”，好快就收檔。筆者同意佢地出身環境係好差，好似石縫夾硬要生長既花咁。差見於免費報業發展空間已十分少，每日派報既阿姐列隊企街，報紙多到要塞比人既情況相信不為鮮見。不過筆者認為被淘汰的未必是「晴報」及「爽報」，有何理據呢?
晴報主攻網絡市場
晴報係最鼓吹讀者上網睇報紙既報社。仲推出左一連三星期上網睇晴報，可獲ipad大獎既活動(類似活動、詳情不贅)。筆者細看其實經濟日報集團旗下既iMoney、uMagazine、晴報、uFood、uTravel樣樣係網上都搞得有聲有色，uMagazine係網上既fanspage仲有超過十萬個like，遠超蘋果日報既三萬個同其他免費報既幾千個。而家旗下既刊物雜誌開始在網上有協同效應，每份周刊可以亙換讀者，增加閱覽率。係未來smartphone閱報有機會成為主流之際，晴報比其他人搶先一步。
爽報用故事感動你
點解「蘋果」比人鬧極都咁多人睇? 因為佢既「故仔」真係好好睇。既然即時新聞變得價值不大。報章需要加入更有用的內容先可以吸引到讀者。係呢方面可參考收費報「蘋果」或「信報」既方向。「蘋果」內載報導都講過已經「唔係新聞」，用「故事」黎形容更合適。每每社會有大事發生，「蘋果」更以連續劇形式一連幾天頭版報導，由銷路講「蘋果」確令大眾受落。「信報」則以專業手法評論時事財經，你唔係行內人望住成份都係字既「信報」確實有感被催眠。兩個不同的方向都可令資訊既價值提高。
「爽報」承繼「蘋果」風氣，做事創新。動新聞同筍購係「爽報」係呢幾個月開始大推既環節。「蘋果」自製既動新聞加上流氓風味確實吸引到人收看，但係佢叫讀者自己upload短片上去作為動新聞仍然反應一般，筆者未知原因何在?? 筍購為「爽報」加入優惠內容吸引大眾，呢樣各份免費報都做緊。唯讀「頭條」自視為「大佬」，除左開headlineJob去刮埋求職廣告既客同埋星期五加印消閒版之外，實未有具創作性的新作。就好似iphone5、6都只係幫你換過粒快既處理器同靚D既鏡頭咁，毫無新意。究竟「爽報」、「晴報」可唔可以給「頭條」重重一擊呢? 「五覺」中邊份免費報最快被out? 你可以發表你既意思，下回分解。