上星期都講過，整體而言，科技股有所減弱。雖然，週一，一眾科技股曾造好，但到週二，好多板塊內嘅股票都未能維持升幅。
咁有咩行業升得最好？
最主要我會睇到係金、銀礦股，生物科技股，以及太陽能、新能源股。(動力ETF全數名單，會上載至facebook 平台。)
金礦股，成交最活躍嘅係GDX。
過去呢隻ETF，升起上嚟升幅可以好勁，唔跌穿$36.87止蝕位，可以繼續睇好。另外，熟識期權嘅朋友，呢隻ETF嘅期權開價好靚，識控制風險的話，我認為Long Call有一定值博率。
銀比金升得更勁。SLV，銀嘅ETF，已連續兩日裂口上升。正股距離止蝕位頗遠，唔易揾買入位。但進取投資者，可試細注博高槓桿Long Call。
Long Call 控制風險嘅最效方法，係從注碼入手。最大虧損，最多就只係下注嘅金額，以細注玩，風險就唔會太高。而識揀期權嘅朋友，可以博啲高槓桿嘅期權，以小博大，只要隻銀可以繼續挾上去，回報就會好勁。
細注高槓桿，係我認為最可以發揮到Long Call 效果嘅方法。
上週介紹過嘅新能源ETF，都升得好好。
已買入呢隻ICLN嘅朋友，可繼續持有。止蝕位，暫時仍維持$12.00。
入面其中一隻成份股Sunrun (RUN)，挾得好勁。呢隻股升得太快，我都唔敢推薦叫大家買，但我知有朋友買咗，我只可以講佢嘅走勢好靚，但止蝕位太遠，如股價升勢減弱，要自己再睇位走。簡單講，呢隻係係難玩，但有值博率。
醫療相關ETF可繼續留意隻PTH。走勢好靚，止蝕位為$123.13。
至於美股指數走勢，睇見科技股轉弱，未來或有變數。一啲已跌穿位，或走勢轉弱嘅股票，絕對要小心。但只要大家保持順勢而行，跟住策略做，唔好亂撈底，就唔使太擔心。
有問題可以喺facebook 或電郵問我，星期五再講。