長實（1113）要相信神明
中銀航租（2588）越升越有
Nasdaq 已收復失地
ATMX四大天王
恒指下半年應有買入機會
今日講多啲大市，長期少少嘅嘢。但先跟進兩隻個股。
長實（1113）要相信神明
都真係經常都講，上次專欄先講完。李嘉誠真金白銀增持，仲要近乎完美嘅往績。你唔信都算，仲夠擔打對台嘅，都真係輸錢冇人可憐。
中銀航租（2588）越升越有
亦係上星期五專欄講過嘅東西。呢排航空公司手緊，好多都玩sales and lease back。最初係國泰，然後係聯合航空，星期五貼嘅係匈牙利廉航。今日呢，又有新客仔，美國西南航空。10架波音737-8。
不過見到個升幅收窄好多。可能因為有航空公司破產？哥倫比亞航空，南美第二大。不過嚴格嚟講申請破產保護唔同破產，而其實就算你破產，架飛機都係要還返畀2588嘅—即係你破產，但租屋，咁你當然要搬走，而唔係拍賣間屋（都唔係你嘅！）。但當然呢個過程要搞一輪，同埋欠落嘅租就可能唔畀了。
無論如何，唔知係咪2588嘅客，晏啲搵下，係都唔奇。不過，應該個損失唔會太大。
Nasdaq 已收復失地
其實Facebook Page 都寫咗，不經不覺Nasdaq指數已經返返年頭嘅位，上返水面。呢個圖話埋你知，有幾誇張。留意其他啲股市好多潛水中。尾二一個column係當地指數計（當你當地人），最尾就係美金計（當你外國人），計埋匯水。例如IBOVESPA，巴西聖保羅指數，你見本幣輸三成，外國人買輸五成。因為巴西雷亞爾跌咗兩成。
Nasdaq點解一支獨秀，Facebook篇文都有講。或者睇我GoBear篇文，講科技股業績都仲有講。主要就係真係實力太強，疫情對啲公司冇乜大影響，甚至係受惠股。
ATMX四大天王
外國有FAAMG，香港就有ATMX，阿里巴巴，騰訊，美團，小米。今日恒指升不足400點，騰訊一隻就貢獻咗超過100點。固然係炒業績。但另外仲有兩樣嘢，首先係中概股回歸，百度京東甚至網易都傳會返嚟，利好成堆嘢嘅氣氛。二來就係星期五恒指季檢，似乎會納入同股不同權嘅股份。而家傳好似阿里巴巴機會大啲，美團可能先落空，可能亦係因為咁，美團今日寧舍跑輸。
恒指下半年應有買入機會
一般人問我股市點睇，我都係答睇好。咁幾時買得？星期一至五九點半至四點就可以。聽落廢，但其實蘊含住無盡嘅智慧呀！
不過正經，我諗下半年會係幾好嘅買入機會。好可能係八九月，出完中期業績後。
你話，喂，中期業績實好難睇喎。唏，睇咁耐都唔知？兩大金句：第一，業績冇好定差，只有合唔合預期。第二，股票永遠睇將來。
今次中期業績差，冇問題，甚至衰差衰好，kitchen sinking，好似莎莎咁整個big bath，乜嘢衰嘢都放晒落去。下次咪靚仔
請睇圖，睇第一行Earning per share 得了。 Y est係2020，Y+1係2021，Y+2係2022
恒指嘅每股盈利。今年梗係差，估倒退9%，可能仲有得調低（但照計應差不多了）。但重點係睇將來，到基金經理等等睇返下年嘅盈利，反彈返15%，而正路地2022年都仲會反彈，咁就應該睇盈利反彈，有得升。
問題就梗係，佢地幾時會睇下年？理論上呢刻應該已經睇晒所有嘢（你都見到呢個圖佢當然一早見到），但實際上，人都係短視嘅，而家講咩2023嘅數亦係亂估。所以我理解，去到2020年下半年，開始睇下年（2021），就差不多咯。
亦都因為咁，所以今年中期業績後，應該係好機會
Bonus：可以再睇多少少，第四行，恒指總派息，今年都係會減嘅，當然多得匯控（5）。但更重要係第五行，每股帳面值。留意，即使係今年，都係正增長的。所以有時我會睇price to book多過睇PE。只要恒指公司有盈利，唔係全蝕（同埋唔派突息，即係唔好賺十億但派廿億），咁呢個book value ，應該一路係加上去嘅，爭在快定慢。