關於呢隻原油ETF，大家應該呢幾日聽唔少嘢，希望大家冇買。有都唔係我叫你買。上一次嘅專欄有講，Facebook Page 都寫過，唔止一次。
公海費事寫得咁盡，但玩呢啲東西，擺明係發行商在暗你在明。我唔覺得發行商係搵你笨，但人地識嘅嘢多過你，又有律師。你見忽然間幫你強行止蝕你都吹唔脹。而其實我理解，股票或黃金ETF就唔會有啲咁嘅東西，呢個同原油嘅本質有關。
講到尾，兩星期前我根本冇聽過有呢隻嘢，唔知點解可以玩到20億成交一日。似乎佢地Marketing 都做唔少嘢。你問我嘅，一般都係財不入急門，你見我呢個專欄都未必成日有股票推介（但有時都有）。真係要炒嘅，買大型上市公司，相對地都係比較公平。
買股定買樓？
你問我，就梗係why not both？自住樓都近乎係必要，買唔起就租，買得起就買。暫時望落，香港樓市嘅承接力都仲係幾高。跌可能會跌，但唔似會跌到冇人敢接。實際呢個屯門利寶花園，我都成日講。因為夠細價，N咁多人搶，你見萬幾蚊尺，真係好難話平。
但反而想分享，你應該見到好多人都迷信磚頭，特別係四十歲樓上嘅。理論上，投資講眾地莫企，crowded trade。但呢個有啲唔同。點解香港人咁迷信磚頭？唔多唔少都係因為，股票太多中伏。你睇隻樓上隻三星原油ETF（3175），一年唔夠14蚊插到個幾，你買樓正常係唔會有咁嘅事發生。況且，任老剛嘅名句話齋，一層自住樓係zero position，冇嘅等於沽空— 你咁睇，好似係沽空先係crowded trade。
平安好醫生
不用多講，好似對上兩三次專欄都有提，link我都費事。兩隻勢不可檔，雙雙破頂。平安好醫生（1833）又新高，阿里健康（241）仲勁，搵人計下入唔入到恒指？但建議亦一樣，有貨嘅有得佢滾存，冇貨嘅唔好追了。個故事我話信係呃你的。
Expedia~~~~~~
講開，平安好醫生同阿里健康炒得勁，好醫生同健康真係不重要，平安同阿里先重點，大家都知。暫時個世界都係winner take all，科技嘅特別係，好難有細player
Expedia亦都係一個例子。公司公關做得好，業務都好，金融海嘯之後真係幾年升十幾倍，你2009買都仲可以升10倍。但近年就原地踏步了。而家應該要引入投資者救亡，未係賣盤，但話私募基金拎10億美金股份—公司而家先80億市值。計及要畀折讓人，應該賣20%甚至更多新股？
呢輪冇晒旅行，冇飛機冇酒店訂，股價當然插水，但其實高位跌一半唔算多—應該話，股價一早就弱勢。肺炎之前都係升升跌跌咁。原因當然因為競爭。呢類公司故事好聽，但慢慢地，你單打獨鬥，未必夠有大公司在背後嘅公司玩。例如Trip.com，Skyscanner，背後係攜程網，股東係百度。鬥燒錢，你好難夠大科企玩。亦見到今年都係啲大科企跑贏晒中小型股，中國美國都係。
香港有錢到！
4月10日嘅收費專欄寫過，可以參考返。唔明樓下呢個古靈精怪表嘅，簡單，就係香港銀行體系結餘。見到將會再升
咁其實上次專欄寫過原因，因為減發Exchange Fund Bills．舊嘢唔再重覆。但，仲有新嘢。
詳情可以睇返新聞，但我個圖都有圈出嚟，部份係因為Exchange Fund Bills，但仲有見到Forex Transaction．係乜？
就係因為港紙對美金，卒之觸及強方保證，7.75，4年幾以嚟第一次。咁所以金管局就要入市，接盤，沽港紙出嚟。咁市場上港紙多咗，銀行體系結餘升咗。就係咁
上篇專欄都有寫，又唔使咁興奮，銀行體系結餘升，不等股樓一定狂爆升嘅。拆息應該會跌，但你見2015恒指一樣係跌的。所以最大得益都係供樓嘅人，或者其他債仔。
版務
埃汾星期六開始，放假九天（其實下星期拎三日補假啫）。當然專欄會繼續。另外，收到讀者意見，可能抽獎都係只換讀者，等我得閒啲再搞。
同時，都見到大家有在homeblogger留言，我覺得好事，啲留言嘅質素都比較高。大家同時都可以在Facebook Page PM我，其實有咩故事有咩想我寫都可以講。另外，其實都歡迎直接whatsapp 本人，9809 8494，都半公開，冇乜所謂。