好快回帶講返對上兩篇講嘅嘢，因為可能有人未睇過。第一篇講，有三樣嘢發生，大市（主要指美股）就會定落嚟。分別係 1)畢菲特宣佈大手入市，2)美國減關稅，3)美國政府宜接買股票。第二篇講，但有兩樣嘢令人擔心，A)中美關係惡化，B)銀行間嘅流動性。
快手總結下，畢菲特入市似乎仲未到，當然佢老人家做之前唔會講你知。但睇美股估值，有排未到跳樓價。可能之後反彈會係美股更勁（相信都係），但短期downside大過港股。所以想短線嘅，都係做港股。
美國政府入市，仲未到，但已經打晒開口牌，（https://on.mktw.net/33wdeea）受疫情影響嘅，政府可能直接入股。股市再跌，見到呢幕唔出奇。
減關稅，睇近日嘅中美關係，應該唔使諗。中美都玩製造外敵轉移視線，誰是誰非不重要，但要合作應該難上加難。美國暫時都仲幾克制，但企穩陣腳應該有機會再針對中國。所以都係，短線港股，長線美股。
最後都係想講多次，最重要嘅，銀行拆借。08「金融海嘯」係香港講法，英文另外有個名稱叫: credit crunch。再三再四強調，如果只係疫症，只係經濟衰退，個市唔應該咁恐怖。市場擔心更加大鑊嘅嘢。現代資本主義社會，命脈始終係銀行，最危險亦都係銀行。銀行唔信任其他公司，甚至同業都唔信，大家唔借錢出去，流動性緊縮，credit 乾咗，好快就出事。
恒指好平，是真的。不用再多講，睇price to book value就知。近廿年一到呢啲位就反彈—所以，市場似乎擔心credit crunch。我地做嘅，就係一路分段入，但一路睇住其他指標，睇住呢個credit crunch會唔會出現。
而呢幾日嘅指標，唔係太樂觀。冇錯，你見到大市反彈。寫呢篇文時係星期五香港時間黃昏，港股彈返1100點。其實美股仲靚仔，道指星期四晚彈200點左右。你心諗，200點咁少都靚仔？就係咁先好。之前彈又1000，跌又2000，呢啲市根本好難有大基金（畢菲特？）去買。要個市冇咁chok先有人敢買。與其大反彈，不如靜返啲。
不幸地，你睇美股VIX，仲係好誇張。高位跌返少少架啦，但仲係令人唔多舒服。所以，都唔敢大市買住。
畀多兩樣嘢你睇，Bloomberg嘅John Authers （https://bloom.bg/2xfML8w），一開始已經睇得好淡，去到而家佢都仲覺得有排跌。佢正係擔心credit crunch。佢指嘅係美股，但如果真係credit crunch，好難相信其他其他市場會冇事。
我並唔完全同意佢嘅觀點，但正因為咁先要睇！佢講咗兩樣嘢。
首先佢講，唔止股市，就連債市都好chok．你話，驚公司破產嘛。合理，但講緊美國10年國債喎！美國10年債息，早兩日曾經一日升咗34點！咩事？呢個升幅係1987年以嚟最大，而1987年講緊10年債息係近8厘，而家係1厘唔夠升上嚟。
股市唔掂，資金泊晒去債市，壓低債息（債息同債價係反向關係），好合理丫。咁點解債息仲會升上嚟？好驚。
仲有，就係美金強得好緊要近呢幾日嘅美金，升幅極大，係英國脫歐公投後最勁（當天英鎊當然散晒）
呢期亦明顯地見到，美金一路升，股市一路跌。
背後發生緊乜？John Authers認為係有事發生，到你睇新聞見到已經太遲。好可能係人人都要搶美金，背後應該已經有公司出事。亦都係好多公司投資失利，連美債都要沽，甚至國家（特別係產油國）都要。
當然仲有我自己鍾意睇嘅，拆息。
美國上星期日忽然減息1厘後，拆息應該點？金管局阿頭余偉文話應該拆息會跌，正路應該係，我都係咁估—但偏偏就唔係。拆息連升，升足五日，代表乜？美國嘅情況亦都差不多
我明明可以近乎零息問阿公借到錢返嚟，然後用1厘左右拆出去，咁著數嘅生意，點解我唔做？
因為，我驚我對家都執笠。
結論：短期都係港股跑贏美股。可以分段買入，但睇緊啲幾個指標：美債債息，美元指數，同埋拆息。有唔對路就忍一忍手。
我深信，一年之後，股市係會比而家好嘅。
希望幫得到大家。呢篇係最後一篇免費試閱文。如果覺得都唔係十分非常之差，又或者想救助下本人嘅，請去訂閱。見到都已經有啲人訂閱咗，數字我都滿意。之後都會係一星期三篇，為期三個月。到時再睇反應。
有問題可以直接在Facebook Page PM本人。感激。