【莫家強】近年嚟香港上市既,係乜嘢公司?

 

究竟,近年嚟香港上市既,係乜嘢公司?點解大部份呢啲股票,一兩年後,都變哂死股?

我既思想比較古老。我認為一間公司,要有穩健既盈利基礎,同發展到有咁上下規模,然後先應該有資格上市。

但近年既情況係,好多公司老闆,掉返轉,係視上市為賺利既途徑。間公司未賺到錢,未run得掂,又如何?短期條數,要整靚佢有幾難?盈利預測既嘢,講就得架啦,更加無問題。總之,上咗市,大股東就有錢賺,過咗海就係神仙,間公司往後幾年,再營運成點,已經唔重要。

過去幾年,一隻又一隻呢啲公司,好似完全暢通無阻咁,成功來港上市。

講呢樣嘢,事源有股票班同學問我,對新股思考樂教育集團(1769)點睇。借呢隻股,又講吓我既睇法。

不過,首先,我想問大家,如果想分析佢既基本因素要睇啲咩?

招股書?

你真係相信招股書上寫既嘢?

招股書要睇。但我建議大家,要再勤力少少,睇一啲招股書以外既資訊。對於大部份公司嚟講,好簡單,google個公司名,已經睇到好多嘢。

先講官方資料。呢間公司,成立於2012年。喺廣東省及福建省5個城市,截至2016年底,有28間學習中心;2017年底,去到49間;2018年底,54間;最新數字為61間。

規模唔大,但學習中心數目既增長速度,相當快。

不過,有財經記者,問咗佢哋既管理層一條好好既問題。收生人數增長未能追上擴展步伐,部分區域教室利用率僅為5成左右,問:「如何改善教室利用率低既問題?」

管理層話,呢個叫「爬撥期」,未來會發展更多內需產品及作更多市場推廣。咁既答案,其實同答你無嘢可以做,係無乜分別既。

再者,你收生都未攪得好,繼續開鋪,為乜?

再睇網上評論,你會睇到個brand一啲都唔響。然後,有人問呢間機構好唔好,佢竟然用自己帳號自己讚自己,話自己做得不錯。作為將要上市既公司,真係有啲弱雞。

呢間公司,呢一刻,真係已經ready上市?

當然,新股,頭兩個星期既升跌,同間公司既質素可以係全無關係。呢隻,我自己無興趣抽,但你要抽我唔會阻你。不過,以佢管理層既能力,我真係睇唔到點樣可以營運到過百間學習中心。時間一長,股價就會反映。

會唔會又係另一隻cap完水就理得你既股票,大家心裡自有答案。

一個股市強唔強,好睇啲公司可唔可以將價值注入股市。簡單講,就係如果每一間公司都賺到錢,又肯同投資者分享盈利成果,咁個股市就會愈變愈強。相反,隻隻都係嚟抽水,當然點都會有一啲人得益,但整體股市就會愈做愈衰。

港股,仲有一啲舊股票質素好好,但大家要識揀先好買。至於整體嚟講,繼續咁攪,唔會有咩前途。短線,跌咗咁多,未來有大反彈出現,實在都唔出奇。但中線,我睇得幾淡。

最後,睇吓可唔可以令大家接受以下呢個concept。

股票,唔係零和遊戲。一間正正經經做生意既公司,只要能夠每年賺錢,而又肯同股東分享成果,咁所有買呢隻股票既投資者,絕對係可以一同賺錢。買呢類股票,賺錢,容易好多。

近期唔少股價破頂既美股,我就係以呢個概念做基礎揀出嚟。愈多呢啲股票,個股市就會強。而且,呢個,我認為先係投資股票既本質。

風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。






本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室