從有錢人身上學回來的兩條投資準則。第一，比別人快一步捕捉到升浪，不是說在最低位買到，而是指在該類資產進入爆升階段前要買齊貨。第二，有持貨能力，即使再有一個金融海嘯殺來，甚至經濟衰退三五年，防守方面完全冇問題。
慢慢消化這些準則，令心態也開始改變，要做到財務自由(即係發達喇！)，就要學識判斷、等待及捕捉機會。久而久之，聽朝就會發達的想法也從腦海中消失，因為太不實際又危險。
很多人覺得這樣投資好悶，成日都係到等，但要明白，當通街平貨時，自己冇錢買，那種痛苦是比沉悶，難受一百倍的。市好時收集資金，市差時收集資產，係做到低買高賣的重要技巧之一。
前排有位朋友買中恒指從22500點反彈，上至23000點收錢，然後說炒期指就是這樣的，現在要於股市中發達，唔可以再靠股票，一定係炒得夠快，睇幾張圖就夠。不熟炒期指，當然佩服得，五體投地，但方法不適合自己，聽完就算。
學一套新武功真的很花氣力，仲要學完依套武功要日日打架，先至有機會賺錢，聽落好唔吸引。財務自由一大重點，就係製造被動收入，唔洗日日打理都有錢收，那怕他係一百幾十，最重要就係現金流入。
看到目的地在那裡，很多旅途上的「誘惑」，都變得不再吸引。