長實拆售雍澄軒，相信不是為左區區十幾廿億，相信係要測試商廈分拆模售能否在港成為潮流。而雍澄軒之一呼百應，開售一朝早就有大陸客係平時你都唔多去既葵涌買樓，你就知長實同代理係幾有默契。上回講到友人入左票去睇樓，最後選擇個三房高層向南單位，一行出門口已有人問佢會否摸售: 即係買家只係簽左買賣合約，但未完成買賣，用確認人身份(CONFIRMOR)去賣出單位。由於單位質素高唔憂賣，一心諗七日後就同長實簽正式買賣合約。
一般二手樓由臨時合約到上律師樓簽正式買賣合約有14日期，但今次用新樓賣法只予7日，但成交期可有4個月或6個月選擇，擺明大把時間比你摸。風險在於呢幾個月，政府又有咩招去打擊呢類炒賣。相信地產商會有更多類型之拆售推出，但多不是酒店，始終在港酒店有價有市。政府暫時都咬佢唔入，呢幾日只係打工口水戰。例如電台有人講雍澄軒與雍雅軒共用CLUB HOUSE，設備殘舊，但筆者聽返又唔係呢回事。水電錶係分開既，雍澄軒為服務式住宅應可容許租客入住28日以上。當然政府現時心戰緊，日後或有實質招數，賺到錢既買家都不宜去得太盡，有錢就賺。畢竟上年仲係官商合作，水乳交融。今年唔見得有呢回事。
如果下月長實又整個XX商廈拆售，就真係大鑊! 肯定排哂長籠。到時可以奶粉問題自動解決(因冇人會再理)。到時九七人籠再現，狂牛之市就此出現。係政府凍結住宅市場下，加上超人神拳，樓市在工商方面爆邊似乎大有可能。十五年之癢，一騷亦不為奇。
