->>按此到上回2/3
上回講到做好屯門及上水工業區既辦法，誘使港人移居深圳，減低港人住係香港既需求，自然有屋騰出比更有需要住係市區既民眾，更令油尖旺冇咁逼。其實港人都唔想日日留係油尖旺，只不過工作機會咁多年都集中係該處，香港人被逼咁日日返去吸廢氣而矣。人跟工作走永遠都對，而家屯門樓價已升左不少，就係因為工作機會明顯增多，令較多人遷入。
另一處可由老人著手。三至四十年前大批壯年男女由內地非法或合法地湧入，佢地共同點係於廣東省一帶有根，與現時四十餘歲或更年輕的本地土生土長之輩不同。政府可否推出措施? 令住緊公屋而又已退休既佢地，交回公屋及到內地居住呢? 當然就咁叫佢地交出單位冇人會理你，但係給予一個三到五年期既津貼，令佢地騰出公屋先比後生又係香港有份工既後生仔搬入，再等幾年後有批公屋落成，保證佢地可以有返間公屋住，有幾個好處。
1. 政府房屋政策通常係「賊過興兵」，其實而家起得居屋黎到2017落成可能全個樓市都仆直，到時大把居屋冇人要。相比用錢叫班老人家「讓路」，即時增加供應可為樓市對症下藥。
2. 不少老人家其實係內地都有樓房，姑勿論佢到收到錢之後去邊住，但計劃出籠可打造成國內養老計劃，令老人家可以係香港出糧，國內洗錢，提高生活質素。更可美其名說香港派錢比深圳促進進經濟，唔好成日話淨係得大陸人過黎「幫」香港。
3. 比津貼緊係要錢，就當一年3000個限額(用公屋單位計)，每一個老人家每月津貼$10000，而每一單位最多$20000，計埋都係$20000*12*3000=約7億一年。你而家猛咁起公屋，咪又係幾十億或百億埋單。而家一個單位一年都係720000萬，建築成本都係番度。
4. 一方面有人質疑計劃吸引乎? 咁你對退左休突然有番五年糧出點睇先?成班老人家更有人已「上哂岸」，根本就唔係住係公屋，你猛咁查佢係咪強霸公屋，不如比錢叫人乖乖地「蒲頭」啦。對於一班搵間公屋當雜物房既住戶，當然每月有兩萬跌落黎好歡喜。諗樣更相信有人會搬返去同仔女住，一齊「瓜分」個$20000蚊添。造成大家住逼d，騰出單位之效果。
5. $20000係咪一個好上限? 考慮條件為該金額已可在私人市場租到一個單位。又有人會話你咁樣咪會推高租金，又助長樓價? 諗樣認為行任何政策皆有風險，只能避重就輕。但比著你七十歲冇收入，咁難得政府派成萬蚊比你你仲用去租靚樓咩?
6. 一石二鳥，當埋老人福利政策部份都得! 到五年後咩環境再睇下點安置班老人家。有心既應該將佢地分佈係幾個公屋村，cross-over一班後生仔居民，再整間護理院係條村入面，咪惠及萬民囉!
7. 應該係樂富黃大仙一帶大力推廣，呢個地段應該比返緊工既後生仔住，更可為該區重新注入活力。老人家可以住遠些少住大些少既屋。
此建議同幾十年前大批人偷渡黎香港相呼應。每一個政策都應順勢而行，乘風而收立竿見影之效。現時該批人已年老，既思鄉，又財困，何不令老人開心一下? 仲可以整個獅子山下既theme做宣傳添! 每年政府派出既錢相信不少用在香港經濟，可以為萬一下行之經濟「沖喜」。仲可以幫手塞住某人既口，唔好話政府唔派錢啦!
此乃諗樣建議之「快」建議，係咪較有新意先?「慢」措施寫在上回。
