80後買樓記 (二)

連篇故事->>按此回上篇:80後買樓記 (一)

 

 

入左男女校,好事自然黎。我既初戀比左小儀,小儀老豆係一個「裝修佬」,我成日笑小儀身上香水成浸天拿水味,不如改埋名叫Tina。高中既日子過得好快,成績出左我冇得直入大學。阿媽知道我高考得兩科合格之後,問我做咩唔好好讀書? 我只係知阿媽問完我呢句洗完碗返房之後,成晚都冇好似平時咁出房睇電視。第二日,字都唔識多隻既佢話要同我搭車去會展睇海外升學展。我不禁問:「阿媽」,你有錢咩?

 

去到升學展,我越行越內疚,阿媽用佢半桶水既廣東話同我問完又問,間間學校都要十幾萬蚊,媽眉頭一皺又再問比錢方法。我一方面真係唔想用左阿媽既棺材本,二來我想留返係房陪小儀。最尾我都係帶返阿媽走,同埋佢一齊去cityu。到步聽見副學士佢話要讀就讀大學,做咩要副咩士? 經過職員細心解釋後,知道副學士是「有途徑」升做大學生的! 阿媽放心番,話你咁後生一定要讀多d書! 媽, 乜係真架咩??

 

 

入到大學,讀最易入既電腦工程,適逄2000年後tom.com爆左冇人再讀電腦。我入到班房成班男佬,自此我係大學三年都好「忠心」咁跟住小儀。係大學第一生完左,GPA到3.6以上可以apply升上去讀學位課程。到個一刻我先知比大學個職員昆左,跟本去到3.6你唔係全級第一就係第二。不過我讀書比以前勤力左,唔想阿媽再為我操心。我同小儀了解加深左,仲被迫咁見左佢做裝修生意既老豆,佢老媽子都係公司幫手。我發覺佢老豆真係好優閒,都唔知幾時開工定放工,有時下午突然閃出黎同我同小儀飲荼都可以。淨係知佢唔落工場做野既時候會去炒下股票。

 

我都有試下玩股票,仲用左grant-loan去玩。你知grant-loan錢入到戶口都係開學前,我咪抽其中三份一試下學人買股票,同其他人一樣,我開頭都羸過錢,當時係2004年,我4.5買857中石油,升到4.9放左,一個星期賺左成萬蚊! 我心諗上年沙士個d畢業既師兄都係搵八千幾蚊個月,猛下手我下次一q係股票賺左,讀書做乜春呢?

 

 

之後到year2更心雄,係信用卡套埋錢出黎玩。我綜合左2004年贏錢皆因炒國企股,係year1贏左十幾萬之後,我認為自己深得炒股之道,逐大舉套玩離場,只投資A股既ETF。即係咩?? 咪2823即係A50新華乜X野富時基金啦! 我知佢同上證指數掛勾,又覺得基金適合我呢D「贏大錢」既豪客。Well,我開頭「一炮」買左廿萬,點知個上證由04年呢1800點跌到得番1500,我心諗已跌兩成,除非進入熊市,個市P/E咁低「邊有得輸呀」! 我係信用卡透知錢,入2823窩輪希望可以反底!

 

到下回->> 80後買樓記(三)當天真嬌遇上窩輪

One Response to 80後買樓記 (二)

  1. Pingback: 80後買樓記 (一) | homeblogger


本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室