相信香港有一批人極希望樓市冧，筆者亦同意樓市或股市大幅下調係獎勵有耐性同唔貪心既人之好機會。但係開口埋口話想市冧既你，有冇諗過大冧個陣既狀觀樣係點同埋你能唔能夠做到成功「低抄」既一個呢?
政府逼到置業者埋牆角
現時梁政府兩個月唔埋就出招，旨在加大你買樓既難度同埋樓房轉手既速度，樓市有否成功跌過呢? 當然政府仍會樂此不疲去出招，因為keep住出政府肯定會有一日係成功的! 因大家都知樓市肯定有日會冧。所以用結果去量度政府打擊樓市成效實在唔妥。要用過程去審視措施成效先得。即係好似大陸成日講既硬著陸同軟著陸。判斷軟硬可見後生年齡群置業率上升? 有冇經濟收縮(可見GDP)? 失業率是否上升才更恰當。
上月梁政府打擊樓市，已令一批生意人斷絕用樓套錢去補番生意盤樓呢條路了。有跑大陸既人都知今年廣交會人流不多，歐洲公司連機票錢都慳埋，唔再飛黎香港大陸睇版了。至於有人話今年月光特別圓? 其實係九月大陸好多工廠冇工開冇煙噴，令身處香港既你重見青天而矣。貨櫃船亦要「釣泥鰍」，即往年要搶櫃但今年一艘船要去齊香港寧波上海儲夠櫃(上齊客)先開去美國。往年九月原本係廠家急於出貨趕聖誕期既時間，而家諗樣見到成班廠佬攪成咁，實在令2013年預見不祥之兆。
報紙已見調查提及22%人睇跌，34%人睇升，衰的咁講呢個係反艇之兆。有讀者話諗樣轉睇淡，其實諗樣認為樓市係政府打壓下會有終極一爆升，之後先至係歸於平淡之時。諗樣下篇會講下係此情況幾類人既自處方法，至於諗樣奇想市冧壯觀樣為: 政府不斷收緊按揭加上有心買樓既人係上幾年都忍手唔買，龐大既購買力加上盤源嚴重缺乏，出現市升貨不爽狀態。之後外圍經濟疲弱帶動香港經濟，有D生意人會因公司唔掂而強行將樓出售，市場應會出現大量連SSD成交。而報紙竟解讀為連SSD炒都有水位，又出咩樓市瘋癲標題。係2012年三大發展商賣樓收入不過或僅過百億之下(比旺市時少約八成)，因黎緊呢幾年要多賣樓追數，唯有夾埋報紙力唱! 實質係眾老闆開始唔掂，接唔到單又要硬掘出糧。
係樓盤漸增加上對經濟觸覺較銳既生意人同投資人離場後，市場首現自2008後10%以上之下跌，一眾青蛙竟然大為歡喜，政府出標題話打擊樓市首見成效，大家樂於泡係溫水中。之前忍手冇買樓既人終於搵到個藉口比自己入市，話等左七年就係呢一日! 市跌但成交急增，大家仲好有信心。
可惜半年過後，因政府仲唔肯鬆開按揭套現途徑，老闆唯有賤賣。樓市會比之前跌得更狠! 現時香港大部份公司有錢賺都因公司物業升值入賬而整靚盤數，到樓市動真格下跌條數走樣，fund佬自己冇計再同班上市公司老闆佬，至於中小企有好多都要暫停，炒人為無可避免。同以往路線一樣，銀行先炒人，到廠家，最尾到食肆。之前政府幫左佢上車既人又要搵人幫，而爭議中既東北發展及大嶼山改造工程終可上馬，為大家創就業! 同共(擁有香港幾千億儲備)產!
諗樣都知香港人事忙同遂漸中國化，用點列表達文章精要更受歡迎! 有江八點，梁四點咁而家有諗六點，請笑納:
- 樓市係政府打壓下反有終極一爆升，此乃積壓成交既反作用力
- 到時市場應會出現大量連SSD成交
- 發展商夾埋報紙力唱連SSD炒都有水位
- 市場首現自2008後10%以上之下跌，政府出標題話打擊樓市首見成效
- 跌市後出現97年般之反彈，但見銀行先炒人，到廠家，最尾到食肆
- 政府幫左佢上車既人又要搵人幫，又再上一課負資產教學