致特首:
我在西九龍區當醫生，我也買不起樓。當電台節目的女醫生聽眾表示，與律師男朋友一起也買不到樓、供不起樓時，我相信不少人也會感到共嗚。香港所建成的新樓，已經不再屬於香港新的一代：從名字的氣派以及推出的呎價，真的只是在和天比高，完全脫離現實世界。
住在獅子山以南為工作拚搏已經成為不切實際的期望？很多第四代的香港人，成長於那些重建區，今日長大成人後，竟然沒有能力住回原來的社區，特首還唱什麼社區價值本土特色的調子。即或我願意住在香港的邊陲位置，但是我們的特首可曾有早上七時迫火車的經歷嗎？我們的特首明白地鐵已經負荷過重，不堪七百萬人每天作如此長距離的人流轉移嗎？
一個城市的樓房連本身城市的人都買不起，這再不是一個自由經濟的問題，而是一個社會學甚至是政治問題。
肥醫生
節錄2009年10月15日 <<肥醫生的日誌>>
*按like/login to facebook看回信
[facebooklike]
回信: 肥醫生:
因為本人事務繁多關係，抱歉現在才年回你老味的信。
我重點係想講你而家遇到既問題其實之前幾代居港人仕都遇過，實不要為自己處於二十年代而過於煩惱。
就你所講香港既新樓(或土地)已經不再屬於香港新的一代既問題，其實四十年前都發生過。係1950年，你知個陣大陸剛打完仗，到60年代上面又大饑荒，係呢幾十年好多內地人游水黎香港。香港係1973年實施抵壘政策，不過人口就由1950年50萬升到你出世之後既幾百萬。咁係呢幾十年有咩人最受影響呢? 就係班新界原居民了。而我覺得係好處多過壞處既。
1950年，當時新中國已成立，班新界原居民仲話自己遵守緊大清律例，要三妻四妾。又話全部地皮都係佢，郁親都破壞佢風水。而可能係肥醫生你既阿爸阿媽就由大陸湧落黎，我地九龍地皮都無哂，香港要留比鬼佬住，咪唯有「屈機」叫班原居民交地出黎囉。當時政府應承佢地交出左某部份地皮之後，淨低既可以用丁權世襲，有佢著數。所以政府係新界都收左唔少地發展，但係班原居民緊係唔妥政府啦，唯有攪個鄉議局，間唔中派著數頂檔。
之後有咩發展呢? 就講沙田。沙田原本係1950年之前係條好細既村，附近山頭有個馬鞍山礦場(係而家恆安村對上山頭)。班內地人黎左之後，原本冇人做既礦場工即刻有人返工，佢地成幾千個人就係山腳住落黎，間接加速沙田發展。都1970年，香港真係逼爆人，我老細就點我入荃灣發展新市鎮，仲話要爆山起屯門公路。我都有份幫香港人攪左呢個大project，如果唔係我當時係行會，你而家搭飛機都仲要迫係舊啟德。
講左咁耐，同你有咩關係? 雖然出生在香港的你不願意，但往往地方一有新發展都要有批人被逼走，令更有經濟價值的能融入社會。我成日係電視講「香港情」，其實係咁現代化既都市真係仲有「情」可言嗎?。我可以做既補償只係起多D居屋比你或攪港人港地，唔收地價，當做你第四代原居民擁有地皮的福利吧!
到有一天，如果你仲係香港，會發覺你係存在於香港既少數族類。今天尖沙咀講普通話，他日將軍澳都會講普通話的。你可能會團結起來走去政府總部示威，結果就好似今日班新界居民走去抗議清拆僭建，得不到當時社會大多數支持。
請你不要再去認為買唔到樓(或更可稱失去家園的感覺)只係呢一撮二、三十出頭既年青人問題，其實由五十年代以來香港居民不斷受外來移民影響，都承受呢個問題。當然外來人會為香港同時帶來好處，好似2004年既自由行咁。唉，得人好處終需報，你同我都有份賺自由行既錢，分別只係直接同間接。如果你覺得香港的生活模式逼人，你可以搬去四川，我簽個visa比你5年先要返香港一次，等你可以係更北地方落地生根。
沙田荃灣等地方已經開發了，邊陲地方已買少見少。我勸你還是把心一橫，離開香港。如果沒有離開既打算，還是買間小房子吧! 畢竟，我已十分盡力將香港維持在低稅的地方了，再嘈咪怪我摺凳無情!
你的特首上
2013年4月
[/facebooklike]