假如香港樓價由2010年無升過? esp3.點解要撈金融? #999 [故事>諗sir]

*今日不答個案

節錄筆者(諗sir)自己寫緊既一個長篇故事當中一節,相信同樣令大家有所得著

<假如香港樓價由2010年金融風暴後無升過?>

 

esp3.點解要撈金融?

 

政府指導呎價由尋晚開始唔比再升,銀行金魚缸外坐左一堆估唔到價上唔到會既苦主。就當早前已簽好哂按揭契一心等drawdown做業主既,都因銀行引用合同條約指估價大變而拒絕借錢。市面上即時出現一批撻訂潮、亦有批原業主走黎銀行問點先可以追討撻訂買家既差價。我只好扮耐心咁答:「其實你呢個問題,係應該請教律師。」無他的…個客都知係要問律師、但因為怕煩又或唔想比機會律師收費、寧願走黎出哂名免費又有咖啡飲既銀行碰下運氣。原本無人坐既按揭櫃位、一片混亂。我比老細指左出去幫手、下午lunch完之後返入back office(即金魚缸裡面)開會。

 

今次開會又係呢係友…西域基金銷售部阿頭winsome。聽講佢一年交稅都成百萬,女同事見到佢個光頭,眼裡有光。佢個salary range已經等同於我地老虎大銀行分行主管既水平,即管足全香港一百間分行個head。點解我地知道? 因為佢有次想網上交稅交唔到,打左落去問佢個客戶經理。了解到網上理財交稅個上限為120萬港幣、而佢因為咁過左所以交唔到。此事即時傳千里。客人既是非唔敢講、會炒! 但winsome哥每星期係各區分行環遊咁sell佢公司d基金、大家對佢「加深認識」實屬正常。何況佢每次黎既目的就係想銀行班sales跑佢d基金,對我地nice係肯定的。

 

winsome:「尋晚政府已公佈樓價唔比再升,我地基金公司作出既估計,係樓市既錢會湧入香港股市,大家好趁機call返d客黎睇下我地公司既港股基金啦….同其他基金比較、我地早幾年既回報都跑羸大市…」

 

我都算叫一個有經驗既sales,唔會比佢講兩句就推哂d錢落佢講隻基金。畢竟個客輸錢唔係鬧佢,係鬧我! 而佢就override我地條大數係度分傭。我先唔會咁傻仔幫佢跑數。何況佢剛派既資料:「咩西域基金全港港股基金第一….用既資料竟然係計2003年至2006年! 而家係2010年呀大佬…」明白圖同統計既由來、完全係佢地不斷將過往基金數據同人地做比較、只要比到有邊一年、或邊個區間跑贏人地少少、就大鑼大鼓咁話自己全港第一! 咁講當然有依據、唔會引到證監黎查。但當諗起早前買左佢公司基金輸到mum都唔認得既客、要我再同佢地「同流合污」真係有難度。

 

何況,你估我billy係傻仔咩? 你以為我唔知你班蛋散點賺錢? 個客100萬買基金、收個2%認購費係歸銀行、到一定金額更可以收多20%、即賣100萬基金收$24000。咁買過基金既客可能問? 基金公司一年管理費先1.25%,咁基金公司咪要個客擺錢夠兩年先平到銀行收條數? well,基金賺錢最叻唔係收個客錢、而係用個客d錢,去同上市公司「打隆通」去保證發達! 點保證? 當有隻市值20億既「爸爸美容」、隻基金只要撥兩億出黎、如果向上炒基金經理平入既貨自然賺價。若基金入貨後個價跌、上市公司自然有「禮金」去多謝基金公司積極買入佢公司股票,輸既錢只係客人資金。禮金保證安全落袋。再唔係上市公司發隻CB(Convertible bond),基金公司去接,變相將客戶既錢借比基金公司、而基金經理當然有report去解釋佢呢個「投資決定」有幾精明。各位投放入基金既錢、唔多唔少幫緊人發達。起碼係頭先談及既「運作鏈」上面、基金公司、分析員、投資銀行、上市公司管理層、盤房trader、人人有錢袋…咁大家明白、點解我billy都要學人撈金融先?

 

LINK TO: esp1管制

LINK TO: esp2 業主大屠殺










本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室