收租佬進擊一生三宅#695

Sir 你好,有幸於兩年前拜讀骷髏會的文章至現在的homeblogger,實在獲益良多。先自我介紹。

本人現年35,已婚,月入48000元。太太已轉做全職主婦,於家中照顧1bb。父母加太太家用約每月15000元,保險每月2500元,儲蓄每月16000元。

2011年中以240萬元朗上車自住,當時以H+0.9%7成按揭。2012年樓價升至約300萬元,故加按60萬元,由於此部份少於100萬元,所以年息為P按息率2.3%。兩筆按揭合共月供約10000元,合共尚欠200萬元。

當時加按的60萬元全數買入中電收息,另持有約80萬元垃圾股票收息,總計有140萬元股票。多年來都係收取股息,未有大郁動,而且多年來都係冇乜錢賺,真係唔輸錢都偷笑。突被諗sir你的一篇「做個收租佬好過」啟發,決定改變吓。把心一橫,於今年4月放晒所有股票(已經冇理賺定蝕),用太太名買入一間260萬元朗連約盤,以H+1.7%5成按揭,月供約4800(但係用埋我名做擔保加借款),名正言順收租,現租金收入為7800元。

現有儲蓄30萬元借貸力48000/10000*2.59*50% = 6.2mil 已使用之借貸力2mil + 1.3mil /6.2mil =53% 當做完晒以上設定

打算於回氣後再向第3間進發,但有新問題諗唔通,煩請賜教

1. 自住樓現估價為360萬元,如打算轉按,但應轉為7成按揭定係5成按揭較適合作第3間樓的打算呢?如7成按揭就會有約50萬現金落袋,但係如用5成按揭,就要補20萬元繼續自住。

2. 轉按後每月只會供少700(由原本20年轉按為30),值得做嗎?

3. 如果自住樓用5成按揭後,找個親戚簽租約加大借貸力,但係繼續自住有咩細節要注意呢?(如算唔算呃借貸架?犯法?後果?)

4. 請問租金計8折後,計壓測時駛唔駛再減一半嚟計呢?

5. 現有方案一: 將自住樓加按至5成按揭,繼續住但係找親戚簽租約加大借貸力,為第3間進發。因為只得自己一個工作,要用兩間樓的租金加大借貸力。

6. 方案二: 將自住樓加按至7成按揭,套岀50萬投資等機會再買樓,但係此方案又會令自己唔夠借貸力向第3間進發,現正煩惱中。

7. 最後,諗sir 有冇其他意見呢?

謝謝KP

ANSWER:

讀者有心向上流,可是有感行動時未有綜觀全局,執行上的方法未夠精密,導致現時借貸力用了一半,在手資金太少,即係邊諗邊砌牆,砌到一半發覺有問題,現上定落好唔知點算。為了初看讀者,介紹背景是讀者原有一間樓,又有1.2mil資金加股票。看了筆者說有關收租佬#547的文章後,(http://homebloggerhk.com/?p=21783) 賣哂全部股票套回錢五成上會入手一間元朗細價樓。一個人持有兩間樓,好在讀者人工都不俗,近5萬銀一個月,先可以太太唔做野之下仲可以一人揹兩間樓上身。可是買第三間樓時,找不著方法。

先答銀行計算壓力測試時,係要計在加息3%後你負債的總數會否超過申請人收入的六成,或未加息時會否超一半。所以讀者想什麼將自己租金收入打八折後再減一半黎計,係筆者在文中冇說清楚之過。當然一篇文只幾百字,筆者是冇能力憑一篇文教哂你成個過程的。

買元朗細樓不是好選擇,睇18區供應率即知。當然筆者幾個月前套回130萬,在要比5成上會之下他的選擇只有二百餘萬的元朗樓。或又連約成交的樓看上去比較便宜,價錢較「筍」。其實這只是證明了樓價同樓房之抵押力有很大關係,樓價同借貸密不可分,見到個價筍而付百幾萬首期五成上會,對於資金少者實在不宜。

如果要由頭砌呢幅牆,其實2013年出版之<樓換樓>已有說可取之法,就係將自住樓加按至五或七成再租出,而自己再買樓自住九成上會。如果人工較高(即家庭收入起碼都6),更應偏向按至七成,因為本身人工高令借貸力較高,那梗係加按多些少要現金唔要借貸力。但如是人工較低,咁只有加按至五成,當然唔係就咁搵親戚簽張租約就令借貸力上升啦! 但點都好,人工低是要借貸力,令自己有再買下一間樓的可能。

讀返讀者,佢買新樓又未有用盡槓桿,竟近乎用盡自己既cash去葬於元朗樓一間仲要五成上會,只可說要讚既係讀者既「專一」。估計佢既想法係: 手上筆錢一係買股、又或買樓、那好處係佢係一個專一人仕,太太安慰。大家明白係買股唔買股之間,係有不少空間可股、樓、債雜溝的,做好資產配置。那現在想再行一步,必須找個強援。太太冇野做,可以搞生意。令收入提升致使家庭借貸力大升50%。當然實行之時要小心部署,同意如果搞唔好有機會被人指證騙貸,所以文章只夠時間授予方略,細節位做好財技要時間深授。

關於他的現居如可加按,那請先取。起碼可以補空一下讀者的資金。既然買賣樓稅項太重,讀者宜現在做好將資金收息。五十萬按出用2%年息成本,而債基方案可予12-15%年息,那突出之10%提供多幾千蚊淨收入。趁休整期整理好自己家庭收入,而拉長按揭令讀者供多700而還多10年,鑑於20年後銀紙不太值錢,又或間樓三五七年後根本可能已賣左既想法,拉長是可作的。

—————————-












本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室