截至中午，雖然恒指仍然跑贏道指，但MTD升幅已縮至唔夠1%，科指仲要累跌逾6%，同中概股指數係同步。宜家最大憂慮係咪睇實美股超賣過後都唔彈的話，一旦暴瀉港股都會頂唔住?
勝利瑞柏基金管理合伙人暨投資總監陳建良指，雖然同市場共識相差幾遠，但佢年頭預測港股好過A股，而A股會好過美股暫時應驗。港股今年一月已經升上嚟，主要因為估值相對較低，中國「放水」相對美國收水，亦有幫助。港股指數除咗科技股、醫藥股、科幻股，較多係金融類股份，因此跑贏美國指數係好正常。美股過去幾個禮拜非常高危，試過跌千幾點之後升返百幾點，近幾日都好大波幅。如果逆轉係超賣的話，應該已經反彈咗，既然不能反彈，不排除將會繼續下試。
KL認為，美股依然高位，投資者可能低估美股發生股災潛在的可能性。一月份港股升而美股急挫，但反彈了的港股遇上再下跌的美股，港股就應該會跟跌不能獨善其身，所以二、三月要小心，唔排除港股再試返去年低位甚至更低。