【漁民系列】低風險買入點

大家好，又係我漁米家😄

上一集講到整個交易框架嘅理念，同埋選股方法，今日會集中討論點樣去搵一個低風險嘅買入點，這亦可能係一般人最喜歡聽嘅嘢😆

補充上一篇文章所講嘅嘢，我時時刻刻都依據股價圖做出股票買賣判斷，因為股價同成交量透露住買家與沽家之間嘅角力。不過，通常啲人一聽到我咁講，就會立即跳出嚟反駁，話所有股票背後都有莊家操盤，啲股價圖係專登做出嚟，呃你呢啲圖表派。而我就認為，可能呢啲人睇得電影多，所以經常都會諗陰謀論。當然有一些股票貨源歸邊，波動性可以好大，尤其係$1以下嘅股票，被操控嘅機會係會高啲嘅。正如我之前所講，我呢個玩法係已經剔除$1以下，同埋成交額低於1千至2千萬嘅股票，理由係成交越大嘅股票，越冇可能有莊家操盤。對於一隻一日過億成交既股票嚟講，就算係投行都可能只屬於中型買家。當然仲有其他方法可以分辨莊家股，不過唔係今次討論嘅重點，有時候簡單到上網望下有咩人推介某隻股票都已經估到。如果係新手，一開始最好都係先trade成交大既股票，減少中招嘅機會。但作為一個Trader，最終都要學識交易一啲細少少，自己又唔係好認識嘅股票，根據我以往經驗，被散戶忽略嘅股票，可能得到嘅回報對風險比例更大，5:1 reward/risk ratio在市況好的時候好常見。經驗亦話比我知，$1-10嘅港股用VCP買入，可以好有爆炸力。

近排好多人都有聽過VCP交易形態，但係如果只係死記硬背VCP，係唔能夠理解其背後嘅真正意思，有跟過米Sir嘅人都知道，VCP交易形態係源自於William J. O’Niel 嘅cup with a handle技術形態，而真正嘅老祖宗可能要數到Jessie Livermore ，當時連股價圖都冇就可以領略到呢一個突破交易買入法，真係非常之厲害👍🏻

VCP交易形態嘅背後真正原理，係買賣雙方於一個價格交易區間內不斷角力，間接透露緊買賣雙方嘅心理狀態，一啲高追被綁嘅買家想等待股價升返到自己買入價甩身，去到一啲關鍵低位又會有另一批買家湧入撈底，股價如果再上又再有一批之前成功撈底嘅買家take profit ，如是者不斷上上落落，於一個區間內整固至波幅收窄，等待股價突破小區間嘅時候才買入。理想小區間係<5%，但7-8%甚至乎10%其實我都可以接受，視乎股票嘅市值去決定。另外都可以用注碼大細來控制風險。

VCP 交易形態有3種演變，普通VCP、Cup Completion Cheat 同Low Cheat。就算過晒這些買入點都仲會有機會形成一個新嘅pivot point。好多人覺得因為太多人知道VCP交易，所以會失效（其實我曾經都有懷疑），因為咁多人知嘅嘢通常唔會再有效。不過後來諗返轉頭，多咗人用呢個方法，反而去到某個大家都見到嘅關鍵位時，先會一齊入市形成一支大陽燭，特別係用Low Cheat, 好常見1至2支大陽燭就升到前頂，1909係一個好例子。

以下是經驗之談，過咗關鍵買入點3-5%，我係一定唔會追入，呢個規條我覺得特別重要！因為市場上有太多日日要開飯嘅day trader 參與買賣異動股，我係冇辦法知道高追之後會唔會一下子散水喺收市前拉回，尤其係市弱既時候，呢種情況特別明顯。

除咗VCP形態之外，其實我亦有時候用回調買入法，但係經過我呢一年嘅測試，呢個方法我傾向只留俾超級強勢股（呢種超級強勢股百中無一），仲要係市寬升嘅時候先好用。香港大約有3000隻股票，所以通常只係得15-30隻超級強勢股！我依家已經比較少用呢個方法，尤其係大市回軟嘅時候，真係唔容易分辨到究竟係接緊飛刀，定係一個回調買入嘅機會。不過，我見過好多散戶會喺市弱嘅時候用回調買入法，就算好彩買到個低位，可能都要坐一頭半個月先回升，唔好彩嘅可能要等幾個月，不斷喺一個價格區間度盤整，悶都悶死🤮

正如我之前所講，我係一個趨勢投資者，冇趨勢嘅股票我點解要介入呢？跟住落嚟就真係今次重點，市弱嘅時候，我反而會用突破買入法，搵出有冇股票開始形成一個新嘅VCP 並準備突破，但要留意大市轉弱頭幾日會有好多假突破。另外要控制風險，其實係可以選擇用一個較細注碼去開倉，我叫呢種方法做試倉，因為可以提高自己對市場嘅觸覺，就算觸及止損都唔會嚴重影響整體組合表現。因為既然選擇喺市弱嘅時候開倉，咁即係對後市嘅睇法仍然樂觀，同一個時空有兩隻股票可以揀，一隻股票係行緊一個新嘅VCP，另一隻就回調緊，明顯地前者較為優勝，但散戶通常都係選擇後者，因為佢哋以為回調之後「抵買」。我哋要時時刻刻記住，展開新升浪嘅時候，新既領頭羊可能已經唔再係上一批強勢股。

坊間太多人過份着重VCP，其實VCP只係代表一個買入機會，並唔係話有VCP嘅股票我哋都要買入。正如我之前所講，選股就好似起樓建地基一樣，地基都未打好，好難做到持續地穩定地跑贏指數。極端啲講，如果選股好，10天線升穿20天線一樣可以作為一個買入方法，我亦都見過好多人唔用VCP都冇問題。

小米係一般散戶至愛，因為佢上年真係升得好靚，如果近排先用回調買入，結果會係點？呢刻冇人知，起碼一定要用時間去消化上方蟹貨，才有機會再展升浪，短則一頭半個月，長則三幾個月都唔定。另外一個例子就係中芯國際，如果仲揸住呢隻過氣領袖股，食驚風散都食足超過半年🥶

最後都係奉勸大家，市寬向下嘅時候都係盡量減少交易，明明12月至1月底期間可以乘風破浪，贏盡easy money，為乜要等到逆市嘅時候先嚟冒進？其實係好危險⚠️

2月我有幸成功做到炒股不炒市，參與幾隻逆市上升嘅股票。當中亦要依靠淨低落嚟嘅20%米Sir以外嘅嘢，裏面包含咗一啲資金流同埋盤路分析，同埋某一啲關鍵價位發生嘅新聞，如何影響股價嘅判斷及深入分析，我會統稱為「盤感」，但呢啲就真係好難三言兩語可以講到，都係要針對每個case去判斷。所以建議大家先順勢而為，有機會先再學習炒股不炒市。 (待續）

============

了解更多：股市漁夫系統 免費試用

股市漁夫是一套高績效的選股系統，系統運用技術分析配合統計學製作出不同指標顯示短、中、長線的港股表現；較一般指數更能反映真實市況，對分析後市走勢有絕對的優勢。股市漁夫選股系統透過精密的方程式去找出股票強弱勢頭，全天侯自動分析個股走勢、突破股、大市評論及視頻等功能。莊博士獨家的運算方程用 「破勢」、「止賺」把機會向用戶展示。漁夫選股系統更有不同種類之篩選股票準則來提高勝算。

 

莊志雄博士為股市漁夫創辦人及香港大學專業進修學院客席講師，並在Now 財經台合作主持《名家給力場》。
股市漁夫是香港財經媒體，而股市漁夫選股系統由莊志雄博士及成家博客Homeblogger團隊共同研發，2018年 11 月11日正式推出，此前莊志雄博士曾任職《信報》研究部主管，並先後於和記黃埔、AXA安盛、永泰地產有限公司、永道管理顧問有限公司（Coopers & Lybrand）等不同類型企業及上市集團擔任管理顧問、財務及市場分析工作，涉及範疇包括資產管理、地產、電訊及電子商貿等。