最近網上瘋傳有人因做Short Call而輸錢輸到破產。亦不時會有朋友收期權金點先收得安全？問，Short Put係咪又會輸大錢。今日呢篇文章，我想同大家講吓，呢兩種收時間值嘅策略風險究竟有幾高，同埋點樣先可以做得安全。
但首先，記住以下呢句說話：「有錢Short Put，有貨Short Call。」
呢兩種策略，要做得安全，根住做就可以。如果你有足夠嘅錢去接貨，你去做Short Put，風險就唔會高。Short Put 嘅所謂風險，就係萬一你做嗰隻股票嘅價格下跌，你就要喺低位接貨。假如你有足夠資金買貨，最多就係買咗啲股票返嚟坐。至於Short Call，就係如果你已有股票現貨，如果隻股票嘅股價上升，你就要喺高位沽出股票。但假如你本身係無持有呢隻股票，一旦被行使，你都要畀貨人。若然此時隻股票升到好高位，你喺無辦法嘅情況下都依然要追貨，然後再喺低位還貨畀人。差價愈大，虧損愈多。
而Short Call 係比Short Put 危險得多。
做Short Put，最多就係買入股票。而買股票，喺最極端嘅情況下，最多都只係total loss，即股價變零，你最多會損失100%嘅投資金額，即係買10萬蚊股票，最多就係輸10萬。
但若然你做Short Call，情況就唔同。理論上，一隻股票嘅升幅係可以無上限，佢可以升200%、300%，甚至更多。最近嘅例子，例如係AMC、GME，佢哋嘅股價又低位計都不知升咗幾多倍，做Short Call被挾，效果就近似沽空股票，股價愈升，損失愈大，沒有上限。而玩無風險上限嘅策略，有機會要不斷補倉，除了虧損，對投資者心理上嘅負擔都極大。用呢啲方法去玩，唔好有種諗法可以挨得到股價下跌而贏錢。
總結，大家要知道每種策略如何控制風險。做Short Put，你無足夠錢接貨，遇上股價大跌，就會好危險。做Short Call，你無貨，遇上股價大升，都係可以好危險。但只要有錢接貨先做Short Put，有貨畀人先做Short Call，咁做就會穩陣好多。
