【莫家強】每週初步測試 (20210111)

 

======附件=======

OP21-20210111

======附件=======

 

 

上星期五,同大家講咗點樣去做Long Call,原因係美股可能將會步入一個即將會大升,但升完就會「冧市」嘅階段。當然,呢個情況會否出現,無人可以講得埋。但假如真係出現,而你又用啱方法的話,係可以有機會賺到大錢之餘,再避埋股災。

 

今日,唔會太著意喺講邊隻股票可以買,因為特別係一啲中價股,好多都升,要揾一啲都唔難。反而,方法更重要。

 

  • 善用Long Call

 

Long Call 嘅好處有兩個,第一,有限風險,輸嘅只係你投放出去嘅錢,就算係方向估得再錯,都唔會輸多咗錢,唔會有手尾跟,係避股災嘅其中一個好重要策略。但若然股中方向,因為呢個策略有槓桿,會可以倍大回報,所以即使你唔係買好多錢,但只要個市大升,回報都會好勁。

 

但今次嘅升勢,除咗TSLA 之外,好多升得最勁嘅股票都係中價股,反而一啲嘅美股市值最大嘅科技巨企,暫時仍然係跟唔上升幅。所以,做Long Call,可能都係要借助ETF。

 

其中一隻,係ARKK,申報返我自己都有持有佢嘅期權倉位。用佢嚟做Long Call,唯一差啲嘅,係佢嘅引伸波幅稍高咗少少,其餘就無問題。

 

 

 

至於個股,ICE都係可以選擇,呢隻股一方面有升勢,另一方面引伸波幅又低,都係Long Call嘅選擇。

 

 

另外,市場上最備受關注嘅個股,大概應該係TSLA,但呢隻Clean Energy ETF (Ticker: ICLN)都升得好靚。

 

 

用升得最勁嘅ETF作選股名單去揀股,一向都係我其一個最鍾意用嘅方法。而呢個list,絕對可以用作畀大家揾強勢股票。

 

  • 順勢而行

呢一刻個市升成咁,已有貨在手,而啲貨又升得起嘅朋友,當然無問題。但如一直都無貨,的確要跟足方法,等股票下跌再企種先買,會有一定難度。喺呢啲情況下,收細注碼買強勢股,都係可以接受。但最重要嘅係順勢而行。

 

過去一兩年,你都會聽到好多人話美股已經升咗好多,再上升嘅空間有限,呢啲就係好典型嘅逆勢思維。如果你跟呢啲諗法,你一早就唔會投資喺美股,就唔會有今日嘅回報。而最大件事嘅係,今日叫你喺升嘅時候唔好買貨嘅人,可能會喺到時美股由最高位回落嘅時候叫你買貨,呢樣就係好多人輸股災嘅原因。

 

美股,實在有機會升完就股災。仲可以升多幾多,唔記到,但泡沫嘅意思就係要升到你唔信,若然你係用所謂嘅「估值」去計算泡沫,就完全係搭錯線。

 

泡沫市,係順勢投資者嘅朋友,升嘅時候繼續坐,高位回落就走人,非常夾。相反,泡沫市,係逆勢投資者嘅敵人,升嘅時候賺唔到,高位回落入貨,一到股災,肯定輸死。所以,大家記住一定要順勢。星期三再講。

使用諗Sir獨家按揭進階計算機,Powerteam成交實例請到:https://buyhouse.com.hk

wtsapp icon top